Линклар

Шошилинч хабар
13 июн 2024, Тошкент вақти: 18:24

Ўзбекистон хабарлари

HRW: Ўзбекистонда инсон ҳуқуқлари сезиларли даражада ёмонлашди

Human Rights Watch халқаро ташкилоти эълон қилган навбатдаги йиллик ҳисоботда Ўзбекистонда 2023 йилда инсон ҳуқуқлари вазияти сезиларли даражада ёмонлашгани қайд этилди.

Ҳисоботда йил давомида Ўзбекистонда блогерлар ва журналистларнинг жиноий таъқиб этилгани сўз ва фикр эркинлигига зарба бергани тилга олинади.

Ҳисоботда 2022 йилдаги Нукус воқеалари пайтида содир этилган инсон ҳуқуқларининг бузилиши юзасидан то шу кунгача одил судлов ўтказилмагани, ҳукумат бунга бефарқ қараётгани таъкидланади.

«Қонунчилик ислоҳ қилиниши тўғрисида берилган ваъдалар ортга сурилмоқда. Адлия вазирлиги мустақил ҳуқуқ фаоллари ташкил этмоқчи бўлган ташкилотларни рўйхатга олишдан бош тортмоқда. Ўзаро розилик асосидаги бир жинсли муносабатлар ҳалигача жиноят ҳисобланмоқда”, дейилади ҳисоботда.

Ташкилот 2023 йил апрелида Ўзбекистонда оилавий зўравонликка қарши жавобгарликни, аёллар ва қизлар ҳимоясини кучайтирувчи қонун қабул қилинганига қарамай, оилавий зўравонлик ҳолатлари камаймаганига эътибор қаратган.

Ҳисоботда 9 июлда ўтган президентлик сайлови демократик тамойилларга зид равишда ўтказилгани қайд этилади. Сайловни кузатган ЕХҲТ ДИИҲБ миссияси “9 июлда муддатидан олдин ўтказилган президент сайлови техник жиҳатдан яхши тайёрланган, аммо унда чинакам рақобат бўлмади”, деган дастлабки хулосасини эълон қилган эди. АҚШ элчихонаси ҳам 10 июль куни тарқатган баёнотида ЕХҲТ ДИИҲБнинг "сайлов рақобатсиз муҳитда ўтгани ҳақидаги хулосаси"ни қўллаб-қувватлашини билдирганди.

Халқаро ташкилот ҳукумат сиёсий эркинликларни бузган ҳолда “Ҳақиқат, тараққиёт ва бирдамлик” демократик партиясини расман рўйхатга олмаётганини, партия етакчиси Хидирназар Аллақулов ва фаолларга босим кўрсатаётганини тилга олган.

Кун янгиликлари

AAB россияликлар учун валюта операциялари тўхтатилганини рад этди

Иллюстратив сурат
Иллюстратив сурат

Ўзбекистондаги Asia Alliance Bank Россия резидентлари билан боғлиқ валюта операциялари тўхтатилгани ҳақида 13 июнь куни ёйинланган баёноти юзасидан раддия берди.

Аввалроқ мазкур банкнинг телеграм-каналида “АҚШ санкциялари пакети янгилангани муносабати билан Россия резидентлари билан боғлиқ валюта операцияларининг барчаси тўхтатилди” қабилидаги баёнот пайдо бўлган эди.

Мазкур пост кўп ўтмай телеграм-каналдан ўчириб ташланган, банк мутасаддилари эса бу хабар каналда "техник носозликларга кўра" ёйинлаганини қайд этишган.

"Банк мижозларнинг Россия Федерацияси резидентлари билан боғлиқ операцияларига қонун ҳужжатларида белгиланган тартибда хизмат кўрсатишни давом эттирмоқда", дейилган банкнинг галдаги хабарномасида мижозлардан "келтирилган ноқулайликлар учун узр" сўралган.

Эслатиб ўтамиз, 12 июнь куни АҚШ Украинада босқинчилик уруши олиб бораётган Россияга қарши санкция тартибини кучайтирган, янги чекловлар ортидан Россия биржасида доллар ва еврога савдо тўхтаб қолган эди.

АҚШ Молия вазирлигининг санкция рўйхатига Россия ва бошқа мамлакатларда фаолият юритувчи жами 300 дан зиёд юридик ва жисмоний шахс киритилган. Мазкур рўйхатда Ўзбекистон компаниялари йўқ, лекин ўзбек ширкатлари санкция остидаги Россия ташкилотлари ва фуқаролари билан чекловсиз алоқаларни давом эттираверган тақдирда, иккиламчи санкцияларга нишон бўлиши эҳтимолдан ҳоли эмас.

Жанубий Корея президенти уч кунлик ташриф билан Ўзбекистонда бўлади

Жанубий Корея президенти Юн Сок Ёль (архив сурати)
Жанубий Корея президенти Юн Сок Ёль (архив сурати)

Корея Республикаси президенти Юн Сок Ёль 13-15 июнь кунлари давлат ташрифи билан Ўзбекистонда бўлади. Президент матбуот хизмати маълумотига кўра, Жанубий Корея етакчиси Ўзбекистонга президент Шавкат Мирзиёев таклифига биноан келмоқда.

Қайд этилишича, мезбон ва меҳмон президентларнинг Тошкент шаҳрида бўлиб ўтадиган музокараларида Ўзбекистон-Корея дўстлик ва алоҳида стратегик шериклик муносабатларини янада ривожлантиришнинг долзарб масалалари кўриб чиқилади.

Савдо, инновациялар ва технологиялар алмашинуви, энергетика, электроника ва электротехника, кимё саноати, қишлоқ хўжалиги, инфратузилмавий ривожланиш ва бошқа устувор йўналишларда амалий ҳамкорликни кенгайтириш масалалари эътибор марказида бўлади. Таълим, соғлиқни сақлаш, маданият, спорт ва туризм соҳаларидаги қўшма дастурлар муҳокама қилинади”, дейилган хабарномада.

Олий даражадаги музокараларда минтақавий, шу жумладан "Марказий Осиё – Корея Республикаси" форматидаги ҳамкорлик юзасидан ҳам фикр алмашиш режаланган ҳамда саммит якунлари бўйича бир қатор ҳукуматлараро ва идоралараро ҳужжатлар имзоланиши кўзда тутилган.

