Линклар

Шошилинч хабар
24 июл 2024, Тошкент вақти: 17:07

Ўзбекистон хабарлари

Қуйи палата “номақбул” чет элликларга оид қонунни қабул қилди

Иллюстратив сурат
Иллюстратив сурат

Олий Мажлис Қонунчилик палатаси депутатлари 25 июнь куни “Ўзбекистон Республикасида чет эл фуқароларининг ва фуқаролиги бўлмаган шахсларнинг ҳуқуқий ҳолати тўғрисида”ги Ўзбекистон Республикасининг Қонунига ўзгартириш ва қўшимчалар киритиш тўғрисида”ги қонун лойиҳасини учинчи ўқишда қабул қилишган.

Қуйи палата матбуот хизмати маълумотига кўра, мажлисда мазкур қонун лойиҳаси “ҳозирги глобаллашув шароитида Ўзбекистон суверенитети ва ҳудудий яхлитлигини муҳофаза қилиш бўйича қўшимча чора-тадбирлар белгилаш заруратидан келиб чиқиши” қайд этилган.

Ҳужжат билан чет эл фуқаролари ва фуқаролиги бўлмаган шахсларнинг Ўзбекистон Республикасида бўлишини номақбул деб топиш асослари ва тартиби белгиланади.

Қонун лойиҳасига мувофиқ, чет эл фуқаролари ва фуқаролиги бўлмаган шахслар томонидан “Ўзбекистоннинг давлат суверенитетига, ҳудудий яхлитлигига ва хавфсизлигига зид бўлган, давлатлараро, ижтимоий, миллий, ирқий ҳамда диний адоватни келтириб чиқарувчи, Ўзбекистон халқининг шаъни, қадр-қимматини ёки тарихини таҳқирловчи мазмундаги оммавий чиқишлар қилиш ёхуд ҳаракатлар содир этиш уларни Ўзбекистон Республикасида бўлиши номақбул деб топиш учун асос бўлиши мумкин.

Лойиҳада мамлакатда бўлиши номақбул деб топилган шахсларга беш йил давомида Ўзбекистонга кириш, банкларда ҳисобварақ очиш, кўчмас мулк сотиб олиш, давлат мулкини хусусийлаштиришда иштирок этиш, молиявий ва шартномавий муносабатларга киришишни тақиқлаш таклиф этилган.

Қонун лойиҳасида мамлакатда бўлиши номақбул деб топилган шахсларни депортация қилиш асослари ва тартиби ҳам назарда тутилган”, дейилган палата матбуот хизмати хабарномасида.

Қайд этилишича, лойиҳа бўйича мунозаралар чоғида депутатлар қонун лойиҳасининг қабул қилиниши Ўзбекистоннинг давлат суверенитети, ҳудудий яхлитлиги ва хавфсизлигини мустаҳкамлашга, мамлакатда давлатлараро, миллатлараро, динлараро аҳиллик, тотувликни ҳимоя қилишга ҳамда Ўзбекистон халқининг шаъни, қадр-қиммати ва тарихи ҳурмат қилинишини таъминлашга хизмат қилишини таъкидлашган.

Қонунчилик палатасининг бир гуруҳ депутатлари томонидан ишлаб чиқилган мазкур қонун лойиҳаси қуйи палатага кўриб чиқиш учун киритилгани ҳақида тақрибан икки ҳафта муқаддам маълум бўлган эди. Ўша пайтда лойиҳа “Қозоғистон, Озарбайжон, Россия Федерацияси, Польша, Беларусь, ХХР каби давлатларнинг илғор тажрибасидан келиб чиққан” ҳолда ҳозирлангани билдирилганди.

Бунинг ортидан ижтимоий тармоқларнинг ўзбек сегментида қонун лойиҳаси юзасидан турли мунозаралар кузатилган, ўзбекистонлик айрим фойдаланувчилар бу ҳужжатга Россиянинг “хорижий агентлар”га оид баҳсли қонунидагига ўхшаш моддалар киритилиб қолиши мумкинлигидан хавотир изҳор этган эдилар.

Мазкур лойиҳа қонун мақомини олиши учун Олий Мажлис Сенати томонидан маъқулланиши ва мамлакат президенти томонидан имзоланиб, расмий матбуотда эълон қилиниши лозим.

