Йил бошидан буён Қирғизистонга олиб кирилиши лозим бўлган 500 дан зиёд автомобиль Беларусда тутиб турилибди. Бу ҳақда Озодликнинг қирғиз хизматига Қирғизистонга автомашина олиб кириш билан шуғулланувчи тадбиркорлардан бири Данияр Салякаев маълум қилган.

Тадбиркорнинг айтишича, Беларусь божхонаси автомобиллар юкланган вагонлар ва автотрейлерларни чегарадан ўтказмаяпти.

“Нима сабабдан тутиб туришганини айтишмаяпти, текширув муддатлари ҳақида ҳам маълумот беришмаяпти. Божхоначилар фақатгина оғзаки тарзда ҳужжатлар текширилаётганини айтишяпти. Бизга машиналар турган тураргоҳлар квитанцияларинигина беришди. Аввал 15 мартда ўтказворишларини айтишувди, энди апрель охирида, дейишяпти. Биз тураргоҳ учун катта пул ёки катта жарима тўлашни талаб қолишса, нима қиламиз, дея хавотирланяпмиз”, деган Салякаев.

Унга кўра, бундай муаммога Қирғизистонга АҚШ ва Европадан машина олиб келаётганлар дуч келишмоқда.

Тадбиркорлар илтимосига кўра, Қозоғистоннинг Минскдаги элчиси Эрмек Ибраимов Беларусь Божхона қўмитаси раиси Владимир Орловский билан учрашган. Дипломат 2022 йилнинг сентябрь ойидан буён Беларусь тарафи қирғизистонликлар томонидан Евросиё иқтисодий иттифоқи (ЕОИИ) ҳудудига олиб кирилаётган машиналарни текширишни бошлаганини маълум қилди. Текширувга ҳужжатларда транспорт воситаларининг қиймати пасайтириб кўрсатилгани сабаб бўлгани айтилган.

Қирғизистонлик тадбиркорлар расмийларни мазкур муаммога эътибор қаратиб, бу масалани ЕОИИ доирасида муҳокама қилишга чақиришган.

Қирғизистонга АҚШ ва Европадан автомобиллар аввалига Литва, кейин эса Беларусь орқали олиб ўтилади.

Қирғизистон ҳам, Беларусь ҳам Евросиё иқтисодий иттифоқи аъзоси бўлиб, мазкур иттифоқда товарлар эркин айланиши кўзда тутилган. Қирғизистон расмийлар авваллари ҳам бир неча бор ЕОИИнинг ички бозоридаги (шу жумладан Қирғизистон билан Қозоғистон чегарасидаги) мавжуд тўсиқлардан шикоят қилишган.

Норвегия Европага газ етказиб берувчи асосий таъминотчига айланди, АҚШ эса Европа Иттифоқига газ экспорти бўйича иккинчи ўринни эгаллади. Бугунги кунда Европа Иттифоқида истеъмол қилинаётган табиий газнинг 31 фоизини Норвегия, 20 фоизини АҚШ етказиб бермоқда.

АҚШ Европа Иттифоқига нефть экспорт қилиш бўйича етакчи бўлган Россиянинг ўрнини босди. 2022 йил декабрида Европа Иттифоқига экспорт қилинган нефтнинг 18 фоизи АҚШ ҳиссасига тўғри келди, деб хабар берди Евростат.

Яқин йилларгача Европанинг асосий нефть таъминотчиси бўлган Россиянинг ҳиссаси ўтган йилнинг январида 31 фоиз эди, декабрга келиб эса 4 фоизни ташкил қилди. Бир йил олдин АҚШ Европа нефть бозорининг 13 фоизига эга эди. ЕИга нефть экспорт қилиш бўйича Норвегия иккинчи ўринни эгаллади. Унинг ҳиссаси 17 фоиз.

Россиянинг Украинага босқини ортидан кўпчилик Европа давлатлари Россиядан нефть, табиий газ ва кўмир сотиб олишдан воз кечди. Бундан мақсад Россияни уруш олиб бориш учун керакли бўлган валюта захираларидан маҳрум қилиш эди. Декабрда ЕИ танкерлар орқали ташиладиган Россия нефтини импорт қилишни тақиқлади ва рус нефтининг энг юқори нархини 60 доллардан оширмаслик тўғрисида қарор қабул қилди.