Ташрифнинг ишбилармонликка оид дастури доирасида Шавкат Мирзиёев ва Юн Сок Ёль қўшма бизнес форумида иштирок этишади.

Сафар дастури доирасида Жанубий Корея президенти Ўзбекистоннинг маданий-тарихий мероси билан танишиш мақсадида Самарқанд шаҳрига ташриф буюриши ҳам кутилмоқда.

Юн Сок Ёль Ўзбекистонга Марказий Осиёдаги уч мамлакат бўйлаб бир ҳафталик сафари доирасида келмоқда. Мазкур ташриф доирасида Жанубий Корея президенти 10-11 июнь кунлари Туркманистонда, 11-13 июнь кунлари эса Қозоғистонда бўлган.

Давлатга хиёнатда айбланган собиқ дипломат озодликка чиқди

Ўзбекистон ТИВ собиқ ходими Қодиржон Юсупов
Ўзбекистон ТИВ собиқ ходими Қодиржон Юсупов

Ўзбекистонда давлатга хоинлик қилганликда айбланиб, 5,5 йилга қамалган Қодиржон Юсупов жорий йилнинг 10 июнида озодликка чиқди. Юсупов қамоқдан озод қилинганидан кейин ҳам бир йил давомида маъмурий назорат остида бўлиши айтилмоқда. Бу ҳақда маълумот тарқатган Марказий Осиёдаги инсон ҳуқуқлари ассоциацияси собиқ дипломат Юсупов аввал-бошдан адолатсиз судлов қурбони бўлганини қўшимча қилган.

Қароргоҳи Францияда бўлган Марказий Осиёдаги инсон ҳуқуқлари ассоциацияси (AHRCA), Инсон ҳуқуқлари бўйича халқаро ҳамкорлик (IPHR), Норвегия Хельсинки қўмитаси (NHC) ҳамда Инсон ҳуқуқлари бўйича Хельсинки жамғармаси (HFHR) Ўзбекистон расмийларини қамоқдан чиққан Қодиржон Юсупов ҳимоясини таъминлашга ҳамда унинг ноҳақ қўлга олиниб, қийноққа солингани юзасидан холис тергов ўтказишга, шунингдек, ҳуқуқлари бузилгани учун унга товон пули тўлаб беришга чақирган.

Бир пайтлар Ўзбекистоннинг Австрия, Британия, Судан ва Яқин Шарқ мамлакатларидаги элчихоналарида ишлаган Қодиржон Юсупов узоқ йилдан бери азият чекиб келаётгани руҳий хасталик туфайли 2018 йилнинг 3 декабрида Тошкент метрополитенининг Пушкин бекатида ўзини поезд остига ташлаган ва тасодиф туфайли омон қолган.

Бошидан қаттиқ лат еган собиқ дипломат, оила-аъзоларига кўра, бу воқеадан кейин тушиб қолган руҳий транс ҳолатида “ўзининг Ғарб давлатларининг жосуси” экани ҳақида алжирай бошлаган ва касалхонага етиб келган ДХХ ходимлари ана шу “иқрор” асосида унга қарши жиноят иши очиб, собиқ мулозимни мамлакат Жиноят кодексининг 157-моддасида (Давлатга хоинлик қилиш) кўзда тутилган жиноятда айблаган.

Юсуповнинг яқинлари Озодлик мухбирлари билан 2019 йил март ойидаги суҳбатда собиқ дипломат уларга сўнгги марта 2018 йил 9 декабрига касалхонада кўрсатилгани, 10 декабрь куни у ДХХ тергов изоляторига ўтказилганини айтишган.

Шундан сўнг Қодиржон Юсупов тергов чоғида ўзига нисбатан турли хил босимлар ўтказилаётгани, даволанишга имкон берилмаётганидан шикоят қилган, бироқ ўзбек расмийлари бу шикоятларни асоссиз деб топишган.

Собиқ дипломат Ўзбекистон Ҳарбий судининг 2020 йил 9 январдаги ҳукми билан 5 йилу 6 ойга озодликдан маҳрум этилган.

Суд ҳукми ортидан қатор халқаро ташкилотлар Қодиржон Юсуповни озод қилиш чақириғи билан ўзбек расмийларига мурожаат қилишган эди.

Мирзиёев АҚШ савдо вакили билан ЖСТ масаласини муҳокама қилди

Ўзбекистон президенти Шавкат Мирзиёев ва АҚШ cавдо вакили Кэтрин Тай ўртасидаги учрашувдан лавҳа (president.uz фотоси)
Ўзбекистон президенти Шавкат Мирзиёев ва АҚШ cавдо вакили Кэтрин Тай ўртасидаги учрашувдан лавҳа (president.uz фотоси)

Ўзбекистон президенти Шавкат Мирзиёев 11 июнь куни АҚШ cавдо вакили Кэтрин Тайни қабул қилган.

Президент матбуот хизмати маълумотига кўра, учрашув чоғида Ўзбекистон билан АҚШ ўртасидаги стратегик шериклик муносабатларини янада мустаҳкамлаш, савдо-иқтисодий ва инвестициявий ҳамкорликни кенгайтириш масалалари муҳокама қилинган.

Ишбилармонлик алоқалари фаоллашгани, ўзаро товар айирбошлаш ва инвестициялар кўрсаткичлари барқарор ўсаётгани мамнуният билан қайд этилди”, дейилган хабарномада.

Қабул чоғида, шунингдек, Ўзбекистоннинг Жаҳон савдо ташкилотига аъзо бўлиши, GSP тизимини қайта тиклаш, “C5+1” формати ҳамда Савдо ва инвестициялар бўйича ҳадли битим доирасида амалий ҳамкорликни чуқурлаштириш билан боғлиқ масалалар кўриб чиқилган.

Хабарномада учрашув пайтида саноат кооперацияси учун янги соҳаларни аниқлаш ва тегишли лойиҳаларни илгари суриш бўйича қўшма платформани ишга тушириш муҳим экани таъкидлангани қўшимча қилинган.

Маълумотларга кўра, АҚШ cавдо вакили Кэтрин Тай 11 июнь куни Ўзбекистон президенти ёрдамчиси ва қизи Саида Мирзиёева билан ҳам учрашган.

