Линклар

Шошилинч хабар
21 сентябр 2021, Тошкент вақти: 10:33

Ўзбекистон хабарлари

Коронавирус юқтириб олганлар сони 140 мингдан, пневмонияга чалинганлар сони 16 мингдан ошди

Ўзбекистонда коронавирус инфекцияси қайд этилганлар сони, 2021 йил 11 август ҳолатига кўра, 140 минг 210 нафарни ташкил этган.

Соғлиқни сақлаш вазирлиги маълумотига мувофиқ, чоршанба куни мамлакат бўйлаб 925 киши коронавирусга чалинган.

Айни пайтда кеча Андижон ва Самарқанд вилоятларидан ташқари барча ҳудудларида 749 киши тузалиб, соғайганларнинг умумий сони 133 минг 362 нафарга етган.

Вазирлик ўтган кеча-кундузда коронавирусга чалинган беморлардан яна 8 нафари вафот этиб, коронавирус қурбонлари сони 956 нафарга етганини қўшимча қилган.

ССВ қайдича, 11 август куни 493 нафар кишида пневмония аниқланган, 5 июлдан бери эса 16 минг 364 киши пневмонияга чалинган. Булардан 9 минг 78 нафари соғайиб чиққан, 110 нафари эса вафот этган.

Кун янгиликлари

Яккабоғдаги ўқувчилар полга чўккалаб дарс ўтган мактабда мутасаддилар жазоланди

Полга ўтирган ҳолда дарс ўтаётган 39-мактаб ўқувчилари (видеодан скриншот)

Қашқадарё вилоятининг Яккабоғ туманидаги 39-умумтаълим мактабида ўқувчиларнинг полга ўтириб дарс ўтаётганига оид ҳолат прокуратура вакиллари ва тегишли мутахассислар иштирокида ўрганилган. Бу ҳақда вилоят прокуратураси матбуот хизмати маълумот тарқатди.

Яккабоғлик ўқувчилар полда ўтирган ҳолда дарс ўтаётгани акс этган видео аввалроқ ижтимоий тармоқларда ёйинланган эди.

Прокуратура ўрганишлар натижасига кўра бу ҳолатнинг юзага келишига ўқитувчилар Н.С ва О.С. ларнинг мактаб директори билан дарс тақсимоти масаласида юзага келган келишмовчилиги сабаб бўлганини қайд этган.

“Ўқув йили бошланган кунлари мактабда мавжуд жиҳозланган хоналарда дарс ўтиш имконияти бўла туриб, мактаб маъмуриятининг ташкилий масалалардаги камчиликларини ижтимоий тармоқларда бўрттириб кўрсатиш мақсадида 5 “а”-синф ўқувчиларига парталар жойлаштирилмаган хонада дарс ўтилган”, дейилган хабарномада.

Қайд этилишича, ўрганишлар ортидан ўқитувчилар Н.С ва О.С.лар таълим-тарбия жараёни иштирокчиларининг шаъни, қадр-қиммати ва ишчанлик обрўсига салбий таъсир кўрсатишга уринганлари учун уларга мактаб педагоглари ва касаба уюшма аъзоларининг қўшма йиғилиши қарори билан ҳайфсан интизомий жазоси берилган.

Айни пайтда текширув натижаси бўйича мактабнинг ўқув йилига тайёргарлик кўриш ва ўқув жараёнини тўғри ташкил қилишда масъулиятсизликка йўл қўйган мактаб директори Ш.Қ., ўқув ишлари бўйича директор ўринбосари А.Х. ва хўжалик мудири Ж.Ж.ларга нисбатан интизомий жавобгарлик тўғрисида иш қўзғатилган.

Ўзбекистон билан Афғонистон ўртасида автомобиль ва темир йўл қатнови тикланади

Ўзбекистон Афғонистон билан автомобиль ва темир йўл қатновини тиклайди. Бу ҳақда, ТАСС агентлиги хабарига кўра, Ўзбекистон президентининг Афғонистон бўйича махсус вакили Исматулла Эргашев 20 сентябрь куни Тошкентда маълум қилган.

“Албатта биз Афғонистон билан автомобиль ва темир йўл алоқасини тиклаймиз, мазкур йўллар орқали бу мамлакатга пандемия даврида афғонистонликлар жуда муҳтож бўлиб турган озиқ-овқат ва дори-дармон етказиб берилмоқда, бу иш гуманизм нуқтаи назаридан амалга оширилади”, деган И. Эргашев.

Мулозим Афғонистон билан чегара бошқа сабабларга кўра эмас, балки коронавирус пандемияси туфайлигина ёпилганини урғулаган.

Эргашевга кўра, шу кунда мазкур чекловлар яна қанча давом этишини айтиш қийин, чунки бу эпидемиологик вазиятнинг яхшиланишига билангина эмас, балки Афғонистонда ҳокимият органлари қанчалик тез шакллантирилиши билан ҳам боғлиқ.

“Вазирлик ва бошқа органлар шакллантирилиши лозим, тузилган идораларни эса толибларнинг ўзлари муваққат деб атамоқда”, деган мулозим бу идоралар давлат йиқилмаслиги учунгина тузилганига эътибор қаратган.

Ўзбекистон президентининг Афғонистон бўйича махсус вакили расмий Тошкент қўшни ўлкада барча жиҳатларни эътиборга олган ҳолда ҳукумат тузилишига умид қилаётганини қўшимча қилган.

Икки мамлакат ўртасидаги автомобиль ва темир йўл алоқаси Ўзбекистонда коронавирусга чалиниш ҳолати илк бор кузатилган 2020 йил март ойидан тўхтаган эди.

Daryo bo’yi Business City Тошкентда Чирчиқ дарёси соҳилини сота бошлади

Daryo City Business лойиҳаси.

Daryo bo’yi Business City дирекцияси Чирчиқ дарёсининг пойтахт Тошкентдан ўтган 16 километрлик қисмининг дастлабки 5 километридаги ер майдонларини сотувга қўйди.