Кун янгиликлари

Самарқандда қурилиш ширкати 30 дан зиёд дарахтни кесиб ташлади

Иллюстратив сурат
Иллюстратив сурат

Самарқанд шаҳрида болалар боғчаси ҳудудида қўшимча бино қураётган қурилиш ширкати ноқонуний равишда 31 туп дарахтни кесиб ташлаган. Қонунбузарлик ҳолати Самарқанд вилояти Экология бошқармаси томонидан ўтказилган текширув чоғида аниқланган.

Экология бошқармаси матбуот хизматига кўра, боғча ҳудудида кесилган дарахтларнинг 30 тупи ҳукумат қарорига асосан қимматбаҳо навлари рўйхатига киритилган Элдор қарағайи (Пинус елдариcа), бир тупи эса кам қимматли терак дарахти бўлган. Дарахтлар ноқонуний равишда қурилиши режалаштирилган бинонинг ерости қисмини (котлован) қазиш вақтида кесиб ташлагани аниқланган.

Олиб борилган тезкор ўрганишлар жараёнида “Самарқанд махсус сув дренаж” МЧЖ томонидан дарахтларни ноқонуний тарзда кесиб ташлаши оқибатида табиатга 260 620 000 сўм зарар етказганлиги маълум бўлди”, дейилган бошқарма хабарномасида.

Ҳолат бўйича тегишли ҳужжатлар расмийлаштирилиб, ҳуқуқ-тартибот идораларига тақдим этилган.

Ўзбекистон президенти 2021 йил 31 декабрь куни имзолаган фармонга мувофиқ, мамлакатда давлат ўрмон фондига кирмайдиган дарахтлар ва буталар қимматбаҳо навларининг кесилишига мораторийнинг амал қилиши муддатсиз даврга узайтирилган. Дарахтларни ҳар қандай ҳолатда кесиш ёки йўқ қилиш тўғрисида ҳукумат фармойишлари ва ҳокимлар қарорларини қабул қилиш ҳам тақиқланган.

Зангиотада ўгай қизини муттасил калтаклаб келган аёл жазоланди

Иллюстратив сурат
Иллюстратив сурат

Тошкент вилоятининг Зангиота туманида 13 яшар қизга мунтазам равишда жисмоний ва руҳий зўравонлик қилиб келган ўгай она жазоланган.

Болалар омбудсмани матбуот хизмати қайдича, ҳолат юзасидан қўзғатилган жиноят иши бўйича олиб борилган дастлабки терговда Ш.С. исмли аёл 2010 йилда туғилган қизи С.Р. ни ўтган йил давомида муттасил равишда дўппослаб, унга нисбатан жисмоний ҳамда руҳий жиҳатдан азоб бериб, унда кучли қўрқув ҳосил қилиш йўли орқали ўлдириш ёки зўрлик ишлатиш билан қўрқитиб, танасининг турли қисмларига тан жароҳатлари етказиб келгани аниқланган.

“Жорий йилнинг 5 июнь куни Тошкент вилояти жиноят ишлари бўйича Зангиота туман судида мазкур жиноят иши юзасидан чиқарилган ҳукмга биноан, Ш.С. ЖКнинг 110-моддаси 2-қисми “а, в” бандлари (Қийнаш) ва 112-моддаси 3-қисми (Ўлдириш ёки зўрлик ишлатиш билан қўрқитиш) билан айбдор деб топилиб, унга 3 йил 6 ой муддатга озодликдан чеклаш жазоси тайинланди ва мазкур жазо билан боғлиқ тегишли чекловлар ўрнатилди”, дейилган Болалар омбудсманининг 22 июль куни ёйинланган хабарномасида.

Иш ҳафтаси охиригача тўртта вилоятда сел кузатилиши мумкин

Иллюстратив сурат
Иллюстратив сурат

Ўзбекистоннинг тоғолди ва тоғли ҳудудларида 23-26 июль кунлари кутилаётган ёғин-сочин сел-сув тошқини ҳодисаларини юзага келтириши мумкин. Бу ҳақда Гидрометеорология хизмати агентлиги маълумот тарқатди.

“Ўзгидромет” қайдича, сел ҳодисалари Тошкент вилоятининг Оҳангарон, Бўстонлиқ, Паркент, Пискент, Ўртачирчиқ, Юқоричирчиқ туманлари ва Ангрен, Олмалиқ шаҳарларида, Наманган вилоятининг Поп, Косонсой, Чортоқ, Чуст, Наманган, Янгиқўрғон туманларида, Фарғона вилоятининг Сўх, Шоҳимардон, Фарғона, Бешариқ туманларида ҳамда Андижон вилоятининг Андижон, Асака, Жалақудуқ, Қўрғонтепа, Пахтаобод, Избоскан, Хўжаобод, Марҳамат туманларида ва Хонабод шаҳрида кузатилиши эҳтимоли бор.

