Линклар

Шошилинч хабар
08 декабр 2022, Тошкент вақти: 17:01

Ўзбекистон хабарлари

Жорий ҳафта охиридан Тошкентда иситиш мавсуми бошланади

Тошкент шаҳри ҳокими қарорига асосан пойтахтда 22 октябрдан эътиборан иситиш мавсуми бошланади. Бу ҳақда пойтахт ҳокимлиги матбуот хизмати маълум қилди.

Тошкентдаги марказлашган иссиқлик таъминотидан фойдаланувчи истеъмолчиларни иссиқлик билан таъминлаш мақсадида 19 октябрдан иссиқликнинг айланма ҳаракати йўлга қўйилади.

22 октябрдан ижтимоий соҳа объектлари, 24 октябрдан эса кўп қаватли тураржой биноларини босқичма-босқич иссиқлик энергияси билан таъминлашга киришилади.

Сўнгги кунларда Ўзбекистонда ҳаво ҳароратини кескин тушиши кузатилмоқда. Наманган, Жиззах, Қашқадарё, Навоий вилоятларида аллақачон биринчи қор ёғди.

Ижтимоий тармоқларда Тошкентда тезроқ иситиш тизимини ишга тушириш борасида талаблар янграётган эди.

Кун янгиликлари

Президент Мирзиёевнинг Қирғизистонга ташрифи қолдирилди

Қирғизистон Ташқи ишлар вазирлиги Ўзбекистон президенти Шавкат Мирзиёевнинг Бишкекка ташрифи бошқа кунга қолдирилгани тўғрисида хабар берди. Мирзиёевнинг Қирғизистонга давлат ташрифи 10 декабрда бўлиши кутилаётган эди.

Ташқи ишлар вазирлиги билдирувида айтилишича, Ўзбекистон президенти йил охиригача Қирғизистонга ташриф қилади. Лекин бу ташриф қачон амалга оширилиши ҳозирча аниқ эмас. Расман билдирилишича, бундай қарор икки давлат президентларининг телефон орқали мулоқоти пайтида қабул қилинган.

“Бишкекда ўтадиган Евросиё иқтисодий кенгаши саммитига Ўзбекистон бош вазири Абдулла Арипов келади”, дейилади вазирлик билдирувида.

Евросиё иқтисодий кенгаши саммити 9 декабрда бўлиб ўтади.

Бир неча кун олдин Қирғизистон президенти маъмуриятининг ташқи сиёсат бўлими бошлиғи Ўзбекистон президенти 10 декабрда Бишкекка давлат ташрифи билан келишини билдирган эди.

«Газета.uz» ҳам Ўзбекистон президенти Администрациясидаги манбага таянган ҳолда Шавкат Мирзиёевнинг “Қирғизистонга давлат ташрифи Қирғизистон расмийлари айтганидек, шу ҳафта эмас, балки шу ой охирида бўлиб ўтади”, деб билдиргани тўғрисида хабар берди.

Ўзбекистон Ҳайратон - Мозори Шариф темир йўли бошқарувидан маҳрум этилганини рад этди

Ҳайратондаги "Дўстлик" кўприги- март, 2016.

Ҳайратон — Мозори Шариф темир йўлини бошқариш Қозоғистоннинг Mansour Fatih ширкатига берилди, деб хабар берди Tolo News. Бироқ “Ўзбекистон темир йўллари” бу хабарни рад этмоқда.

Tolo News хабарида айтилишича, Ҳайратон — Мозори Шариф темир йўлини бошқариш юзасидан Қозоғистон ширкати билан шартнома имзоланган.

Шартномани имзолаган Афғонистон темир йўл бошқармаси раҳбари вазифасини бажарувчи Бахт Раҳмон Шарафат: “Биз бу ширкатга йилига 4,1 миллион доллар тўлайдиган бўлдик. Ўзбекистоннинг “Сўғдиёна транс”ига эса 15 миллион тўлар эдик. Бунинг эвазига “Сўғдиёна транс” Ҳайратонгача бўлган 22 километрга хизмат қўрсатар эди. Янги ширкат эса 106 километрга хизмат кўрсатади”, деб айтган.