Тошкент шаҳар ҳокимлигининг 20 сентябрда билдиришича: “Аукционга қўйилган ер майдонларида савдо марказлари, логистик корхоналар, ресторан ва кафелар, енгил саноат корхоналарини қуриш таклиф қилинмоқда. Сотув учун таклиф қилинган лотларда турар жой қуриш кўзда тутилмаган”.

Ҳокимлик илк 9 та лот e-auksion.uz портали орқали сотувга қўйилгани, бу эса “ер майдонларини сотиб олишда шаффофлик ва очиқликни таъминлаши”ни иддао қилмоқда.

Daryo bo’yi Business City лойиҳасини амалга ошириш лойиҳаси президент Шавкат Мирзиёевнинг Сергели ва Зангиота туманларига 2020 йил 29 май кунидаги ташрифи давомида маъқулланган эди.

Молия вазирлиги мазкур лойиҳа учун президентнинг “Республика ҳудудларида Business city замонавий ишбилармонлик марказларини ташкил этиш чора-тадбирлари тўғрисида”ги қарорига асосан Тошкент шаҳар ҳокимлигига 300 миллиард сўм миқдорида фоизсиз ссуда беради.

Мирзиёев Назарбоев билан ўзбек-қозоқ ҳамкорлиги истиқболларини муҳокама қилди

Ўзбекистон президенти Шавкат Мирзиёев 20 сентябрь куни Қозоғистоннинг Биринчи президенти – Элбоши Нурсултон Назарбоев билан икки давлат ўртасидаги ҳамкорликни ривожлантириш масаласини муҳокама қилди.

“Ўзбекистон ва Қозоғистон ўртасидаги дўстлик, яхши қўшничилик ва стратегик шериклик муносабатларини ривожлантириш истиқболлари кўриб чиқилди”,-дейилади Ўзбекистон президенти матбуот хизмати расмий билдирувида.

Бундан ташқари, суҳбат давомида, “кўп қиррали ҳамкорликнинг бугунги юқори суръати” ва “ўзаро савдо ва юк ташишлар ҳажми ортиб бораётгани, авиақатновлар тўлиқ тиклангани” мамнуният билан қайд этилди.

Шунингдек, Афғонистондаги вазиятни ҳисобга олган ҳолда халқаро ва минтақа кун тартибидаги долзарб масалалар юзасидан ҳам фикр алмашилди.

Тупроққалъада содир бўлган автоаварияда 4 киши ҳалок бўлди

Ўзбекистонда юз берган автоавариялардан бири.

Хоразм вилоятининг Тупроққалъа тумани Саримой қишлоғи ҳудудидан ўтган "Ғузор-Бухоро-Нукус-Бейнеу" автомобиль йўлининг 493-километрида 19 сентябрь куни соат 23:35 ларда содир бўлган автоаварияда 4 киши ҳалок бўлди.

ИИВ ЙҲХББнинг 20 сентябрда билдиришича, "Tacuma" ва "Isuzu" автомобиллари тўқнашуви оқибатида "Tacuma" ҳайдовчиси воқеа жойида, йўловчилар С.М., шифохонага олиб кетилаётганда, Р.Ж., ва А.Қ.,лар шифохонада вафот этган.

Мазкур воқеа юзасидан жиноят иши қўзғатилиб, ҳозирда дастлабки тергов ҳаракатлари олиб борилмоқда.

“Газета уз”нинг хабар беришича, автоаварияда ҳалок бўлганлардан бири “Халқ сўзи” газетасининг 36 ёшдаги мухбири Саид Махсумовдир.

“Саид Махсумов бошқа журналистлар билан биргаликда Нукусда бўлиб ўтган II Халқаро бахши фестиваль-танловининг ёритилишида қатнашган”,- деб ёзди нашр.

Расман: Ҳокимликлар ҳар йили юз нафар хотин-қизнинг ўқиш пулини тўлаб беради

Иллюстратив сурат.

Ўзбекистонда 2021/2022 ўқув йилидан бошлаб вилоят ва шаҳар ҳокимликлари ўзларининг ҳудудларидан ўқишга кирган 25 нафар ва 2 -4-курсларда ўқиётган 75 нафар хотин-қизларнинг тўлов-контракт пулини улар ўқишни битиргунларига қадар тўлаб беради.

Адлия вазирлигининг 20 сентябрда билдиришича, бу борда Вазирлар Маҳкамаси 17 сентябрь куни 577-сон қарорни қабул қилди.

Талабгорлар отаси ёки онаси ёхуд уларнинг иккаласи ҳам вафот этган муҳтож қизлар ва боқувчиси йўқ эҳтиёжманд ёлғиз аёллар орасидан танлаб олинади.

“Бунда юқоридаги мезонларга мос келувчи хотин-қизлар тест натижалари эълон қилинган кундан бошлаб ижтимоий ҳолати тўғрисидаги маълумотномани ҳар йили 10 кун ичида ОТМ қабул комиссиясига тақдим этади. Давлат ОТМ 5 кун мобайнида рўйхатни шакллантириб, ҳокимликларга ёзма равишда маълумотларни юборади”,- дейилади Адлия вазирлиги билдирувида.

Талабгорларни танлаб олиш натижалари “Aziz-ayol.uz” Ягона интерактив миллий платформаси орқали эълон қилинади.

Тошкент метросида яна поезд тўхтаб қолди

Тошкент метросида бу каби воқеалар сўнгги етти ой ичида тез-тез юз бермоқда.

Тошкент метросининг “Ғафур Ғулом” бекатидан “Чорсу” бекатига ҳаракатланаётган 41-йўналишдаги поезд 20 сентябрь куни соат 09:10да тўхтаб қолди. Расман билдирилишича, поезднинг тўхтаб қолишига ҳаво тақсимлаш тизимида техник носозлик юзага келгани сабаб бўлган.

