Линклар

Шошилинч хабар
19 июл 2024, Тошкент вақти: 08:32

Ўзбекистон хабарлари

AAB россияликлар учун валюта операциялари тўхтатилганини рад этди

Иллюстратив сурат
Иллюстратив сурат

Ўзбекистондаги Asia Alliance Bank Россия резидентлари билан боғлиқ валюта операциялари тўхтатилгани ҳақида 13 июнь куни ёйинланган баёноти юзасидан раддия берди.

Аввалроқ мазкур банкнинг телеграм-каналида “АҚШ санкциялари пакети янгилангани муносабати билан Россия резидентлари билан боғлиқ валюта операцияларининг барчаси тўхтатилди” қабилидаги баёнот пайдо бўлган эди.

Мазкур пост кўп ўтмай телеграм-каналдан ўчириб ташланган, банк мутасаддилари эса бу хабар каналда "техник носозликларга кўра" ёйинлаганини қайд этишган.

"Банк мижозларнинг Россия Федерацияси резидентлари билан боғлиқ операцияларига қонун ҳужжатларида белгиланган тартибда хизмат кўрсатишни давом эттирмоқда", дейилган банкнинг галдаги хабарномасида мижозлардан "келтирилган ноқулайликлар учун узр" сўралган.

Эслатиб ўтамиз, 12 июнь куни АҚШ Украинада босқинчилик уруши олиб бораётган Россияга қарши санкция тартибини кучайтирган, янги чекловлар ортидан Россия биржасида доллар ва еврога савдо тўхтаб қолган эди.

АҚШ Молия вазирлигининг санкция рўйхатига Россия ва бошқа мамлакатларда фаолият юритувчи жами 300 дан зиёд юридик ва жисмоний шахс киритилган. Мазкур рўйхатда Ўзбекистон компаниялари йўқ, лекин ўзбек ширкатлари санкция остидаги Россия ташкилотлари ва фуқаролари билан чекловсиз алоқаларни давом эттираверган тақдирда, иккиламчи санкцияларга нишон бўлиши эҳтимолдан ҳоли эмас.

Кун янгиликлари

Ўзбекистон билан Қирғизистон ўртасида 15 дан зиёд ҳужжат имзоланди

Қирғизистон президенти Садир Жапаровнинг Ўзбекистонга икки кунлик ташрифи доирасида 16 та икки томонлама ҳужжат имзоланган.

Президент матбуот хизмати маълумотига мувофиқ, икки давлат президентларининг музокаралари якунида даставвал Шавкат Мирзиёев билан Садир Жапаров Кенг қамровли стратегик шериклик муносабатларини янада чуқурлаштириш ва кенгайтириш тўғрисидаги қўшма баёнотга қўл қўйишган.

Шундан сўнг мезбон ва меҳмон президентлар ҳузурида Қирғизистоннинг Иссиқкўл вилояти ҳудудида жойлашган курорт-ҳордиқ хўжалиги объектлари бўйича ҳукуматлараро битим, Фуқароларнинг ўзаро келиб-кетишлари тўғрисидаги ҳукуматлараро битимга ўзгартиришлар киритиш тўғрисида баённома, Ўзбекистоннинг ЖСТга аъзо бўлиши бўйича икки томонлама музокараларни якунлаш тўғрисида баённома, Қурилиш фаолияти соҳасидаги ҳамкорлик тўғрисида баённома, Меҳнат, аҳоли бандлиги ва миграция соҳасидаги ҳамкорлик тўғрисида баённома, Маданият ва санъат соҳасидаги ҳамкорлик тўғрисида баённома, Давлат хизмати соҳасидаги ҳамкорлик тўғрисида баённома, 2024-2030 йилларда ўзаро савдо ҳажмини ошириш бўйича чора-тадбирлар режаси, 2024-2026 йилларда жисмоний тарбия ва спорт соҳасидаги ҳамкорликни ривожлантириш бўйича амалий чора-тадбирлар режаси, 2024-2026 йилларда қишлоқ хўжалиги ва озиқ-овқат таъминоти соҳасидаги ҳамкорликни янада ривожлантириш бўйича "йўл харитаси", Ўзбекистон президенти ҳузуридаги Стратегик ва минтақалараро тадқиқотлар институти ҳамда Қирғизистон президенти ҳузуридаги Стратегик ташаббуслар миллий институти ўртасидаги меморандум ва бошқа ҳужжатлар имзоланган.

Қирғизистон президенти Садир Жапаров давлат ташрифини амалга ошириш учун Ўзбекистонга 18 июль куни эрталаб рафиқаси Айгул Жапарова билан биргаликда учиб келган. Меҳмонларни Тошкент халқаро аэропортида президент Шавкат Мирзиёев ва унинг рафиқаси Зироат Мирзиёева кутиб олишган.