Mansour Fatih ширкати раҳбари ўринбосари Бисенбай Маханов эса “Биз шартномани тендер орқали ютиб олдик”, деб билдирган ва эҳтиёждан келиб чиққан ҳолда мазкур йўналишдаги ходимлар сони кўпайтирилишини маълум қилган.

“Ўзбекистон темир йўллари” 2010 йил ноябрида лойиҳавий қиймати 129 миллион долларга баҳоланган 75 километрлик мазкур линияни қуриб битирганини билдирганди.

“Ўзбекистон темир йўллари”нинг “Сўғдиёна транс” шўъба корхонаси 2011 йил декабрда Ҳайратон-Мозори Шариф темир йўлини бошқариш ва таъмирлаш мақсадида ташкил этилган эди.

“Ўзбекистон темир йўллари” Ҳайратон — Мозори Шариф темир йўлини бошқариш ҳуқуқидан маҳрум бўлганини рад этувчи баёнот берди.

Расман билдирилишича, 5-6 декабрь кунлари Афғонистон темир йўл бошқармаси билан Ҳайратон-Мозори-Шариф темир йўл участкасидан фойдаланиш бўйича 2023 йилга мўлжалланган музокаралар бўлиб ўтган.

“Музокаралар якунида Афғонистон ҳудудидаги темир йўлларга хизмат кўрсатиш (эксплуатация)да иштирок этиш учун афғонистонлик маҳаллий техник ходимларини босқичма-босқич жалб қилиш бўйича амалдаги шартномани узайтириш ва йўл харитасини тайёрлаш бўйича келишувга эришилди”, дейилади баёнотда.

“Ўзбекистон темир йўллари”нинг билдиришича, бундан олдин ҳам айни мана шу мавзуда асоссиз маълумотлар тарқатилган ва буни Афғонистон темир йўл бошқармаси раҳбари вазифасини бажарувчи Бахт Раҳмон Шарафат расман рад этган.

Энергия муаммосини ҳал этиш учун Бош вазир раислигида ишчи гуруҳ тузилди

ЎзАнинг 8 декабрда хабар беришича, президент Шавкат Мирзиёев топшириғига асосан, Бош вазир Абдулла Арипов раислигида энергия муаммоларини тезкор ўрганиш ва ҳал қилиб бориш бўйича ҳукумат ишчи гуруҳи тузилади.

Ишчи гуруҳга энергия тақчиллиги муносабати билан юзага келган вазиятни қисқа муддатларда чуқур таҳлил қилиш ва аниқланган камчиликларни бартараф қилиш бўйича тезкор чоралар кўриб бориш вазифаси юкланди.

Бундан ташқари гуруҳ электр ва газни биринчи навбатда аҳолига етказиб бериш заруриятини эътиборга олган ҳолда, мавжуд энергия ресурсларини мувозанатли тақсимлаб боради ва назорат қилади.

Гуруҳга муқобил энергия билан аҳолини ва ижтимоий соҳа объектларини узлуксиз таъминлаш ишларини жадаллаштириш, ижтимоий объектларнинг барқарор фаолият юритишини таъминлаш учун зарур маблағларни ажратиш, уларнинг мақсадли ишлатилишини назорат қилиш, энергия тақчиллиги ва унинг оқибатида юзага келадиган салбий оқибатлар, айниқса иқтисодиётга таъсирини камайтириш мақсадида, комплекс чора-тадбирлар кўриш юзасидан асосланган таклифлар ишлаб чиқиш ва кўриб чиқиш вазифаси ҳам юклатилди.

Президент администрациясида энергетик коллапсдан чиқиш йўллари муҳокама этилди

Ўзбекистонда энергетик коллапсдан чиқиш йўллари президент администрацияси раҳбари Сардор Умрзоқов 7 декабрда ўтказган йиғилишда кўриб чиқилди.

Йиғилишда президент маслаҳатчилари ва бош вазир ўринбосарлари вилоятларга бириктирилди ва уларга газ, электр энергияси, кўмир таъминотини яхшиланишини назорат қилишга кўрсатмаси берилди.