“Ҳаракат хавфсизлигини таъминлаш мақсадида йўловчилар бекатда туширилган ва ортда ҳаракатланган 43-йўналишдаги ҳаракат таркиби ёрдам сифатида келиб, носоз ҳаракат таркибини техник кўрик пунктига олиб кетган. Техник носозлик соат 09:25да бартараф этилган”, - дейилади “Тошкент метрополитени” тарқатган хабарда.

Тошкент метросида бу каби воқеалар сўнгги етти ой ичида тез-тез юз бермоқда. Бундан олдин 28 август соат 14:35 атрофида "Ойбек" бекатидан "Тошкент" бекатига ҳаракатланаётган поёзд тўхтаб қолгани ҳам хабар қилинган эди. Июнь, апрель ойларида ҳам шунга ўхшаш ҳолатлар юз берган.

18 март куни эса Тошкент метрополитенида тўхтаб қолган поездга унинг ортидан келаётган поезд келиб урилган. Йўловчилар эвакуация қилинган. Ҳодисада жабрланган ва ҳалок бўлганлар йўқлиги билдирилган.

Президент сайлови олдидан ёпиқ мажмуаларда тадбир ва йиғилишлар ўтказишга рухсат берилди

Ўзбекистонда жорий йилнинг 20 сентябридан томоша, маданий-кўнгилочар (театр, кинотеатр, концерт заллари), оммавий тадбирлар ва йиғилишларни очиқ майдонлар ҳамда ёпиқ мажмуаларда ўтказишга рухсат берилди.

Соғлиқни сақлаш вазирлиги маълумотига кўра, мазкур қарор Республика махсус комиссияси томонидан “тегишли мутасадди ташкилотларнинг таклифларини инобатга олган ҳолда” қабул қилинган.

Қайд этилишича, маданий-кўнгилочар, оммавий тадбирлар ва йиғилишларни ўтказишда қуйидаги карантин чекловларига риоя этиш талаб қилинади:

маданий-кўнгилочар объектлар (театр, кинотеатр, концерт заллари) ишчи ва ходимлари ҳамда оммавий тадбирлар ташкилотчилари ва хизмат кўрсатувчилари бўлган шахслар (саломатлиги бўйича қарши кўрсатма бўлган ходимлари бундан мустасно) коронавирусга қарши вакцинанинг (туридан қатъи назар) камида 2 та дозаси билан эмланганлиги тўғрисидаги QR-кодли сертификати мавжуд бўлиши лозим;

маданий-кўнгилочар (театр, кинотеатр, концерт заллари фаолияти) ва оммавий тадбирларни ўтказишда ташриф буюрувчилардан тиббий ниқобда бўлиш талаб этилади, шунингдек, бу жойларда антисептик воситалардан фойдаланиш, кириш жойларида тана ҳароратини ўлчаш каби муҳим санитария-гигиена қоидаларига қатъий риоя этилиши шарт.

Қарор билан маданий-кўнгилочар ва оммавий тадбирларни ўтказиш объектларига фақатгина коронавирусга қарши вакцина билан эмланганлиги тўғрисидаги QR-кодли сертификати мавжуд бўлган ташриф буюрувчилар (саломатлиги бўйича қарши кўрсатмалар бўлган фуқаролар бундан мустасно) киритилиши тавсия этилган.

Айни пайтда Республика махсус комиссиясининг қарори билан тўй ва оилавий маросимларни ўтказиш бўйича илгари белгиланган чекловлар юмшатилиб, 20 сентябрдан тўйхоналарда оилавий тантана, тўй, маърака ва маросимларни ўтказиш 100 кишидан (аввал 50 киши эди) кўп бўлмаган ҳамда санитария ва гигиена талабларига қатьий риоя этган ҳолда ўтказилишига рухсат берилган.

Комиссиянинг галдаги мажлисида Ўзбекистон мусулмонлари идораси ҳамда Дин ишлари бўйича қўмитанинг 2021 йил 24 сентябридан эътиборан жума намози ва бошқа намозларни масжидларнинг фақат очиқ саҳналарида адо этилишига оид чекловни бекор қилиш тўғрисидаги таклифи ҳам кўриб чиқилган ва маъқулланган.

Коронавирус қурбонлари сони 1190 нафардан ошди, пневмония қурбонлари сони 215 нафарга етди

Ўзбекистонда 19 сентябрь куни коронавирусга чалинган беморлардан 4 нафари вафот этган, шу тариқа пандемия қурбонлари сони 1 минг 192 нафарга етган.

Соғлиқни сақлаш вазирлиги қайдича, кеча мамлакат бўйлаб 501 киши коронавирусга чалинган, вирус юқтириб олганларнинг умумий сони эса 168 минг 938 нафарни ташкил қилган.

Айни пайтда якшанба куни Сирдарё ва Хоразм вилоятларидан ташқари барча ҳудудларда 629 киши тузалиб, соғайганларнинг умумий сони 162 минг 684 нафарга етган.

ССВ маълумотига кўра, ўтган кеча-кундузда яна 95 нафар кишида пневмония аниқланган, 5 июлдан бери эса 26 минг 272 киши пневмонияга чалинган. Булардан 22 минг 757 нафари соғайиб чиққан, 215 нафари эса вафот этган.

Меҳнат вазирлиги: Сурхондарёда банк ходимлари пахтага олиб чиқилганига оид ҳолат ўрганилмоқда

Бандлик ва меҳнат муносабатлари вазирлиги Сурхондарёнинг Ангор туманида банк ходимлари ҳордиқ кунлари пахта теришга жалб қилинганига оид маълумотни текширяпти. Бу ҳақда вазирлик матбуот хизмати маълум қилган.

Аввалроқ Телеграмдаги “Банкир кундалиги” каналида тумандаги банк ходимлари шанба куни раиснинг топшириғи билан “Тўққиз ой якуни” дея ишга жалб қилингани, якшанба куни эса уларга, ҳоким топшириғига мувофиқ, пахта теримига чиқиш тайинланганига оид хабар тарқатилган.