Метеорологлар тоғолди ва тоғли ҳудудларда истиқомат қилувчи фуқаролар ҳамда бу ҳудудларда ҳаракатланувчи ҳайдовчилардан тошқин эҳтимолига қарши эҳтиёткорлик чораларини кўриш ҳақида огоҳлантиришган.

Тошкент вилояти ва Фарғона водийси ҳудуди бўйича ёмғир сувлари тўпланиши эҳтимоли бор, бу эса ҳудудларни сув босишига олиб келиши мумкин”, дейилган “Ўзгидромет” хабарномасида.

Жорий йилнинг 14 июль куни Ўзбекистоннинг Андижон вилоятига қўшни бўлган Ўш шаҳрида катта сел ҳодисаси кузатилган, табиий офат оқибатида беш киши нобуд бўлган эди.

Моли вазир иштирокида реклама қилинган дўконга жарима солинди

Маданият вазири Озодбек Назарбеков иштирокида олинган реклама видеоролигидан скриншот
Маданият вазири Озодбек Назарбеков иштирокида олинган реклама видеоролигидан скриншот

Рақобатни ривожлантириш ва истеъмолчилар ҳуқуқларини ҳимоя қилиш қўмитаси KINGSMAN UZBEKISTAN дўконида сотилаётган кийим-кечакларни маданият вазири Озодбек Назарбеков иштирокида реклама қилган “Boutique” МЧЖни жаримага тортди.

Жорий йилнинг 2 июлида вазир Назарбеков маҳаллий кийим брендининг реклама ролигида иштирок этгани акс этган видео тарқалган эди. Видео тарқалиши ортидан Рақобат қўмитаси ҳолат назоратга олингани, бу борада ўрганиш ишлари олиб борилаётганини маълум қилган.

Орадан қарийб уч ҳафта ўтиб, қўмита ҳолат юзасидан махсус комиссия томонидан тегишли тартибда иш қўзғатилгани, ўрганиш натижаси бўйича комиссия KINGSMAN UZBEKISTAN бренди остида фаолият кўрсатувчи “Boutique” МЧЖ “Реклама тўғрисида”ги қонуннинг 16-моддасини, яъни рекламада товар давлат органлари ёки уларнинг мансабдор шахслари томонидан маъқулланганлигини кўрсатиш бўйича тақиқ талабларини бузган, деб топганини очиқлади.

Пировардида, Рақобат қўмитаси қайдича, “Boutique” МЧЖга нисбатан белгиланган тартибда молиявий жарима қўллаш ҳақида қарор қабул қилинган ҳамда унга қонунбузарлик ҳолатини бартараф этиш ва келгусида такрорламаслик юзасидан кўрсатма берилган.

Айни пайтда қўмита маданият вазири Озодбек Назарбековнинг рекламада иштирокини реклама берувчи, реклама тайёрловчи ёки реклама тарқатувчи сифатида иштирок этганлиги аломатлари аниқланмаганини урғулаган.

О. Назарбеков томонидан рекламани ўз шахсий ижтимоий тармоқлари ва бошқа расмий тармоқлар орқали тарқатмаганлиги «Реклама тўғрисидаги» Қонунига асосан рекламанинг айланиши соҳасидаги иштирокчиси сифатида баҳоланмайди”, дейилган Рақобат қўмитаси хулосасида.

Ўзбекистон ТСАсида Хитой ва Россия ҳиссаси қарийб тенглашди

Жорий йилнинг биринчи ярмида Ўзбекистон ташқи савдо айланмасида Хитойнинг ҳиссаси 18,5 фоизни, Россия ҳиссаси эса 18,1 фоизни ташкил қилган. Шу тариқа, бу икки давлат ҳамон Ўзбекистоннинг энг йирик савдо ҳамкорлари бўлиб қолмоқда.

Статистика агентлиги маълумотига кўра, 2024 йилнинг январь-июнь ойларида Ўзбекистон жаҳоннинг 186 та мамлакати билан савдо алоқаларини амалга ошириб, ташқи савдо айланмаси ҳажмини 31,8 млрд АҚШ долларига етказган.