Кўксарой қароргоҳида ўтказилган тантанали кутиб олиш маросими ортидан аввалига икки президентнинг тор доирадаги учрашуви бўлиб ўтган. Унда, жумладан, икки давлат ўртасида парламентлар, ҳукуматлар, ташқи сиёсат ва тармоқ идоралари даражасидаги мулоқотлар натижадорлигини ошириш, халқаро ва минтақавий майдонлар, жумладан, Бирлашган Миллатлар Ташкилоти, Жаҳон савдо ташкилоти, минтақа давлатлари раҳбарларининг маслаҳат учрашувлари, “Марказий Осиё плюс” форматлари доирасида ўзаро қўллаб-қувватлашни давом эттириш зарурлиги таъкидланган, ўзаро товар айирбошлаш ҳажмини яқин йилларда 2 миллиард долларга етказиш, қишлоқ ва сув хўжалиги, экология, хавфсизлик ва бошқа соҳаларда ўзаро манфаатли ҳамкорликни ривожлантириш, стратегик аҳамиятга эга минтақавий лойиҳаларни, жумладан, “Хитой - Қирғизистон - Ўзбекистон” темир йўли ва Қамбарота ГЭС-1 қурилишини тез фурсатда амалга ошириш масалалари муҳокама қилинган.

Икки мамлакат расмий делегациялари иштирокида кенгайтирилган таркибда ўтказилган музокараларда эса, президент матбуот хизмати қайдича, савдо, саноат кооперацияси, энергетика, транспорт, қишлоқ ва сув хўжалиги, хавфсизлик, маданият ва бошқа муҳим йўналишлардаги ҳамкорлик натижалари танқидий таҳлил қилинган. Музокаралар чоғида томонлар парламентлар, ҳукуматлар, вазирликлар, идоралар ва ҳудудлар, ишбилармонлар, экспертлар ва жамоатчилик даражасида фаол алоқаларни давом эттиришга келишиб олишган. Шунингдек, Давлатлараро кенгаш тузишга қарор қилинган.

Йиғилишда бош вазирлар ўринбосарларининг ҳисоботлари ва савдо-иқтисодий ҳамкорлик юзасидан аниқ таклифлари тингланган, музокаралар якунида эса президентлар қўшма “йўл харитаси”ни тайёрлаш ва эришилган келишувларни самарали амалга ошириш механизмларини йўлга қўйиш бўйича топшириқ беришган.

Икки томонлама музокаралардан сўнг Мирзиёев ва Жапаров видеоалоқа форматида йирик кооперация лойиҳаларини ишга тушириш маросимида иштирок этишган. Жумладан, президентлар Фарғона ва Наманган вилоятларида умумий қуввати 400 мегаватт бўлган иккита қуёш электр станцияси қурилишига старт беришган. Мазкур станцияларда ишлаб чиқариладиган электр энергияси Қирғизистонга етказиб берилиши кўзда тутилган. Шунингдек, Қирғизистоннинг Чуй вилоятида “Кобальт”, “Оникс” ва “Трекер” русумли енгил ҳамда юк автомобиллари йиғиладиган заводни ишга туширишган. Президентлар Қирғизистон Қораболта шаҳрида жойлашган тикув-трикотаж маҳсулотлари ва мато ишлаб чиқарадиган фабрикани ҳам онлайн тарзда очиб беришган.

Қирғизистон президентининг Ўзбекистонга давлат ташрифига оид тадбирлар 19 июль куни ҳам давом этади.

Мирзиёев Эроннинг янги президенти билан мулоқот қилди

Эроннинг янги президенти Масъуд Пезешкиён
Эроннинг янги президенти Масъуд Пезешкиён

Ўзбекистон президенти Шавкат Мирзиёев 17 июль куни Эроннинг янги сайланган президенти Масъуд Пезешкиён билан телефон орқали мулоқот қилган.

Президент матбуот хизмати маълумотига кўра, мулоқот аввалида Мирзиёев Пезешкиённи Эронда ўтказилган президент сайловидаги ғалабаси билан қутлаган.

Шундан сўнг икки президент Ўзбекистон-Эрон муносабатларини янада ривожлантириш, савдо, инвестиция ва транспорт соҳаларидаги амалий ҳамкорликни кенгайтириш масалалари муҳокама қилишган.

Мулоқот чоғида энергетика, кимё саноати, қишлоқ хўжалиги, озиқ-овқат ва бошқа тармоқларда кооперация лойиҳаларини илгари суриш муҳимлиги қайд этилган.

Хабарномада суҳбат чоғида Мирзиёев ва Пезешкиён минтақавий кун тартибидаги долзарб масалаларга ҳам тўхталишгани қўшимча қилинган.

Аввалроқ Озодлик Эронда 5 июль куни бўлиб ўтган президент сайловининг иккинчи босқичида ислоҳотчи номзод Масъуд Пезешкиён ғалаба қозонгани ҳақида хабар қилган эди.

