Линклар

Шошилинч хабар
08 декабр 2021, Тошкент вақти: 03:02

Ўзбекистон хабарлари

ОАВ: Пора билан қўлга тушган прокурор ҳокимнинг укаси экани ҳозирча тасдиқланмади

Иллюстратив сурат.

Андижонда пора олаётган пайтда ДХХ томонидан ушланган прокуратура ходими ҳокимнинг жияни экани тўғрисидаги маълумот ўз тасдиғини топмади. Бу борада Kun.uz нашри ўз манбаси ва Бош прокуратурага таяниб хабар берди.

Аввалроқ ижтимоий тармоқларда “Андижонда 30 минг доллар пора билан қўлга олинган прокуратура ходими Андижон вилояти ҳокими Шуҳрат Абдураҳмоновнинг жияни” экани иддао қилинган хабарлар тарқалган эди.

Qalampir.uz нашрининг 13 ноябрда хабар беришича, “Андижон вилоят прокуроратурасининг кадрлар бўлими бошлиғи Қ. исмли шахс” бундан аввал “маълум вақт Андижон шаҳар прокурори лавозимида ҳам ишлаган. У пулни вилоят халқ таълим бўлимида “еб юборилган” 6,7 млрд сўмни ёпди-ёпди қилиш учун олаётган пайтда қўлга тушган”.

Kun.uz , “Дарё” ва “Газета уз” эса Бош прокуратура матбуот хизматига таянган ҳолда, пора миқдори 15 минг доллар бўлганини ёзмоқда.

Хабарларда айтилишича, прокуратура ходими 12 ноябрь куни соат тахминан 23:00 ларда қўлга тушган.

Сентябрь ойида Жиззах вилоятида туман прокурори 2 минг доллар, Самарқанд вилоятида туман прокурори ўринбосари 10 минг доллар пора олаётганда қўлга тушгани хабар қилинган.

Кун янгиликлари

Ҳукумат муҳтож аёлларни уй-жой билан таъминлашга оид низомни тасдиқлади

Иллюстратив сурат

Ўзбекистон ҳукумати жорий йилнинг 6 декабридаги қарори билан “Нотурар жойларда истиқомат қилаётган, шунингдек, ота-онасидан ёки уларнинг биридан айрилган ҳамда ёлғиз онаси, ёлғиз отаси ёки бошқа шахслар қарамоғида бўлган вояга йетган уй-жойга муҳтож хотин-қизларни уй-жой билан таъминлаш тартиби тўғрисидаги низом”ни тасдиқлаган. Бу ҳақда Маҳалла ва оилани қўллаб-қувватлаш вазирлиги матбуот хизмати маълум қилди.

Низомга мувофиқ, уй-жой шароитини яхшилаш истагида бўлган уй-жойга муҳтож аёллар ўзини ўзи бошқариш органи ёки туман (шаҳар) маҳалла ва оилани қўллаб-қувватлаш бўлимига сўровнома-ариза билан мурожаат қилади.

Уй-жойга муҳтож хотин-қизларни уй-жой билан таъминлашга кўмаклашиш комиссияси ҳар чоракда (чорак биринчи ойининг 15-кунигача) уларнинг уй-жойга эҳтиёжмандлик даражасини ўрганиб чиқади.

Комиссиянинг тегишли қарори қабул қилингач, уй-жойга муҳтож хотин-қизлар кўпи билан 30 кундан ошмаган муддат ичида ижтимоий уй-жойларга ижара ҳуқуқи асосида вақтинчалик жойлаштирилади.

Ҳужжатга мувофиқ, бунда уй-жойга муҳтож хотин-қизларга ипотека кредити бўйича уй-жойларнинг ҳисобланган қийматининг 15 фоизи миқдорида бошланғич бадал тўлаб берилиши, туман (шаҳар) ҳокимлиги Комиссия қарори қабул қилингандан сўнг 20 кун ичида ижтимоий уй-жойга жойлаштириладиган хотин-қизлар билан ижара шартномасини тузиши (кўпи билан 5 йил муддатга), ижара шартномаси тузилгандан кейин 5 кун ичида ижтимоий уй-жойни топшириш – қабул қилиш далолатномаси тузилиши, далолатнома тузилгач, уй-жойга муҳтож хотин-қизлар 5 кун ичида ижтимоий уй-жойга жойлаштирилиши белгиланган.