Аввалроқ америкалик мулозиманинг Ўзбекистон бош вазири ўринбосари Жамшид Хўжаев, инвестициялар, саноат ва савдо вазири Лазиз Қудратов, камбағалликни қисқартириш ва бандлик вазири Беҳзод Мусаев билан ҳам учрашиши, меҳнат ҳуқуқлари ва умуман инсон ҳуқуқларига ихтисослашган Uzbek Forum ташкилоти вакиллари ҳамда Халқаро меҳнат ташкилоти томонидан тайёрланган меҳнат ҳуқуқларини мониторинг қилувчи мутахассислар билан учрашув ўтказиши режалангани билдирилган.

12 июнь куни Кэтрин Тайнинг Самарқандга ташриф буюриб, вилоят ҳокими Эркинжон Турдимов билан учрашиши ва шаҳарнинг диққатга сазовор жойларини зиёрат қилиши кутилмоқда.

“Ҳисорак”даги авария ҳақида “фейк” тарқатганлар жазоланмоқда

"Ҳисорак" сув омборидан келаётган сув
"Ҳисорак" сув омборидан келаётган сув

Қашқадарё вилояти Ички ишлар бошқармаси “Ҳисорак” сув омборидаги авария ҳақида ижтимоий тармоқларда ёлғон хабарлар тарқатган фуқароларга нисбатан жиноят иши қўзғатилганини маълум қилди.

Қайд этилишича, 10 июнь куни Шаҳрисабз туманидаги “Ҳисорак” сув омбори ҳақида интернет тармоғида “баъзи фуқаролар ёлғон ахборот тарқатиб, одамларнинг тинчини бузиб, фуқароларнинг ҳуқуқлари ва қонун билан қўриқланадиган манфаатларига зарар етказилишига сабабчи бўлган”.

Вилоят ИИБ мазкур ҳолат бўйича Шаҳрисабз туманида яшовчи Д.У., Н.А. ва бошқаларга нисбатан Ўзбекистон Жиноят кодексининг 244/6-моддаси 3-қисми “б” банди билан жиноят иши қўзғатилиб, тергов ҳаракатлари олиб борилаётганини билдирган.

“Ҳисорак”даги вазият бўйича Фавқулодда вазиятлар вазирлиги томонидан тарқатилган дастлабки расмий маълумотда сув омбори тўғонида авария содир бўлгани, бироқ сув омборига айтарли шикаст етмагани, ортиқча хавотирга ўрин йўқлиги, вазият тўлиқ назоратга олингани урғуланган.

Бу маълумот маҳаллий турғунларга етарлича таскин бермаган чоғи - сув омбори атрофида яшовчи аҳоли тунда бошқа ҳудудларга кета бошлаган. Бунинг ортидан маҳаллий расмийлар кетма-кетига сув омбори ёрилмагани ва фавқулодда вазият юзага келмагани, ҳамма нарса назорат остида экани ҳақидаги қайта ва қайта баёнотлар билан чиқа бошлаган.

Тўғондаги вазият ҳақида 11 июнь куни Ўзбекистон Фавқулодда вазиятлар вазири Абдулла Қўлдошев ҳам “Ҳисорак” сув омбори яқинида туриб баёнот берган. Мулозимга кўра, сув омборида ҳеч қандай техноген ҳодиса юз бермаган, сув омбори эса одатий тартибда ишламоқда. Бироқ вазирнинг бу баёноти ФВВ томонидан аввалроқ тарқатилган “тўғоннинг чап тарафидан қўшимча туннел очиш мақсадида олиб борилаётган муҳандислик техник тадбирлари вақтида сув сизиб чиқиши ҳолати кузатилган”ига оид маълумотига зид эди.

Ўрганишлар натижасида маълум бўлдики, Ҳисорак сув омбори "штатний" режимда ишлаяпти. Бу йил об-ҳавонинг серёғин келганлиги ва кунларнинг исиб кетиб, тоғлардаги қорларнинг эриши тезлашганлиги Ҳисорак сув омборининг ён бағирларида жойлашган, ўзининг йўли билан келаётган сувларнинг бирмунча кўпайиши ҳолати сезилган. Лекин сув омборининг бирорта параметри ўзгармаган”, деган вазир Абдулла Қўлдошев.

Айни пайтда Қашқадарё вилояти ҳокимиятига яқин, бир-биридан мустақил икки манбанинг Озодликка билдиришларича, омбор тўғонида техноген ҳодиса юз берган.

Кеча туман ҳокими пахтага сув ҳайдаяпмиз, деб ёлғон айтди. Ҳеч қачон Қамашидаги сув омборига бу омбордан сув ҳайдалмайди. Бу - халқ ваҳимага тушмаслиги учун ўйлаб топилган гап. Хитойликлар сув омборидан сув тушадиган яна бир туннел қуришаётган эди. Қурилиш ишлари учун улар тоғ жинсларини бир неча марта портлатган. Ўша портлашлардан тўғоннинг бетони дарз кетган ва сув ўша ердан оқиб чиққан. Айтишларича, ҳозир ўша сув чиқаётган жой вақтинчалик ёпилган, лекин уни бутунлай мустаҳкам ёпиш учун уч-тўрт кун вақт керак экан. Ҳозир, ҳамма катталару мутахассислар шу ерда”, деган жумладан исми сир қолишини сўраган маҳаллий мулозимлардан бири.

“Ҳисорак ГЭС” УК бошқармасига қарашли “Ҳисорак” сув омбори жойлашган Мираки қўрғончасининг исми сир қолишини сўраган яшовчиси эса тўғон тарафга туни билан қориштирилган цемент ортилган машиналарнинг қатнови тўхтамаганини айтган.

Мен ўзим шу маҳаллада яшайман. Туни билан тайёр цемент қоришмаси бор, цистернаси айланиб турадиган мошиналар оқими тинмади. Менинг ўзим юзтадан ортиғини санадим. Билмадим, ичкарида нима қилишди, лекин бугун вазият тинчиди”, деган маҳаллий турғун.

