Линклар

Шошилинч хабар
29 март 2024, Тошкент вақти: 10:13

Гулистонда пенсия олишга борган 72 яшар аëл тиқилинчда қолиб ўлди


Суратда ерда ëтган Мария Худойқулова¸ пенсия олиш учун навбат кутаëтган юздан ошиқ пенсионер кўз ўнгида жон берди.
Суратда ерда ëтган Мария Худойқулова¸ пенсия олиш учун навбат кутаëтган юздан ошиқ пенсионер кўз ўнгида жон берди.

6 апрель,кундуз соат 2 ларда Сирдарë вилоят маркази Гулистон шаҳрининг “Навбаҳор” маҳалла фуқаролар йиғини биносига пенсия олиш учун келган 72 яшар Мария Худойқулова тиқилинчда қолиб, жон берди.

Гувоҳлар ҳикояси

Воқеа гувоҳларининг Озодликка билдиришича¸ Худойқулова пенсия олиш учун эрта тонгдан навбатда турган.

Мария Худойқулова пенсия олиш учун навбат кутган эшик олдидаги тиқилинч.
Мария Худойқулова пенсия олиш учун навбат кутган эшик олдидаги тиқилинч.

Учта маҳаллада яшайдиганларга телефон қилиб¸ “Навбаҳор”га бориб¸ пенсияларингизни олинг¸ дейишди. Мен билганим¸ 150 тача одам бирваракайига пул берилаëтган хонага ëпирилди. Бу кампир ана шу тиқилинчда қолиб¸ юраги ëмон бўлиб қолди. Одамлар парвоям қилмади. Икки-учта аëл уни четга тортиб¸ сув-пув берайлик¸ деса¸ маҳалла биноси ичидагилар¸ “сув йўқ¸ бориб дўкондан олинглар” деди. Бир йигит яқиндаги магазинга югурди¸ келгунча кампир ўлиб қолди. “Тез ëрдам”га телефон қилишди¸ уям бир соат ўтиб¸ кампир ўлиб бўлганда келди ”¸ деди воқеага бевосита гувоҳ бўлганлардан бири.

Гувоҳлар ҳикоясича¸ ҳаëтини сақлаб қолиш учун деярли ҳеч ким ҳаракат қилмаган Мария Худойқулова ўлиб бўлгач¸ милиция¸ прокуратура ходимлари дарров етиб келган ва воқеани расмийлаштиришга киришган.

Ўғил ҳикояси

Озодликка маълум бўлишича¸ 1945 йилда туғилган Мария Худойқулова Гулистоннинг “Тараққиëт” маҳалласида яшаган. Унга 6 апрель куни телефон қилиб¸ шу куни “Навбаҳор” маҳалласида тарқатиладиган пенсия жадвалида унинг номи ҳам борлигини айтиб¸ бу ерга паспортини олиб келиш сўралган.

Онам эрталаб соппа-соғ турди¸ ширинлик пиширмоқчи бўлди. Кейин унга телефон қилиб¸ бугунги ведомостда сизнинг ҳам отингиз бор¸ келиб олинг дейишди¸ кетди. Обеддан кейин менга телефон қилиб¸ онанг ўлиб қолди¸ дейишди. Милиция¸ прокуратура қанақадир қоғозларга қўл қўйдиришди¸ рус мактабида ўқиганим учун¸ нималар ëзилганини унча тушунмадим. Бугун соат 1 ларда онамни дафн қилдим¸ маҳалладан ҳеч ким келмади”¸ дейди Мария Худойқулованинг ўғли Дамир.

Бу суҳбатдошга кўра¸ онасининг январь ойида юрак хасталиги билан касалхонада ëтиб чиққани¸ ëши 72 да эканига қарамай¸ у пенсиясини олиш учун ҳар ой куни билан¸ баъзида¸ кунлаб кутиб навбатда туриб келган.

Олдинлари почтадан оларди¸ у ерда ҳам тўполон¸ навбат эди. Бу ойдан банк маҳаллага бориб тарқатади¸ дейишди. Тарқатишни ташкиллаштиришнинг аҳволи мана –ўз оëғи билан пенсия оламан деб кетган онамнинг жасадини қайтаришди менга”¸ дейди марҳуманинг ўғли Дамир.

Ким масъул?

Озодлик кун давомида бу саволга расмий идоралардан жавоб олишга уринди¸ аммо бунинг уддасидан чиқа олмади.

Мария Худойқулова ўлган жой – “Навбаҳор” маҳалласи раиси¸ бу аëл “Тараққиëт” маҳалласидан¸ менинг ҳудудимга алоқаси йўқ¸ шунинг учун мен ҳеч нарса билмайман¸ деган мазмунда жавоб қилган бўлса¸ “Тараққиëт” маҳалласи раҳбарияти¸ тиқилинч “Навбаҳор”да бўлган¸ бизнинг бунга алоқамиз йўқ¸ биз ҳам буни бошқалардан эшитиб билдик¸ дея жавоб қилди.

Гулистонда пенсия тарқатишга масъул этиб белгиланган “Халқ банки” вакили эса¸ пенсионерлар навбатини ташкиллаштириш маҳаллақўмлар масъулиятида¸ деган мазмунда изоҳ берди.

Шу пайтгача¸ пенсиялар почтада тарқатиларди. 1 апрелдан президент қарорига мувофиқ¸ бу иш банкларга ўтди. Ўзи Гулистонда пенсия тарқатишни кеча бошладик. 6-8 апрель кунлари “Навбаҳор”¸ “Сайқал” ва “Шодлик” маҳалласидагиларга пенсия тарқатамиз¸ хабар беринглар¸ деб маҳаллақўмларга билдирдик. Бу учала маҳаллада жами 1290 нафар пенсионер бор. Учта кассиримиз пул тарқатишга кетди. Ким маҳалла биносига келади¸ кимнинг пенсияси уйига олиб бориб берилади¸ бунинг рўйхатини ҳам маҳаллақўмдагилар қилган. Касалванд¸ ëши кексаларга пенсиясини уйига олиб бориш учун битта кассир ажратганмиз¸ маҳаллақўм бу аëлни шу рўйхатга қўшмагандирки¸ у келиб навбатда турган”¸ деди Гулистон “Халқ банки”нинг Озодлик суҳбатлашган вакили.

Пенсионерлар системани айблайди

Мария Худойқулова ўлимига гувоҳ бўлган айрим гулистонлик пенсионерлар Озодлик билан суҳбатда¸ бу фожиани пенсионерларнинг хор экани ва ҳокимият улар устидан очиқча кулаëтгани исботи сифатида талқин этдилар.

“Мен ҳам шу юрт учун ишлаб¸ пенсияга чиқтим. Оладиган пенсиям деярли ҳеч нарсага етмайди¸ лекин уни олиш учун эзилиб кетаяпман. Кеча эрталаб соат 8 да пенсия хабарини эшитиб уйдан чиққанимча¸ бешларда пенсияни қўлимга олдим. Куни билан оч-наҳор иссиқда¸ тиқилинчда навбат кутдим. Пластикка ўтказиб¸ бу балодан қутулай десам¸ ҳамма нарсага 20-30 процент кўп тўлашга тўғри келади¸ пенсиямни олмай туриб¸ йўқотаман. Нақдда олади энди деб президент қарор чиқарди¸ лекин уни оламан деб¸ Мария опага ўхшаб ўлиб кетиш ҳеч нарса бўлмай қолди”¸ дейди кечадан бери ўзига келолмаëтганини айтган гулистонлик пенсионерлардан бири.

XS
SM
MD
LG