Россия ўтган йили нефтни Ҳиндистон ва Хитойга экспорт қилишни сезиларли даражада кўпайтирди. Бу давлатлар Россия нефтини анча арзон нархда сотиб олмоқдалар. Россия Энергетика вазирлигининг билдиришича, Европа тақиқи ортидан 2023 йилда нефть ва газ қазиб олиш озайиши кутилмоқда.

Франция парламенти Украинада 1932-1933 йилларда юз берган оммавий очлик – Голодоморни геноцид деб тан олди. Бу ҳақда парламентнинг қуйи палатаси сайтида маълум қилинди.

Мазкур резолюция 168 депутат томонидан маъқулланди, икки депутат қарши овоз берди. Резолюцияда Голодомор сунъий равишда уюштирилгани ва асосан деҳқонлардан бўлган тўрт миллион украин ўлгани қайд этилади.

Бундан аввал бу каби резолюцияларни Германия, Молдова, Руминия, Болгария парламентлари ва Ирландия сенати ҳам қабул қилган эди. АҚШ голодоморни геноцид сифатида 2018 йилда тан олган. Ўтган йилнинг декабрида Европа парламенти Голодоморни геноцид деб атади ва Россиянинг украин халқига нисбатан содир этаётган янги жиноятларини қоралади.

Украина ССРда Совет ҳукумати 1932–1933 йилларда ғалла тайёрлаш ва деҳқонлардан барча озиқ-овқат заҳираларини мажбурий равишда мусодара қилиш сиёсатини олиб борган. Бундай сиёсат оқибатида камида 5 миллион киши қурбон бўлгани айтилади. Голодоморда нобуд бўлганлар сони шу кунгача аниқ эмас.

Украина парламенти Голодоморни 2006 йилда геноцид сифатида эътироф этган. Россия ҳукумати бунга қарши чиқиб келмоқда.

Туркиянинг мухолифатдаги учта сиёсий партияси амалдаги давлат раҳбари Ражаб Тоййиб Эрдўғон номзодини президент сайловидан чиқариб ташлашни талаб қилишган. Бунга оид мурожаат Олий сайлов комиссиясига IYI, DEVA ва VATAN партиялари томонидан йўлланган. Мухолифат мазкур сайловларда Эрдўғоннинг асосий рақиби Камол Қиличдорўғлини дастакламоқда.

Мурожаат муаллифлари фикрича, амалдаги президент номзодининг сайловга қўйилиши Туркия конституциясига зиддир, чунки унинг жорий муддати иккинчи муддат бўлиб ҳисобланади. Анқара иддаосича эса, 2017 йилдаги конституциявий референдумдан кейин Эрдўғоннинг президенлик муддати “нолланган”.

Туркияда президент сайлови 14 майга белгиланган. 50 мингдан зиёд киши ўлимига сабаб бўлган яқиндаги зилзилага қарамай, сайлов муддати кечиктирилгани йўқ.

Яна бир ярим ойдан кейин бўлиб ўтажак сайловда энг кўп овозлар Эрдўғон ва Қиличдорўғлига берилиши тахмин қилинмоқда. Ҳар икки номзоднинг сайловолди кампаниясида асосий мавзу зилзила мавзуси бўлади. Мухолифатнинг президент Эрдўғонга асосий эътирози расмийларнинг ер силкиниши оқибатларини олдини олишга яхши ҳозирланмагани ва жабрланганларга ёрдам кўрсатишдаги камчиликларда акс этган.

Айрим социологлар фикрича, амалдаги президент билан мухолифатнинг ягона номзоди бўлажак сайловда бир-бирига жуда яқин фоиз овоз олишлари мумкин.

Саудия Арабистонида 28 март куни ичида Умра зиёратчилари бўлган автобус автоҳалокатга учраган. Habеr Global хабарига кўра, йўл-транспорт ҳодисаси мамлакат жануби-ғарбидаги Асир вилоятида юз берган.

Аварияга Маккага зиёратчиларни олиб кетаётган автобуснинг тормози ишламай қолгани сабаб бўлган. Қайд этилишича, носоз автобус йўлда енгил автомобиль билан тўқнашганидан кейин ёниб кетган.