Ўтган ярим йил мобайнида ТСАдаги экспорт улуши 13 миллиард долларни (ўтган йилнинг шу даврига нисбатан 5,5 фоизга кўп), импорт улуши эса 18,8 миллиард долларни (ўтган йилнинг шу даврига нисбатан 10,6 фоизга кўп) ташкил қилган.

Хитой ва Россиядан ташқари биринчи ярим йилликда Ўзбекистоннинг Қозоғистон билан олди-бердиси 6 фоизга, Туркия билан 4,5 фоизга, Жанубий Корея билан эса 3,4 фоизга етган.

БП: “Чорвоқ”даги фожиали авария юзасидан жиноят иши қўзғатилди

"Чорвоқ" сув омборидаги скутерлар (иллюстратив сурат)
"Чорвоқ" сув омборидаги скутерлар (иллюстратив сурат)

“Чорвоқ” сув омборида икки кишининг ўлимига сабаб бўлган авария юзасидан Ўзбекистон Жиноят кодексининг 260-моддаси (Темир йўл, денгиз, дарё ёки ҳаво транспортининг ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Бу ҳақда Бош прокуратура матбуот котиби Ҳаёт Шамсутдинов маълум қилди.

Фавқулодда вазиятлар вазирлиги қайдича, мазкур авария 20 июль куни соат 14:30 ларда содир бўлган. Вазирлик хабарномасида Тошкент вилояти Бўстонлиқ туманидаги “Чорвоқ” сув омборининг “Бурчмулла” сув ҳавзасига дам олиш мақсадида келган зангиоталик 19 ёшли фуқаро скутерни ҳайдаш вақтида бошқарувни эплай олмай, қаршисидаги катамаранга бориб урилгани, оқибатда катамаранда бўлган икки нафар фарғоналик фуқаро воқеа жойида вафот этгани маълум қилинган. Ижтимоий тармоқларда авария қурбони бўлган фарғоналикларнинг бири 26, яна бири 28 ёшда экани айтилган.

БП мулозими Ҳаёт Шамсутдинов ҳолат юзасидан тергов ҳаракатлари олиб борилаётганини қўшимча қилган.

Нью-Йоркда ўзбекистонлик ўз оиласидан тўрт кишини ўлдирди

Иллюстратив сурат
Иллюстратив сурат

АҚШнинг Нью-Йорк шаҳрида ўзбекистонлик йигит ўз оила аъзоларидан тўрт нафарини ўлдирган.

New York Post нашри хабарига кўра, ҳодиса 19 июль куни Бруклиндаги Ғарбий саккизинчи кўчада содир бўлган. 24 ёшли йигит ўз онаси, келинойиси ва икки жиянини пичоқлаб ўлдирган.

Жума куни соат 22:20 ларда Нью-Йорк полицияси ходимлари шаҳар кўчаларидан бирида қотилликда гумонланаётган шахснинг онаси – бўйнига кўплаб марта пичоқ урилган 56 ёшли Мавлуда Файзиеванинг жасадини топишган.

Қотилликда гумонланаётган шахснинг жиянлари бўлмиш 5 яшар Камила ва 4 яшар Тимурнинг жасадлари эса уйдаги шкафга солинган қоп ичидан топилган.

Ўлдирилган болаларнинг онаси – 27 ёшли Мафтуна Ҳакимованинг жасади ҳам фарзандларининг жасади яқинида бўлган. Она ва болаларнинг жасадларида ҳам кўплаб пичоқ излари топилган.

Воқеа ортидан гумонланувчи ҳибсга олинган. Полициячилар фикрича, у руҳан носоғлом бўлиши мумкин. Айни пайтда нашр суҳбатлашган воқеа гувоҳларидан бири қотилликда гумонлаётган шахснинг гиёҳванд моддалар истеъмол қилиб юрганини айтган.

Қашқадарёда уч нафар блогер қамалди

Иллюстратив сурат
Иллюстратив сурат

Жиноят ишлари бўйича Қарши шаҳар суди ҳукми билан 18 июль куни блогер Наргиза Келдиёрова 6 йил 6 ойга, блогер Дилдора Ҳакимова 6 йил 2 ойга ва блогер Шукрулло Парпиев 6 йил 6 ойга озодликдан маҳрум қилинди.