Меҳнат вазирлиги мазкур ҳолат Давлат меҳнат инспекцияси томонидан ўрганиб чиқилаётгани, ўрганиш якунлари бўйича қўшимча маълумот тақдим этилишини билдирган.

Тиббий маълумотга эга бўлган шахсларга мустақил ҳамширалик билан шуғулланишга рухсат берилади

Иллюстратив сурат

Ўзбекистонда ўрта тиббий (ҳамширалик иши, даволаш иши, акушерлик иши) ёки олий ҳамширалик иши бўйича олий маълумотга эга бўлган, давлат ёки нодавлат тиббиёт ташкилотида ишламайдиган шахсларга ўзини ўзи банд қилган шахс сифатида “ҳамширалик иши” фаолияти билан шуғуллланишга рухсат берилади. Бунга оид низом, “Ҳуқуқий ахборот” Телеграм-канали маълумотига кўра, ўтган ҳафта сўнгида ҳукумат қарори билан тасдиқланган.

Низомга мувофиқ, мустақил ҳамширалик билан шуғулланмоқчи бўлган шахс махсус мобил илова ёки солиқ тўловчининг шахсий кабинети орқали ёхуд давлат солиқ хизмати органига келган ҳолда рўйхатдан ўтиши керак.

Қайд этилишича, ҳамширага маълумотнома расмийлаштирилади ва шу асосда у Соғлиқни сақлаш вазирлигининг ахборот дастурида рўйхатдан ўтиб, ўз фаолиятини бошлайди.

Низомда мустақил ҳамширанинг шифокор кўрсатмасисиз ҳамда унинг тавсияси асосида аҳолига мустақил тиббий маслаҳат ва муолажаларни бажариш бўйича ҳуқуқлари белгиланган.

Мустақил ҳамширага стерилизация қилиниши талаб этиладиган тиббий буюмлардан фойдаланган ҳолда аҳолига тиббий муолажаларини бажаришига, дори воситалари қабул қилишда ножўя таъсир ҳолатини аниқлаш мақсадида қўйилган синама ҳолатини баҳолашга рухсат этилмайди.

Ҳужжатда мустақил ҳамшира фаолиятни амалга оширишдаги ҳаракатлари (ҳаракатсизлиги) учун шахсан жавобгар ҳисобланиши қайд этилган.

Халқ таълими вазирлиги мактабларда дарслик етишмаслиги кузатилиши мумкинлигидан огоҳлантирди

Ўзбекистон Халқ таълими вазирлиги ота-оналарни янги ўқув йили бошида баъзи мактабларда дарслик етишмовчилиги кузатилиши мумкинлигидан огоҳлантирган. Вазирлик матбуот хизматига кўра, бу каби муаммо “айрим ўқувчиларнинг мактабдан-мактабга ўтиши, жумладан таълим тилини ўзгартириши натижасида” юзага келиши мумкин.

“Жойлардаги бундай муаммоларни ўша мактаб раҳбарияти ҳамда ҳудудий халқ таълими бўлими ва бошқармалари ҳудуддаги китоб ортиқча бўлган бошқа мактаблардан китоб етишмаётган мактабларга ўтказиш орқали зудлик билан ҳал этиш чораларини кўриши белгиланган”, дейилган ХТВ хабарномасида.

Мурожаати ижобий ҳал этилмаган ўқувчиларга вазирлик махсус Телеграм-бот орқали маълумот юборишни тавсия қилиб, ҳар бир мурожаатни ўз назорати олишни ваъда қилган.

Беш ярим ойда эмланиши режалаштирилган 21 миллион кишининг 16 фоизи эмланди

Вирусга қарши тўлиқ босқичларда вакцина олганлар сони 3,4 миллион нафардан ошган.

Ўзбекистонда 15 сентябргача 10 миллион 200 минг киши 1 доза вакцина билан эмланди. Соғлиқни сақлаш вазирлигининг билдирилишича, бу эмланиши режалаштирилган аҳолининг 47,6 фоизини ташкил қилади.

Вирусга қарши тўлиқ босқичларда вакцина олганлар жами эмланадиган аҳолининг 16 фоизини ташкил қилиб, уларнинг сони 3,4 миллион нафардан ошган.

Вазирлик жами 21 миллиондан кўпроқ киши эмланиши режалаштирилганини маълум қилди.

Ўзбекистонда коронавирусга қарши эмлаш кампанияси шу йил 1 апрелидан бошланган. Шу кунда ўзбекистонликлар Россиянинг “Спутник V” ва Хитойдан келтирилган ZF-UZ-VAC 2001 вакциналаридан ташқари AstraZeneca, Moderna ва Pfizer/BioNTech вакциналари билан ҳам эмланмоқда.

Коронавирусга чалинганлар сони 168 мингдан ошди

Янги касалланиш ҳолатларининг 249 таси Тошкент шаҳрида аниқланди.

Ўзбекистонда 18 сентябрь куни яна 579 кишида коронавирус аниқланди, 4 бемор вафот этди. Соғлиқни сақлаш вазирлигининг билдиришича, бу билан коронавирус инфекцияси қайд этилганлар сони 168437 кишига етди. Беморлардан 1188 нафари вафот этди.

Янги касалланиш ҳолатларининг 249 таси Тошкент шаҳрида, 106 таси Тошкент вилоятида, 42 нафари Фарғона вилоятида аниқланган.

Касалликдан соғайганлар жами 162055 нафарга етди ва соғайиш кўрсаткичи 96 фоизни ташкил этмоқда.

18 сентябрь куни 109 кишида пневмония аниқланиб, жами беморлар сони 26177 нафарга етди. Кеча уларнинг 478 нафари соғайиб, умумий соғайганлар сони 22314 нафарни ташкил қилмоқда.

Шунингдек, 1 нафар бемор вафот этиб, шу кунгача пневмониядан вафот этганлар сони 214 нафарга етди.

Туризм ва спорт вазирлиги пиёда юрганларга пул тўлаш тўхтатилгани тўғрисида ўзи берган хабарни ўзи рад этди

Бир кунда 10 минг қадам юрганларга 3000 сўмдан берилади.

