Жонли ХДТ: Ҳормуз бўғозида 1600 кема қолиб кетмоқда

Россия Эронга яширин ёрдам кўрсатиб, спутниклардан олинган тасвирлар ва кибер операцияларда қўллаб-қувватлаётгани ҳақида Украинанинг разведка хизматлари ҳужжатларига таяниб, Reuters агентлиги хабар берди.

Маълумотга кўра, март ойи охирида рус спутниклари Яқин Шарқдаги 11 мамлакатда камида 24 марта кузатув олиб бориб, 46 объектни, жумладан АҚШ ҳарбий базалари, аэропортлар ва нефть қонлари бор. Шундан кейин Эрон ракета ва дрон ҳужумларини кучайтиргани таъкидланган.

Аммо агентлик бу маълумотларни мустақил равишда тасдиқлай олмаганини билдирган.

Шунингдек, 2022 йилда Россия Украинага уруш бошлаганидан бери Москва–Теҳрон ҳарбий ҳамкорлиги кучайгани, дронлар ва разведка маълумотлари бўйича келишувлар мавжудлиги айтилган.

АҚШ расмийси эса ташқи кўмак Американинг Эрондаги операциялар самарасига таъсир қилмаганини айтган.

Россиянинг Ленинград вилояти 7 апрелда яна дронлар ҳужумига учради. Губернатор Александр Дрозденконинг айтишича, ҳаво мудофаа кучлари минтақа устидан 22 та дронни уриб туширган.

Украина мониторинг каналлари Уст-Луга портига ҳужум қилинганини ёзмоқда. Киев бунга ҳозирча изоҳ бермаган.

Украина дронлари март ойининг охиридан бери экспорт учун муҳим бўлган Уст-Луга портига фаол ҳужум қилиб келмоқда. Маълумотларга кўра, зарбалар натижасида учта нефть танкери, бир нечта ёқилғи резервуарлари, причаллар ва “Новатэк” компанияси инфратузилмасига зарар етган.

Bloomberg агентлиги аввалроқ Уст-Луга порти бир неча кунлик узилишлардан сўнг нефть юклашни қайта бошлаганини ёзган.

ASTRA телеграм-канали Воронеж вилоятининг Россош шаҳрида “Минудобрения” заводига ҳам ҳужум қилинганини, завод томига ўт кетган бўлиши мумкинлиги ҳақида маълум қилди.

Бир кун аввал Украина президенти Владимир Зеленский агар Россия Украинанинг нефть экспортига оид объектларига ҳужумларини бас қилса, Киев ҳам Москванинг энергетика инфратузилмасига зарбаларни тўхтатишга тайёр эканини айтган.

Россия Украинанинг нефть экспортига оид объектларига ҳужумларини бас қилса, Киев ҳам Москванинг энергетика инфратузилмасига зарбаларни тўхтатишга тайёр.

Украина президенти Владимир Зеленский 6 апрел куни кечки видеомурожаатида "энергетика сулҳи" таклифи АҚШ воситачилиги орқали Россия томонига етказилганини айтди.

"Агар Россия бизнинг энергетикамизга зарба беришни тўхтатишга тайёр бўлса, биз ҳам худди шундай жавоб беришга тайёрмиз" - деди у.

Зеленский Пасха муносабати билан таклиф этилган вақтинчалик тинчлик ҳали кучида эканини, аммо Россия унга жавоб бермаганини қўшимча қилди.

Шунингдек, Россия урушни нефть экспортидан тушаётган даромадлар ҳисобига давом эттиришини, Яқин Шарқдаги уруш туфайли нефть нархлари ошиши эса Москва имкониятларини кенгайтираётганини таъкидлади

Кремл тинчлик музокаралари “танаффус”да эканини, аммо тўхтамаганини билдирган, шунингдек, АҚШ билан мулоқот давом этаётганини айтган. Москва “энергетик сулҳ” бўйича изоҳ бермаган.

6 апрелга ўтар кечаси Украина дронлари Новороссийскдаги “Шесхарис” нефть терминалига зарба берган. Март ойида эса Украина бир неча бор Россиянинг Болтиқбўйи портларини нишонга олган.

АҚШ президенти Доналд Трамп душанба куни Вашингтонда журналистлар билан мулоқот чоғида 7 апрелни Эроннинг АҚШ таклифларини қабул қилиб, тинчлик келишувига эришиши учун белгиланган сўнгги муддат сифатида атади.