Бундан ташқари Энергетика вазирлиги, Иқтисодий тараққиёт ва камбағалликни қисқартириш вазирлиги, Инвестициялар ва ташқи савдо вазирлигида кун-тун ишлайдиган штаблар ташкил этиш топширилди. Уларга аҳоли ва иқтисодиёт тармоқларини энергия ресурслари билан мутаносиб таъминлаш масалаларини тезкор ва тизимли ҳал этиш топширилди.

Йиғлишида вилоятларга қўшимча табиий газ, суюлтирилган газ, электр энергияси ва кўмир етказиб бериш масаласи ҳам муҳокама қилинди.

Энергетика тармоғида юзага келган вазиятни енгиллаштириш учун товар газ етказиб бериш ҳажмини суткасига 5 миллион куб метрга оширишга қарор қилинди.

Шунингдек, 2023 йил 1 мартга қадар давлат идоралари тасарруфидаги сиқилган газда ҳаракатланадиган автомобиллардан фойдаланишни тақиқлаш, уларни бензинга ўтказиш;

хорижий давлатлар билан қўшимча табиий газ, электр энергияси, кўмир, мазут харид қилиш бўйича музокараларни жадаллаштириш;

2 ой муддатга Аи-80 бензини импорти учун акциз солиғи ва уни чакана сотиш учун акциз солиғини ҳисоблаш ва ундиришни тўхтатиб туриш;

биржа сотувларига қўйилаётган Аи-80 бензининг кунлик ҳажмини ошириш;

Аи-80 бензини нархининг асоссиз оширилишига йўл қўймаслик, нарх ошиши бошланғич нархнинг 5 фоизидан ортиқ бўлмаслигини таъминлаш.

Тегишли соҳа ва тармоқлар раҳбарларига шу ва бошқа топшириқлар ижросини сўзсиз таъминлаш, қилинган ишлар юзасидан кунлик ҳисобот киритиб бориш топширилди.

Самарқандда 2 минг йиллик қозон топилди – у 29 йилдан буён маҳаллий турғун рўзғорида ишлатиб келинган

Пайариқ туманида топилгани айтилаётган бронза қозон (Маданий мерос агентлиги фотосурати)

Самарқанд вилоятининг Пайариқ туманида милоддан аввалги II–I асрга оид бўлган бронза қозони топилган. Самарқанд давлат музей-қўриқхонаси бош муҳофизи Маҳмудхон Юнусовнинг ёзишича, топилдиқ сак қабилалари томонидан ишлатиб келинган.

Аниқланишича, мазкур қозон аслида туманнинг Муҳаммадий қишлоғи турғуни Анвар Шоғдоров томонидан 1993 йили топилган. Ўша пайтда мактаб директори бўлиб ишлаган Шоғдоров бронза буюмни Қароқчи тоғи ва Тешиктепа археологик ёдгорлиги оралиғидаги адирдан канал қазиш вақтида топиб олинганини айтган. Шундан кейин қозонни топиб олганлар унинг ноёблигини билишмагани учун ундан уй-рўзғор ишларида фойдаланиб келишган.

Қайд этилишича, қозоннинг баландлиги 37 сантиметр, оғиз қисмининг диаметри 52 сантиметрни ташкил этади.

“Ушбу ҳудудда бронза қозонларнинг аниқланиши биринчи марта эмас. Қароқчи тоғининг Қўшработ туманидан ўтган қисми ён бағрида жойлашган Сирлибойтепадан, Пайариқ туманидаги Кўктепа археологик ёдгорлигидан ҳам сакларга оид бронза қозонлар топилган. Шунингдек, 2017 йилда Каттақўрғон туманининг Оқтов тоғларига туташ Йилқиҳайдар қишлоғидан ҳам маҳаллий аҳоли томонидан топилган сакларнинг бронза қозони музей-қўриқхонага топширилган”, дейилган М. Юнусовнинг Маданий мерос агентлиги сайтида ёйинланган мақоласида.