Ўзбекистонликлар Қурбон ҳайити муносабати билан уч кун дам олади

Тошкентдаги ҳайит намозидан олинган лавҳа (архив сурати)
Тошкентдаги ҳайит намозидан олинган лавҳа (архив сурати)

Ўзбекистон президенти Шавкат Мирзиёев 11 июнь куни “Муборак Қурбон ҳайитини нишонлаш тўғрисида”ги қарорни имзолади.

Қарорда бу йилги Қурбон ҳайити 16 июнга тўғри келаётгани, шу куни байрам ўлароқ нишонланиши қайд этилган.

Қурбон ҳайитининг биринчи куни дам олиш кунига тўғри келиши муносабати билан ушбу дам олиш куни 17 июнь – душанба кунига кўчирилади, 18 июнь – сешанба куни барча ходимлар учун қўшимча дам олиш куни бўлади”, дейилган президент матбуот хизмати хабарномасида.

Қарор билан маҳаллий давлат ҳокимияти органлари, масъул вазирлик ва идораларга муборак Қурбон ҳайитини Ўзбекистон халқининг миллий анъана ва урф-одатларига уйғун ҳолда ўтказиш учун тегишли чора-тадбирларни амалга ошириш, ҳайит кунларида мўътабар зиёратгоҳлар ва тарихий қадамжоларга зиёратларни ташкил этиш мақсадида фуқароларга қулай шароит ва имкониятлар яратиш топширилган.

Ўзбекистонликлар ўтган йили Қурбон ҳайити муносабати билан қаторасига беш кун - 28 июндан 2 июлгача дам олган эдилар.

Тошкентда “Саидазиз медгородок” ва шериклари суди бошланди

Жиноят ишлари бўйича Юнусобод туман суди биноси
Жиноят ишлари бўйича Юнусобод туман суди биноси

Жиноят ишлари бўйича Юнусобод туман судида 11 июнь куни соат 10 да кенг жамоатчиликка “Саидазиз медгородок” лақаби билан танилган Саидазиз Саидалиев ва шерикларига оид жиноят ишини кўриб чиқиш бошланган.

Олий суд матбуот котиби Азиз Обидов маълумотига кўра, мазкур жиноят иши Юнусобод туман суди раиси М. Мирзажонов раислигида биринчи инстанция судида кўриб чиқилади.

Дастлабки тергов органининг айблов хулосасига кўра судланувчилар С. Саидалиев, М. Мирходжаев, Ш. Самиев, А. Акрамов, И. Сатвалдиев, Ф. Алимов, Р. Бобоназаров, Л. Шомуродов, Н. Туляганов, Ш. Қуватов, Ғ. Ўринбоев, У. Махмудов, А. Нурматов, Б. Эркинов, А. Юлдашев, С. Усмонов, Д. Умирзаков, Т. Абдумаликов, Д. Бадалов, У. Рахимов, Д. Хошаков, З. Қаюмов, Б. Муминов, Д. Юнусов, Д. Султанов, Б. Самадов, Х. Рискиев, Б. Раҳмонов ва Ё. Сотиволдиев Жиноят кодексининг 112, 165, 168, 182, 227, 228, 229, 236, 237, 238, 242, 243, 277 ва 28,211-моддаларида назарда тутилган жиноятларни содир этганликда айбланмоқда”, дейилган хабарномада.

Бу эса “Саидазиз медгородок” ва шерикларининг ўлдириш ёки зўрлик ишлатиш билан қўрқитиш, товламачилик, фирибгарлик, божхона тўғрисидаги қонунчиликни бузиш, ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш, ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш, ўзбошимчалик, тергов қилишга ёки суд ишларини ҳал этишга аралашиш, ёлғон хабар бериш, ёлғон гувоҳлик бериш, жиноий уюшма ташкил этиш, жиноий фаолиятдан олинган даромадларни легаллаштириш, безорилик ва пора беришда иштирок каби жиноятларда айбланаётганини англатади.

Қайд этилишича, судланаётган 28 кишига нисбатан “қамоққа олиш” ва 1 нафарига нисбатан эса “муносиб хулқ-атворда бўлиш тўғрисида тилхат“ тарзидаги эҳтиёт чоралари қўлланилган.

“Саидазиз медгородок” ва шериклари Ўзбекистонда, хусусан пойтахт Тошкентда ўтган йилнинг ноябрь ойида бошланган “Долзарб 40 кунлик” тадбирлари давомида қўлга олинган эди. Мазкур тадбирлар чоғида яна жиноят оламида “Бахти Ташкентский” номи билан танилган Бахтиёр Қудратуллаев, “Салимбой” номи билан танилган Салим Абдувалиев, “Зики эски шаҳар” лақабли Лутфулла Умаров, “Бохо завхоз” лақабли Баҳодир Султонов ҳамда жиноят оламининг бошқа вакиллари ушланганди.

Ўтган ярим йил мобайнида юқорида номи зикр этилган шахслардан суд ҳукми билан Салим Абдувалиев 6 йилга, Лутфулла Умаров 6 йилу 2 ойга, Баҳодир Султонов 10 йилга қамалган. Бахтиёр Қудратуллаев ва шерикларининг суди эса ўтган ҳафтада бошланган.

Аввалроқ бўлиб ўтган очиқ суд мажлисида “Бахти Ташкентский” кўчада тартиб ўрнатиш унга “давлат ташкилоти” томонидан топширилганини иддао қилган эди.

Кишанланган "кўча“ ва сочи қирилган "Бахти Ташкентский”
Илтимос кутинг

Айни дамда медиа-манба мавжуд эмас

0:00 0:09:37 0:00

Бу баёнот ижтимоий тармоқларда турли баҳс-мунозараларга сабаб бўлди. Бунинг ортидан судга раислик қилувчи суд жараёнидан видео ва аудио ёзиб олишга чеклов киритган. Бу борада тарқатилган расмий баёнотда бу қарор “жамоатчиликда нотўғри тасаввурлар” шаклланмаслиги ҳамда “судга нисбатан ижтимоий босим эҳтимоли” туфайли олингани қайд этилиб, бунга маҳаллий қонунчилик изн бериши ва бундай тартиб халқаро амалиётда ҳам қўлланилиши урғуланган.

Айни пайтда “суднинг мазкур ажрими суд мажлисида журналист ва блогерларнинг иштирокини узил-кесил таъқиқламаслиги”га таъкидланган.