Низомда ногиронлиги бўлган шахслар, кекса ёшдаги ва ўзи ҳаракатлана олмайдиган шахслар устувор равишда кўп квартирали уйларнинг биринчи қаватидаги ижтимоий уй-жойларга жойлаштирилиши қайд этилган.

Ижтимоий уй-жойдан фойдаланганлик учун ижара ҳақи уй-жой умумий майдонидан келиб чиқиб унинг 1 квадрат метри учун Тошкент шаҳрида 1 йилга БҲМнинг 2 фоизи (5 минг 400 сўм), Қорақалпоғистон Республикаси ва вилоятларда 1 фоизи (2 минг 700 сўм) миқдорида белгиланади.

Ҳужжатда ижара шартномасида белгиланган талабларга риоя этилиши юзасидан ҳар ойда бир маротаба мониторинг олиб борилиши қайд этилган.

Андижонда блогер аёлни калтаклаганликда гумонланаётган бош ҳисобчига қарши жиноят иши очилди

Андижонлик блогер Фотима Жўраева

Андижонда блогер аёлни калтаклаганликда гумонланаётган Улуғнор тумани электр тармоқлари бош ҳисобчисига нисбатан жиноят иши қўзғатилган. Бу ҳақда “Дарё” нашри Бош прокуратура ахборот хизмати раҳбари Ҳаёт Шамсутдиновдан олинган маълумотга таянган ҳолда хабар қилди.

Блогер Фотима Жўраева шу йилнинг 22 ноябрь куни Facebook тармоғидаги ўз саҳифасида Улуғнор тумани электр тармоқлари корхонаси бош ҳисобчиси томонидан калтакланганига оид видеони жойлаштирган .

Блогернинг айтишича, у фермер хўжаликларидан бирининг электр энергиясидан қарздорлиги сунъий равишда оширилгани тўғрисидаги гумонларни текшириш учун Улуғнор тумани электр тармоқлари корхонасига борган.

Ф. Жўраева корхона бош ҳисобчисидан тегишли ҳужжатларни кўрсатишни талаб қилган, аммо бош ҳисобчи унга қўпол муомалада бўлган ва уни калтаклаган. Блогер ўз мурожаатида айбдор корхона ходимларига нисбатан қонуний чора кўришни сўраган.

Аввалроқ Озодлик андижонлик блогер аёлнинг калтакланиши юзасидан Бош прокуратура ва "Ҳудудий электр тармоқлари" ширкати томонидан текширув ишлари бошлангани ҳақида хабар қилган. Расмийлар мазкур ҳолат юзасидан махсус комиссия тузилгани ва Улуғнор туманига юборилганини билдирган эдилар.

Олиб борилган терговга қадар текширув натижасига кўра, Улуғнор тумани электр тармоқлари корхонаси бош ҳисобчиси С.М.га нисбатан туман ИИБ ҳузуридаги Тергов бўлинмаси томонидан Жиноят кодексининг 109-моддаси 2-қисми (қасддан баданга енгил шикаст етказиш) билан жиноят иши қўзғатилган ҳамда Фотима Жўраева жиноят ишида жабрланувчи дея эътироф этилган.

Ўтказилган суд-тиббий экспертизасининг 25 ноябрдаги хулосасига мувофиқ, Фотима Жўраевада бош мия чайқалиши, бошнинг чап қовоқ соҳаси ёрилиши, чап елка, бел, қорин ва думба соҳаси юмшоқ тўқималарининг лат ейиши ва қонталашлар каби жароҳатлар аниқланган.

ССВ: COVID-19 га қарши эмловда қўлланилган вакцина сони 35 миллион дозадан ошди

Ўзбекистонда коронавирусга қарши эмлаш тадбирлари бошланган апрель ойидан буён шу кунгача 35 миллион 117 минг 208 доза вакцинадан фойдаланилган. Бу ҳақда Соғлиқни сақлаш вазирлиги матбуот хизмати маълумот тарқатди.