Туризм ва спорт вазирлиги “Соғлом турмуш тарзи” платформаси фаолияти ва 1hls.uz мобил иловаси фойдаланувчиларга пул тўлаш вақтинча тўхтатилгани тўғрисида ўзи тарқатган хабарга ўзи раддия берди.

Билдирилишича, Туризм ва спорт вазирлиги ахборот хизмати ходими маҳаллий матбуотда бу борада чоп этилган мақоласида жамоатчиликка асоссиз ва тасдиқланмаган маълумот берган.

Вазирлик ахборот хизмати мазкур хабарни етказишда хатоликка йўл қўйгани учун узр сўраган ва “Соғлом турмуш тарзи” платформаси ишлашда давом этишини маълум қилган. Матбуотга нотўғри хабар етказган ходимга эса огоҳлантириш берилган.

Расман билдирилишича, мазкур платформа бўйича 2021 йил 10 июндан 13 сентябрга қадар бир сутка давомида ўн минг ва ундан ортиқ қадам юрган фуқароларининг платформадаги электрон ҳамёнига жами 9,4 млрд сўм маблағ тўлаб берилган.

Ўзбекистонда юриш ва югуришни рағбатлантирувчи 1hls.uz иловаси шу йилнинг 10 июнида ишга туширилган эди.
Мазкур платформани ишлаб чиқиш тўғрисида президент Шавкат Мирзиёев 2020 йилнинг ноябрида махсус фармонни имзолаганди.

Ўзбекистон уран қазиб олиш бўйича жаҳонда 5-ўринни эгаллади

Иллюстратив сурат.

Ўзбекистон 2020 йилда ҳам 2019 йилда бўлгани каби 3500 тонна уран қазиб олди. Бутунжаҳон ядро ассоциацияси – WNAнинг билдиришича, бу билан Ўзбекистон уран қазиб олиш бўйича жаҳонда 5-ўринни эгаллади.

WNA ҳисоботида билдирилишича, 2011 йилда Ўзбекистон 2500 тонна уран қазиб олган. 2012 йилдан бошлаб мамлакатда уран қазиш камайган. Масалан, 2012 -2015 йилларда 2400 тонна ва ундан озроқ уран ишлаб чиқарилган бўлса, 2016 йилдан бошлаб уран қазиш деярли 1000 тоннага кўпайган ва 2019 йилга келиб 3500 тоннани ташкил қилган.

Ўзбекистоннинг ўзида уран қайта ишланмайди, шунинг учун у тўлиғича экспорт қилинади. Ўзбекистонда 132 минг тонна уран захираси мавжуд бўлиб, бу дунё захирасининг 2 фоизини ташкил қилади. Уран захираси бўйича Ўзбекистон жаҳонда 11-ўринда туради.

Уран қазиш бўйича 2020 йилда 1-ўринни Қозоғистон (19,5 минг тонна), 2-ўринни Австралия (6,2 минг тонна), 3- ўринни Намибия (5,4 минг тонна) ва 4-ўринни Канада (3,9 минг тонна) эгаллаган.

Мирзиёев Афғонистоннинг хориждаги музлатилган активларини қайтаришни таклиф қилди 

Толибон вакиллари Тошкентда, Ўзбекистон.

Ўзбекистон президенти Шавкат Мирзиёев Душанбе шаҳрида ўтаётган Шанхай Ҳамкорлик Ташкилоти саммитида Афғонистондаги гуманитар вазиятни ҳисобга олган ҳолда хориж банкларида музлатиб қўйилган афғон активларини қайтаришни таклиф қилди.

Гап август ўртасида "Толибон" қўлига тушмаслиги учун АҚШ томонидан музлатилган Афғонистон Марказий банкининг миллиардлаб долларлари ҳақида бормоқда.

Ўзбекистон раҳбарининг таъкидича, пулларнинг қайтарилиши Афғонистондаги гуманитар инқироз, қочқинлар оқимининг кўпайишига чек қўяди, шунингдек, мамлакатга ижтимоий муаммоларни ҳал қилишда ёрдам беради.

Қўшма Штатлар Афғонистон ҳукуматининг Америка банк ҳисобларида сақланаётган захираларни музлатгани, бундан ташқари маблағлар толиблар қўлига тушмаслиги учун Афғонистонга катта миыдорда доллар етказишни тақиқлаган.

23 август куни Жаҳон банки ҳам Афғонистондаги лойиҳаларини молиялаштиришни вақтинча тўхтатган эди.

Халқаро валюта жамғармаси маълумотига кўра, Афғонистон Марказий банки 9,4 миллиард долларлик захира активларига эга бўлган.

Толибон ишғоли ортидан чет элга қочган Афғонистоннинг Марказий банки бошқарувчиси Ажмал Аҳмадий "Твиттер"да банкининг деярли барча захиралари чет элда жойлашган ва улар 9 миллиард доллардан кўпроқни ташкил қилади деб ёзган эди.

Ўзбекистон президенти Шавкат Мирзиёев Афғонистон Толибон қўлига ўтишидан саноқли кунлар ўтиб, ўзбек халқининг тинчлиги учун, "ким бўлишидан қатъиназар, исталган томон билан гаплашиши"ни билдирганди.

Пиёда юрганларга Мирзиёев ваъда қилган пуллар тўхтади

Ўзбекистонда бир суткада камида ўн минг қадам юрганларга 3 минг сўмдан бериш 14 сентябр кунидан тўхтади. 

Ўзбекистонда бир суткада камида ўн минг қадам юрганларга 3 минг сўмдан бериш 14 сентябр кунидан тўхтади.

Ўзбекистон Туризм ва спорт вазирлиги аҳолини кунлик юриш ва югуришга тарғиб қилиш бўйича “Соғлом турмуш тарзи” платформаси 1hls.uz мобил илова бўйича фойдаланувчиларга тўловлар вақтинча тўхтатилганини айтмоқда.

