Линклар

Шошилинч хабар
25 июл 2021, Тошкент вақти: 02:02

“Proyekt” Rossiya IIV rahbarining 2 mlrd rubllik mulkini fosh qildi


Vladimir Kolokolsev

Yaqinda “Proyekt” nashri bosh muharriri Roman Badanin, uning o‘rinbosari Mixail Rubin va muxbir Mariya Jolobovalarning uylarida tintuv o‘tkazildi. Jurnalistlar bu voqeani “Proyekt” saytida e’lon qilingan maqola bilan bog‘lamoqdalar.

Nashr Rossiya ichki ishlar vazirining o‘g‘li Aleksandr Kolokolsev juda katta qiymatli son-sanoqsiz mol-mulkga egalik qilishi haqida yozib chiqqan edi. Aslida ochiq bo‘lishi kerak bo‘lgan bu ma’lumotlar qattiq sir tutiladi. Sababi, jurnalistlar fikricha, bu mulklar, jumladan jinoyat olami avtoritetlari bilan yaqin aloqalar hisobiga xarid qilingan bo‘lishi mumkin.

Aleksandr Kolokolsevning Zarechyedagi uyi

Moskva shahrining Rossiya elitasi joylashib olgan Rublyovka mavzesida Zarechye degan joy bor. U Rublyovkaning eng bahavo qismlaridan biridir. Zarechyedagi uylar Los-Anjelesning manaman degan koshonalaridan qolishmaydi va har biri kamida milliard rubl turadi.

Yaqinda bir odam Zarechyedan jami 1,2 mlrd rublga 100 gektar yer va qariyb 1300 kv. metr yashash maydoniga ega hashamatli uyga sohib bo‘ladi. U yangi uyiga ko‘chib kelishga ulgurmasdan Rosreyestrning kadastr ma’lumotlarida mazkur mol-mulk to‘g‘risidagi yozuvlar g‘oyib bo‘ladi. Ushbu sirli boyvachcha 32 yashar moskvalik tadbirkor Aleksandr Kolokolsevdir, bu saroydan uning foydasiga kechgan odamning ismi sharifi esa Liliya Kail. Mazkur oldi-sotdiga doir ma’lumot nega Bazadan o‘chirib yuborilgan bo‘lishi mumkin?

Gap shundaki, Aleksandr – Rossiya ichki ishlar vaziri Vladimir Kolokolsevning o‘g‘li. U tadbirkorlik qiladi, ammo koshona sotib olingan 2016 - yilda unga qarashli shirkatning sof foydasi 90 mln rublga ham bormagan.

Liliya Kail esa Izmaylovo jinoiy guruhiga yaqin nufuzli tadbirkorlardan birining xotinidir. Kolokolsevlar bu oila bilan ko‘pdan beri qalin.

Cherep, Tayvanchik va boshqa mo‘’tabar tanishlar

Izmaylovo uyushgan jinoiy guruhi 90-yillarda Rossiyadagi eng qudratli to‘dalardan biri sanalgan. Rossiya siyosat va biznes ahlining ko‘plab namoyondalari u yoki bu shaklda mazkur guruh bilan aloqadorlikda gumon qilingan. Chunonchi, sobiq sport vaziri va Yelsinning shaxsiy tennis murabbiyi Shamil Tarpishev izmaylovoliklar bilan birga “biznes qilgan”, hatto ularga mamlakatga boj to‘lovlarisiz alkogolli ichimliklar va tamaki mahsulotlari olib kelish uchun Yelsindan ruxsat olib bergan, degan taxminlar bor.

Rossiya kriminal tarixidagi eng mashhur shaxslardan biri bo‘lgan Tayvanchik ham Izmaylovo guruhiga daxldor bo‘lgani aytiladi.

Izmaylovo guruhining “huquqiy muammolari” bilan Cherep laqabli Lev Cherepov shug‘ullangan. U asli qirg‘izistonlik bo‘lib, mahalliy militsiya bo‘limi boshlig‘i bo‘lib ishlagan. Qirg‘izistonning sobiq bosh vaziri Feliks Kulov uni “o‘z vaqtida rostdan ham yaxshi yurist edi”, deb ta’riflagan. Cherep shunchaki yuristlik qilmagan, albatta. Guruhning davlat idoralari va “siloviklar” bilan aloqalarini ta’minlagan, vaqti-vaqti bilan amaldorlarni ziyofat qilib, ularga “ulush” berib turgan.

“Proyekt”ga ko‘ra, ichki ishlar vaziri Vladimir Kolokolsev bilan Cherepov avvaldan yaqin munosabatda bo‘lganlar. Rublyovkadagi hashamatli mulkini Kolokolsevlarga o‘tkazib bergan xonim, Liliya Kail esa Cherepovning rafiqasidir. Ya’ni, bu o‘zaro foydali oldi-berdi.

Zoya Berdichevskaya kim?