Қирғизистон жанубида ўзбекистонликка қарашли автомобиль ёниб кетди

Қирғизистоннинг Боткен вилояти Қадамжой туманида ўзбекистонлик ҳайдовчига тегишли автомобиль номаълум сабабларга кўра портлаб, ёниб кетган. Бу ҳақда Kaktus нашри Боткен вилоят ИИБдан олинган маълумотга таянган ҳолда хабар қилди.

Қайд этилишича, 6 декабрь куни ўзбекистонлик ҳайдовчи ўзининг Lasetti машинасида Риштон-Сўх автойўлидан келаётган пайтда мазкур йўлнинг 16-километрида (Мингчинор қишлоғи ҳудуди) автомобиль портлаган.

Ҳодиса чоғида машина ичида тўрт нафар ўзбекистонлик бўлгани, уларнинг ҳеч бирига шикаст етмагани айтилмоқда.

Аниқлик киритилишича, машинага газ жиҳозлари ўрнатилган бўлган. Айни пайтда ҳодиса юзасидан текширув ишлари олиб борилмоқда.

Мирзиёев Конституция куни муносабати билан 400 дан зиёд маҳкумни афв этишга оид фармонни имзолади

Ўзбекистон президенти Шавкат Мирзиёев 7 декабрь куни Конституция қабул қилинганлигининг 30 йиллиги муносабати билан 402 нафар маҳкумни афв этиш тўғрисидаги фармонни имзолади.

Президент матбуот хизмати томонидан мазкур фармонга берилган шарҳда афв этилган шахсларнинг 128 нафари жазодан тўлиқ озод қилиниши, 201 нафари жазони ўташдан муддатидан илгари шартли озод қилиниши, 15 нафарига тайинланган жазо енгилроқ жазо билан алмаштирилиши, умумий ҳисобда 223 нафар шахс жазони ижро этиш муассасаларидан озод қилинаётгани, 121 нафар шахс пробация органлари назоратидан чиқарилаётгани айтилган. Шунингдек, 58 нафар шахсга тайинланган
қамоқ жазолари муддати қисқартирилиши қайд этилган.

Фармон билан афв этилганларнинг 17 нафарини чет эл фуқаролари, 26 нафарини 60 ёшдан ошган эркаклар, 63 нафарини аёл ҳамда 19 нафарини тақиқланган ташкилотлар фаолиятида қатнашган шахслар ташкил этади.

Конституция куни арафасида Ш. Мирзиёев афв тўғрисида фармон имзолагани ҳақида аввалроқ президентнинг матбуот котиби Шерзод Асадов Газета.uz нашрига маълум қилган эди.

Ўзбекистонда ҳар йили Конституция куни муносабати билан “тузалиш йўлидаги” маҳкумларни афв қилиш одат тусига кирган. Ўтган 2021 йилда президентнинг афв фармони билан 182 нафар шахс муддатидан олдин қамоқдан озод қилинган эди. 2020 йили эса Ш. Мирзиёев 104 нафар фуқарони афв этишга оид фармонни имзолаган.

Энергетика вазири “жиддийроқ талафотларни олдини олиш” учун чекловлар киритилганини айтди

Ўзбекистон бош вазири ўринбосари – энергетика вазири Жўрабек Мирзамаҳмудов газ ва электр энергияси таъминотидаги узилишларни изоҳлар экан: “Шу об-ҳаво шароитида режали чекловлар киритган ҳолда [вазиятдан] чиқиб кетмасак, эртага бундан-да жиддийроқ талафот бўлиши мумкин. Шунинг учун бундай кескин чоралар кўришга мажбурмиз”, – деб айтди. Бу борада "Кун уз" хабар берди.

Вазир Фарғонанинг Ўзбекистон туманидаги “Шўрсув цемент” заводи ишчиларининг инжтимоий тармоқлардаги мурожаатига ҳам жавоб қайтарди. Ишчилар мурожаатларида завод газдан узилгани сабабли ўн мингта ишчи ишсиз қолганини айтган эдилар.