Вазирлик буни ғазна ҳисобварағига тушадиган тегишли даромадлар манбаларининг бир меъёрда доимий тушиш имконияти чекланганлиги билан изоҳлаган.

Мазкур шахсий ғазна ҳисобварағида 500,0 млн сўмдан кам маблағ қолса, мобил илова бўйича фойдаланувчиларга тўловлар, ушбу шахсий ғазна ҳисобварағида 5,0 млрд сўмгача маблағ йиғилгунга қадар автоматик тарзда тўхтатилиши белгилаб қўйилган.

“Бунда, шахсий ғазна ҳисобварағидаги маблағлар 5,0 млрд. сўмга етгунга қадар мобил иловада ўн минг ва ундан ортиқ қадам юрган фуқароларга тўланадиган тўловлар тўланмаслиги кўрсатиб ўтилган”, дейилади вазирлик хабарида.

Тўловлар қачондан қайта тикланиши ҳақида вазирлик баёнотида ҳеч нарса айтилмаган.

Ўзбекистонда юриш ва югуришни рағбатлантирувчи 1hls.uz иловаси шу йилнинг 10 июнида ишга туширилган эди.

Мазкур платформани ишлаб чиқиш тўғрисида президент Шавкат Мирзиёев 2020 йилнинг ноябрида махсус фармонни имзолаганди.

Режага кўра, ҳар ойда ҳар бир туман (шаҳар) бўйича энг кўп юрган шахсга 300 минг сўм, ҳар бир ҳудуд бўйича энг кўп юрган шахсга 500 минг сўм, республика бўйича энг кўп юрган шахсга 1 млн сўм қўшимча равишда платформадаги электрон ҳамёнига ўтказилиши кўзда тутилганди.

Ўзбекистон Туризм ва спорт вазирлигига кўра, ўшандан буён бир сутка давомида ўн минг ва ундан ортиқ қадам юрган 18 ёш ва ундан юқори ёшдаги Ўзбекистон фуқароларининг платформадаги электрон ҳамёнига жами 9,4 млрд сўм маблағлар тўлаб берилган.

Шунингдек, ҳар ойда ҳар бир туман (шаҳар) бўйича энг кўп юрган шахсга 300 минг сўмдан, ҳар бир ҳудуд бўйича энг кўп юрган шахсга 500 минг сўм, республика бўйича энг кўп юрган шахсга қўшимча равишда 1 млн. сўм тўланиб, жорий йил июнь-август ойлари давомида жами 206,7 млн. сўм маблағ фойдаланувчилар электрон ҳисоб рақамига ўтказилган.

"Малика" бозорида яна рейдлар, Тошкент ИИББ бу соқолга қарши тадбир эмаслигини билдирди

Ижтимоий тармоқларда тарқалган видеода "Малика" савдо мажмуасида ниқобли махсус кучлар юргани кўринади.

Тошкент шаҳар Ички ишлар бош бошқармаси "Малика" савдо мажмуасида хавфсизлик хизматининг махсус ходимлари юргани акс этган видео юзасидан изоҳ берди.

Ижтимоий тармоқларда тарқалган видеода савдо мажмуасида ниқобли махсус кучлар юргани кўринади.

"Малика" савдо мажмуасидаги баъзи савдогарлар профилактик суҳбат чоғида хавфсизлик ходимлари соқолини олишга мажбурлаганини айтишган.

"Бизни ҳудди жиноятчидай Шайхонтоҳур РОВДсига олиб бориб соқолимизни олишди", - деган савдогарлардан бири Озодликка.

"Малика" бозорида рейдлар
Илтимос кутинг
Киритиш (Embed)

Айни дамда медиа-манба мавжуд эмас

0:00 0:00:11 0:00

Озодликка юборилган яна бир видеода кадр ортидан гапирган одам: "Маскалилар келди, соқоллиларни босишяпти, огоҳ бўлинглар!", дейди.

Тошкент шаҳар ИИББ матбуот хизмати пойтахтдаги "Малика" савдо мажмуасида профилактик тадбир ўтказилганини тасдиқлади.

"Шайхонтоҳур туманида Тошкент шаҳар ИИББ ходимлари томонидан "Хавфсиз шаҳар" концепцияси ижроси доирасида ҳамда жамоат тартибини таъминлаш, жиноятларнинг олдини олиш, гиёҳвандлик воситаларининг тарқалишига барҳам бериш мақсадида профилактик тадбирлар ўтказилмоқда", - дейилади Тошкент шаҳар ИИББ матбуот хизмати билдирувида.

Тошкент шаҳар ИИББнинг Озодлик суҳбатлашган мулозими рейдлар "соқол"га қарши ўтказилмаганини айтди.

Бу "Малика" бозоридаги биринчи профилактик тадбир эмас.

Икки йил аввал Тошкентда жума намозидан сўнг ички ишлар ходимлари “Малика” савдо мажмуасида ўнлаб соқолли эркакларни тутиб олиб кетиб, соқолини олишга мажбурлагани норозиликларга сабаб бўлган ва инсон ҳуқуқлари ташкилотлари томонидан танқид қилинган эди.

Шу йилнинг февраль ойида ҳам “Малика” мажмуасидаги савдогарлар соқоли мажбурлаб олингани ҳақда Озодликка айтишганди.

Ўшанда Тошкент шаҳар ИИББ матбуот котиби Ирини Сайфуддинова Озодлик билан суҳбатда бозорда савдогарлар соқоли мажбурлаб олинганини рад этаркан, "ҳеч ким соқолини олишга мажбурланмаслигини" таъкидлаган эди.

Сайфутдинова фуқароларга "ташқи кўринишларини биометрик паспортларидаги суратларга мувофиқлаштириш тавсия этилган бўлиши мумкин"лигини инкор қилмаган.

"Малика" бозорида "мажбурлаб соқол олиш тадбирлари" Ўзбекистонда Шавкат Мирзиёев президентлиги даврида халқаро ташкилотлар тарафидан нисбатан яхшилангани айтилаётган диний эркинлик вазиятига соя солди.