Vladimir Kolokolsev, Cherepov singari, bir paytlar oddiy militsioner bo‘lib ishlagan. Keyin jinoyat-qidiruv bo‘limiga o‘tgan. Oradan ancha vaqt o‘tib, 2007 - yilda uni Oryol shahri IIBga boshliq qilib tayinlashadi, u yerdan — 2012 - yilda Moskva shahri bosh politsiyachisi bo‘lib ko‘tariladi, 2012 - yilda esa ichki ishlar vaziri lavozimini egallaydi.

“Omadli mentlardan biri. Xotini tadbirkorlikdan vaqtida yaxshi pul topgan, Kolokolsevning mansabda o‘g‘rilik qilishiga ham zarurat yo‘q”, deb yozishgandi u Moskva shahri IIBBga boshliq bo‘lib tayinlangan kezlarda.

Biroq Vera Kolokolsevaning hech qanaqa biznesi yo‘q. Daromadlar deklaratsiyasiga qaraganda, vazirning oilasi kamtarona hayot kechiradi. Kolokolsev vazir bo‘lganidan beri xotini ikkovining nomida bironta ham yangi mulk paydo bo‘lmagan. Rasmiy hujjatlarga ko‘ra, er-xotin 20 yildan buyon 90 kv. metrli kvartirada istiqomat qiladi.

Vazirning rafiqasi Vera Ivanovna Rostov viloyatining Gromkovskiy degan qishlog‘idan. Bir zamonlar u Zoya Ivanovna Berdichevskaya ismli ayol bilan birga oddiygina xususiy uyda yashagani aytiladi. Qizig‘i shundaki, Zoya Ivanovnaning oilasi yil sayin boyib ketavergan. 2012 - yilda, Kolokolsev vazirlikka ko‘tarilganidan bir oz o‘tib Berdichevskayaning o‘g‘li Rublyovo-Uspenskiy yo‘li yaqinidan dang‘illama hovli-joy sotib oladi. Uyning bahosi, atrofidagi yerlar bilan birga 200 million rublgacha bo‘lishi mumkin.

Zoya Berdichevskaya va oilasi buncha pulni qayerdan olgan bo‘lishi mumkin? Holbuki eri ikkovi allaqachon nafaqada, uyni o‘z nomiga sotib olgan o‘g‘li Dmitriy esa, aniqlanishicha, kichik bir transport shirkatida ishlar ekan.

Yana bir g‘aroyib tasodif shuki, Zoya Berdichevskaya va oilasi dong‘i chiqqan kriminal avtoritet — Yaponchikning bevasi bilan uzoq yillar qo‘shni bo‘lib yashagan.

Berdichevskayalar oilasi qanday qilib Rublyovkadan uy sotib olgani koronavirus pandemiyasi vaqtida to‘satdan ma’lum bo‘lib qoldi. Kunlarning birida Zoya Ivanovna Shevelkinodagi chorbog‘iga borish uchun ruxsatnoma so‘rab ariza beradi. Bundan xabar topgan jurnalistlar hushyor tortishadi: shahardan tashqaridagi hashamatli xususiy uyda yashaydigan odamning Shevelkovoga “tabiatni ko‘rgani” borishi g‘alati-ku? Ammo o‘sha o‘rtamiyona chorbog‘ning egasi Vladimir Kolokolsev ekani, uni 2000 - yilda, oddiy “oper” bo‘lib ishlab yurganida sotib olgani ma’lum bo‘lgach taajjublar hayratga aylandi.

Tashqariga “sizgan” ma’lumotlarga ko‘ra, Berdichevskaya kamtarona “Toyota Kamri”da yuradi. Lekin nomida biryo‘la ikkita “Porshe” avtomobili bor.

Ayon bo‘ladiki, Berdichevskayalar oilasi Kolokolsevlarning eski va odmiroq mulklaridan foydalanishadi, ayni chog‘da ularning nomlarida boshqalar foydalanadigan hashamatli mulk va buyumlar mavjud. O‘sha “boshqalar” — kim?

Katta ehtimol bilan, Zoya Berdichevskaya ichki ishlar vazirining qaynsinglisi, xotinining opasi va o‘g‘lining xolasidir.

Shevelkinodagi kooperativ chorbog‘ga kelsak, uni Kolokolsevga uzoq 2000 - yilda Izmaylovo jinoiy guruhiga mansub tadbirkor, Cherepovning jiyani Pavel Zadorin bergan bo‘lib chiqdi.

Igor Chuyan, Arkadiy Rotenberg va alkogol bozorining boshqa nahanglari

O‘n yilcha avval Alkogolli mahsulotlar bozorini nazorat qilish federal xizmatining o‘sha paytlardagi rahbari Igor Chuyan ilgari IIVda ishlagan bir yordamchisidan Vladimir Kolokolsev haqida tavsifnoma so‘ragan edi. Yordamchi sobiq hamkasbini xo‘p maqtaydi va shundan so‘ng ko‘p o‘tmay Kolokolsev vazir bo‘lib ko‘tariladi.

Aytishingiz mumkin: alkogol mulozimi kim bo‘libdiki, ichki ishlar vazirini tayinlashga aralashsa, deb. Gap Rossiyadan boshqa mamlakat haqida bo‘lganida bu savol o‘rinli bo‘lur edi.

