Линклар

Шошилинч хабар
19 январ 2022, Тошкент вақти: 03:42

Ўзбекистон хабарлари

Ўзбекистон ўз ижтимоий тармоқ ва мессенжерларига эга бўлмоқчи

Ўзбекистонда “фуқароларнинг шахсий маълумотларини ҳимоялаш мақсадида” замонавий коммуникацион дастурлар ҳамда миллий ижтимоий тармоқ ва мессенжерлар яратилади.

Мазкур вазифа regulation.gov.uz порталида муҳокамаси давом этаётган “Янги Ўзбекистоннинг 2022–2026 йилларга мўлжалланган тараққиёт стратегияси” лойиҳаси иловасида акс этган.

“Фуқароларнинг ахборот олиш ва тарқатиш эркинлиги борасидаги ҳуқуқларини янада мустаҳкамлаш” (83-мақсад) бандига киритилган бу вазифанинг амалга ошириш муддати ўлароқ 2022 йил декабри белгиланган.

Давлат бюджети ҳамда ҳомийлар ва мақсадли жамғармалар маблағлари ҳисобидан амалга оширилиши кўзланган мазкур вазифани амалга ошириш учун соҳанинг етук мутахассислари ва йирик тадбиркорларни миллий коммуникация платформаларини яратишга жалб қилиш, маълумотларни узатиш ва қайта ишлашнинг замонавий талабларига мос дастурий таъминот ва техник воситалар билан таъминлаш кўзда тутилган.

Ўзбекистонда миллий ижтимоий тармоқ ва мессенжерлар яратиш уринишлари аввал ҳам бўлган, бироқ бу платформалар аҳоли орасида оммалашмаган эди.

Ўзбекистонликлар шу кунда асосан Facebook, Instagram, YouTube, Twitter, Одноклассники, ВКонтакте ижтимоий тармоқлари ҳамда Telegram, WhatsApp, Skype, Viber ва бошқа мессенжерлардан фойдаланишади.

Ўтган йилнинг 3 ноябрь куни Ўзбекистонда ижтимоий тармоқларнинг блокланиши билан боғлиқ можаро ҳукуматда инқирозга сабаб бўлган. Бунинг ортидан “Ўзкомназорат” раҳбари, АКТ вазири ҳамда Бош вазир маслаҳатчиси ишдан бўшатилган эди.

Кун янгиликлари

Андижонда 12 аёл “ҳизбчи”ликда гумонланиб қўлга олинди

Андижон туманида яшовчи 12 нафар аёл 16 январь куни “Ҳизб ут-Таҳрир” диний экстремистик ташкилотининг “Аёллар қаноти” гуруҳига аъзо бўлганликда гумонланиб қўлга олингани тўғрисида 18 январь куни вилоят ИИБ ахборот хизмати хабар берди.

Аёллар ДХХ Андижон вилояти бошқармаси, Андижон вилояти ва тумани ИИБ ходимлари ҳамкорликда ўтказган амалиёт пайтида ушланган.

Билдирилишича, 12 нафар аёл Андижон туманида яшовчи фуқаро М.М.,нинг хонадонида тўпланиб, “Ҳизб ут-Таҳрир” диний экстремистик ташкилоти фаолиятини тарғиб қилувчи “диний ўқишхонлик қилиб келаётганлиги аниқланди”.

“Олиб борилган тезкор суриштирув тадбирлари давомида ушбу аёллар ҳозирда Туркия давлатида бўлган 1972 йилда туғилган аёл М.Х.нинг кўрсатмаси асосида тез-тез бир бирларининг хонадонларида зиёфат баҳонасида йиғилишиб, М.Х.,дан ижтимоий тармоқлар орқали “Ҳизб ут-Таҳрир” диний экстремистик ташкилоти ғоялари бўйича сабоқ олиб келишаётганлиги аниқланди”,-дейилади расмий билдирувда.

Сўнгги пайтларда ДХХ ва ИИВ томонидан Ўзбекистонда ўнлаб фуқаро турли экстремистик диний оқимларга аъзоликда гумонланиб қўлга олингани тўғрисидаги хабарлар тез-тез пайдо бўлмоқда.