Ҳуқуқбонларга кўра, фуқароларнинг соқоли мажбуран олиниши инсон ҳуқуқлари поймол этилишини англатади.

Ўзбекистон расмийлари ва ҳуқуқ-тартибот идораларининг диний рамз деб кўриладиган соқол ва ҳижобга қарши кампаниялари халқаро жамоатчилик, жумладан, АҚШ Давлат департаменти томонидан ҳам танқид қилиб келинган.

Тошкентда 12 нафар шахс ҳизбчиликда гумонланиб ушланди

Тошкент шаҳрида 12 нафар шахс “Ҳизб ут-Таҳрир” диний-экстремистик ташкилотига аъзолигида гумонланиб қўлга олинган.

Бу ҳақда Тошкент шаҳар Ички ишлар бош бошқармаси маълум қилди.

17 сентябрь куни Тошкент шаҳрининг Олмазор, Учтепа, Яшнобод ва Юнусобод туманларида ўтказилган рейдларда ушланганлар ёнидан эктремистик мазмундаги материаллар топилгани айтилади.

"Таҳрирчилар”нинг барчаси 1980 й.т. Юнусобод туманида истиқомат қилувчи “Р.У.”нинг ғоявий таъсири остида экстремистик фаолият билан шуғулланиб келганлар.

“Р.У.” ва унинг жиноий алоқалари интернет ижтимоий тармоғи орқали Украина давлатида яшириниб келаётган 1980 йилда Қирғизистон Республикасида туғилган, “Махмуд Абдулмўмин” тахаллусли – Холдаров Махмуджон Абдумаликович билан алоқа ўрнатиб, унинг маърузалари ва “Ҳизб-ут Таҳрир” экстремистик ташкилоти материалларини аҳоли орасида тарқатиш ҳамда унинг кўрсатмалари асосида “таҳрирчилар” сафига янги аъзоларни ёллаш билан шуғулланиб келганлар", дейилади Тошкент ИИББ билдирувида.

Бу сўнгги бир ҳафтада Тошкентда "диний экстремистик ташкилоти аъзоларининг жиноий фаолиятига чек қўйишга қаратилган" иккинчи рейд.

Бундан олдин Тошкентда “Ҳизб-ут Таҳрир”нинг аёллар қаноти фош этили, 22 нафар шахс қўлга олингани хабар қилинган эди.

ДСҚ: Ўзбекистон йил бошидан импортга 15,7 млрд сарфлаган

Ўзбекистон Давлат статистика қўмитаси маълумотига кўра, шу йилнинг январь-август ойларида Ўзбекистоннинг ташқи савдо айланмаси 25 млрд АҚШ долларига тенг бўлган.

Шунинг 15,7 млрд доллари импортга сарфланган.

Экспорт 9,3 млрд долларни ташкил этиб, унинг таркибида маҳсулотлар 7,7 млрд долларни, хизматлар – 1,6 млрд долларни ташкил қилди.

Импорт ҳажми 15,7 млрд долларга тенг бўлиб, унинг таркибида маҳсулотларга 14,7 млрд доллар, хизматларга 1,0 млрд доллар сарфланган.

2021 йилнинг беш ойида Хитой Ўзбекистон экспорт ва импортида етакчилик қилмоқда. Хитойдан импорт экспортга нисбатан 2 баробарга кўп.

Ўзбекистон импортида юқори улушга эга бўлган бошқа давлатлар эса Россия, Қозоғистон, Жанубий Корея, Туркиядир.

Озодлик суриштируви ортидан каттақўрғонлик солиқчи ўлими бўйича иш қайта судга юборилди

40 ёшли Азиз Аҳмедов Каттақўрғон туман солиқ инспекцияси бошлиғи ўринбосари эди.

Шу йилнинг 14 сентябрь куни Самарқанд вилояти прокуратураси Каттақўрғон тумани ДСИ бошлиғи ўринбосари, 40 яшар Азиз Ахмедовнинг ўлими юзасидан қўзғатилган жиноят ишини мазмунан кўриш учун иккинчи марта жиноят ишлари бўйича Каттақўрғон тумани судига юборди.

Бу ҳақда Ўзбекистон Республикаси Бош прокуратурасининг матбуот хизмати маълум қилди.

Бош прокураура маълумотига кўра, Азиз Ахмедовнинг ўлими юзасидан қўзғатилган жиноят иши доирасида 4 нафар нафар ички ишлар органи ходимига нисбатан Ўзбекистон Республикаси ЖКнинг 102-моддаси (Эҳтиётсизлик орқасидан одам ўлдириш) ва 206-моддаси (Мансаб ваколатидан четга чиқиш) билан жиноят иши қўзғатилиб, тергов ҳаркатлари тугалланган. Икки нафар ходим қамоққа олинган.

Самарқанд вилояти прокуратурасига кўра, жиноят иши дастлаб шу йилнинг августида уч нафар ички ишлар ходимининг ҳаракатларида жиноят аломатлари йўқ, деган айблов хулосаси билан судга юборилган. Бироқ солиқчининг қариндошларининг муттасил норозилигидан сўнг шу йилнинг 6 сентябрь куни жиноят иши суддан чақириб олиниб, тергов органи қарори бекор қилинган ва ходимларга нисбатан қайта иш қўзғатилган ҳамда уларнинг бир нафари қамоққа олинган.

13 сентябрь куни Озодлик радиоси Каттақўрғон тумани ДСИ бошлиғи ўринбосари Азиз Аҳмедовга нисбатан ички ишлар органлари ходимлари куч ишлатгани акс этган видеони эълон қилган эди.

Ўзбекистон Ички ишлар вазирлиги ҳодиса борасида боди-камера тасвирларини сохталаштиргани ўртага чиққан.