Эронда президент давлат раҳбари бўлиб ҳисобланмайди, у айниқса ташқи сиёсатда анчагина чекланган ваколат эгаси бўлмиш ижроия ҳокимияти раҳбаридир. Шунга қарамай, президент дунёнинг турли мамлакатлари билан алоқалар оҳангига ўз таъсирини кўрсатиш имконига эга.

Ботир Зокиров қурилиш вазири лавозимидан кетди

Қурилиш ва уй-жой коммунал хўжалиги вазири Ботир Зокиров лавозимидан бўшатилди. Бу ҳақда 17 июль куни президент раислигида Тошкентда ўтказилган видеоселектор йиғилишида билдирилган.

Йиғилишда қайд этилишича, Ботир Зокиров ўз лавозимидан “соғлиги туфайли” озод этилган, унинг ўрнига эса вазирнинг биринчи ўринбосари Шерзод Ҳидоятов вазир вазифасини бажарувчи этиб тайинланган.

Ҳидоятов биринчи ўринбосар лавозимига тайинланган 2019 йилнинг сентябрига қадар Tashkent City Халқаро ишбилармонлик маркази қурилиши дирекциясини бошқарган, ундан аввал эса Тошкент шаҳрининг собиқ ҳокими Жаҳонгир Ортиқхўжаевга тегишли Akfa ширкатлар гуруҳида қурилиш бўйича директор вазифасида ишлаган.

Шу ой охирида 61 ёшга тўладиган Ботир Зокиров 2019 йилнинг сентябридан буён қурилиш вазири лавозимида ишлаб келаётган эди. Ишдан бўшатилган мулозимга бошқа бирор лавозим бериладими ёки у соғлиғини тиклаш билан машғул бўладими – ҳозирча маълум эмас.

Аввалроқ маҳаллий матбуотда қурилиш вазири Ботир Зокировга алоқадор “Трест-12” ширкатига миллионлаб долларлик қурилиш лойиҳалари бир неча марта тендерсиз берилгани ҳақида хабарлар чиққан эди.

Россия армияси сафида жанг қилишга шайланган яна бир ўзбекистонлик жазоланди

Иллюстратив сурат
Иллюстратив сурат

Қорақалпоғистоннинг Амударё туман суди Россия армиясида хизмат қилиш учун шартнома имзолаган, бироқ жанговар тайёргарликни тамомлагач, ҳарбий лагердан қочиб, Ўзбекистонга қайтган фуқаронинг озодлигини 3 йилга чеклаш ҳақида ҳукм чиқарган.

Газета.uz нашри қайдича, суд ҳукми 24 июнь кунида чиққан бўлишига қарамай, бу ҳақда жамоатчиликка эндигина маълум бўлган.

Маълумотларга кўра, 23 ёшли йигит 2023 йил декабрь ойида Россияга ишлаш учун кетган. У Москвада турли қурилиш майдонларида ишлаган, кейин тунги клубда буфетчи бўлган, бироқ маоши оила харажатларига етмаган.

Жорий йилнинг 5 февраль куни у Россия армиясида хизмат қилиш учун шартнома имзолашга қарор қилган. Шартномага мувофиқ, у Украина урушида қатнашгани учун бир марталик 195 минг рубль (тахминан 27,9 миллион сўм), сўнгра ВТБ банк картасига ойига 240 минг рублдан (34,3 миллион сўм) олиши керак бўлган.

У 24 нафар россиялик, ўзбекистонлик ва тожикистонлик билан биргаликда Москва вилоятидаги “Авангард” ҳарбий лагерида махсус жанговар тайёргарликдан ўтиб, оддий аскар ва ўқчи лавозимини эгаллаган. Бироқ йигит Украина урушида оёғидан жароҳат олган зобит ҳикоясини эшитиб, қўрқиб кетган ва отаси касал эканини айтиб, қисқа муддатга хизматдан бўшатишни сўраган. Шундан сўнг у Ўзбекистоннинг Москвадаги дипломатлари ёрдамида Ўзбекистонга қочиб кетган.

Суд йигитнинг қарамоғида вояга етмаган фарзанди борлиги, муқаддам судланмагани ва жанговар ҳаракатларда қатнашмаганини ҳисобга олиб, унга 3 йил муддатга озодликни чеклаш жазосини тайинлаган. Ҳукмга мувофиқ, унинг кечки соат 21:00 дан эрталабки 06:00 гача уйидан чиқиш тақиқланган.

Бу Украина урушида қатнашиш учун Россия армияси билан шартнома имзолаган шахснинг Ўзбекистон суди томонидан жазога тортилиши бўйича иккинчи ҳолатдир. Аввалроқ Озодлик Россиянинг “Вагнер” хусусий ҳарбий ширкати сафида ярим йил мобайнида Украинада жанг қилган Шавкат Йўлдошевга нисбатан Оҳангарон туман суди томонидан 2 йилу 6 ой муддатга ахлоқ тузатиш ишлари жазоси тайинлангани ҳақида хабар қилган эди.