Вазирлик 1-босқичда эмланганлар сони 17 миллион 987 минг 159 нафарни, 2-босқичда эмланганлар сони 11 миллион 323 минг 656 нафарни, 3-босқичда эмланганлар сони эса 5 миллион 806 минг 393 нафарни ташкил этганини билдирган.

ССВ қайдича, шу кунгача Ўзбекистонда Pfizer вакцинаси билан 12 ёшдан 18 ёшгача бўлган 476 минг 941 нафар бола эмланган.

Вазирлик 6 декабрда мамлакат бўйлаб 147 киши коронавирусга чалингани, шу тариқа хасталик юқтириб олганларнинг умумий сони 194 минг 703 нафарга етганини маълум қилган.

Душанба куни Ўзбекистон бўйича 215 киши тузалиб, соғайганларнинг умумий сони 191 минг 277 нафарга етган.

Соғлиқни сақлаш вазирлиги ўтган кеча-кундуза коронавирусга чалинган беморлардан яна 3 нафари вафот этиб, коронавирус қурбонлари сони 1 минг 424 нафарга етганини қўшимча қилган.

Тошкентда хорижлик блогерлар иштирокидаги TikTok Fest шоу-концерти ўтказилмайдиган бўлди

Тошкентдаги Humo Arena мажмуасида 25 декабрь куни россиялик ва украиналик блогерлар иштирокида ўтказилиши мўлжалланган TikTok Fest шоу-концерти бекор қилинди.

Маданият вазирлиги матбуот хизматига кўра, TikTok Fest “ижтимоий тармоқларда танқидий мулоҳазаларга сабаб бўлган”. Вазирлик шоу-концерт “маънавий жиҳатдан ёшлар онгига, дунёқарашига салбий таъсир этиши” ва “ўзбек халқи миллий менталитети, ахлоқий тарбияси”га тўғри келмаслигини урғулаган.

Қайд этилишича, фестивални ўтказиш учун рухсатномани Ички ишлар вазирлиги ва маҳаллий ижроия ҳокимияти беради.

“Ўйлаймизки, бу каби оммавий тадбирларни ташкил этаётган мутассаддилар ана шу жиҳатларни ҳисобга олиб, бу масалага жиддий ёндашади”, дейилган Маданият вазирлиги хабарномасида.

Бу муносабат ортидан Ёшлар ишлари агентлиги ахборот хизмати раҳбари Нодир Абдуқодиров Humo Arena муз саройида бўлиб ўтиши режаланган концерт ўтказилмаслигини билдирган.

Аввалроқ шоу-концертда россиялик ва украиналик блогер ва мусиқачилардан Даня Милохин, Артур Бабич, Егор Шип, Анет Сай, Ваня Дмитриенко ва Аня Pokrov иштирок этиши айтилган эди.

Йўловчи ташиш бўйича тендерлар электрон тарзда ташкил қилинади

Иллюстратив сурат

Ўзбекистонда кейинги йилнинг 1 январидан 1 мартигача йўловчи ташиш йўналишларини очиқ тендерлар орқали бириктириш бўйича электрон тизим тест режимида жорий этилади.

Мазкур тартиб, Адлия вазирлиги қайдича, Вазирлар Маҳкамаси томонидан шу йил 6 декабрида чиқарилган “Автомобиль транспортида йўловчи ташиш йўналишлари бўйича очиқ тендерларни электрон тарзда ташкил этиш чора-тадбирлари тўғрисида”ги қарор асосида жорий қилинмоқда.

Ҳужжатга мувофиқ, 2022 йил 1 мартидан шаҳар, шаҳар атрофи, шаҳарлараро ва халқаро йўловчилар ташиш йўналишларини бириктириш юзасидан очиқ тендерлар фақат электрон тизим орқали ўтказилади.

Қарор билан тендерни ўтказиш тартиби тўғрисидаги низом ҳам тасдиқланиб, унда тендер таклифларига қўйиладиган талаблар, ғолибларни аниқлаш, шартнома тузиш ва бошқа қоидалар белгиланган.