Сўнги марта Давлат хавфсизлик хизмати 12 январь куни Россияда жангарилар сафига қўшилиш мақсадида Сурияга кетмоқчи бўлган вақтида Ўзбекистон фуқароси қўлга олингани тўғрисида хабар берди.

Тошкент шаҳар суди Юлдуз Усмонова муаллифлик ҳуқуқини бузганини тасдиқлади

Ўзбекистон халқ артисти Юлдуз Усмонова.

Тошкент шаҳар суди фуқаролик ишлари бўйича судлов ҳайъати 18 январь куни Ўзбекистон халқ артисти Юлдуз Усмонова муаллифлик ҳуқуқини бузганини тасдиқлади ва Мирзо Улуғбек туманлараро суди ўтган йилнинг 29 октябрида чиқарган қарорни ўзгаришсиз қолдирди.

Юлдуз Усмонова Мирзо Улуғбек туманлараро суди қарори юзасидан Тошкент шаҳар судига апелляция шикояти киритган эди. Суд Усмонованинг шикоятини қаноатлантирмади.

2021 йил 20 сентябрь куни шоир Йўлчи Рўзиев Юлдуз Усмонова унинг “Хаста бўлма” шеърини қўшиқ қилиб айтгани ва бир неча йилдан бери мазкур шеър учун қонунда белгиланган тартибда ҳақ тўламай келаётганидан шикоят қилганди.

Мирзо Улуғбек туманлараро суди 2021 йил 29 октябрда Юлдуз Усмонова шоирга маънавий зарар учун 50 миллион сўм компенсация, базавий ҳисоблаш миқдорининг 500 баробари, яъни 135 миллион сўм миқдорида етказилган зарар ҳисобига товон пули тўлаши шартлиги тўғрисида қарор чиқарган.

“Апелляция тартибида кўрилган ҳал қилув қарори ҳамда апелляция инстанцияси судининг ажрими устидан Олий суднинг фуқаролик ишлари бўйича судлов ҳайъатига апелляция инстанцияси судининг ажрими қабул қилинган кундан эътиборан бир йил ичида кассация шикояти (протест) берилиши мумкин”,-дейилади Тошкент шаҳар суди хабарида.

Фарғонада бир хонадонда уч киши ис газидан заҳарланиб вафот этди

Фарғона шаҳар “Истиқлол” маҳалла фуқаролар йиғини Абдулла Қодирий кўчаси 43-уй, 44-хонадонда 14 январ куни соат 13:00 да ис газидан уч киши заҳарланди.

Расман билдирилишича, заҳарланганлардан икки нафари уй эгалари бўлиб, улар воқеа жойида вафот этган. Учинчи киши эса хонадонга меҳмонга келган. У оғир аҳволда касалхонага олиб кетилган. Лекин тез тиббий ёрдам кўрсатилганига қарамасдан вафот этган.

Фарғона шаҳар ҳокимиятида мазкур фавқулодда вазиятни ўрганиш бўйича комиссия ташкил этилди.

Ўтган йилнинг 15 декабрь куни Фавқулодда вазиятлар вазирлиги Ўзбекистонда 2021 йилнинг январидан 15 декабрига қадар ис газидан ва ҳаво-газ аралашмаси чақнаши оқибатида юзага келган портлашлардан 125 киши ҳалок бўлгани ва 115 киши жароҳатлангани тўғрисида маълум қилди.

Мутахассисларнинг билдиришларича, бу каби ҳодисалар фуқаролар томонидан газ ва муқобил ёқилғи турларидан фойдаланишда хавфсизлик чораларига риоя этмаслик, қўлбола ясалган печлардан фойдаланиш оқибатида юз бермоқда.

Ташқи ишлар вазирлиги Қозоғистонда ушланган шахс ўзбекистонлик эканини инкор этди

Иллюстратив сурат.