Ҳодиса оқибатида камида 20 киши ўлган, 30 чоғли киши жароҳатланган. Зиёратчиларнинг яманликлар экани ҳақида маълумотлар бўлса-да, бу ҳали тасдиқланганича йўқ.

Рамазон ойи зиёратчилар Умра учун Макка ва Мадинага энг кўп борадиган вақт бўлиб ҳисобланади. Коронавирус пандемиясидан аввалги йилларда Рамазон ойида Маккаи Мукаррама бир вақтнинг ўзида бир неча миллион зиёратчига мезбонлик қилгани кузатилган.

АҚШнинг Теннесси штатидаги Нэшвилл шаҳрида хусусий бошланғич христиан мактабига қуролли ҳужум уюштирилди. Ҳужум оқибатида камида олти киши, жумладан, уч ўқувчи ҳалок бўлди. Бу ҳақда Fox News хабар берди.

Шаҳар полиция бошқармаси ҳужумчи ўқотар қуролдан фойдалангани ҳақида маълум қилди. Ҳужумни амалга оширганликда гумонланган шахс полиция томонидан отиб ўлдирилган. CNN телеканалининг билдиришича, ҳужумчи ўсмир қиз бўлиб, унда камида иккита милтиқ ва битта тўппонча бўлган. У мактаб биноси ичида отиб ўлдирилган.

Мазкур мактабда 200 га яқин бола таълим олади ва 33 нафар ўқитувчи ишлайди. Ҳужум пайтида яраланганлар борлиги айтилмоқда. Мактабга уюштирилган ҳужум сабаблари маълум эмас.

Бу жорий йилда АҚШда содир этилган 128- оммавий отишма ҳодисасидир.

Россиялик қатор бизнесменлар ва таниқли шахслар Украина босқини ортидан Қирғизистон фуқаролигини қабул қилди. Бу ҳақда Қирғизистон президентининг фуқароликка қабул қилиш тўғрисидаги фармонига таянган ҳолда The Moscow Times хабар берди. Мазкур фармонни президент Садир Жапаров ўтган йили имзолаган эди.

Transparency International халқаро ташкилоти россияликларга Қирғизистон фуқаролигининг берилишида коррупция аломатлари бор деб ҳисоблайди, деб ёзди Озодлик радиоси қирғиз хизмати.

«Москвада яшовчилар Қирғизистон паспортларини олишга интилмоқда. Президентнинг фуқароликка қабул қилиш тўғрисидаги сўнгги фармонида пойтахтнинг беш юз яшовчиси ва Россиянинг бошқа ҳудудларида яшовчи яна шунча кишининг исм шарифи қайд этилган», ‒ деб ёзди The Moscow Times.

Нашр фармонда келтирилган маълумотларни таҳлил қилди. Натижада фуқаролик олганлар орасида Тверь вилоятининг собиқ губернатори Дмитрий Зеленин, Россия ҳукуматининг олий суд инстанцияларидаги махсус вакили Михаил Баршчевскийнинг қизи Наталия Баршчевская, Bitzlato криптобиржаси асосчиси Антон Шкуренко, «Ароматний мир» ширкати эгаси Валерий Задориннинг ўғиллари Александр ва Михаил борлиги аниқланди.

Озодлик радиоси қирғиз хизмати москвалик молиячи Михаил Жуховицкий ижтимоий тармоқда қолдирган постга эътибор қаратди. 2022 йилнинг 22 ноябридан бери Бишкекда яшаётган молиячи фейсбук саҳифасида дўстларига «Қирғизистондан иккинчи паспортни олишга кўмаклашгани» тўғрисида ёзган. Жуховицкий ўз постида Қирғизистон паспорти визасиз равишда Туркияга чиқиш ва кейин Европа Иттифоқига кетиш учун замин эканини қайд этган.

Афғонистон пойтахти Кобул шаҳрида 27 март куни Ташқи ишлар вазирлиги биноси яқинида кучли портлаш содир бўлди. Al-Jazeera хабарига кўра, худкуш шахс вазирлик биносига портлаш мосламасини олиб ўтишга уринган. Худкуш қўриқчилар хизмати томонидан тўхтатилган, бироқ у бомбани портлатишга улгурган. Ҳодиса оқибатида камида олти киши ўлган, ўндан ортиқ киши жароҳатланган.