Бош прокуратура масъули 29 минг доллар пора билан қўлга олинди

Ўзбекистон Бош прокуратурасида бошқарма бошлиғи ўринбосари лавозимида ишлаб келаётган А.Т. аввалги иш жойида Олмалиқдаги ётоқхона реконструкцияси бўйича ўтказилган тендерни ютиб олган қурилиш корхонаси раҳбарига тендерда ўзининг ёрдами билан ғолиб чиққанини иддао қилиб, ундан моддий рағбат талаб қилиб келган.

Мулозим шу йил 5 декабрида Тошкентдаги “Мустафо” ресторанида қурилиш корхонаси раҳбаридан 29 минг АҚШ долларини олган пайтида ДХХ ва БП ҳамкорликда ўтказган тезкор тадбир чоғида ушланган ашёвий далиллар билан қўлга олинган.

Бош прокуратура матбуот хизмати маълумотига кўра, мазкур ҳолат юзасидан А.Т.га нисбатан мамлакат Жиноят кодексининг 168-моддаси 4-қисми "а" банди (Фирибгарлик) билан жиноят иши қўзғатилган ва гумонланувчи процессуал тартибда ушланган.

Ҳодиса ортидан БП прокуратура органларидаги коррупцион ҳолатлар юзасидан аҳолига мурожаат билан чиққан ва тизимда “коррупцияга қарши муросасиз ва кескин кураш олиб борилаётгани”ни иддао қилган.

“Агар прокуратура органларининг бирон-бир ходими фаолиятида коррупция билан боғлиқ хатти-ҳаракат (ёки ҳаракатсизлик)ни кузатсангиз, сезсангиз, бу ҳақда зудлик билан Бош прокуратура Шахсий хавфсизлик бошқармасининг (71) 202-08-28 рақамли “Ишонч телефони”га маълум қилишингизни сўраймиз”, дея сўралган Бош прокуратуранинг аҳолига мурожаатида.

Ўзбекистонга яна 300 минг дозадан кўпроқ Pfizer/BioNTech вакцинаси олиб келинди

Ўзбекистонга 6 декабрь куни Pfizer/BioNTech вакцинасидан яна 301 минг 860 доза келтирилди. Бу ҳақда Соғлиқни сақлаш вазирлиги матбуот хизмати маълумот тарқатди.

Бу мазкур вакцинанинг Ўзбекистонга олиб келинган тўртинчи партиясидир. Илк партия (1 миллион 200 минг доза) жорий йилнинг сентябрь ойида олиб келингани ҳақида Озодлик аввалроқ хабар қилган. Иккинчи (526 минг 500 доза) ва учинчи (273 минг 780 доза) партиялар эса 18 ва 25 октябрь кунлари келтирилган.

ССВ қайдича, бугунги партия билан Ўзбекистонга олиб келинган Pfizer/BioNTech вакцинасининг умумий миқдори 2 миллион 316 минг 600 дозага етган.

Эмлаш жараёни бошлангани дан бери мамлакатга келтирилган ва ичкарида ишлаб чиқарилган вакцина миқдори 43 миллион 107 минг 478 дозага етган. Булар орасида Pfizer/BioNTech (АҚШ/Германия) вакцинасидан ташқари AstraZeneca (Британия), ZF-UZ-VAC2001 (Хитой), Спутник V (Россия), Moderna (АҚШ) ва Sinovac (Хитой) вакциналар бор.

Вазирлик бундан 34 миллион 874 минг 583 дозаси эмлаш жараёнида қўлланилганини билдирган.

Мирзиёевнинг Нур-Султонга сафари доирасида ўзаро ҳамкорликка оид 22 та ҳужжат имзоланди

Ўзбекистон ва Қозоғистон президентлари ҳужжатларни имзолаш маросимида, Нур-Султон, 2021 йил 6 декабри (president.uz фотоси)

Ўзбекистон президенти Шавкат Мирзиёевнинг Қозоғистонга сафари доирасида икки давлат ҳамкорлигининг турли йўналишларини қамраб олган 22 та ҳужжат имзоланган. Бу ҳақда президент матбуот хизмати маълумот тарқатди.