Қозоғистоннинг Туркистон вилояти "Жибек жоли" ўтиш пунктида 17 январь куни қўлга олинган шахс Ўзбекистон фуқароси эмас. Бу ҳақда Ўзбекистон Ташқи ишлар вазирлиги 18 январь куни расман баёнот берди.

Баёнотда таъкидланишича, Ўзбекистоннинг Олмаота шаҳридаги Бош консулхонаси бу борада Қозоғистон Миллий хавфсизлик қўмитаси матбуот хизматидан маълумот олган.

Ушбу маълумотда қўлга олинган шахс Ўзбекистон Республикаси фуқароси эмаслиги билдирилган.

Аввалроқ Қозоғистонлик чегарачилар бошқа кучишлатар идоралар ходимлари билан биргаликда Туркистон вилоятидаги “Жибек Жоли” назорат-ўтказиш масканида Чимкентдаги тартибсизликларда иштирок этганликда гумонланган ўзбекистонликни қўлга олгани хабар қилинган эди.

Ўшанда Қозоғистон Миллий хавфсизлик қўмитаси матбуот хизмати Ўзбекистон ҳудудига ўтиб кетишга уринган бу шахс 1993 йилда туғилган Е., исмли шахс эканини маълум қилган.

Академик Бахтиёр Назаров вафот этди

Бахтиёр Назаров 1945 йилда Тошкентда туғилган.

Йирик ўзбек адабиётшуноси, Ўзбекистон Фанлар академияси академиги Бахтиёр Назаров 18 январда 77 ёшида вафот этгани тўғрисида Фанлар академияси маълум қилди.

1945 йил Тошкентда туғилган Бахтиёр Назаров 1966 йилда ТошДУни тугатган. У 1969 йилдан 1973 йилгача Фанлар академияси Тил ва адабиёт институтида ишлади. Кейинроқ Ўзбекистон Фанлар академияси Бош илмий котиби ўринбосари ва вице-президент вазифасини бажарувчи бўлиб ишлаган.

Назаров 1990—92 йилларда президент маслаҳатчиси, 1992—94 йилларда олий ва ўрта махсус таълим вазирининг биринчи ўринбосари, 1986-94 йилларда “Ўзбек тили ва адабиёти” журналининг бош муҳаррири бўлган.

Назаров ўрта мактабнинг 9-, 11-синфлари учун “Ўзбек адабиёти”, олий мактаб учун “XX аср ўзбек адабиёти тарихи” дарсликларининг муаллифларидан бири.

Мудофаа саноати қўмитаси: Ўзбекистонда маҳаллий дронларни ишлаб чиқариш йўлга қўйилди

Ўзбекистонда ишлаб чиқилган "Lochin" дрони (видеодан скриншот)

Ўзбекистонда Марказий Осиёда илк бор учувчисиз учиш аппаратларини ишлаб чиқариш йўлга қўйилди. Бу ҳақда Мудофаа саноати давлат қўмитаси матбуот хизмати маълумот тарқатди.

Иддаога кўра, “халқаро техник талаб ва стандартларга тўлиқ жавоб берадиган” Lochin дронлари қўмита тасарруфидаги Учувчисиз авиация мажмуаларини илмий-ишлаб чиқариш маркази томонидан ишлаб чиқилган. Марказ учувчисиз авиация мажмуаларини ишлаб чиқариш, йиғиш, таъмирлаш ва техник хизмат кўрсатиш учун зарур йиғув жамланмалари, технологик ва махсус ускуналар, текшириш (тест лаборатория) мосламалари каби технологик жиҳозлар билан тўлиқ таъминлангани айтилмоқда.

Айни пайтда Мудофаа саноати қўмитаси мазкур дронлар қайси ҳудудда йиғилаётгани, уларни ишлаб чиқишда қайси мамлакат технологиясидан фойдаланилгани, битта дронни йиғиш қанчага тушаётгани ҳамда бу аппаратларни келажакда хорижга экспорт қилиш истиқболи бор-йўқлигига оид саволларга аниқлик киритган эмас.