“Фарғонадаги ҳолатга келадиган бўлсак, яна бир бор таъкидлаб ўтамиз, бошқа алтернатив ёқилғида ишлаши мумкин бўлган барча объектлар ҳаво кескин шунақа пайтда тармоқдан узилади. Бу ерда бироз бўрттириб гапирилган, 10 мингта [ишчи ишсиз қоляпти] деб. Бу цемент ишлаб чиқариш корхонасининг 10 мингта эмас, юздан сал ошиқроқ ишчилари бўлган”, - деб иқтибос келтирди вазир сўзларидан нашр.

Энергетика вазирлиги октябрь ойида қишда аҳолига ўтган йилгидан кўпроқ электр беришни ваъда қилган эди.

Энергетика вазирлигининг расмий сайтида куз-қиш масумида ўзбекистонлик истеъмолчиларга 34 млрд 918 млн киловатт-соат электр энергияси етказиб берилиши ва бу ўтган йилнинг мос даврига солиштирганда 2 млрд 540 млн киловатт-соатга кўплиги қайд этилганди. Вазирликка кўра, аҳолига етказиб бериладиган электр энергияси миқдори 10 млрд 938 млн киловатт-соатни ташкил этади.

“Бош вазир ўринбосари, энергетика вазири Жўрабек Мирзамаҳмудов 10 октябрда ўтказган йиғилишда куз-қиш даврида истеъмолчиларга жами 30,6 млрд куб метр табиий газ етказиб берилиши қайд этилди. Унинг 10,4 млрд куб метри аҳолига ва 20,2 млрд куб метри иқтисодиёт тармоқларига берилади”,дейилган эди расмий хабарда.

Трансафғон темир йўли 8 миллиард доллардан кўпроққа тушиши мумкин

Иллюстратив сурат

Покистон “Термиз – Мозори-Шариф – Кобул – Пешовар” темир йўли қурилишини 8,2 миллиард долларга баҳолади. Бу ҳақда Samaa нашри хабар қилди.

Лойиҳанинг янги муҳтамал қийматини Покистон Темир йўллар вазирлиги котиби Зафар Ранжа эълон қилган.

Ўтган йилнинг февраль ойида Ўзбекистон, Афғонистон ва Покистон Тошкентда Трансафғон темир йўли қурилиши бўйича йўл харитасини имзолаган. Ўша пайтда лойиҳа қиймати 5 миллиард долларга баҳолангани, 600 километрга узанган темир йўл Ўзбекистон ва минтақа давлатлари учун Покистон денгиз бандаргоҳларига йўл очиши айтилган.

Аввалроқ мазкур уч давлат шу йил 18 июлидан “Термиз – Пешовар” темир йўли лойиҳасини амалга оширишга киришгани хабар қилинган.

Темир йўлини қуриш лойиҳаси 2018 йилда эълон қилинган, қурилиш эса 2021 йилнинг сентябрида бошланиши эълон қилинганди. Бироқ 2021 йилнинг 15 август куни Толибон Афғонистонда ҳокимиятни эгаллаб олгани ортидан лойиҳани амалга ошириш муддати кечиктирилган.

Нодир қўлёзмалар йўқолганида айбланиб 5 йилга қамалган кутубхона директори 2 ойда озодликка чиқди

Нодир қўлёзмалар йўқолганида айбдор деб топилган Ўзбекистон Миллий университетининг Ахборот ресурс маркази директори Ирина Кислицина биринчи инстанция суди қарори чиққанидан икки ой ўтар-ўтмас қамоқдан озод этилди. Бу ҳақда Тошкент шаҳар судлари телеграм-канали маълумот тарқатди.

Мулозима Мирзо Улуғбек туман судининг шу йил 10 октябрида чиқарилган ҳукми билан 5 йилу 1 ойга қамалган ҳамда 2 йил муддатга мансабдорлик ва моддий жавобгарлик юклатилган лавозимларда ишлаш ҳуқуқидан маҳрум этилган эди. У Ахборот ресурс маркази “Шарқий” фондининг умумий баҳоси 2 миллиард 656 миллион 600 минг сўм қийматга эга ноёб – 57 та тарихий қўлёзма асари, ХIII-XIX асрларга оид 12 та тошбосма ва 9 та тарихий ҳужжатни талон-торож қилинишида айбдор деб топилган эди.