Жапаров икки кунлик ташриф билан Ўзбекистонда бўлади

Ўзбекистон президенти Шавкат Мирзиёев қирғизистонлик ҳамкасби Садир Жапаров билан (архив сурати)
Ўзбекистон президенти Шавкат Мирзиёев қирғизистонлик ҳамкасби Садир Жапаров билан (архив сурати)

Қирғизистон президенти Садир Жапаров 18-19 июль кунлари Ўзбекистонга давлат ташрифини амалга оширади. Бу ҳақда Қирғизистон президенти маъмурияти ташқи сиёсат бўлими мудири Муратбек Азимбакиев маълум қилди.

Ташриф доирасида Садир Жапаров Ўзбекистон президенти Шавкат Мирзиёев билан икки томонлама музокараларни олиб боради. Томонлар ўзаро манфаатли бўлган барча йўналишлар бўйича икки томонлама ҳамкорликнинг долзарб масалаларини ҳамда қирғиз-ўзбек алоқаларини ривожлантириш истиқболларини муҳокама қилишади”, дея билдирган қирғиз мулозими.

Азимбакиев президент Жапаров Тошкентда Ўзбекистондаги Қирғизистон маданияти кунларини расмий очилиш маросимида, шунингдек, мезбон президент билан биргаликда икки томонлама лойиҳаларнинг онлайн очилиш маросимида иштирок этишини маълум қилган.

Бундан ташқари, Садир Жапаровнинг ташрифи чоғида Ўзбекистон-Қирғизистон бизнес-форуми ва икки давлат олий таълим муассасалари ректорларининг форуми бўлиб ўтиши кутилмоқда.

Қирғизистон президенти Ўзбекистонга сўнгги марта ўтган йилнинг ноябрь ойида сафар қилган эди.

Ўзбекистонда 10 та туман ва шаҳар ҳокими ишдан олинди

Ўзбекистон президенти Шавкат Мирзиёев Тошкентдаги видеоселектор йиғилишида, 2024 йил 17 июли (president.uz фотоси)
Ўзбекистон президенти Шавкат Мирзиёев Тошкентдаги видеоселектор йиғилишида, 2024 йил 17 июли (president.uz фотоси)

Ўзбекистонда фаолиятида тизимли камчиликларга йўл қўйган 10 та туман ва шаҳар ҳокими ишдан олинган. Бу ҳақда президент матбуот хизмати маълумот тарқатди.

Қораўзак, Тахиатош, Учқудуқ, Тошкент, Фурқат, Гурлан, Мирзаобод, Янгиариқ, Мингбулоқ туманлари ва Ғозғон шаҳри ҳокимларини ишдан олингани президент Шавкат Мирзиёев раислигида 17 июль куни ҳудудлар ва тармоқларда иқтисодий ўсиш суръатларини таъминлаш бўйича биринчи ярим йиллик таҳлили ва йил якунига қадар устувор вазифалар юзасидан видеоселектор йиғилиши чоғида эълон қилинган.

Йиғилишда бош вазир Абдулла Арипов таклифига кўра ишида тизимли нуқсонлар кузатилган 28 та туман-шаҳар ҳокимига нисбатан интизомий жазо чораларини кўрилиши ҳам очиқланган.

Парламент қуйи палатасига сайлов октябрь ойида ўтиши кутилмоқда

Иллюстратив сурат
Иллюстратив сурат

Мустақил Давлатлар Ҳамдўстлиги Парламентлараро ассамблеяси халқаро кузатувчилари жорий йилнинг октябрь ойида Ўзбекистон Олий Мажлиси Қонунчилик палатаси ва маҳаллий кенгашларга бўлиб ўтадиган сайловларни кузатишга таклиф қилинди. Бу ҳақда Олий Мажлис Сенати ахборот хизмати маълумот тарқатди.

Қайд этилишича, мазкур таклиф Сенат раиси Танзила Норбаева бошчилигидаги Ўзбекистон парламенти делегацияси томонидан ўтган ҳафта Россиянинг Санкт-Петербург шаҳрида бўлиб ўтган МДҲ ПА Кенгашининг йиғилишида очиқланган.

Ўзбекистонда келаётган кузда парламент ва маҳаллий кенгашларга сайлов ўтказилиши шу кунгача на Марказий сайлов комиссияси, на-да бошқа бир ваколатли идора томонидан расман тасдиқланган эмас.

Сайлов қонунчилигига киритилган сўнгги ўзгартишлар эътиборга олинса, сайлов 2024 йилнинг октябрь ойи учинчи ўн кунлиги биринчи якшанбасида бўлиб ўтиши керак.

Президент Шавкат Мирзиёев ўтган йил 6 мартида сиёсий партиялар ролини ошириш учун - мажоритар ва пропорционал сайлов тизимига ўтишни таклиф қилган.