Қўмита вакилларининг урғулашларича, Lochin дронлари бир қанча мақсадларда фойдаланишга мўлжалланган бўлиб, разведка қилиш, зарба бериш, реал вақт режимида кузатиш, маълумот олиш, артиллерия ўт очиш жараёнини бошқариш каби вазифаларни бажариш билан бир қаторда қишлоқ хўжалиги, нефт ва газ, ўрмон хўжалиги, темир йўллар, геология, қидирув соҳаларида картография, топогеодезия, экинларни дефолиация қилиш, қўриқхоналарни, йўлларни, ижтимоий инфратузилма ҳамда муҳим обектларни кузатиб бориш ва бошқа мақсадларда фойдаланиш имкониятини беради.

ССВ: Коронавирусга чалинганлар сони 207 минг нафардан, қурбонлар сони 1520 нафардан ошди

Ўзбекистонда коронавирус инфекцияси қайд этилганлар сони, 2022 йил 17 январь ҳолатига кўра, 207 минг 57 нафарга етган.

Соғлиқни сақлаш вазирлигининг маълум қилишича, кеча мамлакат бўйлаб 935 киши коронавирусга чалинган.

Сўнгги кунларда Ўзбекистонда хасталикка чалиниш бўйича кундалик кўрсаткичнинг кескин ошиб кетганига мамлакатга Omicron штамми кириб келиши сабаб бўлгани тахмин қилинмоқда.

Душанба куни мамлакат ҳудудлари бўйлаб 679 киши тузалиб, соғайганларнинг умумий сони 199 минг 872 нафарга етган.

ССВ ўтган кеча-кундузда коронавирусга чалинган беморлардан яна 4 нафари вафот этиб, коронавирус қурбонлари сони 1 минг 522 нафарга етганини қўшимча қилган.

Қозоғистон МХҚ чегарада курагида ўқ изи бўлган ўзбекистонлик ушланганини иддао қилди

Ўзбек-қозоқ чегарасидаги "Жибек Жоли" назорат-ўтказиш маскани (архив сурати)

Қозоғистонлик чегарачилар бошқа кучишлатар идоралар ходимлари билан биргаликда Туркистон вилоятидаги “Жибек Жоли” назорат-ўтказиш масканида тартибсизликларда иштирок этганликда гумонланган ўзбекистонликни қўлга олишган.

Қозоғистон Миллий хавфсизлик қўмитаси матбуот хизмати Ўзбекистон ҳудудига ўтиб кетишга уринган бу шахс 1993 йилда туғилган Е. исмли шахс эканини маълум қилган.

МХҚ иддаосича, қўлга олинган ўзбекистонликнинг мобил телефонидан Чимкентдаги тартибсизликлар акс этган видеоматериаллар чиққан. Шунингдек, унинг курагида ўқ изи борлиги айтилган. Қўмита тахминича, бу резина ўқ изи бўлиши мумкин.

Қўлга олинган шахс Сариоғоч тумани полиция бўлими ходимларига топширилгани айтилган.

Мазкур ҳодиса юзасидан Ўзбекистон Ташқи ишлар вазирлиги ҳам, мамлакатнинг Қозоғистондаги дипломатик муассасалари ҳам ҳали изоҳ берганича йўқ.

Қозоғистонда суюлтирилган газ нархи кескин ошиши ортидан 2 январь куни мамлакат ғарбида бошланган норозилик чиқишлари кейинроқ бошқа ҳудудларга ҳам тарқалган ва жанубдаги Туркистон вилоятида ҳам кузатилган. Дастлаб тинч намойиш кўринишига эга бўлган бу чиқишлардан айримлари турли жойларда тартибсизликларга айланиб кетган, хусусан, Қозоғистоннинг аввалги пойтахти Олмаота зўравонликларга саҳна бўлган. Бунинг ортидан президент Қасим-Жомарт Тоқаев фавқулодда ҳолат тартибини жорий этиб, кучишлатар тизимлар ходимларига намойишчиларни “огоҳлантиришсиз отиш”га буйруқ берган.