Олтинчи декабрь куни Тошкент шаҳар судининг жиноят ишлари бўйича судлов ҳайъати апелляция инстанциясида Ирина Кислицинанинг апелляция шикояти кўриб чиқилган.

Судда судланувчининг айбловидаги китобларни ўзлаштирганлиги тасдиқланмаганлиги, балки у ўз мансаб вазифаларини лозим даражада бажармаганлиги ўз тасдиғини топганлиги сабабли биринчи инстанция суди ҳукми ўзгартирилиб, унинг ҳаракатлари Ўзбекистон Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми “а” бандидан 207-моддаси (мансабга совуққонлик билан қараш) 1-қисмига қайта квалификация қилинган.

Пировардида Ахборот ресурслар маркази директорига ўташ учун узил-кесил 6 ой 23 кун озодликни чеклаш ҳамда 2 йил муддатга мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиш жазоси тайинланган. Судланувчидан ЎзМУ фойдасига 2 миллиард 642 миллион 600 минг сўм миқдоридаги моддий зарар ҳам ундирилмайдиган бўлган, Ирина Кислицинанинг ўзи эса суд залидан озод қилинган.

Фарғонада қиморга ютқазган профилактика инспектори ўзини отиб қўйди

Иллюстратив сурат.

Фарғона вилоятининг Тошлоқ туманида қиморга 45 миллион сўм бой берган профилактика инспектори ўзини отиб қўйди.

“Аниқланишича, ходим, ижтимоий тармоқларнинг "1xbet" иловасидан фойдаланиб, жорий йилнинг август ойида 45 млн. сўм ютқазганлиги учун, қарздорлик муаммоси ҳал этилиб, интизомий тартибда жазоланган ҳамда вилоят ИИБ қошидаги Интизомий кенгашнинг назоратида бўлган”, - дейилади Фарғона вилоят Ички ишлар бошқармаси билдирувида.

Катта лейтенант А.У.нинг чалажон танаси 6 декабрь куни уйидан таҳминан 3 километр узоқликдаги Бесаранг қишлоғи ҳудудидан оқиб ўтувчи Катта Фарғона канали ёқасидаги йўлнинг четида, ўзига тегишли бўлган Spark автомобилида топилган.

Дастлабки суриштирувда инспектор ўзига бириктирилган ПМ табел қуроли билан бош қисмидан жароҳатлангани ва кома ҳолатида экани аниқланган. У зудлик билан тиббий муассасага жойлаштирилган.

Вилоят ИИБ маълумот учун қимор ўйинлари борасидаги статистикани ҳам келтирган. “Республика кесимида қимор ўйинлари бўйича маъмурий ҳуқуқбузарликлар сони 2019 йилда 1 454 та ташкил этган бўлса, 2022 йилнинг 6 ойида 2 325 тага етган. Ушбу ўйинларни ташкил этиш билан боғлиқ жиноятлар 2019 йилда 55 та бўлса, 2022 йилнинг 6 ойида 90 тадан ошган», - дейилади билдирувда

Ички ишлар органи ходими ўз жонига қасд қилгани билан боғлиқ хабарлар бундан олдин ҳам тарқатилган. Жумладан, 26 ноябрь куни Хоразм вилояти Янгиариқ туман ИИБ ходими У.Р., ўз жонига қасд қилган. Вилоят прокуратураснинг билдиришича, у туман ИИБ биносида хизмат қуроли орқали ўз жонига қасд қилган.

Дастлабки маълумотларга кўра, ИИБ ходимининг ўз жонига қасд қилишига оилавий келишмовчилик оқибатида келиб чиққан руҳий сиқилиш сабаб бўлган.