Имзоланган ҳужжатларнинг энг муҳимларидан бири сифатида Ўзбекистон билан Қозоғистон ўртасидаги иттифоқчилик муносабатларига оид декларация экани урғуланмоқда.

“Ҳужжатда қардош халқларимизнинг ҳаётий муҳим ва узоқ муддатли миллий манфаатлари, кўп қиррали шериклик салоҳиятини тўлиқ рўёбга чиқариш мақсади ўз ифодасини топган”, дейилган хабарномада.

Яқин беш йилда икки мамлакат ўртасидаги товар айирбошлашни 10 миллиардга етказиш бўйича Амалий ҳаракатлар режаси маросимда имзоланган яна бир муҳим ҳужжатлиги қайд этилган.

Маросимда икки президент ҳузурида ҳукуматлараро ва идоралараро ҳужжатлар имзоланган. Булар божхона, фавқулодда вазиятларни олдини олиш ва бартараф этиш, фазовий маконни тадқиқ этиш ва ундан тинч мақсадларда фойдаланиш соҳасига доир ҳамда “Марказий Осиё” саноат кооперацияси халқаро марказини ташкил этиш тўғрисидаги битимлар, савдо, инвестициялар, энергетика, транспорт коммуникациялари, суд-экспертлик фаолияти, мудофаа, бандлик ва фан соҳаларида ҳамкорликни янада кенгайтириш бўйича тегишли ҳужжатлардир.

Ш. Мирзиёев 5-6 декабрь кунлари давлат ташрифи билан Қозоғистон пойтахтида бўлиши ҳақида Озодлик аввалроқ хабар қилган.

ССВ: COVID-19 қурбонлари сони 1 минг 420 нафардан ошди

Ўзбекистонда 5 декабрь куни коронавирусга чалинган беморлардан 3 нафари вафот этган, шу тариқа бу хасталикдан қурбон бўлганларнинг умумий сони 1 минг 421 нафарга етган.

Соғлиқни сақлаш вазирлиги қайдича, якшанба куни мамлакат бўйлаб 223 киши коронавирусга чалинган, вирус юқтириб олганларнинг умумий сони эса 194 минг 556 нафарни ташкил қилган.

Айни пайтда кеча Жиззах, Навоий, Сурхондарё ва Қашқадарё вилоятларидан ташқари ҳудудларда 123 киши тузалиб, соғайганларнинг умумий сони 191 минг 62 нафарга етган.

Тошкентда бангивор моддалар савдосини реклама қилган рассом қиз жаримага тортилди

Тошкентнинг Учтепа туманида ИИБ ходимлари рассом қизнинг наркограффитини ўчириш жараёнини назорат қилмоқда (Тошкент шаҳар ИИББ видеосидан скриншот)

Тошкентда кўп қаватли уйлар деворларига наркотик ва психотроп моддалар савдоси бўйича сайтларга иловали граффитилар чизиб юрган 31 ёшли К. З.га 540 минг сўм миқдорида жарима солинди. Тошкент шаҳар ички ишлар бош бошқармаси маълумотига кўра, рассом қизнинг иши Учтепа туман судида 25 ноябрь куни кўриб чиқилган.

ИИББ қайдича, қиз пойтахтнинг Учтепа туманидаги уйлардан бири деворига расм чизаётган пайтда тутилган. Дастлаб у ҳуқуқ-тартибот идоралари вакиллари томонидан огоҳлантирилган ва аввал чизган барча расмларни ўчириб юбориш шарти билан қўйиб юборилган.

Бироқ бир неча кун ўтгач, участка нозири қизни бошқа уй деворига расм солаётган пайтда тутган. Шундан сўнг иш судга оширилган.

Судда қиз бу ишни Интернетда топганини айтган. У Маъмурий жавобгарлик тўғрисидаги кодекснинг 194-моддаси 1-қисми (Ички ишлар органлари ходимининг қонуний талабларини бажармаслик) бўйича айбдор деб топилган ҳамда БҲМнинг 2 баробари (540 минг сўм) миқдорида жаримага тортилган.