У Эрон томонининг сўнгги таклифларини “жиддий”, аммо АҚШнинг бу давлатга қарши кампаниясини тўхтатиш учун “етарли эмас”, деб баҳолади. BBC хабар беришича, душанба куни Теҳрон Покистон орқали етказилган Вашингтон таклифини рад этган ва урушнинг тўлиқ ва якуний тўхтатилиши тарафдори эканини таъкидлаган.

Аввалроқ Трамп Эронни 48 соат ичида келишувга рози бўлишга ёки камида Ҳурмуз бўғозини кемалар ҳаракати учун очишга чақирган эди. Кейин у ультиматум муддатини Вашингтон вақти билан 7 апрел соат 20:00 гача (Тошкент вақти билан 8 апрел соат 5:00) узайтирган. Талаблар бажарилмаган тақдирда, Эроннинг электр станциялари ва бошқа энергетика объектларига кучли зарбалар берилиши мумкинлигини билдирган.

Оқ уйдаги матбуот анжуманида “Фуқаролик инфратузилмасига зарбалар ҳарбий жиноят ҳисобланадими?” - деган саволга жавобан Трамп Эрон ҳукумати сўнгги ойларда 45 минг намойишчини ўлдирганини иддао қилди ва “уларни тўхтатиш керак” деди (Ҳуқуқ ҳимоячилари минглаб қурбонлар ҳақида хабар бермоқда, айрим маълумотларга кўра, улар сони 10 мингдан ошган. Эрон расмийлари эса бир неча минг киши ҳалок бўлганини тан олган, бу ҳолат зўравон тўқнашувлар пайтида юз берганини ва куч ишлатар тузилмалар ходимлари ҳам қурбон бўлганини билдирган).

Трампнинг таъкидлашича, агар Эрон келишувга рози бўлса, уруш “жуда тез” тугайди. Теҳрон эса АҚШ талабларини рад этишда давом этмоқда.

Трампнинг баёнотларига жавобан Эрон парламенти раиси Муҳаммад Боқир Қолибоф АҚШни "хавфли ўйин"ни тўхтатишга чақирди. У Вашингтонни "масъулиятсиз қадамлар" қўяётганликда айблаб, бу ҳолат "бутун минтақани олов ичига ташлаши мумкин"лигидан огоҳлантирди.

6 апрел куни Покистон АҚШ ва Эронга ўзининг тинчлик режасини тақдим этгани ҳақида Reuters манбаларга таяниб хабар қилди. Унга кўра, Исломобод зудлик билан ўт очишни тўхтатиш ва 15–20 кун ичида кенгроқ келишувни муҳокама қилишни таклиф этган. Якуний музокараларни Исломободда ўтказиш режалаштирилган. Битим Эроннинг ядровий қурол ишлаб чиқмаслик мажбурияти эвазига санкцияларни бекор қилиш ва музлатилган активларни очишни назарда тутади.

Эроннинг IRNA агентлиги Теҳрон Покистон орқали АҚШга 10 банддан иборат таклиф юборганини маълум қилди. Унда Эрон ўт очишни тўхтатишни рад этиб, узоқ муддатли тинчлик келишуви зарурлигини таъкидлаган, шунингдек санкцияларни бекор қилиш ва Ҳурмуз бўғозида хавфсиз транзит бўйича протокол ишлаб чиқишни таклиф этган.

CNN маълумотига кўра, Трамп мазкур лойиҳани қўллаб-қувватламаган, аммо Оқ уй бу “ғоялардан бири” эканини билдирган. Axios эса томонлар 45 кунлик ўт очишни тўхтатиш вариантини муҳокама қилаётганини ёзган. Нашр манбаларига кўра, яқин 48 соат ичида келишув эҳтимоли паст, бироқ бу кескинлашувнинг олдини олиш учун сўнгги уриниш сифатида баҳоланмоқда.

28 февралдан бери АҚШ ва Исроил Эрон ҳудудига зарбалар бермоқда. Трамп ҳарбий операциянинг асосий мақсади Эроннинг ядровий қуролга эга бўлишининг олдини олиш эканини таъкидлаган. Жанглар бошланганидан сўнг Эрон жаҳон энергия бозори учун стратегик аҳамиятга эга бўлган Ҳурмуз бўғозини амалда ёпган.