Яъни, улар жараённи бевосита кузатиши, ўзлари учун зарур қайдлар қилиб бориши ҳамда турли башорат ва тахминларга берилмаган ҳолда ахборотлар эълон қилишига монеълик йўқ”, дейилган Судьялар олий кенгаши матбуот хизмати томонидан тарқатилган хабарномада.

ФВВ: “Ҳисорак” тўғонида авария юз берди, аммо хавотирга ўрин йўқ

Иллюстратив сурат
Иллюстратив сурат

Жорий йилнинг 10 июнь куни Қашқадарё вилоятининг Шаҳрисабз туманида жойлашган “Ҳисорак” сув омбори тўғонининг чап тарафидан қўшимча туннел очиш мақсадида олиб борилаётган муҳандислик техник тадбирлари чоғида сув сизиб чиқиши ҳолати кузатилган. Бу ҳақда Фавқулодда вазиятлар вазирлиги матбуот хизмати маълум қилди.

Вазирлик қайдича, тўғондаги авария оқибатини бартараф этиш мақсадида "Ўзбекгидроэнерго" АЖ бошқаруви раиси раҳбарлигида вилоят ҳокими, ФВБ, ИИБ бошлиқлари ва бошқа мутасадди ташкилотлардан иборат тезкор штаб тузилиб, махсус техникалар ёрдамида барча зарур муҳандислик тадбирлар олиб бориляпти.

ФВВ сув омборига шикаст етмагани, ҳодиса оқибатида ҳеч ким тан жароҳати олмагани ва ҳалок бўлмаганини билдирган.

Вазирлик хабарномасида ортиқча хавотирга ўрин йўқлиги, вазият тўлиқ назоратга олингани урғуланган.

Аввалроқ ижтимоий тармоқларда “Ҳисорак” сув омбори тўғонида ёриқ пайдо бўлганига оид хабар ортидан аҳоли орасида ваҳима бошлангани, тўғон яқинидаги одамлар уй-жойларини ташлаб чиқиб кетаётганига оид хабарлар тарқай бошлаган эди.

Куз-қиш мавсумига ҳозирлик учун қўшимча 14 трлн сўм ажратилади

Ўзбекистонда бу йилги куз-қиш мавсумига тайёргарлик ишларига ўтган йилги 14 триллион сўмга қўшимча яна 14 триллион сўм ажратилади. Бу ҳақда президент Шавкат Мирзиёев раислигида энергия ресурсларидан самарали фойдаланиш ҳамда энергетика соҳаси объектлари куз-қиш мавсумида барқарор ишлашини таъминлаш чора-тадбирлари юзасидан 10 июнь куни ўтказилган видеоселектор йиғилишида айтилган.

Президент матбуот хизмати қайдича, йиғилишда Мирзиёев буларни эълон қилар экан, “Энди “муддат кам эди, маблағ бўлмади”, деб баҳона қилишга ҳеч кимнинг ҳаққи йўқ”, дея мутасаддиларни огоҳлантирган.

Видеоселекторда президент тармоқ раҳбарлари ва ҳокимларнинг бу йил электр ва газни тежаш режаси қониқарсиз эканини, улар янада катта марра олиши шартлигини таъкидлаган. У ҳар бир ҳокимга 1 тадан туманни танлаб, электр ва газ тежаш бўйича намуна қилиш бўйича топшириқ берган. Ушбу туманларда бу йил 750 миллион киловатт электр ва 550 миллион куб метр газ иқтисод қилинишига эришиш муҳимлиги урғуланган.

Тежаш – йўқотишларни камайтириш, тежамкор технологияларни жорий қилиш ҳисобига бўлиши шарт”, деган жумладан Шавкат Мирзиёев.

Шунингдек, куз-қиш мавсумида аҳолини иссиқлик ва ичимлик суви билан кафолатли таъминлаш учун қозонхона, қозон ва иссиқлик тармоқларини яхшилаш, сув тармоқлари ва насосларни таъмирлаш вазифалари белгиланган.

Куз-қиш мавсумини беталафот ўтказиш мақсадида Энергетика вазирлиги раҳбарларини ҳудудларга бириктиришга қарор қилинган. Вазирлик раҳбарлари жойларда ишларни ташкил қилишга ҳамда ҳар бир носозлик ва аварияларни зудлик билан бартараф этишга масъул бўлиши айтилган.

Шу билан бирга, йиғилишда йил бошидан вилоятларда 250 та авариявий ўчиш боис айрим жойлардаги истеъмолчиларга электр барқарор етказилмагани танқид қилинган. Бунга кўп қаватли уйларнинг айримларидаги электр қутилар ва ундаги симлар муддатини ўтаб бўлгани сабаб ўлароқ келтирилиб, мутасаддиларга бу борадаги камчиликларни тўлиқ бартараф этиш топширилган.

Айни пайтда ишларни энг оғир маҳаллалардан бошлаб, йил якунигача 30 минг километр тармоқ, 10 мингта трансформаторни яхшилаш вазифаси қўйилган.

Йиғилиш давомида тармоқ ва ҳудудлар раҳбарларининг ҳисоботлари ҳам тингланган.

АҚШ элчихонаси виза бўйича янги тизимни ишга туширди

АҚШнинг Ўзбекистондаги элчихонаси жорий йилнинг 10 июнидан визага ариза топшириш бўйича янги тизим ишга туширилганини эълон қилди.

Элчихона матбуот хизмати маълумотига кўра, мазкур тизим ёрдамида мурожаатчилар виза бўйича маълумотга эга бўлиш, талаб этилган виза учун маъмурий тўловни амалга ошириш, виза бўйича суҳбат санасини белгилаш ҳамда етказиб бериш хизматидан фойдаланиш имкониятига эга бўлишади.

Визага ариза топширишнинг янгича жараёнига мувофиқ, мурожаатчи барча зарурий тўловларни суҳбатга ёзилиш қайд этилгунига қадар тўлаши керак бўлади. Мурожаатчиларга виза учун тўловни қуйидаги йўллар билан амалга ошириш имконияти берилади:

  • “Tenge Bank”нинг барча филиалларида нақд пул орқали (Тўловлар АҚШ Элчихонасида қабул қилинмайди).
  • Веб-сайтда АҚШ долларида пластик карта орқали.