Газ тақчиллиги сабаб Тошкентда айрим туманлардаги уйларга иссиқлиқ етишмаяпти

Тошкентни иссиқлик билан таъминлаш тизимини бошқарувчи Veolia Energy Tashkent ширкати айрим уйлар иситилмаётганига табиий газнинг етишмаётгани сабаб бўлаётганини билдирди. Ширкатнинг 5 декабрда маълум қилишича, айрим туманлардаги истиш тизими қозонхоналари газ етишмаётгани сабабли етарли даражадаги иссиқликни ишлаб чиқара олмаяпти.

Расман билдирилишича, пойтахтни 90 фоиз иссиқлик билан «Тошиссиқлик маркази» ва «Тошкент ТЭЦ”и таъминлайди. Қолган 10 фоиз иссиқлик Veolia Energy Tashkent ширкатига қарашли локал қозонхоналарда ишлаб чиқарилади.

Хабарда Veolia Energy Tashkent ширкатининг техник ходимлари кучайтирилган тартибда ишлаётгани ва муаммони ҳал қилиш учун барча имкониятлар ишга солинаётгани таъкидланади.

Аввалроқ Тошкент шаҳар ҳокимияти мавжуд газ захирасини барча истеъмолчилар ўртасида тенг бўлиштиришга ҳаракат қилаётгани, аммо у ҳаммага етмаётгани тўғрисида билдирган эди. Бунинг ортидан Тошкентда автомобилларга газ қуйиш шохобчалари вақтинча ёпиб қўйилди.

Икки кунда икки оиланинг 8 аъзоси ис газидан вафот этди

Бухоро вилоятининг Жондор туманида ёнғин оқибатида келиб чиққан ис газидан эр-хотин ва уларнинг 2, 7, 11 ёшдаги фарзандлари вафот этди. Бу маълумотни вилоят прокуратураси тасдиқлади.

Расман билдирилишича, Охших қишлоғидаги уйлардан бирида 36 ёшли эр, 34 ёшли хотин ва уч боланинг жасади топилган.

Вилоят прокуратураси Жиноят кодексининг 259-моддасининг 2-қисми (ёнғин хавфсизлиги қоидаларининг шу қоидалар бажарилиши учун масъул бўлган шахс томонидан бузилиши) асосида жиноят иши очди.

Тошкент вилоятининг Чиноз туманида ҳам 4 декабрь куни «Хўжа» маҳалласида 28 ёшли эр, унинг 20 ёшли хотини ва 2022 йилда туғилган боласи ис газидан заҳарланиб вафот этгани қайд этилган эди.

Дастлабки текширув натижасида 3 декабрь куни 7,5 миллион сўм қарздорлиги бор мазкур хонадон газдан узиб қўйилган. Уй эгаси ўзбошимчалик билан газ таъминотига уланиб олган.

Ўзбекистонда қиш мавсуми бошланиши билан “ис газидан заҳарланиш” ҳолатлари кўпайишини кузатиш мумкин. Бунинг натижасида мамлакатда ҳар йили юзлаб одам нобуд бўлади.

10 ноябрдан 5 декабргача бўлган даврда маҳаллий матбуотдаги хабарлардан келиб чиқилса, камида 19 киши ис газидан заҳарланиб вафот этган.

Мутахассислар бу каби ҳодисаларга фуқаролар томонидан газ ва муқобил ёқилғи турларидан фойдаланишда хавфсизлик чораларига риоя этмаслик, қўлбола ясалган печлардан фойдаланиш сабаб бўлаётганини билдиришган. Аммо йиллар ўтгани сари бу муаммо бартараф этилиши ўрнига кучайиб бормоқда.

9 февраль куни Фавқулодда вазиятлар вазирлиги ахборот хизмати бошлиғи ўринбосари Самандар Ҳикматуллаев Ўзбекистонда 2022 йилнинг 1 январидан 8 февралигача ис гази билан боғлиқ 21 ҳолат қайд этилгани, уларда жами 36 киши ҳалок бўлгани ва 19 киши заҳарлангани тўғрисида билдирган.

Вазирлик расмийси ўтган йили ис гази билан боғлиқ 74 та ҳолат аниқланганини, ис газидан 128 киши ўлгани ва 67 киши заҳарланганини айтди.