Ушбу таклиф асосида 2023 йилнинг 18 декабрь куни “Ўзбекистон Республикасининг айрим қонун ҳужжатларига сайлов ва референдум ўтказиш тартибини янада такомиллаштиришга қаратилган ўзгартириш ва қўшимчалар киритиш тўғрисида”ги қонун қабул қилинган.

Ҳужжатга мувофиқ, бундан буён парламентдаги 150 ўриннинг ярми - пропорционал шаклда - партиявий рўйхатлар билан, ярми - мажоритар тизимда - номзодларга овоз бериш йўли билан тақсимланиши лозим.

Бундан ташқари, янги қонунчиликка кўра, Ўзбекистонда парламент ўзини ўзи тарқатиб юбориш ваколатига ҳам эга бўлган. Бу янгилик жамоатчилик орасида галдаги парламент сайлови жорий йилнинг “ё баҳор, ё куз”ида бўлиб ўтишига оид тахминлар урчишига сабаб бўлган, бироқ муддатидан илгари сайловларга оид тахминлар ҳам ўз тасдиғини топган эмас.

Тахминлар орасида тасдиқланиш эҳтимоли энг юқори бўлгани – бу галги сайловларда ҳам мухолифат вакилларининг сайловга қўйилмаслиги бўлиб турибди. Ўзбекистон қонунчилигига мувофиқ, парламент ва маҳаллий сайловларда фақат мамлакатда расмий рўйхатдан ўтган партияларгина иштирок этиши мумкин. Айни пайтда мамлакат бешта сиёсий партия рўйхатга олинган бўлиб, булар Ўзбекистон Халқ демократик партияси (ХДП), ЎзЛиДеП, “Миллий тикланиш”, “Адолат” ва Экологик партиялардир.

Ўзбекистонда ўтган асрнинг 90-йиллари бошида рўйхатга олинган “Бирлик” ва “Эрк” партияларини ўзбек расмийлари амалдаги партия ўлароқ тан олмай келишади. Лидерлари хорижда бўлган бу икки партия вакилларининг Ўзбекистон Адлия вазирлигида қайта рўйхатдан ўтишга ҳаракатлари ҳатто президент Шавкат Мирзиёев даврида ҳам ижобий натижа берган эмас. Шунингдек, профессор Хидирназар Аллақулов бошчилигидаги фаоллар томонидан янги бир партия тузиш бўйича 2021 йилдан буён амалга оширилган бир неча уриниш ҳам муваффақиятсиз якунланган.

Селдан жабр кўрган Ўшга Ўзбекистондан ёрдам етказилди

Ўзбекистондан йўлланган ва "Дўстлик" чегара масканидан ўтиб кетаётган гуманитар юкли автомашиналар (Андижон вилоят ҳокимлиги матбуот хизмати фотоси)
Ўзбекистондан йўлланган ва "Дўстлик" чегара масканидан ўтиб кетаётган гуманитар юкли автомашиналар (Андижон вилоят ҳокимлиги матбуот хизмати фотоси)

Ўзбекистон расмийлари 16 июль куни селдан зарар кўрган Қирғизистоннинг Ўш шаҳрига инсонпарварлик ёрдами йўллашган.

Андижон вилояти ҳокимлиги ахборот хизмати маълумотига кўра, юклар вилоят ҳокими Шуҳрат Абдураҳмонов бошчилигидаги делегация ҳамроҳлигида икки давлат ўртасидаги “Дўстлик” чегара-божхона масканидан олиб ўтилган.

Маълумотларга кўра, 13 та юк машинасига ортилган 200 тоннали гуманитар ёрдам ичига кийим-кечак, озиқ-овқат маҳсулотлари, хўжалик ва қурилиш моллари ҳамда бошқа ашёлар киради.

Аввалроқ Озодлик 14 июль куни Ўшда кузатилган сел тошқини бир неча кишини оқизиб кетгани, табиий офат қурбонларидан тўрт нафарининг (она ва унинг уч қизи) жасади Оқбура ва Шаҳрихонсойдан топилгани, тошқин туфайли юздан зиёд уй сув остида қолгани, 15 чоғли машина оқиб кетгани ҳақида хабар қилган эди.

Ўзбекистон аввалроқ Қирғизистоннинг селдан зарар кўрган Новқат туманига ҳам 95 тоннали гуманитар ёрдам юкини йўллаган эди.

Ўзбекистонда тожикча ёзадиган журналист айирмачиликда гумонланмоқда

Салим Иномзода
Салим Иномзода

Ўзбекистонда 58 ёшли журналист Салим Иномзода “жамоат хавфсизлигига таҳдид солувчи материаллар” тарқатганликка оид иш бўйича қўлга олинди. Бу ҳақда Озодлик радиосининг тожик хизмати уч манбадан олинган маълумотга таянган ҳолда хабар қилди.