Кейинроқ расмийлар вазият назоратга олингани иддаоси билан қатор ҳудудларда фавқулодда вазият тартибини бекор қилинган. Хусусан, 13 январдан буён Ғарбий Қозоғистон, Павлодар, Шимолий Қозоғистон, Шарқий Қозоғистон, Туркистон ва Қарағанда вилоятлари ҳамда Чимкент шаҳрида мазкур тартиб бекор қилинган.

ХТВ айрим мактабларни Президент таълим муассасалари агентлигига ўтказиб беради

Кейинги ўқув йилидан бошлаб Ўзбекистондаги вилоят марказларидан, катта шаҳар ва туманлардан иккитадан, туман ва шаҳарлардан биттадан ихтисослашган мактаб Халқ таълими вазирлигидан Президент таълим муассасалари агентлигига ўтказиб берилади. Бу ҳақда президент Шавкат Мирзиёев раислигида “мактабларда, айниқса ихтисослаштирилган мактабларда таълим ва тарбия сифатини тубдан ошириш бўйича устувор вазифалар”га бағишланиб 17 январь куни ўтказилган йиғилишда айтилган.

Селектор мажлисида очиқланган маълумотлардан келиб чиқилса, янги ўқув йилидан мамлакат бўйлаб юзлаб мактаб Президент таълим муассасалари агентлиги назоратига ўтиши ойдинлашади.

Шунингдек, бундан буён ихтисослашган мактаблар мазкур агентлик тизимида ташкил этилади. Бунда туман ва шаҳарлардаги саноат ва қишлоқ хўжалигининг ривожланганлиги, бу ҳудудларда азалдан кучли ўқитилган фанлардан келиб чиқиб, мактаблар ихтисослашиши керак.

Йиғилишда президент ихтисослашган мактаблар фаолиятини тубдан такомиллаштириш учун бу ерда ўқийдиган ўқувчиларнинг халқаро таълим дастурлари асосида замонавий ўқув дарсликлари билан таъминланиши, 9-синфга келиб ўқувчилар камида 1 та хорижий тил бўйича миллий ва халқаро сертификат олишлари таъминланиши, юқори синф ўқувчиларининг бевосита корхоналарда амалиёт ўташи тизими жорий қилиниши, мактабларга ихтисослигидан келиб чиқиб Фанлар Академияси илмий-тадқиқот институтлари ва олийгоҳларнинг кафедралари бириктирилиши лозимлигини айтган.

Президент таълим муассасалари агентлиги Ш. Мирзиёевнинг ўтган йил 19 июлидаги қарорига мувофиқ равишда қайта ташкил этилган бўлиб, аввал у “Вазирлар Маҳкамаси ҳузуридаги Президент, ижод ва ихтисослаштирилган мактабларни ривожлантириш агентлиги” деб номланар эди.

Ўзбекистонга Pfizer/BioNTech вакцинасидан яна 310 минг доза олиб келинди

Жорий йилнинг 17 январь куни Ўзбекистонга Pfizer/BioNTech вакцинасидан 310 минг 50 доза олиб келинган. Бу ҳақда Соғлиқни сақлаш вазирлиги матбуот хизмати маълумот тарқатди.

Бир ҳафта муқаддам Озодлик Ўзбекистонга 500 минг дозадан зиёдроқ Moderna вакцинаси келтирилгани, бу 2022 йил ҳисобидан мамлакатга чет элдан олиб келинган вакцинанинг илк партияси экани ҳақида хабар қилган.

Жорий йил ҳисобидан хориждан олиб келинган вакцинанинг иккинчи партияси билан Ўзбекистонда Pfizer/BioNTech вакцинасининг умумий миқдори 2 миллион 626 минг 650 дозага етган (ўтган йили мазкур вакцинадан 2 миллион 316 минг 600 доза олиб келинган эди).