Россиядаги ўзбек мигрантлари учун декабрь ойида саккизта поезд қатнови амалга оширилади

Иллюстратив сурат

“Ўзбекистон темир йўллари” АЖ шу йил 4 декабридан “Волжский-Тошкент” йўналишида 483-сонли махсус йўловчи поездининг саккиз маротаба қатновини амалга оширишни режалаган.

“Ўзтемирйўлйўловчи” АЖ матбуот хизмати маълумотига кўра, илк поезд шанба куни соат 20:57 да “Волжский” темир йўл вокзалидан йўлга чиққан.

Кейинги рейслар яна шу вокзалдан 6, 10, 13, 17, 20, 24, 27 декабрь кунлари соат 20:57 да амалга оширилиши кутилмоқда.

“Мазкур поездга фақат бир томонга, яъни “Волжский-Тошкент” йўналишига чипталар сотилади. Чипталарни электрон тарзда ҳам сотиш йўлга қўйилган”, дейилган хабарномада мазкур рейслар пандемия даврида Россияда қолиб кетган мигрантларнинг Ўзбекистонга келишлари учун қулайлик яратиш мақсадида йўлга қўйилгани урғуланган.

Жиззахда дарахтлар атрофини бетонлаб ташлаган корхона жаримага тортилди

Ости бетонлаб ташланган дарахтларни кўчириш тадбири, Гагарин шаҳарчаси, 2021 йил 5 декабри (Жиззах вилояти экология бошқармаси фотоси)

Жиззах вилоятининг Гагарин шаҳарчасида дарахтлар атрофини бетонлаб юборган "Файз-Барака" МЧЖга нисбатан маъмурий чора кўрилди. Бу ҳақда Жиззах вилояти экология бошқармаси ахборот хизмати маълумот тарқатди.

Гагаринда йўлак қуриш чоғида дарахтлар атрофи бетонлаб ташлангани ҳақида аввалроқ журналист Хуршид Далиев хабар қилган эди. Бу борада ўрганиш ўтказган Жиззах вилояти экология ва атроф муҳитни муҳофаза қилиш бошқармаси ҳақиқатан ҳам 75 туп дарахт ости бетонланганига гувоҳ бўлган.

Бошқарма 4 декабрь куни дарахтлар тагидаги бетонлар бузиб олиниб, таги юмшатилгани, “Файз-Барака” ходимларига нисбатан эса расмий баённома расмийлаштирилиб, жарима белгилангани ҳақида маълум қилган.

Якшанба куни эса жиззахлик экологлар мазкур дарахтларни бетон ариқ ёқасидаги тупроқ ерга кўчириб ўтқазганлар, кўчириш имкони бўлмаган кўп йиллик дарахтларнинг таги юмшатилган.

Ўзбекистон президентининг Қозоғистонга сафари бошланди

Ўзбекистон Республикаси Президенти Шавкат Мирзиёев Қозоғистон Республикаси Президенти Қасим-Жомарт Тоқаевнинг таклифига биноан 5 декабрь куни Нурсултон шаҳрига келди.

Бу ҳақда хабар қилган ЎзА ахборот агентлигига кўра, давлат раҳбари Қозоғистонга давлат ташрифи билан келган, Нурсултон Назарбоев номидаги халқаро аэропортда олий мартабали меҳмон шарафига фахрий қоровул саф тортди.

Олдинроқ “Музокараларда сиёсий мулоқот ва савдо-иқтисодий ҳамкорликни кенгайтириш, иқтисодиётнинг турли тармоқларида кооперация лойиҳаларини амалга ошириш, транспорт-логистика салоҳиятини ошириш, маданий-гуманитар алоқаларни фаоллаштиришнинг долзарб масалалари муҳокама қилинади. Ташриф якунида ҳамкорликни янги босқичга кўтаришга қаратилган кўплаб ҳужжатлар имзоланиши режалаштирилган”, деб хабар қилинган эди.

Ташрифнинг асосий тадбирлари 6 декабрга мўлжалланган. Учрашув натижалари бўйича 20 дан ортиқ ҳужжат имзоланиши кўзда тутилган.

Мирзиёевнинг Нурсултонга ташрифи арафасида, 4 декабрь куни бу ерда Ўзбекистон-Қозоғистон ишбилармонлар кенгашининг навбатдаги, 4-йиғилиши бўлиб ўтди.