Шунингдек, блогерларга жиноий шерикликда айбланган яна 4 нафар фуқаронинг ҳар бири 5 йилга озодликдан чеклаш билан жазоланди. Бу ҳақда Озодликка судда иштирок этган адвокатлардан бири маълум қилди.

Блогерлар Ўзбекистон Жиноят кодексининг 165-моддасида (Товламачилик) кўзда тутилган жиноятларни содир этганликда айбланган.

Бундан ташқари, блогер Наргиза Келдиёровага Жиноят кодексининг 155-моддаси (Терроризм) ва 158-моддаси 3-қисми (Ўзбекистон Республикаси президентини омма олдида ҳақоратлаш ёки унга туҳмат қилиш, шунингдек, матбуот ёки бошқа оммавий ахборот воситаларидан, телекоммуникация тармоқларидан ёки Интернет бутунжаҳон ахборот тармоғидан фойдаланган ҳолда уни ҳақоратлаш ёки унга туҳмат қилиш) бўйича айблов қўйилган.

Жиноят иши материалларига кўра, Келдиёрова хусусан Қозоғистондаги оммавий тартибсизликлар ҳақида ижтимоий тармоқларда фикр билдириб, уни қўллаб-қувватлаган ва бу билан қонунчиликдаги терроризм жиноятини содир этган.

Блогерларга нисбатан суд томонидан белгиланган жазо муддатлари умумий тартибдаги колонияларда ўталиши билдирилган.

Шавкат Мирзиёев Урсула фон дер Ляйенга табрик мактуби йўллади

Урсула фон дер Ляйен
Урсула фон дер Ляйен

Ўзбекистон президенти Шавкат Мирзиёев Урсула фон дер Ляйенни Европа комиссияси президенти лавозимига қайта сайлангани муносабати билан табриклаб, унга мактуб йўллаган. Бу ҳақда президент матбуот котиби Шерзод Асадов ўз телеграм-канали орқали маълум қилди.

Асадовга кўра, Мирзиёев ўз мактубида Ўзбекистоннинг сўнгги йилларда Европа Иттифоқи билан кенг қамровли муносабатларини сифат ва мазмун жиҳатидан мутлақо янги босқичга кўтаришда, “Ўзбекистондаги ортга қайтмас тус олган демократик ва иқтисодий-ижтимоий ислоҳотларни ҳар томонлама қўллаб-қувватлашда Еврокомиссия Президентининг улкан шахсий ҳиссаси бор”лигини урғулаган.

Мактубда Ўзбекистон Европа Иттифоқи билан муносабатларда мутлақо янги саҳифа очадиган Кенгайтирилган ҳамкорлик ва шериклик тўғрисидаги битимни тез орада имзолаш тарафдори экани қайд этилган.

Яқин келажакда Самарқанд шаҳрида биринчи “Марказий Осиё - Европа Иттифоқи” саммити ўтказилиши минтақавий алоқаларимизни манфаатли лойиҳалар ва дастурлар билан бойитиш йўлида муҳим амалий қадам бўлишига аминман", дейилган президент Мирзиёев мактубида.

Германиялик сиёсатчи Урсула фон дер Ляйен номзоди 18 июль куни Европарламент томонидан яна беш йилга Европа комиссияси раҳбари лавозимига тасдиқланган эди. Маълумотларга кўра, Европарламентдаги 720 депутатдан 401 нафари Урсула фон дер Ляйен номзодини ёқлаб, овоз берган. Бу Европа комиссияси президенти бўлиш учун зарур бўлган овоз миқдоридан 40 тага кўпдир. Яширин овоз бериш йўли билан ўтказилган сайловда 284 нафар депутат Урсула фон дер Ляйенга қарши овоз берган, депутатлардан 15 нафари эса овоз беришдан тийилган.

Аввалроқ ЕИга аъзо давлатлар раҳбарлари ҳам Урсула фон дер Ляйен номзодини маъқуллаган эдилар.

“Бахти Ташкентский” 20 йилга озодликдан маҳрум этилди

"Бахти Ташкентский" лақаби билан танилган Бахтиёр Қудратуллаев (Тошкент шахар ИИББ фотоси)
"Бахти Ташкентский" лақаби билан танилган Бахтиёр Қудратуллаев (Тошкент шахар ИИББ фотоси)

Жиноят ишлари бўйича Юнусобод туман суди 19 июль куни жиноят оламида “Бахти Ташкентский” лақаби билан танилган Бахтиёр Қудратуллаев ва унинг яқинлари дохил 37 нафар судланувчига нисбатан ўз ҳукмини очиқлади.