Chuyan qariyb o‘n yil Rossiya alkogol bozoriga rahbarlik qilgan. Putinning yaqin do‘sti Arkadiy Rotenberg uning valine’matidir. Qolaversa, Pavel va Valeriy Zadorinlar ham Chuyanning alkogol olami tepasiga kelishida muhim rol o‘ynaganlar. 1990-yillarda Chuyan Izmaylovo guruhi ta’siri ostida bo‘lgan Milliy sport fondiga qarashli shirkatlardan birining direktori edi.

2014 - yilda aka-uka Zadorinlar Rossiyaga alkogolli mahsulotlar olib kiruvchi “Selyatino” bojxona terminalini qo‘lga kiritishdi. “Proyekt” ma’lumotiga ko‘ra, burungi sohibi serdaromad joyni sotishni mutlaqo xohlamagan. Shunda Chuyan shaxsan o‘zi kelib, ularni ko‘ndirgan. Butun bozorni boshqaradigan odamga yo‘q deyish o‘ng‘aysiz edi, qolaversa muzokaralarda IIV rahbari Kolokolsev nomi ham yangragan.

“Chuyan terminal endi Zadorinlarga o‘tishini, ammo eng katta xo‘jayin Kolokolsev bo‘lishini aytgan”, deydi nashr manbasi.

Hozirda Zadorinlar — Rublyovkadagi Zarechye mavzesida, jismonan o‘sha yerda istiqomat qilsa-da, rasmiy qaydlarda buni sir tutadigan ichki ishlar vazirining o‘g‘li bilan qo‘shni yashashadi.

Aleksandr Kolokolsevning mol-mulklariyu boshqa yutuqlari

Agar birov, u hatto davlat xizmatchisi bo‘lsin, Rosreyestrdan kichik Kolokolsevning mol-mulklari to‘g‘risida ma’lumot olmoqchi bo‘lsa, qo‘lidan hech nima kelmaydi. Yosh tadbirkor va uning rafiqasi Kristinaga tegishli barcha mulklar ko‘zdan yashirilgan. Davlat idoralari ichki ishlar vazirining o‘ziga oid mulklar haqidagi ma’lumotlarni yashirganlarida ham boshqa gap edi. Ammo nega uning voyaga yetgan, nafaqat kuchishlatar idoralarda, balki umuman davlat xizmatida bir kun ham ishlamagan o‘g‘liga qarashli son-sanoqsiz mulklar yoppasiga maxfiylashtirilgan?

Bir necha oy shug‘ullanib, yosh Kolokolsev mulklarining uzun ro‘yxatini tuzgan “Proekt” ushbu oilani qurshab olgan maxfiylik halqasi to‘g‘risida o‘z versiyasini ilgari surmoqda. Gap shundaki, Aleksandr Kolokolsev 37 yoshga to‘lgunicha qo‘lga kiritgan barcha mol-mulkning umumiy qiymati qachondir u egalik qilgan barcha shirkatlarning daromadlaridan sezilarli darajada ko‘p.

Kolokolsevlar oilasining mulklari

Ichki ishlar vazirining oilasi qiymati 2 mlrd rubldan ortiq qimmatbaho mol-mulklarga egalik qiladi. Mana ularning to‘liq ro‘yxati:

Tver tumanida kvartira va parkovka joylari – 215 kv. metr, 121 mln rubl;

Lenin prospektida uchta kvartira – jami 350 kv. metr, 144 mln rubl;

O‘sha yerdagi 23 mashinaga mo‘ljallangan parkovka joyi – 27 mln rubl;

Xamovnikidagi keliniga qarashli kvartira – 178 kv. metr, 177 mln rubl;

“Moskva-Siti”dagi apartamentlar – 157 kv. metr, 80 mln rubl;

Dmitriy Berdichevskiy nomida turgan uy va yer maydoni – 600 kv. metr, 30 sotok, 200 mln rubl;

Zarechyedagi uy va yer maydoni – 1250 kv. metr, 100 sotok, 1,2 mlrd rubl;

Zarechyedagi kvartira – 244 kv. metr, 76 mln rubl.

Hujjatlarga ko‘ra, vazir o‘g‘lining yagona muvaffaqiyatli biznesi bu nizom jamg‘armasida Kolokolsevlarning 40 foizlik hissasibor “FB Grupp” shirkatidir. Yevropada noqonuniy pul yuvishda gumon qilingan mazkur shirkatning yillik daromadi 40 mln.dan 250 mln rublgacha. Boshqa bizneslari yo zarariga ishlaydi, yoki arzimagan foyda keltiradi.

Rossiya Ichki ishlar vazirligi “Proyekt”ning kichik Kolokolsevga tegishli mulklar haqidagi ma’lumotlarning sir tutilishi sababi xususidagi savoliga javob bermagan.

Shuningdek, Berdichevskaya oilasi bilan qarindoshlik, ushbu oilaning boyib ketishi, Zadorinlar va Cherepovlar oilalari bilan tanishlik va Zarechyedagi saroyning sotib olinishi bilan bog‘liq holatlar yuzasidan berilgan savollar ham javobsiz qoldirilgan.

XS
SM
MD
LG