Янги тизим 10 июндан бошлаб https://ais.usvisa-info.com/ веб-сайтида 2 июль ва ундан кейинги саналар учун барча ноиммиграцион виза суҳбатлари санасини белгилаш учун фаолият юрита бошлайди.

“Янги суҳбат тизими орқали суҳбатсиз визага мурожаат этиш талабларига жавоб берувчи мурожаатчилар етказиб бериш хизмати ёрдамида ҳужжатларини Консуллик бўлимига топширишлари ҳамда ҳужжатларини белгиланган тегишли бўлинмадан қабул қилиб олишлари мумкин бўлади”, дейилган элчихона хабарномасида.

Америкалик дипломатлар аввалги суҳбат тизимидан фойдаланган ҳолда июнь ойи учун суҳбат санасини белгилаган виза мурожаатчилари белгиланган санада виза суҳбатига келишлари ва виза учун тўловни бинонинг ичида суҳбатдан аввал амалга оширишлари лозимлигини эслатганлар.

“Олға, Қорақалпоғистон” Ўзбекистонда экстремистик деб топилди

Парахат Мусапбаровга нисбатан чиқарилган ҳукмга оид суд сайтидаги маълумотдан скриншот
Парахат Мусапбаровга нисбатан чиқарилган ҳукмга оид суд сайтидаги маълумотдан скриншот

Ўзбекистон Олий суди мухолифатдаги “Олға, Қорақалпоғистон” ҳаракатини “экстремистик ташкилот” деб топган ва мамлакат ҳудудида унинг фаолиятини тақиқлаган.

“Мемориал” ҳуқуқбонлик маркази Марказий Осиё дастури директори Виталий Пономарёвга кўра, суд мазкур қарорни шу йил 22 февралида чиқарган.

Ҳуқуқ ҳимоячисининг бунга оид хабари 6 июнь куни Туркманистон инсон ҳуқуқлари бўйича Хельсинки жамғармаси (TFH) сайтида ёйинланган.

Ўзбекистон Олий суди қарорини очиқ манбалардан топиб бўлмади.

Тақиқловчи қарор борлиги ҳақида жорий йилнинг 30 майида Хўжайли туман суди томонидан олти йилга озодликдан маҳрум этилган Парахат Мусапбаров иши бўйича суд қароридан маълум бўўлган. Фаолга қўйилган айбловлар орасида Ўзбекистон Жиноят кодексининг 244-2-моддаси (Диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) бўйича айблов ҳам бор. Ҳукм матнида Олий суднинг “Олға, Қорақалпоғистон”ни тақиқлаш тўғрисидаги қарори ҳам эслатилган.

Жорий йилнинг февраль ойи охирида қўлга олинган Мусапбаров иши, афтидан, “Олға, Қорақалпоғистон” тарафдорига бу каби айблов қўйилиши билан боғлиқ илк жиноят ишидир.

Х ижтимоий тармоғидаги Alga Qara'qalpaqstan аккаунти 7 июнь куни Ўзбекистонда “махфий суд” “Қорақалпоғистон демократик партияси” фаолиятини “экстремистик” ўлароқ тақиқлаш ҳақида қарор чиқарганини ёзди.

“Олға, Қорақалпоғистон” ҳаракати тарихи 2008 йилнинг сентябрь ойига бориб тақалади. Ҳаракат лидери Аман Сагидуллаев 2023 йил 10 майида Ўзбекистон президентини омма олдида ҳақоратлаш ёки унга туҳмат қилиш моддаси дохил мамлакат Жиноят кодексининг қатор моддалари бўйича сиртдан 18 йилга озодликдан маҳрум қилинган эди.

Сагидуллаев ўзига қўйилган барча айбловларни рад этган. У Қорақалпоғистон мустақиллигига тинч йўл билан эришишни ўз олдига мақсад қилиб қўйганини қайд этган. Сагидуллаевнинг фикрича, бу айирмачилик эмас, балки мухтор ҳудудга Конституцияга мувофиқ равишда берилган ҳақ бўлиб ҳисобланади.

Илк чоракда алимент тўламаган қарийб 2600 киши жазоланди

Иллюстратив сурат
Иллюстратив сурат

Жорий йилнинг биринчи чорагида Ўзбекистонда Маъмурий жавобгарлик тўғрисидаги кодекснинг 47-4-моддаси (вояга етмаган ёки меҳнатга лаёқатсиз шахсларни моддий таъминлашдан бўйин товлаш) билан 2 минг 593 нафар шахс маъмурий жавобгарликка тортилган. Улардан 35 нафари жаримага тортилган, 2 минг 558 нафарига нисбатан эса маъмурий қамоқ жазоси тайинланган. Бу ҳақда Олий суд матбуот котиби Азиз Обидов маълумот тарқатди.

Ўзбекистоннинг амалдаги қонунчилигига мувофиқ, маъмурий қамоқ дейилганда бирор маъмурий ҳуқуқбузарлик содир этган шахсни 3 суткадан 15 суткагача муддатга ҳибсда сақлаш тушунилади. Фавқулодда ҳолат тартиби шароитида эса бу жазо 30 суткагача чўзилиши мумкин. Бу тартиб 2018 йилнинг 11 июлидан кучга кирган.

Олий суд мулозими қайдича, ўтган йили мамлакат бўйлаб алимент тўлашдан бўйин товлаган 8 минг 517 нафар шахс маъмурий жавобгарликка тортилган. Улардан 160 нафарига нисбатан жарима жазоси тайинланган, 8 357 нафарига нисбатан эса маъмурий қамоқ жазоси қўлланилган.

Ўзбекистон билан Туркия ўртасида 20 чоғли ҳужжат имзоланди

Ўзбекистон президенти Шавкат Мирзиёев (ч) ва Туркия президенти Ражаб Тоййиб Эрдўғон (ў), Анқара, 2024 йил 6 июни (president.uz фотоси)
Ўзбекистон президенти Шавкат Мирзиёев (ч) ва Туркия президенти Ражаб Тоййиб Эрдўғон (ў), Анқара, 2024 йил 6 июни (president.uz фотоси)

Туркияга расмий ташрифи доирасида Ўзбекистон президенти Шавкат Мирзиёев 6 июнь куни Анқарада мезбон президент Ражаб Тоййиб Эрдўғон билан биргаликда икки давлат ўртасидаги Кенг қамровли стратегик шерикликни чуқурлаштириш тўғрисида қўшма декларацияни имзолади.