Салим Иномзода “Овози Тожик” газетасида ишлаган. Шунингдек, у Facebook тармоғида 15 мингга яқин обуначига эга “Ўзбекистон тожиклари” гуруҳини тузган. Гуруҳда Ўзбекистон тожиклари маданияти ва тожик-ўзбек маданий алоқаларига оид материаллар эълон қилиб келинган.

Иддаога кўра, Иномзода 2022 йил октябрь ойида ижтимоий тармоқлардаги ўз саҳифаларида тожикистонлик қўшиқчи Афзалшў Шодиевнинг “Самарқанд ва Бухоро”га оид “диний характерга ва айирмачилик унсурларига эга” қўшиғини кўчириб босган. Унда, хусусан, Самарқанднинг тожиклар ва форслар ватани экани айтилади.

Озодликнинг тожик хизмати қайдича, қўшиқ 2013 йилда – Тожикистон ва Ўзбекистон ўртасидаги муносабатлар таранг бўлган ва мамлакатлар ўртасида виза тартиби амал қилган пайтда ёзилган.

Нашр суҳбатдошларидан бири куч ишлатар тузилмалар ходимлари “Ўзбекистон тожиклари” гуруҳи маъмурларини ҳам сўроққа чақиришганини маълум қилган.

Тошкентда ҳиндистонлик фуқаро ўз жонига қасд қилди

Тошкентнинг Яккасарой туманида 61 ёшни қоралаган ҳиндистонлик фуқаро хусусий фирма ҳудудида ўзини ўлдирган. Бу ҳақда маҳаллий нашрлар Ўзбекистон Бош прокуратураси матбуот хизматидан олинган маълумотга таянган ҳолда хабар қилишмоқда.

Қайд этилишича, ҳиндистонлик Ш. С. ўлими олдидан инглиз ва рус тилларида қолдирган хатида молиявий қийинчиликларга дуч келганини, ҳеч кимга эътирози йўқлигини ёзиб қолдирган. Шунингдек, Ш. С. ўз васиятида жасадини Ҳиндистонга етказишни сўраган.

Ҳиндистонлик шахс 12 июль куни туш вақтида ўзи ишлаган фирма ҳудудидаги ваннахонада томирларини кесиб, ўз жонига қасд қилгани айтилмоқда. Маълумотларга кўра, айни пайтда ҳолат юзасидан Яккасарой туман прокуратураси терговга қадар текширув ҳаракатларини олиб боряпти.

Блогер Шерали Комилов Тошкент вилоятида қўлга олинди

Шерали Комилов (Фейсбукдан олинган сурат)
Шерали Комилов (Фейсбукдан олинган сурат)

Қашқадарёлик блогер Шерали Комилов 15 июль куни соат 17 лар атрофида Тошкент вилояти Қибрай тумани Дўрмон аҳоли пунктида ҳибсга олинган. Бу ҳақда Ўзбекистон инсон ҳуқуқлари “Эзгулик” жамияти раҳбари Абдураҳмон Ташанов Фейсбукдаги ўз саҳифаси орқали маълумот тарқатди.

Ҳуқуқ фаолининг ёзишича, Шерали Комилов Қашқадарё вилояти ИИБ Тергов бўлими томонидан бир йил аввал эълон қилинган айблов ва қидирув доирасида “15 нафарга яқин ИИО ходими” иштирокида қўлга олинган.

Блогернинг аввал Қибрай тумани ИИБга, сўнг Ўзбекистон Республикаси ИИВнинг 1-сонли тергов изоляторига олиб кетилгани айтилмоқда”, дейилган Ташанов постида.

“Эзгулик” раҳбари Қашқадарё вилояти ИИБ Тергов бўлими терговчиси санкцияси билан Шерали Комилов истиқомат қилган хонадонда тинтув ўтказилгани, тинтув давомида блогерга тегишли ашёлар, техникалар суриштирув органи томонидан олиб кетилганини қўшимча қилган.

Блогер Қашқадарё вилоятига этап қилиниши мумкин, унга нисбатан вилоят ИИБ томонидан фирибгарлик, туҳмат ва ҳақорат сингари айбловлар билан жиноят иши қўзғатилган”, деб ёзган Ташанов Шерали Комиловнинг сўнгги бир йил давомида терговдан яшириниб келганини қайд этиб, тергов органини “тергов жараёнида процессуал нормаларга қатъий амал қилишга” чақирган.

Ўтган ойда Озодликнинг “ОзодНазар” дастури меҳмони бўлган Шерали Комилов қарийб бир йилдан буён ўзига нисбатан учта жиноят иши очилиб, тўрт марта қидирув эълон қилинганини эътироф этган, шу вақт оралиғида Ўзбекистон ҳудудида бемалол юрганига қарамай, ўзини ҳеч ким тутиб кетишга уринмаётганини алоҳида таъкидлаб ўтган эди.