ИИВ ходимларига 5 ойда 94 марта қаршилик кўрсатилди

Ички ишлар вазирлиги мулозимининг Kun.uz нашрига билдиришича, ички ишлар ходимлари 2021 йилнинг 5 ойида 94 марта хизмат вазифасини бажариш чоғида қаршиликка учраган ва ҳаёт учун хавфли жароҳат олган.

“2018 йилда ички ишлар идоралари ходимларига 146 маротаба қаттиқ қаршилик кўрсатилган ва оғир тан жароҳати етказилган. Шундан 78 та ҳолат профилактика инспекторлари билан рўй берган. 2019 йилда эса ички ишлар органлари ходимлари 163 маротаба қаршиликка учраган, шундан 84 таси профилактика инспекторларига нисбатан содир этилган”, деган ИИВ Ҳуқуқбузарликлар профилактикаси бош бошқармаси бошлиғи Бахтиёр Бердиалиев .

ИИВ мулозимига кўра, 2020 йилда бу кўрсаткич 186 тага чиқиб кетган, мазкур ҳолатлар туфайли 137 нафар профилактика инспектори ҳаёт учун хавфли бўлган оғир тан жароҳатлари олган, уларнинг аксарияти ногирон бўлиб қолгани учун хизматни давом эттира олмаган, 2021 йилнинг 5 ойида ички ишлар ходимлари хизмат вазифасини бажариш чоғида 94 маротаба қаршиликка учраган бўлса, шундан 64 та ҳолат профилактика инспекторлари ҳиссасига тўғри келган.

Ҳокимият вакилига, жумладан, ички ишлар ходимларига ва фуқаролик бурчини бажараётган шахсларга нисбатан қаршилик кўрсатиб, оғир ва ўртача оғир шикаст етказган фуқаролар Жиноят кодексининг 219-моддаси билан жавобгарликка тортилади”, деган Бахтиёр Бердиалиев.

Андижон. Аёлнинг 4-қаватдан қулаши ҳолати юзасидан жиноят иши қўзғатилди

Андижон Давлат университети биноси.

Ўзбекистон Республикаси Бош прокуратураси матбуот хизмати Андижон Давлат университети Тарих факультетининг биноси 4- қаватидан 28 яшар аёл қулагани ортидан бу ҳолат юзасидан жиноят иши қўзғатилганини хабар қилди.

Хабар қилинишича, 4 декабрь куни 28 ёшли аёл Андижон Давлат Университетига ушбу олийгоҳнинг 2-босқич талабасининг оила аъзоси сифатида таъмирлаш ишлари амалга оширилаётган Тарих факультетининг биносида бўлиб ўтадиган ота-оналар мажлисига келган.

Шунда у бинонинг 4-қаватида уяли алоқа телефон аппаратидан фойдаланиб, эҳтиётсизлиги оқибатида зиналарнинг тўсиқлари бўлмаганлиги сабабли зинапоядан пастга йиқилган ва оғир тан жароҳати олган.

Олиб борилган текшириш ҳаракатлари давомида ушбу бинода таъмирлаш ишларини олиб бораётган “S.Haus” МЧЖ ишчилари томонидан зинапояларнинг тўсиқлари олиб ташланиб, қурилиш ишлари амалга оширилаётганлиги аниқланган.

“Мазкур ҳолат юзасидан “S.Haus” МЧЖ мансабдор шахсларига нисбатан Жиноят кодексининг 257-моддаси (Меҳнатни муҳофаза қилиш қоидаларини бузиш) билан жиноят иши қўзғатилган. Ҳозирда Андижон шахар ИИОФМБ ҳузуридаги Тергов бўлими томонидан тергов ҳаракатлари олиб борилмоқда”, дейилган Бош прокуратура матбуот хизмати хабарида.

Бош прокуратура хабаридан олдинроқ ижтимоий тармоқларда бир аёл Андижон Давлат университети биносининг 4- чи қаватидан тушиб кетгани ҳақида хабар тарқалган эди.

Давомини ўқинг

XS
SM
MD
LG