Кобул полицияси вакили Холид Задранга кўра, жабрланганлар орасида камида уч нафар полициячи бор. Портлашдан сўнг бир бола дохил 12 киши касалхонага етказилган. Айни пайтгача ҳеч бир ташкилот портлаш учун масъулиятни зиммасига олмагани айтилмоқда.

Кобулдаги ҳукумат бинолари жойлашган маҳалла террор хуружларига илк бор нишон бўлаётгани йўқ. 11 январь куни айнан шу ТИВ биноси ёнида худкуш шахс ўзини портлатиб юборган, натижада 20 киши ҳалок бўлган эди. Ўшанда портлаш учун масъулиятни “Ислом давлати” экстремистик гуруҳи ўз зиммасига олган.

Ўтган йил декабрида Кобулда бир гуруҳ қуролли шахс хитойлик тадбиркорлар яшаган меҳмонхонада одамларни ўққа тутган. Ўшанда Хитойнинг беш нафар фуқароси жароҳат олган. Шундан сўнг хитойлик инвесторларнинг кўпчилиги Афғонистон билан ҳамкорлик имкониятини қайта кўриб чиқишларини билдиришган.

Бундан ташқари, 2022 йил сентябрида яна худкуш шахс Кобулдаги Россия элчихонаси биноси олдида ўзини портлатиб юборган. Россия ТИВ маълумотига кўра, ҳодиса ортидан элчихонанинг икки ходими ҳалок бўлган. Портлаш чоғида ўлган ва яраланганларнинг умумий сони 20 нафардан ошган.

Исроил президенти Ицхак Герцог мамлакатда оммавий норозиликлар юзага келишига сабаб бўлган суд ислоҳотини тўхтатишга чақирди. Унга кўра, ҳозирги кунда мамлакат хавфсизлиги, иқтисодиёти ва жамияти хавф остида турибди.

Герцог Исроил парламентидаги барча фракцияларини фуқаролар манфаатини ҳамма нарсадан юқори қўйишга чақирган.

“Ақлингизни йиғиб олинг! Бу сиёсат қиладиган вақт эмас, лидерлик ва масъулият лаҳзасидир”, деган Исроил президенти.

Исроилда судьяларни лавозимга тайинлаш бўйича парламентдаги кўпчиликка янада каттароқ ваколатлар бериши айтилаётган суд ислоҳотига қарши акциялар 12 ҳафтадан буён давом этмоқда. Норозилар фикрича, мазкур ислоҳот демократияга зиддир.

26 март куни мудофаа вазири Йоав Галант ҳам юзага келган вазиятни мамлакат хавфсизлиги учун таҳдид деб атаб, ислоҳот жараёнини тўхтатиш таклифи билан чиққан. Вазир таклифини мухолифат лидери, собиқ бош вазир Яир Лапид дастаклаган. Бунинг ортидан амалдаги бош вазир Бинямин Нетаняҳу Йоав Галантни мудофаа вазири лавозимидан истеъфога кетишини эълон қилган.

Бу воқеалар манзарасида Исроилда якшанба куни ҳам йирик норозилик акцияси ўтказилган. Турли ҳисоб-китобларга кўра, унда 600 мингдан 700 минг нафаргача киши иштирок этгани айтилмоқда.

Cўнгги хабарларга кўра, 27 март куни бош вазир Нетаняҳу парламентдаги ҳукмрон коалиция лидерларига оммавий норозиликлар туфайли суд ислоҳотини тўхтатмоқчи эканини билдирган. Бироқ ислоҳот тўхтатилиши ҳақида ҳали расман эълон қилингани йўқ.

The Telegraph Европа Иттифоқи Россияга санкцияларни четлаб ўтишга кўмаклашган мамлакатлар, ширкатлар ва шахсларга нисбатан савдо чекловлари жорий қилиш масаласини муҳокама этаётгани тўғрисида хабар берди. Нашрнинг билдиришича, бу борада унинг ихтиёрига махфий ҳужжат келиб тушган.

Ҳужжат қабул қилинса, Россияга санкция остидаги товарларни реэкспорт қилган мамлакатлар, юридик ва жисмоний шахсларнинг Европа Иттифоқи бозорига кириши чекланади.