45 ёшли Шерали Комилов, маълумотларга кўра, меҳнат фаолиятини дастлаб ҳуқуқ-тартибот идораларида бошлаган, кейинчалик у хусусий тадбиркорлик ва блогерлик билан шуғуллана бошлаган. Блогерлик фаолияти давомида у сўнгги йилларда кўпроқ фаол равишда диний контент тарқатиш билан шуғулланувчи блогерлар ҳамда диний арбоблар хатти-ҳаракатларини танқид қилиш билан шуғулланиб келган.

Андижоннинг Шаҳрихонсойидан сел қурбони бўлган яна икки ўшлик қизнинг жасади топилди

Иллюстратив сурат
Иллюстратив сурат

Ўзбекистоннинг Андижон шаҳридаги Шаҳрихонсойдан 19 ёшли ва 10 ёшли опа-сингилнинг жасади топилган.

Қирғизистон Фавқулодда вазиятлар вазирлиги маълумотига кўра, қизларнинг жасади соат 14:30 да топилгани ортидан Андижон шаҳри моргига етказилган.

Аввалроқ ФВВ мазкур каналдан сел оқизиб кетган марҳумаларнинг 6 яшар синглиси жасади топилгани ҳақида маълум қилган эди. Бу уч қиз онасининг жасадини эса қутқарувчилар Оқбура дарёсининг ўзбек-қирғиз чегараси яқинидаги жойидан топишган.

Ўш шаҳар мэрияси маълумотига кўра, она билан унинг уч қизини “Мол-Булак” дам олиш маскани бўлган пайтда сел оқизиб кетган.

Рақобат қўмитаси “Korzinka”га қарши иш қўзғатди

Архив сурати
Архив сурати

Рақобатни ривожлантириш ва истеъмолчилар ҳуқуқларини ҳимоя қилиш қўмитаси Anglesly food масъулияти чекланган жамиятига (“Korzinka” супермаркетлар тармоғи) нисбатан иш қўзғатган.

Қўмита иддаосича, “Korzinka” супермаркетлар тармоғи томонидан турли хил усулларда тарқатилаётган реклама ахборотида “Кундалик харидларга энг арзон нарх”, “Энг арзон нарх - Korzinkaда”, "...Энг унумлисига келинг!" деган рекламасида фойдаланувчиларни чалғитадиган ёки чалғитиши мумкин бўлган сўз жумлаларидан фойдаланилган.

Мазкур реклама ахборотида қайд этилган маълумотларни ўрганиш натижасида акция доирасида кундалик эҳтиёжлар учун керак бўладиган маълум бир миқдордаги маҳсулотлардан иборат бўлган каталог жорий қилинганлиги маълум бўлди”, дейилган қўмита хабарномасида ушбу каталогга киритилган маҳсулотларнинг нархлари турли супермаркетлар тармоғи ҳамда деҳқон бозорлардаги худди шундай маҳсулотларнинг нархлари бўйича ўтказилган мониторинглар натижасига кўра солиштирилганлиги ҳамда таққослаш учун ҳар бир товарнинг алоҳида эмас, балки саватнинг (каталогнинг) умумий нархи олингани аниқланганини қўшимча қилинган.

Қўмитага кўра, Anglesly food МЧЖ томонидан “энг арзон нарх” деб эълон қилинган маҳсулотларнинг алоҳида турлари бўйича нархлари бошқа супермаркетлар ва деҳқон бозорларида сотилаётган худди шу турдаги маҳсулотлар нархларидан фарқ қилмаслиги кузатилган.

Рекламани бундай кўринишда бўлиши рекламадан фойдаланувчиларни чалғитувчи ёки чалғитишга олиб келувчи ҳолат дейилиши мумкин”, дейилган хабарномада шундан келиб чиққан ҳолда мазкур МЧЖга нисбатан “Реклама тўғрисида”ги қонуннинг 16-моддаси биринчи қисми ва “Истеъмолчилар ҳуқуқларини ҳимоя қилиш тўғрисида”ги қонуннинг 6-моддаси биринчи қисми талаблари бузилиши аломатлари юзасидан белгиланган тартибда иш қўзғатилгани билдирилган.

Аввалроқ Озодлик Рақобат қўмитаси томонидан Ўзбекистонда нарх-наво манипуляциясида гумонланаётган Lukoil Overseas Supply and Trading Ltd ширкатига (Россиядаги машҳур “Лукойл” компаниясининг шуъба корхонаси) нисбатан иш қўзғатилгани ҳақида хабар қилган эди.

Ўшда сел оқизиб кетган қизчанинг жасади Ўзбекистондан топилди

Видеодан олинган скриншот
Видеодан олинган скриншот

Ўшда сел оқизиб кетган қизлардан бирининг жасади Ўзбекистоннинг Шаҳрихонсой каналидан топилган. Бу ҳақда Озодликнинг қирғиз хизмати Қирғизистон Фавқулодда вазиятлар вазирлигидан олинган маълумотга таянган ҳолда хабар қилди.