Бундан ташқари, президент матбуот хизмати маълумотига кўра, икки президент ҳузурида кўп қиррали шерикликнинг қатор соҳаларини қамраб олган 19 та ҳужжат имзоланган. Илмий алмашинув ва юқори технологиялар соҳасида ҳамкорлик тўғрисида битим, Ҳудудий ривожланиш соҳасидаги ҳамкорликни мустаҳкамлаш тўғрисида битим, Ўзбекистоннинг ЖСТга аъзо бўлишида техник кўмак кўрсатиш бўйича ҳамкорлик тўғрисида баённома, Космик фанлар, технологиялар ва тадқиқотлар соҳасида ҳамкорлик тўғрисида баённома, Қишлоқ хўжалиги таълими соҳасидаги ҳамкорлик тўғрисида баённома, Энергетик ривожланиш соҳасидаги ҳамкорлик тўғрисида баённома, Ахборот соҳасидаги ҳамкорлик тўғрисида баённома, Кадастр масалалари бўйича ҳамкорлик тўғрисида баённома, Туризм соҳасидаги ҳамкорлик тўғрисида баённома, Оила институти ва хотин-қизларни қўллаб-қувватлаш соҳасидаги ҳамкорлик тўғрисида баённома, Бошқарув кадрларини тайёрлаш соҳасидаги ҳамкорлик тўғрисида баённома ва бошқалар шулар жумласидандир.

Шу билан бирга, тадбирда имтиёзли савдо, энергетика бозорини тартибга солишга оид икки томонлама ҳужжатлар ҳамда Қишлоқ хўжалиги соҳасидаги ҳамкорликни кенгайтириш бўйича чора-тадбирлар режаси қабул қилинган.

Ҳужжатларни имзолаш маросимидан сўнг Эрдўғон ва Мирзиёев Анқарада ўтказилган Стратегик ҳамкорлик кенгашининг учинчи йиғилиши якунлари бўйича оммавий ахборот воситалари вакиллари учун баёнот беришган.

Ўзаро илтифотларга тўла нутқлар давомида мезбон президент ҳам, меҳмон президент ҳам асосан Туркия билан Ўзбекистон ўртасидаги стратегик шерикликнинг бугуни ва истиқболи тўғрисида сўзлашган.

Хусусан, Ўзбекистон президенти ўз сўзида: “Биз ҳамкорликнинг янги, янада мустаҳкам кўприкларини қураяпмиз. Ҳеч шубҳасиз, Ўзбекистон-Туркия Стратегик ҳамкорлик кенгаши йиғилиши ҳозирги вақтда алоқаларимиз тарихида янги саҳифа очмоқда. Бундай юксак даражадаги мулоқот формати ўзаро ишонч ва ҳурматнинг олий ифодасидир”, деган.

Ўзбекистон президенти ўз нутқи давомида Фаластин-Исроил муаммосини тинч йўл билан ҳал қилиш зарурлигини урғулаган.

Барқарор ва узоқ муддатли тинчликка эришиш учун мустақил ва озод Фаластин давлати ташкил этилиши шарт”, деган Шавкат Мирзиёев.

Журналистлар учун уюштирилган брифингда Мирзиёев ҳам, Эрдўғон ҳам Туркияга келаётган ўзбекистонликлар рўбарў бўлаётган муаммолардан сўз очмаган. Бироқ, президент матбуот хизмати маълумотига кўра, аввалроқ Туркия ва Ўзбекистон президентлари ўртасидаги тор доирада бўлиб ўтган учрашувда “икки давлат фуқароларининг борди-келдиси учун энг қулай шароитларни яратиш зарурлигига алоҳида эътибор қаратилган”.

Тор доирадаги мазкур учрашув чоғида яна олдига товар айирбошлашни 5 миллиард долларга етказиш, жумладан, Имтиёзли савдо битими доирасида маҳсулот турларини кенгайтириш вазифаси қўйилган. Шунингдек, Истанбул шаҳрида Ўзбекистоннинг савдо ваколатхонасини ташкил этиш бўйича келишувга эришилган.

Учрашувда томонлар хавфсизлик ва мудофаа, терроризм, экстремизм ва радикализмга қарши курашиш соҳасида ҳамкорликни янада мустаҳкамлаш ва мувофиқлаштириш зарурлиги таъкидлашган ҳамда ўзаро фаол маданий-гуманитар алмашинувларни давом эттиришга келишиб олишган.

Тор доирадаги учрашув ортидан икки президент раислигида Ўзбекистон-Туркия Ишбилармонлар кенгашининг биринчи йиғилиши бўлиб ўтган.

Тадбирда Ўзбекистон томонидан "Global Textile", "ProCab", "Agromir Group", "ERIELL Group", "Akfa Holding", "Murad Buildings", "SAG", "BMB Holding", "Uzbekistan Hydrogen" компаниялари, Туркия томонидан эса "Çalık", "Cengiz", "Acibadem", "Eczacıbaşı", "Anadolu Group", "Aksa Energy", "Zorlu", "Kalyon", "Onur Group" каби холдинг компаниялари иштирок этишган.

Мирзиёев ва Эрдўғон икки давлат Ишбилармонлар кенгашининг тузилиши икки томонлама муносабатлар ривожи янги босқичга кўтарилганининг рамзи эканини таъкидлашган.

Мазкур тадбирлар аввалида Ўзбекистон президенти “Turkish Aerospace Industries Inc.” компанияси фаолияти билан танишган. Ташриф давомида Мирзиёев учун Туркия мудофаа саноатининг кенг турдаги қурол-аслаҳа ва ҳарбий техникани ишлаб чиқиш ва ишлаб чиқаришга ихтисослашган бошқа корхоналари фаолияти тақдимоти уюштирилган ҳамда авиация техникасининг намойиш парвозлари ҳам ўтказилган.