ССВ душанба кунги партия билан мамлакатда фойдаланилаётган вакциналар миқдори 49 миллион 846 минг 818 дозага етганини билдирган. Бундан (Pfizer/BioNTech вакцинасидан ташқари) 2 миллион 404 минг 480 дозасини AstraZeneca, 37 миллион 789 минг 938 дозасини ZF-UZ-VAC2001, 1 миллион 341 минг 790 дозасини “Sputnik V”, 3 миллион 500 минг 460 дозасини Moderna, 1 миллион 976 минг дозасини Sinovac, 207 минг 500 дозасини Sputnik Light вакцинаси ташкил этган.

Ўзбекистонда аҳолини коронавирусга қарши эмлаш жараёни ўтган йилнинг апрель ойидан бошланган. Ўтган вақт оралиғида эмлаш тадбирларида, расмий маълумотларга кўра, 40 миллион 787 минг 150 доза вакцинадан фойдаланилган.

Мусулмонлар идораси Умра сафари нега қимматлаганига изоҳ берди

Ўзбекистон мусулмонлари идораси Умра зиёрати 4 миллион 770 минг сўмга қимматлагани тўғрисидаги маълумотга изоҳ берди.

17 январда тарқатилган расмий билдирувда айтилишича, “коронавирус пандемияси умра хизматлари кўрсатишга ҳам салбий таъсир кўрсатди”. Жумладан, меҳмонхонада 4 кишилик хонага 2 нафар зиёратчи, 50 ўриндиқли автобусга 25 киши жойлаштириш каби талаблар ўрнатилди.

Бундан ташқари, эпидемиологик меъёрларга асосан озиқ-овқат маҳсулотлари махсус қадоқланган ҳолда тарқатилади, тиббий хизмат кўрсатишда қўшимча шифокорлар ва махсус дори-дармонлар билан таъминланади.

Шунингдек, Саудия Арабистонида 15 фоиз қўшимча қиймат солиғи жорий этилгани, зиёратчиларнинг бевосита Макка ва Мадина шаҳарларида Икки Ҳарамга яқин бўлган меҳмонхоналарга жойлаштирилиши ҳам нархнинг ошишига сабаб бўлган.

Бир неча кун олдин Мусулмонлари идораси Умра зиёрати ўзбекистонликлар учун 22 январдан бошланишини эълон қилган.

Умрага биринчи навбатда пандемиядан олдин, яъни 2020 йил февраль ойи охирига қадар умра зиёрати учун тўловларни амалга ошириб, сафарга бора олмаган фуқаролар юборилади.

Бироқ улар нарх ошгани сабабали қўшимча равишда 4 миллион 770 минг сўм тўлашлари лозим бўлади.

Президент Шавкат Мирзиёев “Аркадаг”нинг ўғли билан музокара ўтказди

Сердар Бердимуҳамедов 2021 йил февралидан бери Бош вазир ўринбосари лавозимида ишлаб келмоқда.

Ўзбекистон президенти Шавкат Мирзиёев 17 январь куни Тошкентга амалий ташриф билан келган “Туркманистон Вазирлар Маҳкамаси Раисининг ўринбосари Сердар Бердимуҳамедовни қабул қилди”.

Сердар Бердимуҳамедов Туркманистонда “Аркадаг” (“Суянч тоғи”) сифатида улуғланадиган авторитар президент Гурбангули Бердимуҳаммедовнинг ўғлидир.

Сердар Бердимуҳамедов 2021 йил февралидан бери Бош вазир ўринбосари лавозимида ишлаб келмоқда. Мазкур ҳолат Гурбангули Бердимуҳамедов ўғлини ўзининг ҳокимиятдаги вориси ўлароқ кўраётганини англатади.

“Юқори мартабали меҳмон қабул учун самимий миннатдорлик билдириб, Туркманистон Президенти Гурбангули Бердимуҳамедовнинг саломи ва энг эзгу тилакларини етказди ҳамда Туркманистон етакчисининг барча йўналишларда жадал ривожланиб бораётган Туркманистон-Ўзбекистон алоқаларига юксак баҳо берилган мактубини топширди”, -дейилади расмий хабарда.

Президент матбуот хизматининг билдиришича, Гурбангули Бердимуҳамедов ўз мактубида “икки мамлакатнинг халқаро сиёсат ва минтақавий муносабатлар борасидаги позициялари яқин ва ўхшашлигини алоҳида қайд этган”.