ФВВ қайдича, 7 яшар қизалоқнинг жасади икки давлат ўртасидаги “Дўстлик” чегара маскани орқали олиб ўтилади.

Вазирлик 15 июль куни қирғиз-ўзбек чегарасига яқин бўлган Каттатерак участкасида Оқбура дарёсидан яна бир аёл жасади топилганини маълум қилган.

ФВВ аввалроқ сел ортидан тўрт кишининг жасади қидирилаётганини билдирган эди. Қирғизистон жанубидаги Ўш шаҳрида 14 июль куни тинимсиз ёққан жала туфайли сел тошқини рўй берган.

Ижтимоий тармоқларда тарқалган видеоларда Ўшдаги марказий бозор сув остида қолганини кўриш мумкин - сел нафақат бозорда сотилаётган товарларни, балки бир неча машинани ҳам оқизиб кетган.

ФВВ маълумотига кўра, сел ортидан Ўш-Гулча-Эргаштом йўли вақтинча ёпиб қўйилган.

Шунингдек, вазирлик шаҳарга туташ Тўлўйкўн ва Ўзгур қишлоқларида эвакуация ишлари олиб борилаётганини маълум қилган.

Ўшда бошланган сел Андижон вилоятининг Хўжаобод ва Жалақудуқ туманлари орасидаги бир кўприкнинг ҳам қулашига сабаб бўлган. Ижтимоий тармоқларда тарқалган видеоларда Қирғизистондан оқиб келувчи Оқбура дарёси устига қурилган кўприк оқимга дош беролмай, қулаганини кўриш мумкин. Маълумотларга кўра, қулаган кўприк Жалақудуқ туманининг Ёрқишлоқ қишлоғида жойлашган.

Ўзбекистон Фавқулодда вазиятлар вазирлиги сел тошқини оқибатида ҳеч ким жабрланмаганини билдириб, фуқаролардан саросимага тушмасликни сўраган.

Баҳор мавсумидан бери Қирғизистоннинг турли жойларида сел-тошқин ҳодисалари кузатилмоқда. Қирғиз расмийларига кўра, жорий йилнинг 20 апрелидан 1 июлигача сел тошқинлари туфайли 170 миллион сўмдан кўпроқ (тақрибан 2 миллион АҚШ доллари) зарар кўрилган. Бу вақт оралиғида табиий офат туфайли 17 киши нобуд бўлган.

Ҳафта якунида Ўзбекистоннинг олти вилоятида сел келиши мумкин

 Сурхондарё вилоятида кузатилган сел оқибати (архив сурати)
Сурхондарё вилоятида кузатилган сел оқибати (архив сурати)

Ўзбекистоннинг тоғолди ва тоғли ҳудудларида 13-16 июль кунлари кутилаётган ёғин-сочин сел-сув тошқини ҳодисаларини юзага келтириши мумкин. Бу ҳақда Гидрометеорология хизмати агентлиги директори Шерзод Ҳабибуллаев маълум қилди.

Мулозимга кўра, сел ҳодисалари Қашқадарё вилоятининг Яккабоғ, Деҳқонобод, Чироқчи, Китоб, Шаҳрисабз, Қамаши, Ғузор туманларида, Сурхондарё вилоятининг Сариосиё, Узун, Олтинсой, Денов, Бойсун, Шеробод, Шўрчи, Қумқўрғон, Музробот туманларида, Тошкент вилоятининг Оҳангарон, Бўстонлиқ, Паркент, Пискент, Ўртачирчиқ, Юқоричирчиқ туманларида ва Ангрен, Олмалиқ шаҳарларида, Наманган вилоятининг Поп, Косонсой, Чортоқ, Чуст, Наманган, Янгиқўрғон туманларида, Фарғона вилоятининг Сўх, Шоҳимардон, Фарғона, Бешариқ туманларида ҳамда Андижон вилоятининг Андижон, Асака, Жалақудуқ, Қўрғонтепа, Пахтаобод, Избоскан, Хўжаобод, Марҳамат туманлари ва Хонабод шаҳрида кузатилиши эҳтимоли бор.

Ҳабибуллаев тоғолди ва тоғли ҳудудларда истиқомат қилувчи аҳолини ҳамда бу ҳудудларда ҳаракатланувчи ҳайдовчилардан тошқин эҳтимолига қарши эҳтиёткорлик чораларини кўриш ҳақида огоҳлантирган.

Республика ҳудуди бўйича ёмғир сувлари тўпланиши эҳтимоли бор, бу эса ҳудудларни сув босишига олиб келиши мумкин”, деб ёзган “Ўзгидромет” раҳбари.

Давомини ўқинг

XS
SM
MD
LG