The Telegraph ҳужжатда, жумладан, Европа Иттифоқидан Ўзбекистон, Қозоғистон ва Қирғизистонга, Марказий Осиё мамлакатларидан эса Россияга экспорт камида 60-80 фоизга ўсгани қайд этилганини таъкидлайди. Европа Иттифоқи бу ҳолат “Россияга санкцияларни четлаб ўтишда” кўрсатилаётган ёрдам бўлиши мумкинлигидан ташвишланмоқда.

Нашрнинг ёзишича, бу ерда Европа Иттифоқидан Ўзбекистон, Қозоғистон ва Қирғизистонга сотилаётган “икки мақсадли” техника - кир ювиш машиналари, эски автомобиллар ва фотокамералар назарда тутилмоқда. Бу техникалар демонтаж қилиниб, улардан олинган яримўтказгичлар ва бошқа эҳтиёт қисмлардан Россия шикастланган ҳарбий техникасини таъмирлашда фойдаланаётган бўлиши мумкин.

Аввалроқ Reuters агентлиги Россия компаниялари сўнгги ҳафталарда қозоқ ҳамкорларидан Ғарб санкцияларини четлаб ўтиб, зарур товарларни импорт қилишда ёрдам сўраётгани тўғрисида ўз манбаларига таяниб хабар берган эди.

Туркия ўтган ой АҚШнинг кимёвий моддалар, микрочиплар ва бошқа ускуналарни Россияга экспорт қилмаслик ҳақидаги огоҳлантиришларидан кейин Россия урушда фойдаланиши мумкин бўлган маҳсулотларни экспорт қилмаслигини билдирди.

Анқара Туркия ҳудудида ёки Туркия орқали Ғарб санкцияларини четлаб ўтишга йўл қўймаслигини ва бунинг олдини олиш учун чоралар кўраётганини маълум қилди.

Украина Россия президенти Владимир Путиннинг Москва Беларусь ҳудудига ядровий қуролларни жойлаштириши тўғрисидаги баёноти ортидан БМТ Хавфсизлик кенгашини шошилинч чақиришни талаб қилди.

Украина Ташқи ишлар вазирлиги баёнотида Киев бу масалада Хавфсизлик кенгашининг доимий аъзолари Франция, Британия, АҚШ ва Хитойдан қатъий қарорлар қабул қилинишини кутаётгани қайд этилди.

Россия ҳам БМТ Хавфсизлик кенгнашининг доимий аъзоси бўлиб, вето қўйиш ҳуқуқига эга.

Баёнотда Россиянинг Беларусга ядровий қурол жойлаштириш интилиши “навбатдаги провокацион қадам” ўлароқ сифатланади. Украина ТИВ Беларусь халқига ҳам мурожаат йўллаб, “жиноий ниятларнинг амалга оширилишига тўсқинлик қилиш”га чақирди.

НАТО 26 март куни Россиянинг бу ҳаракатини “хавфли ва масъулиятсиз” деб баҳолади. НАТО баёнотида Россия ядровий қурол қўллаши мумкинлиги белгилари пайдо бўлмаганига қадар, ташкилотга аъзо давлатлар армияларининг жанговар шайлиги ўзгартирилмаслиги алоҳида қайд этилди.

АҚШ ҳам Россияни кескин танқид қилди. Шу билан бирга Давлат департаменти ва Пентагон мамлакат ядровий кучлари жанговар шайлик ҳолатига келтирилмаслигини билдирди.

25 март куни Путин “Россия-24” телеканалига берган интервьюсида Россия Беларусда президент Александр Лукашенко илтимоси билан тактик ядровий қуролларини жойлаштиришини билдирган эди. Путинга кўра, 1 июлда Беларусда тактик ядровий қурол сақланувчи иншоот қурилиши якунланади. Путин Беларусга “Искандер” ракета қомплексини берганини, Беларусь ҳарбий ҳаво кучларининг 10 та самолёти ядровий ракеталар олиб юришга мослаштирилганини билдирган.

Қозоғистонда 1 апрелдан Россиянинг ғарб санкцияларини айланиб ўтишига йўл қўймаслик учун чегарадан чегарага товар етказиш бўйича бутун занжирни онлайн тартибда кузатиб турадиган тизим ишга тушиши керак. Бу ҳақда Британиянинг Financial Times нашри қозоғистонлик юқори лавозимли мулозим сўзларига таянган ҳолда хабар қилди.