2020 йилнинг 16 декабрида ўтган йиғилишда президент Шавкат Мирзиёев бир йилда 56 та ис газидан заҳарланиш ва 106 та чақнаш ҳолати оқибатида 106 нафар фуқаро вафот этгани, 190 нафари заҳарлангани ва куйиш тан жароҳатини олганини таъкидлаган.

Ўша йиғилишда президент Бош вазир зиммасига ФВВ Ёнғинга қарши курашиш бошқармаси фаолиятини танқидий кўриб чиқиб, уни тубдан ислоҳ қилиш ва янги тизим яратиш юзасидан таклиф бериш вазифасини юклаган эди.

Шавкат Мирзиёев 10 декабрда Қирғизистонга боради

Ўзбекистон президенти Шавкат Мирзиёев 10 декабрда давлат ташрифи билан Қирғизистонда бўлади. Бу ҳақда Қирғизистон президенти маъмуриятининг ташқи сиёсат бўлими бошлиғи Муратбек Азимбакиев маълум қилди.

«Икки давлат лидерлари тор ва кенгайтирилган тартибда кенг кўламли қирғиз-ўзбек стратегик ҳамкорлиги доирасидаги масалаларни, шунингдек, дўстлик, биродарлик ва иноқ қўшничилик муносабатларини янада ривожлантириш истиқболларини муҳокама қилади”, - деди Азимбакиев.

Расмийга кўра, давлат ташрифи доирасида қатор ҳужжатлар имзоланади ва Қирғизистон-Ўзбекистон бизнес форуми ўтказилади.

Шавкат Мирзиёевнинг Қирғизистонга давлат ташрифи икки давлат чегараси бўйича якуний шартномалар ратификация қилиниб, президентлар томонидан имзоланганидан сўнг бўлиб ўтади.

29 ноябрда Қирғизистон президенти Садир Жапаров “Қирғиз-ўзбек давлат чегарасининг айрим участкалари тўғрисида”ги шартномани ва “Кампиробод (Андижон) сув омборининг сув захираларини биргаликда бошқариш” келишувини ратификациялаш тўғрисидаги икки қонунни имзолаган эди.

Ўзбекистон президенти матбуот хизмати эса 30 октябрда Шавкат Мирзиёев ҳам Қирғизистон билан чегарага оид қонунларни имзолаганини билдирган.

Нукус воқеалари бўйича суд жараёнини трансляция қилиш вақтинча тўхтатилди

Бухоро вилоят судида 22 киши устидан суд 28 ноябрда бошланган эди.

Нукусда 1−2 июль кунлари содир этилган тартибсизликларда айбланаётганларга нисбатан Бухорода ўтаётган суд жараёнини жонли эфирда трансляция қилиш 5 декабрдан бошлаб вақтинча тўхтатилади.

«Газета.uz»нинг хабар беришича, бу судда гувоҳларнинг кўрсатма бериши билан боғлиқ. Ўзбекистон Жиноят-процессуал кодексининг 432-моддасига мувофиқ гувоҳлар бошқа гувоҳларнинг кўрсатмаларини эшитмаслиги ва мулоқот қилмаслиги лозим.

2 декабрда ўтган суд мажлисида прокурор Жиноят-процессуал кодексининг 432-моддаси талабларидан келиб чиққан ҳолда судья Елубай Абибуллаевдан жараённи трансляция қилишни то томонлар мунозараси бошлангунига қадар тўхтатиб туришни сўраган эди. Судья прокурорнинг бу талабини қаноатлантирган.

Бухоро вилоят судида шу йил июлида Қорақалпоғистондаги намойиш ва зўравонликларга алоқадорликда айбланаётган 22 киши устидан суд 28 ноябрда бошланган эди.

Даулетмурат Тажимуратов ва бошқалар ЖКнинг 10 га яқин моддаси, жумладан, оммавий тартибсизликлар ва конституциявий тузумга тажовузда айбланмоқда.

Давомини ўқинг

XS
SM
MD
LG