Учрашувда олий даражада эришилган келишувларнинг амалга оширилиши кўриб чиқилди.

IT-танлов ғолибига эски ноутбук берган ҳоким ўринбосари ҳайфсан олди. Ғолибга янги ноутбук берилмади

IT-танлов ғолиби бўлган ўқувчи ўзига совға қилинган эски ноутбукдаги инвентарь ёзувини намойиш қилмоқда (видеоскриншот)

Самарқандда ўтган “Бир миллион ўзбек дастурчилар” танловида ғолиб бўлган 8-синф ўқувчиси Сардор Сатторовга ишлатилган эски ноутбукни мукофот тарзида берган Нуробод тумани ҳокимининг ўринбосари ҳайфсан олди.

“Газета.uz” ва “Дарё уз”нинг билдиришича, бу ҳақда Нуробод тумани матбуот хизмати хабар берди.

Туман матбуот хизмати ҳоким ўринбосари Наврўз Жалалиддиновга нисбатан “Меҳнат кодексининг 181-моддаси (интизомий жазолар) 1-бандига асосан ҳайфсан интизомий жазоси қўлланилган”и ҳақида билдирлган. Аммо расмий хабарда ғолибга берилган эски ноутбук янгисига алиштирилгани ёки алиштирилмагани тўғрисида бирорта маълумот берилмаган.

Айни пайтда ижтимоий тармоқларда Самарқандга борган Restar жамоаси Сардор Сатторовга янги ноутбук сотиб олгани ва уни ғолибнинг уйига бориб совға қилгани тўғрисидаги видеолар тарқалди.

Аввалроқ Озодлик радиоси “Бир миллион ўзбек дастурчилар” танловида ғолиб бўлган 8-синф ўқувчиси Сардор Сатторовга ишлатилган эски ноутбук берилгани тўғрисида хабар қилган эди.

Балиқчида авария бўлган Nexiа ичидаги икки йўловчи ёниб кетди (ВИДЕО)

Иллюстратив сурат.

Андижон вилояти Балиқчи туманида 14 январь куни аварияга учрагани оқибатида ёниб кетган Nexia автомобилининг икки йўловчиси ҳалок бўлди.

Вилоят Йўл ҳаракати хавфсизлиги бошқармасининг хабар беришича, Куйганёр—Эски Хаққулобод автомобиль йўлининг 23-километрида 1994 йилда туғилган ҳайдовчи А.Н., йўлнинг белгиланмаган қисмидан кесиб ўтаётган 12 ва 9 ёшли болаларни уриб юбормаслик учун машина рулини ўнг томонга бурган. Бунининг оқибатида автомобиль йўл четидаги дарахтга урилган ва ёниб кетган.

Тан жароҳатлари олган ҳайдовчи машинадан чиқишга улгурган. Аммо унинг икки йўловчиси Қ.У., ва М.Х., автомашина ичида ёниб кетган.

Ҳолат юзасидан терговга қадар суриштирув ишлари олиб борилмоқда.

Россиянинг яна 144 ширкатига Ўзбекистонга балиқ ва гўшт сотишга рухсат берилди

Россельхознадзор Ўзбекистон Россиянинг 144 ширкатига балиқ ва гўшт сотишга рухсат бегани ҳақида хабар берди.

Расман билдирилишича, Россельхознадзор бу борада Ўзбекистон Ветеринария ва чорвачиликни ривожлантириш давлат қўмитаси билан музокаралар олиб борган.

Сўнгги келишувларга мувофиқ Ўзбекистонга балиқ ва гўшт сотиш ҳуқуқини қўлга киритган Россия ширкатлари сони 262тага етди.

Аввалроқ Россельхознадзор Ўзбекистон Россиядан балиқ импортини 2021 йилда 2020 йилдагига нисбатан 89 фоизга кўпайтирганини ва 2,5 минг тоннага етказиганини билдирган эди.

Давомини ўқинг

XS
SM
MD
LG