ИИВ матбуот котиби Шохруҳ Ғиёсов Озодлик сўровига жавобан, "Ҳолатга тўлиқ ҳуқуқий баҳо берилганидан сўнг, расмий маълумот берилади. Қонунчиликка риоя этиш зарур", деди.

Шу йилнинг 26 июнида президент Шавкат Мирзиёев қийноқларни баратараф этиш ва қийноқ қурбонларига компенсация тўлаш тартибини жорий этиш бўйича қарор қабул қилганди. Қарор кучга киргандан сўнг мамлакатнинг Денов, Тахиатош ва Нишон туманларида оқибати ўлим билан тугаган қийноқ ҳодисалари фош бўлди.

Аксилкоррупция агентлиги Самарқандда коррупцион схемаларни фош қилганини айтмоқда

Коррупцияга қарши курашиш агентлиги директори Акмал Бурхонов

Ўзбекистон Республикаси Коррупцияга қарши курашиш агентлиги томонидан Самарқанд вилоятида давлат харидларига оид ўтказилган тафтишлар қарийб 50 миллиард сўмлик талон-тарожликларни юзага чиқарди.

Бу ҳақда агентликнинг матбуот хизмати хабар қилди.

Маълум бўлишича, бюджетдан молияланадиган буюртмачилар томонидан «dxarid.uz» ва «tender.mc.uz» махсус ахборот порталида жойлаштирилган эълонларнинг аксарияти сохта бўлиб, буюртмачилар томонидан давлат харидларини амалга оширишда 18 та ҳолатда қонунбузилишлар аниқланган.

Масъул идоралар томонидан Халқ таълими вазирлиги ва Солиқ қўмитасининг қуйи тизимларига қарашли объектларда қурилиш ишларини амалга ошириш бўйича тендерлар эълон қилинган. Аммо ҳали тендер натижалари эълон қилинмай туриб, буюртмаларни хуфиёна қўлга киритган ширкатлар қурилиш ишларини аллақачон бошлаб юборган.

Бундан аввал Бош прокуратура давлат идоралари ҳамда вазирликлар тизимида миллиардлаб сўм маблағлар ўзлаштирилгани, тендерлар сохталаштирилгани ҳақида ҳисоботлар берган. Корруцияга қарши курашиш агентлиги ўрта ва қуйи бўғиндаги амалдорлар орасида коррупция ҳолатларини фош этиш билан чекланиб қолаётгани, ҳокимиятнинг юқори эшелонларидаги коррупция ва манфаатлар тўқнашувига эътибор қаратмаётгани учун танқид қилинади.

Аввалроқ агентлик директори Акмал Бурхонов турли идора ва мансабдор шахслар томонидан агентлик фаолиятига босим ўтказилишини тан олган.

Адлия вазири Давлетов: Оммавий эмлаш жараёнининг сустлиги давлатга ишончнинг пастлигини кўрсатади

Ўзбекистон Республикаси Адлия вазири Русланбек Давлетовга кўра, мамлакатда коронавирусга қарши оммавий эмлаш ишларининг суст кечаётгани халқнинг давлатга ишончи пастлигини кўрсатади.

Бу ҳақда вазир 14 сентябрь куни олий таълим муассасаларининг профессор-ўқитувчилари билан Тошкент давлат юридик университетида ўтган мулоқотда гапирган.

“Халқнинг давлат органларига ишончи нақадар муҳимлигини вакцинация жараёнида кўрдик. Қаерда, қайси мамлакатда давлатга халқнинг ишончи юқори бўлса, вакцинация даражаси шунча юқори бўляпти – булар ўзаро тўғри пропорционал” дея вазирнинг сўзларидан иқтибос келтирмоқда Kun.uz нашри.

Вазирга кўра, фуқароларнинг уй-жойлари, объектларнинг ноқонуний бузиб ташланиши халқнинг давлат органларига бўлган ишончига қаттиқ зарба берган. “Одамлар бир-бирини ёқиш орқали муаммони ҳал қилиши – бу цивилизациянинг ортга кетиши эди. Буни нега ўрганмайсизлар?” дея хитоб қилади вазир.

Русланбек Давлетов шунингдек, дарсликлар, таълим соҳасидаги адолатсизлик, жазони ижро этиш муассасалари ва ижтимоий соҳадаги аҳволни танқид остига олган.

Президент Мирзиёев Покистон бош вазири билан Афғонистондаги вазиятни муҳокама қилди

Шавкат Мирзиёев ва Имрон Хон Душанбедаги Шанхай Ҳамкорлик Ташкилоти саммити доирасида ўтган учрашувда икки томонлама муносабатлар ва Афғонистонадаги вазият муҳокама қилишган.

Бу ҳақда 16 сентябрь куни Ўзбекистон президентининг матбуот хизмати хабар қилди.

“Тошкент мулоқотларидан сўнг ўзаро товар айрибошлаш ҳажми 2,5 бараварга ошган. Тошкент ва Лаҳор ўртасида авиапарвозлар тикланган. 30 дан ортиқ қўшма корхоналар бунёд қилинди. Савдо-иқтисодий соаҳаларда келишилган битимларга амал қилинмоқда” дейилади матибуот хизмати хабарида.

Кузатувчиларга кўра, Ўзбекистон ва Покистон ҳукуматларининг ўзаро мулоқотлари гарчанд савдо-иқтисодий, сиёсий алоқалар билан дастакланса-да, мазкур учрашувларнинг ажралмас мавзуи Афғонистон ва толиблар масаласи бўлиб қолаверади. Чунки Афғонистоннинг икки қўшни мамлакати муносабатлари, шубҳасиз, Афғоистодаги вазият билан чамбарчас боғлиқдир.

Ўтган ҳафтада Жанубий Осиё ва Марказий Осиё мамлакатлари махсус хизматлари раҳбарларининг Исломободдаги жамоатчилик учун ёпиқ мажлисларида Ўзбекистон расмийлари ҳам иштирок этганига доир маълумотлар чиққанди, аммо тафсилотлар очиқланмаган.

Давомини ўқинг

XS
SM
MD
LG