Линклар

Шошилинч хабар
15 август 2018, Тошкент вақти: 13:58

Фарғонада ота-онаси Туркияда ишлаëтган 5 яшар қизча ўлдириб кетилди


Фожиа 5 февраль куни Олтиқариқ тумани Полосон қишлоғида рўй берди. Гувоҳларнинг Озодликка айтишича, болани боғчадан оладиган одам бўлмагач, боғча опа уни бошқа болаларга қўшиб уйига жўнатган; кечқурун боланинг чавақланган жасади боғчадан бир километр нарида топилган. Қотилликда гумонланиб бир шахс ҳибсга олинган.

Яқинларининг Озодликка айтишича¸ 5 февраль куни ўлик ҳолда топилган қиз Олтиариқ туманидаги 6-сонли боғча тарбияланувчиси 5 яшар Кибриё Ғаппоровадир.

Кибриёнинг ёриб ташланган жасади 5 февраль оқшомида у борадиган боғчадан 8 километр наридаги Оқбўйра қишлоғидан ўтувчи темир йўл ва Фарғона канали кесишган жойдан 5 метр наридан топилган.

Бу ҳақда қизнинг қариндошларидан бири Озодликка гапириб берди:

- Болани танасининг ўнг томони қовурғаси ёрилган, айрим қисмлари мажақланган. Бугун жаназаси бўлаяпти, - деди Кибриёнинг қариндошларидан бири Озодликка 6 февраль куни.

Олтиариқ туманидаги 6-сонли боғча тарбиячисининг Озодликка айтишича, Кибриёнинг ота-оналари ўтган йил август ойида Туркияга ишлагани кетишган, бола бувиси қарамоғида қолган.

Боғча ходималаридан бири Озодлик билан суҳбатда шу куни Кибриёни олгани ҳеч ким келмаганини айтди:

- Унинг амакиваччаларининг болалари ҳам бизни боғчада-да. Улар 6 ёшда. Уйлари боғчага яқин жойда-да. Лекин, билсак болалар уйига етиб бормаган. Қидириб-қидириб катта болаларни топишди, Кибриёни топиша олишмади. Уларнинг айтишича, қандайдир велосипедли эркак боғчадан чиқишлари билан қанд олиб бераман, деб қаергадир олиб кетган. Узоқроқ юришгач, катта болаларга сизлар туриб-туринглар, биз Кибриё билан қанд олиб келамиз, деб олиб кетган. Шу билан қайтмаган. Кечқурун шунақа бўлганини кейин биз эшитдик, - деди 6-сонли боғча ходимаси.

Озодлик мухбири Кибриёнинг Туркиядаги ота-оналарига боғланди. Улар Истанбулдаги текстил фабрикаларидан бирида ишлаши, яккаю-ягона қизининг ўлимини эшитиб, Ўзбекистонга йўлга чиқишгани, ҳозирда гапира олмасликларини айтишди.

Олтиариқ тумани прокуратураси ҳозир мазкур ҳолат бўйича Ўзбекистон Жиноят Кодексининг 98-моддаси - "Қасддан одам ўлдириш" банди бўйича иш очиб, ҳодисани тергов қилмоқда.

Жараëн тафсилотларидан хабардор маҳаллий расмийнинг Озодликка айтишича¸ болаларни катталар ҳамроҳлигисиз уйларига жўнатиб юборгани гумон қилинаётган боғчаопалар ички ишлар бўлимида сўроқ қилинмоқда.

Фарғона ҳуқуқ-тартибот идораси мулозимининг Озодликка айтишича, болаларга қанд олиб бераман, деб уларни олиб кетган велосипедли эркакнинг кимлиги фоторобот ёрдамида аниқланмоқда.

Ҳозирча қотиллик мотивларига оид аниқ маълумот йўқ. Ҳуқуқ-тартибот идораларидаги Озодлик манбасига кўра, экспертиза қизнинг зўрланмагани, тана аъзолари ҳам олинмаганини кўрсатган.

Терговчилар қизни поезд босиб кетган, деган фаразларни ҳам ўрганмоқда.

Озодлик воқеа тафсилотларини ўрганишда давом этади.

Сизнинг фикрингиз

Шарҳларни кўрсатинг

XS
SM
MD
LG