Мулозимга кўра, Остона иккиламчи санкциялар билан боғлиқ барча хатарларни яхши англашади, шунинг учун ҳам барча ҳамкорлар билан ўзаро савдо-сотиқни диққат билан кузатиб боришмоқда.

Мулозим Қозоғистон ҳукумати Россия билан савдо-сотиқ бўйича ҳеч қанақа чеклов ва санкция киритмаётганини, бироқ ғарб санкцияларини айланиб ўтишга йўл қўймаслиги ва бу каби айланиб ўтиш учун майдонга айланмаслигини қайд этган.

Куни кеча Reuters агентлиги бир неча манбадан олинган маълумотга таянган ҳолда, сўнгги ҳафталарда Россия компаниялари қозоғистонлик ўз ҳамкорларидан ғарб санкцияларини айланиб ўтиш ва зарур товарларни импорт қилишда ёрдам қилиш сўраб, тобора кўпроқ мурожаат қилаётганлари ҳақида хабар қилган эди. Агентликнинг икки суҳбатдоши бундай фаолликни Анқаранинг санкция остига тушган товарлар транзитини тўхтатиш режалари тўғрисидаги хабарлар билан боғлаган.

Россия қўшинлари Украина ҳудудига бостириб киргани ортидан юзлаб хорижий корпорация, ширкат ва брендлар Россиядаги бизнесини ёпишини эълон қилган ва хориждан маҳсулот импорт қилишни ҳам тўхтатиб қўйган. Бунга жавобан россиялик расмийлар параллел импорт доирасида (яъни эгасидан рухсат сўраб ўтирмасдан) учинчи мамлакатлар орқали Россияга чет эл молларини олиб киришга рухсат беришган эди.

Россия Адлия вазирлиги блогер Илья Варламов ва “Агора” халқаро инсон ҳуқуқлари гуруҳи раҳбари Павел Чиковни “хориж агентлари” рўйхатига киритди.

Бундан ташқари мазкур рўйхатдан “Парни Плюс/Парни+” гей сайти, “Воля” партияси раиси Светлана Лада-Русь (Пеунова), “Дождь” телеканалининг собиқ журналисти Богдан Бакалейко, сиёсатшунос Руслан Айсин ҳам жой олди.

Адлия вазирлиги Варламов ва Чиковни “давлат ҳокимияти органлари қабул қилаётган қарорлар ва олиб бораётган сиёсат тўғрисида нотўғри ахборот тарқатганлик”да айбламоқда.

Вазирликнинг иддаосича, блогер Варламов “хорижий манбалардан молиявий кўмак” олиб турган, Чиков эса “хориж агентлари томонидан яратилган материалларни тарқатган”. Рўйхатга киритилган бошқа шахсларга ҳам мана шу каби айбловлар қўйилмоқда.

2012 йилда “Хориж агентлари тўғрисида”ги қонун қабул қилиниши ортидан 2017 йилда “хориж агентлари рўйхати” ҳам шакллантирилди. Бу рўйхатга шу кунгача юзлаб шахслар ва нодавлат ташкилотлари киритилган.

«Вагнер» хусусий ҳарбий ширкатининг асосчиси Евгений Пригожин ёлланма аскарларни Украинадаги урушдан олиб чиқмоқчи ва ўз фаолиятини асосан Африка минтақасида давом эттирмоқчи. Бу ҳақда Bloomberg ўз ишончли манбаларига таянган ҳолда хабар тарқатди.

Агентлик манбалари олий лавозимлардаги рус сиёсатчилари ва ҳарбийлари Пригожинни ўзларига таҳдид сифатида қабул қила бошлаганини айтган. “Вагнер” Украина урушида қурол ва ўқ-дори етишмовчилигига дучор этилмоқда. Шунингдек, Пригожинга қамоқхоналардан маҳкумларни ёллаш тақиқланганидан сўнг, “Вагнер”да жангчилар етишмаслиги ҳам кузатилмоқда.