Маҳаллий матбуот хабарига кўра, Ўзбекистон Жиноят кодексининг қатор моддалари бўйича айбдор деб топилган Бахтиёр Қудратуллаев, суд ҳукмига кўра, 20 йилга озодликдан маҳрум қилинган.

Аввалроқ прокурор 44 та эпизод бўйича айбланаётган “Бахти Ташкентский”га 20 йиллик қамоқ жазоси берилишини сўраганди.

53 ёшни қоралаган Бахтиёр Қудратуллаев ўтган йилнинг ноябрь ойи охирида Тошкент шаҳар ИИББ томонидан ўтказилган “Долзарб 40 кунлик” тадбирлари доирасида қўлга олинган эди. У Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ИИО ходимини қонуний талабини бажармаслик) 1-қисмида назарда тутилган маъмурий ҳуқуқбузарликларни содир этганликда айбли деб топилган ва 15 суткага қамалган.

Декабрь ойи бошида Тошкент шаҳар ИИББ Бахтиёр Қудратуллаев 165-модда 3-қисми (жуда кўп миқдорда товламачилик), 276-модда 2-қисмида (кўп миқдорда гиёҳвандлик воситаларини сақлаш) ҳам гумонланаётганини билдирганди.

“Бахти Ташкентский” ва яна 36 кишининг жиноят ишини кўриб чиқиш бўйича суд жараёни жорий йилнинг 3 июнида Юнусобод туман суди биносида бошланган эди.

Ўзини ўзи банд қилган таксичилар сони ярим миллиондан ошди

Иллюстратив сурат
Иллюстратив сурат

Ўзбекистонда ўзини ўзи банд қилган шахслар сони 2024 йилнинг 1 июль ҳолатига 3,5 миллион нафардан ошган. Давлат солиқ қўмитаси матбуот хизмати қайдича, бу ўтган йилнинг шу даврига нисбатан 115,6 фоизга (1,9 миллион нафарга) кўпдир.

Солиқ қўмитаси ўтган йилга нисбатан ўсиш кўрсаткичи энг юқори соҳалар қаторида ишлаб чиқариш ва хизмат кўрсатиш (199,3 фоиз ёки 220,4 мингта), маиший хизматлар (186,2 фоиз ёки 952,5 мингта) ҳамда ахборот-коммуникация (154,7 фоиз ёки 56,1 мингта) каби соҳаларни санаган.

Ўзини ўзи банд қилган шахслар ичида эркаклар улуши 57 фоизга, аёллар улуши эса 43 фоизга тенг.

Ҳудудлар кесимида ўзини ўзи банд қилганлар энг кўп Самарқанд вилоятида (қарийд 430 минг киши), Қашқадарё вилоятида (362,5 минг киши), Андижон вилоятида (327,7 минг киши) ва Тошкентда (320 минг киши) яшайди.

IT соҳасида ўзини ўзи банд қилган шахслар сони 2,5 баравар (92,3 минг киши) ошган. Солиқ қўмитаси бу кишиларнинг қайси мамлакат фуқароси эканига аниқлик киритган эмас. Шу сабабдан қайд этилган ITчиларнинг ҳаммаси ўзбекистонликми ёки улар орасида Ўзбекистонда фаолият юритаётган Россия ва Беларусь фуқаролари ҳам борми – маълум эмас.

Қўмита маълумотига кўра, жорий йилнинг биринчи ярмида енгил автотранспортда йўловчи ташиш фаолияти бўйича рўйхатдан ўтган фуқаролар сони 530 минг 16 нафарга етган. “Шундан 238 631 нафари жорий йилда рўйхатдан ўтган”, дейилган Солиқ қўмитаси хабарномасида.

Ўзбекистонда “Лукойл” шуъбаси нарх манипуляциясида айбдор топилди

Иллюстратив сурат
Иллюстратив сурат

Рақобатни ривожлантириш ва истеъмолчилар ҳуқуқларини ҳимоя қилиш қўмитасининг махсус комиссияси Россиянинг “Лукойл” ширкати шуъба корхонаси томонидан Ўзбекистон қонунчилиги бузилганини аниқлаган.

