O‘zbekistonda 2021-yilda o‘tkazilgan prezident saylovida davlat rahbari lavozimiga nomzod bo‘lgan Narzullo Oblomurodov Toshkent davlat agrar universitetining O‘quv ishlari bo‘yicha prorektori lavozimiga tayinlandi. Bu haqda Qishloq xo‘jaligi vazirligi matbuot xizmati ma’lumot tarqatdi.
Oblomurodov o‘tgan yil iyulida Toshkent moliya institutining ilmiy ishlar va innovatsiyalar bo‘yicha prorektor lavozimiga tayinlangan edi.
Undan oldin esa u tabiat resurslari vazirining o‘rinbosari lavozimida ishlagan.
Narzullo Oblomurodov 2021-yil boshida O‘zbekiston Ekologiya partiyasi Markaziy kengashi ijroiya qo‘mitasi raisi etib saylangan. O‘sha yili partiyadan prezidentlikka nomzod o‘laroq ko‘rsatilgan Oblomurodov natijasi avvaldan ma’lum mazkur saylovda 4,1 foiz ovoz olgani aytilgan edi.
O‘sha yil oxiriga borib Ekologiya va atrof muhitni muhofaza qilish davlat qo‘mitasi raisi lavozimiga tayinlangan Narzullo Oblomurodov Ekologiya partiyasi Markaziy kengashi raisi lavozimidan ketgani bildirilgandi.