Анқарага ташриф ниҳоясида Шавкат Мирзиёев Ражаб Тоййиб Эрдўғон қўлидан "Туркия Республикаси нишони"ни қабул қилиб олган. Қайд этилишича, мазкур орден Туркия билан дўстона муносабатларни ривожлантиришга катта ҳисса қўшган давлат арбобларига берилади. Бунинг ортидан икки президент рафиқалари билан Туркия халқ амалий санъати ва таомлари кўргазмасига боришган.

Шу билан ташриф тадбирлари якунланган ҳамда Тошкентга йўл тутган Мирзиёев ва рафиқасини "Эсенбўға" аэропортида Эрдўғон ва рафиқаси кузатиб қўйган.

Ўзбекистон, Хитой ва Қирғизистон темир йўлга оид битимни имзолади

“Хитой — Қирғизистон — Ўзбекистон” темир йўли қурилиши тўғрисидаги битимни имзолаш маросимидан лавҳа, Пекин, 2024 йил 6 июни
“Хитой — Қирғизистон — Ўзбекистон” темир йўли қурилиши тўғрисидаги битимни имзолаш маросимидан лавҳа, Пекин, 2024 йил 6 июни

Хитой пойтахти Пекин шаҳрида 6 май куни “Хитой — Қирғизистон — Ўзбекистон” темир йўли бўйича стратегик лойиҳани амалга ошириш тўғрисидаги битимни имзолаш маросими ўтказилган.

Мазкур битимни Ўзбекистон томонидан транспорт вазири Илҳом Маҳкамов, Хитой томонидан Тараққиёт ва ислоҳотлар бўйича давлат қўмитаси раиси Шаньцзе, Қирғизистон томонидан эса транспорт ва коммуникациялар вазири Тилек Текебаев имзолаган.

Президент матбуот хизмати маълумотига кўра, шу муносабат билан Ўзбекистон президенти Шавкат Мирзиёев Пекиндаги маросим иштирокчиларига видеомурожаат йўллаган. Шу каби мурожаатлар ХХР раиси Си Цзиньпин ва Қирғизистон президенти Садир Жапаровдан ҳам йўлланган.

Ўз мурожаатида Мирзиёев уч давлат ўртасидаги темир йўли Хитойни Марказий Осиё минтақаси билан боғловчи энг қисқа қуруқлик йўлига айланиши, келгусида бу йўл уч мамлакатга истиқболли Трансафғон йўлаги орқали Жанубий Осиё ва Яқин Шарқ давлатларининг кенг бозорларига чиқиш имконини беришини урғулаган.

Ўзбекистон президентига кўра, мазкур лойиҳанинг амалга оширилиши оқибатида вужудга келадиган иқтисодий самара янги корхоналар ва ўн минглаб иш ўринлари яратилиши, ўзаро савдо ҳажми каррасига ошиши, саноат кооперацияси кенгайиши, инвестициявий жозибадорлик ўсиши ва энг муҳими – аҳоли турмуш даражаси ошида намоён бўлади.

Қурилажак темир йўл, келишувга кўра, Қашғар – Тўруғарт – Мақмал – Жалолобод – Андижон йўналиши бўйлаб ўтади.

Қирғизистон президент Садир Жапаров бундан бир ой муқаддам “Хитой — Қирғизистон — Ўзбекистон” темир йўли шу йил октябрида бошланиши мумкинлиги ҳақида билдирган эди. Ўшанда Жапаров ҳозирда Қирғизистон логистика нуқтаи назаридан “боши берк кўча”даги давлат бўлиб ҳисобланиши, дунёга чиқиш учун у Қозоғистон ва Россия темир йўлларидан фойдаланишга мажбурлигини қайд эта туриб, “темир йўл қуриб битказилганидан кейин биз дунёга чиқа оламиз”, дея таъкидлаган эди.

Лойиҳа якунига етказилган тақдирда бу йўл орқали йилига 15 миллион тоннагача юк ташилиши мумкинлиги, товарларни харидорларига етказиш муддати эса бир ҳафтага қисқариши тахмин қилинмоқда.

ТММА Қозоғистондаги ўзбекларни миграцион рейдлардан огоҳлантирди

Қозоғистон жанубида қўлга олинган хорижлик мигрантлар (архив сурати)
Қозоғистон жанубида қўлга олинган хорижлик мигрантлар (архив сурати)

Ўзбекистон Ташқи меҳнат миграцияси агентлиги (ТММА) Қозоғистонда юрган ўзбекистонлик муҳожирларни миграция қоидаларига риоя қилишни сўради.

Агентлик қайдича, 3 июндан бошлаб Қозоғистоннинг барча ҳудудларида миграция соҳасида ҳуқуқбузарликни аниқлаш мақсадида “Нелегал-2024” рейд тадбирлари ўтказиляпти.

Ушбу рейд тадбирлари давомида Қозоғистон ҳудудида қонуний бўлиб туриш ва қонуний меҳнат миграцияси тартибини бузган чет эл фуқароларига нисбатан тегишли чоралар кўрилмоқда”, дейилган хабарномада миграцион қонунбузарлик ҳолатлари Олмаота, Остона, Чимкент шаҳарлари ва Мангистау вилоятида кўп учраётганини қўшимча қилинган.

Агентлик ўзбекистонликлар Қозоғистон ҳудудида 30 кунгача юриши мумкинлиги, бироқ бу давр мобайнида улар меҳнат фаолиятини амалга ошира олмасликлари, пул топиш мақсадида бу мамлакатга борган шахсдан дарҳол ишлаш учун ва вақтинча яшаш учун рухсатнома олиш талаб этилишини эслатган.

Қозоғистонда ноқонуний миграцияга қарши рейдлар ўтказилаётгани ҳақида маҳаллий матбуот ҳам ёзмоқда. Хусусан, Zakon.kz онлайн-нашри хабарига кўра, Олмаота шаҳрида ўтказилган рейд давомида мамлакат миграцион қонунчилигини бузган 27 нафар ўзбекистонлик қўлга олинган.

Олмаота шаҳар полиция департаменти томонидан 5 июнь куни тарқатилган маълумотда келтирилишича, текширув чоғида хорижликларнинг тўққиз нафари ёнидан шахсини тасдиқловчи ҳужжат чиққан эмас.

Давомини ўқинг

XS
SM
MD
LG