Bloomberg манбалари ҳарбийлар президент Владимир Путинга “Вагнер”нинг жанговар салоҳияти шубҳали экани тўғрисидаги маълумотларни етказгани ҳақида ҳам гапирган.

Пригожин «Вагнер»ни Украина урушидан олиб чиқиб, Африкага жўнатиши тўғрисида тасдиқланган маълумотлар мавжуд эмас. Айни пайтда «Вагнер» Украина урушига олти ойга, Африкада хизмат қилиш учун эса 9-14 ойга аскар ёллаётгани тўғрисидаги рекламаларни кўриш мумкин.

Путинга яқин бўлган миллиардер Пригожин мазкур хабарни рад этди. «Биз мамлакатга токи керак эканмиз, Украина ҳудудида жанг қилишда давом этамиз», деди у.

“Вагнер” ёлланма аскарлари Украинада, Сурияда ва Африка давлатларидаги жангларда қатнашган ва қатнашмоқда. “Вагнер” чилар қатор ҳарбий жиноятларда ҳам айбланган.

27 январда АҚШ “Вагнер”ни трансмиллий жиноий ташкилотлар рўйхатига киритган. Айрим давлатларда “Вагнер” террорчи ташкилот сифатида тан олинган.

Бунга қадар “Вагнер” Россия қамоқларида ётган маҳкумларни, жумладан, ўта оғир жиноятларни содир этганликда айбланиб қамалганларни ўз сафига ёллагани тўғрисида хабарлар берилган. “Вагнер”га ёлланган маҳкумлар орасида Ўзбекистон, Қирғизистон ва Тожикистон фуқаролари ҳам бор.

Тожикистоннинг Сўғд вилояти Тоғли Мастчоҳ туманида 23 март куни кузатилган зилзила оқибатида уйлар ва қишлоқ хўжалиги иншоотларига шикаст етган. Бу ҳақда Озодликнинг тожик хизмати хабар қилди.

Тожикистонда 23 мартга ўтар кечаси 5,9 магнитудали зилзила содир бўлгани ҳақида аввалроқ хабар қилинган.

Фавқулодда вазиятлар қўмитаси матбуот котиби Умеда Юсуфий зилзила маркази Тоғли Мастчоҳ туманига қарашли Палдорак қишлоғи яқинида бўлганини маълум қилган. Зилзила кучи Душанбеда 3-4 балл, Рашт туманида 4-5 балл, Тоғли Бадахшон мухтор вилояти ҳудудида эса 2-3 баллга етган.

Умеда Юсуфийга кўра, зилзила натижасида Тоғли Мастчоҳ туманидаги айрим уйлар ва ёрдамчи биноларга шикаст етган, бироқ аҳоли орасида ҳеч ким жабрланган эмас.

Палдорак қишлоғи турғунларининг Озодликка йўллаган видеосида кўплаб уйлар зилзила оқибатида шикастлангани, айрим уйлар деворлари вайрон бўлгани акс этган. Шунингдек, Палдоракка қўшни бўлган Пакшиф, Деҳманора, Худгифи-Эшонҳо ва Роғ қишлоқларида ҳам уйларга зарар етган.

Палдоракликлар тунни кўчада ўтказганлар. Уларга кўра, ўзларига ҳеч қанақа ёрдам берилган эмас.

“Бизнинг қишлоқдаги уйларнинг деярли ҳаммаси шикастланди. Кўплаб чора моллари нобуд бўлди. Одамларнинг тунашга жойлари йўқ, улар орасида эса касаллар ҳам, болалар ҳам, аёллар ҳам бор. Қишлоқ аҳлининг бари шунақа аҳволда”, деган Палдорак қишлоғи турғунларидан бири.

Озодликнинг тожик хизмати маълумотига кўра, Тожикистон бош вазири Қоҳир Расулзода ва Сўғд вилояти раиси Ражаббой Аҳмадзода зилзиладан зарар кўрган жойга йўл олишган.

21 март оқшомида маркази Афғонистонда бўлган зилзила оқибатида Покистон ва Афғонистонда камида 13 киши ҳалок бўлган, 90 дан зиёд киши турли даражада тан жароҳати олганди. Мазкур зилзила Афғонистонга қўшни бўлган бошқа мамлакатлар каби Тожикистоннинг ҳам қарийб барча вилоятларида сезилган.