Линклар

Шошилинч хабар
29 март 2024, Тошкент вақти: 06:27

Jizzaxda seldan kamida 5 odam halok bo‘ldi, o‘nlab uyni suv yuvib ketdi


Forish tumanida sel uylarni vayron etgan.
Forish tumanida sel uylarni vayron etgan.

O‘zbekiston Favqulodda vaziyatlar vazirligining ma’lum qilishicha, Jizzax viloyatida so‘nggi sutkada yuz bergan sel oqibatida halok bo‘lganlar soni 5 kishiga yetgan.

Shuningdek, sel avtomashinalarni oqizib ketgan, uy va ekinzorlarni vayron etgan.

Forish tumanining tabiiy ofatdan eng ko‘p ziyon ko‘rgan “Egizbuloq” qishlog‘ida 100 dan ortiq odam boshpanasiz qolgan, ular qarindoshlarining uylariga va tumandagi ikkita kollej binosiga vaqtinchalik yashash uchun ko‘chirilgan.

O‘zbekiston Favqulodda vaziyatlar vazirligiga ko‘ra, 20-aprel kungi kabi kuchli sel mamlakatning bu hududlarida so‘nggi 80 yil ichida ilk bor kuzatilgan.

O‘zbekiston Favqulodda vaziyatlar vazirligining Jizzax viloyatidagi boshqarmasi xodimi Ozodlikka tabiiy ofatdan o‘lim holatlarining barchasi "Egizbuloq" qishlog‘ida qayd etilganini aytdi.

“O‘lganlar soni 5ta bo‘ldi, to‘rt erkak va bir ayol halok bo‘ldi. O‘lim holatlarining hammasi Forishning "Egizbuloq" qishlog‘idan. Shu qishloqda yana olti odam qutqarib olindi, Forish tumani kasalxonasiga yotqizildi. Joylarda qutqaruvchilarimiz ishlayapti. Tabiiy ofat zarari o‘rganilyapti”, - dedi FVV mulozimi.

21-aprel kuni ertalab vazirlik Forish tumanida tabiiy ofatdan 4 kishining nobud bo‘lgani, bir kishi bedarak ketgani, olti kishining esa jarohat olgani haqda xabar bergandi.

Ijtimoiy tarmoqlarda tarqalgan videolardan birida sel “Jiguli” avtomobilini oqizib ketayotganini ko‘rish mumkin.

Forish tumanida sel avtomashinalarni ham oqizib ketgan.
Forish tumanida sel avtomashinalarni ham oqizib ketgan.

Bu hodisa ham Forish tumanida kuzatilgan.

“Maktab devorlari qulagan. Mana qarang, mana bu binoni birinchi etaj derazasigacha suv ko‘tarilgan”, - deydi videolavhada kadr ortidan gapirgan kishi.

"Qoramol va qo‘ylarni ham suv oqizib ketdi"

Forish tumanidagi ismi ochiqlanmasligini istagan mahalla faollaridan biri Ozodlikka yuzdan ziyod xonadon vayron bo‘lgani, sel uy hayvonlarini ham oqizib ketganini aytdi.

“Kecha to‘xtovsiz sharros yomg‘ir bo‘lib, kuchli sel yo‘lda uchragan narsalarni oqizib ketdi. Tumanimizda yuzdan ortiq xonadon vayron bo‘ldi. Ayrimlarini devorlari qulab tushgan. Boshpanasiz qolgan aholi tumandagi ikkita kollej binosiga ko‘chirildi. Bizni tuman chorvachilikka ixtisoslashgan tuman-da. Qoramol va qo‘ylarni ham suv oqizib ketgan, yo‘qotishlar ko‘p. Sonini aniq aytolmaymiz. Biz hozir hashardamiz. Boshqa viloyatlardan yordamchilar kelgan. Oziq-ovqat tarqatishyapti. Respublika MChSidan odamlar shu yerda ishlayapti”, - deydi mahalla faoli.

Jizzaxda sel 5 odamning o‘limiga sabab bo‘ldi.
Jizzaxda sel 5 odamning o‘limiga sabab bo‘ldi.

"Bir oylik yomg‘ir 1 yarim soatda yog‘di"

Jizzaxning G‘allaorol tumanida esa sel ko‘prik, ekin yerlari va yo‘llarni yuvib ketgan. Mahalliy fermerlardan biri Ozodlikka o‘ndan ziyod qoramol va qo‘y-qo‘zilari nobud bo‘lganini aytdi.

“Ekish mavsumida sel yerlarni yuvib ketdi. Yerlarni qaytadan ekinga tayyorlab, boshqatdan qilishga to‘g‘ri keladi. Qoramol va qo‘y-qo‘zi nobud bo‘ldi, o‘ndan ko‘p hayvonni yo‘qotdik. Jonimiz omon qolganiga shukur qilyapmiz’, - deydi fermer.

O‘zbekiston Favqulodda vaziyatlar vazirligiga ko‘ra, 20-aprel kuni kuchli sel Qashqadaryo, Navoiy va Samarqand viloyatlarida ham kuzatilgan.

"Samarqand viloyatidan 222 ta, Jizzax viloyatidan 14 ta, Navoiy viloyatidan 10 ta, Qashqadaryo viloyatidan 1 ta jami 280 dan ortiq murojaat kelib tushgan. Barcha murojaatlar bo‘yicha, jumladan, sel oqimlari, suv toshqinlari va ularning oqibatlarini bartaraf etish uchun yong‘in-qutqaruv bo‘linmalaridan 92 ta maxsus texnika, 20 ta motopompa hamda 758 nafar qutqaruvchi jalb etildi", - deyiladi FVV rasmiy bildiruvida.

Jizzaxning G‘allaorol tumanidan o‘tuvchi Samarqand- Jizzax magistral yo‘lining ba’zi qismlari ham suv ostida qolgan. Poyezdlar qatnovi bir necha soat to‘xtab qolgan.

Samarqand yo‘llarida suv to‘planishi avtomobillar qatnoviga halal qilgan.
Samarqand yo‘llarida suv to‘planishi avtomobillar qatnoviga halal qilgan.

Samarqand shahri va tumanlari avtomobil yo‘llarida suv to‘planib qolishi avtomobillar qatnoviga halal qilgan.

O‘zbekiston Gidrometeorologiya markazi ma’lumotiga ko‘ra, chorshanba kuni yoqqan bir yarim soatlik jala bir oylik yog‘ingarchilik miqdorini tashkil etgan.

O‘zbekistonda sel va ko‘chkilar bahor oylarida bo‘lib turadi. Lekin O‘zbekiston Favqulodda vaziyatlar vazirligiga ko‘ra, 20-aprel kungi kabi kuchli sel mamlakatning bu xududlarida so‘nggi 80 yil ichida ilk bor kuzatilgan.

XS
SM
MD
LG