Паҳлавий: Халқ томонига ўтинг!
Эрон мухолифатининг етакчиларидан бири — АҚШда яшайдиган собиқ Эрон шоҳи ўғли Реза Паҳлавий эронлик куч тузилмаларини «халқ томонига ўтишга» чақирди:
"Эндиликда Ислом Республикаси қулаб бораётган бир пайтда, мамлакат ҳарбийлари, полицияси ва хавфсизлик кучларига мурожаатим аниқ: сизлар Эрон ва эрон халқини ҳимоя қилишга қасам ичгансизлар, Ислом Республикаси ва унинг етакчиларини эмас. Сизнинг бурчингиз — халқни ҳимоя қилиш, юртимизни зўравонлик ва жиноятлар орқали гаровга олган режимни қўллаб-қувватлаш эмас. Халқ томонига ўтинг ва барқарор ҳамда хавфсиз ўтиш жараёнини амалга оширишга ёрдам беринг", деди Реза Паҳлавий.
NetBlocks лойиҳаси маълумотига кўра, Эронда интернет деярли тўлиқ ўчирилган — мамлакатда интернет фаоллиги одатий кўрсаткичнинг атиги 4 фоизини ташкил этмоқда.
Матбуот: камида 7 та ракета президент қароргоҳига тушди
Эроннинг «Тасним» давлат ахборот агентлиги хабарига кўра, камида етти ракета президент қароргоҳи ва Эрон олий раҳбари Оятуллоҳ Али Ҳоманаий резиденцияси жойлашган ҳудудга тушган.
Эрон раҳбарияти манбалари Reuters агентлигига Оятуллоҳ Али Ҳоманаий тирик ва Теҳрон ташқарисидаги хавфсиз жойда эканини айтган. Эрон ОАВлари Исфаҳон, Қум, Табриз ва Луристон ҳудудларида ҳам портлашлар бўлганини ёзмоқда.
The New York Times нашрининг Исроил хавфсизлик тузилмаларидаги манбаларига кўра, зарбаларнинг асосий нишонларидан бири Ислом Республикаси раҳбарлари ҳисобланади. Режага кўра, ушбу ҳужумларда қатор юқори лавозимли эронлик амалдорлар йўқ қилиниши керак бўлган.
Халқаро муносабатлар
Бельгия: Ташқи ишлар вазири Максим Прево шундай деди: «Эрон халқи ўз ҳукуматининг танловлари учун жазо тўламаслиги керак. Дипломатик саъй-ҳаракатлар аввалроқ музокара йўли билан ечимга олиб кела олмаганидан чуқур афсусдамиз».
Норвегия: Ташқи ишлар вазири Эспен Барс Эйде шундай деди: «Исроил бу ҳужумни олдиндан зарба сифатида таърифламоқда, аммо бу халқаро ҳуқуққа мос эмас. Олдиндан қилинган ҳужумлар учун дарҳол ва яқин таҳдид мавжуд бўлиши талаб этилади».
Покистон: Ташқи ишлар вазири Исхак Дар «Эронга қарши асоссиз ҳужумларни кескин қоралаб, инқирозни тинч, музокара йўли билан ҳал қилиш учун дипломатияни зудлик билан қайта тиклаш орқали кескинлашувни дарҳол тўхтатишга чақирди».
Индонезия: Индонезия Ташқи ишлар вазирлигининг маълум қилишича, Президент Вашингтон ва Теҳрон ўртасида воситачилик қилишга тайёр:
«Индонезия АҚШ ва Эрон ўртасидаги музокаралар муваффақиятсиз тугаганидан, бу эса Яқин Шарқда ҳарбий кескинлашувга олиб келганидан чуқур афсусда. Индонезия барча томонларни вазминликка чақириб, мулоқот ва дипломатияни устувор деб билишга даъват этади».
«Индонезия Ҳукумати, хусусан Индонезия Республикаси Президенти, хавфсизлик бўйича барқарор шароитни қайта тиклаш мақсадида мулоқотни ташкил этишга тайёрлигини билдиради. Агар ҳар икки томон рози бўлса, Индонезия Президенти воситачилик олиб бориш учун Теҳронга боришга ҳам тайёр».
Шунингдек, баёнотда кескинлик минтақа ҳамда «жаҳон тинчлиги ва хавфсизлиги»га путур етказиши мумкинлиги таъкидланган.
Ароқчи: Эронда режим алмаштириш - "амалга ошмайдиган вазифа"
Эрон ташқи ишлар вазири Аббос Ароқчий, Трампнинг Эронда режимни ўзгартириш мақсади "амалга ошмайдиган вазифа" эканини айтди.
Унга кўра, Эрон Яқин Шарқ минтақасидаги АҚШ ҳарбий иншоотларига зарба бермоқда, "ўз юртидаги америкаликларга эмас". Шу билан бирга, у мамлакати кескинликни камайтиришдан манфаатдор эканини ва АҚШ–Исроил зарбалари тўхтагач, музокараларга тайёрлигини қўшимча қилди.
"Ҳозирча ҳеч қандай алоқа йўқ", деди у NBC News телеканалига берган интервьюсида.
"Аммо агар америкаликлар биз билан гаплашмоқчи бўлса, мен билан қандай боғланишни билишади. Биз, албатта, кескинликни камайтиришдан манфаатдормиз… Бу - Қўшма Штатлар танлаган уруш, ва улар бунинг учун жавоб бериши керак. Лекин биз томондан олиб қаралса, биз урушни истамаймиз".
Унинг таъкидлашича, АҚШ кучлари эронликларга ҳужум қилмоқда, аммо Эрон минтақадаги Америка базалари, ҳарбий базалар ҳамда ҳарбий иншоот ва объектлар зарба бермоқда.
"Бу тажовузни бошлаган биз эмасмиз", дея таъкидлади Ароқчи.
Трампнинг Эронда режим алмаштириш ҳақидаги ёзиб олинган нутқидаги баёноти ҳақида сўралганда, Ароқчи, миллионлаб одам “режим” деб аталадиган ҳукуматни қўллаб-қувватлаб турган бир пайтда режимни ўзгартириб бўлмайди, деди.