Икки ҳафта муқаддам Озодлик Ўзбекистонда нарх-наво манипуляциясида гумонланаётган Lukoil Overseas Supply and Trading Ltd ширкатига нисбатан иш қўзғатилгани ҳақида хабар қилган эди.

Ўшанда ширкат биржа савдолари орқали техник олтингугурт маҳсулотини реализация қилишда, шу жумладан биржа савдоларида маҳсулот ҳажмларини номувофиқ қўйиш каби манипуляция ҳолатлари орқали маҳсулот нархларини ошишига олиб келган ҳаракатларни амалга оширганликда гумонланаётгани айтилган.

Иддаога кўра, ширкат томонидан содир этилган мазкур манипулятив хатти-ҳаракатлар биржа савдоларида техник олтингугурт маҳсулоти нархларининг ўртача 10 фоиздан 50 фоизгача ошишига сабаб бўлган.

Бу борада текширув ўтказган Рақобат қўмитаси махсус комиссияси ширкат томонидан қонун бузилишига йўл қўйилганлиги натижасида асоссиз олинган маблағни қайтариш бўйича қарор қабул қилган.

Қўмита хабарномасида маълум қилинишича, махсус комиссия томонидан ширкатга қонун бузилишларини бартараф этиш ва кейинчалик йўл қўймаслик юзасидан бажарилиши мажбурий бўлган кўрсатма берилган.

Рақобат қўмитаси “махсус комиссия қароридан норози бўлган томон Қўмитанинг Апелляция кенгашига ёки судга мурожаат қилиш ҳуқуқига эга” эканини қўшимча қилган.

Ўзбекистон билан Қирғизистон ўртасида 15 дан зиёд ҳужжат имзоланди

Қирғизистон президенти Садир Жапаровнинг Ўзбекистонга икки кунлик ташрифи доирасида 16 та икки томонлама ҳужжат имзоланган.

Президент матбуот хизмати маълумотига мувофиқ, икки давлат президентларининг музокаралари якунида даставвал Шавкат Мирзиёев билан Садир Жапаров Кенг қамровли стратегик шериклик муносабатларини янада чуқурлаштириш ва кенгайтириш тўғрисидаги қўшма баёнотга қўл қўйишган.

Шундан сўнг мезбон ва меҳмон президентлар ҳузурида Қирғизистоннинг Иссиқкўл вилояти ҳудудида жойлашган курорт-ҳордиқ хўжалиги объектлари бўйича ҳукуматлараро битим, Фуқароларнинг ўзаро келиб-кетишлари тўғрисидаги ҳукуматлараро битимга ўзгартиришлар киритиш тўғрисида баённома, Ўзбекистоннинг ЖСТга аъзо бўлиши бўйича икки томонлама музокараларни якунлаш тўғрисида баённома, Қурилиш фаолияти соҳасидаги ҳамкорлик тўғрисида баённома, Меҳнат, аҳоли бандлиги ва миграция соҳасидаги ҳамкорлик тўғрисида баённома, Маданият ва санъат соҳасидаги ҳамкорлик тўғрисида баённома, Давлат хизмати соҳасидаги ҳамкорлик тўғрисида баённома, 2024-2030 йилларда ўзаро савдо ҳажмини ошириш бўйича чора-тадбирлар режаси, 2024-2026 йилларда жисмоний тарбия ва спорт соҳасидаги ҳамкорликни ривожлантириш бўйича амалий чора-тадбирлар режаси, 2024-2026 йилларда қишлоқ хўжалиги ва озиқ-овқат таъминоти соҳасидаги ҳамкорликни янада ривожлантириш бўйича "йўл харитаси", Ўзбекистон президенти ҳузуридаги Стратегик ва минтақалараро тадқиқотлар институти ҳамда Қирғизистон президенти ҳузуридаги Стратегик ташаббуслар миллий институти ўртасидаги меморандум ва бошқа ҳужжатлар имзоланган.

Қирғизистон президенти Садир Жапаров давлат ташрифини амалга ошириш учун Ўзбекистонга 18 июль куни эрталаб рафиқаси Айгул Жапарова билан биргаликда учиб келган. Меҳмонларни Тошкент халқаро аэропортида президент Шавкат Мирзиёев ва унинг рафиқаси Зироат Мирзиёева кутиб олишган.

Кўксарой қароргоҳида ўтказилган тантанали кутиб олиш маросими ортидан аввалига икки президентнинг тор доирадаги учрашуви бўлиб ўтган. Унда, жумладан, икки давлат ўртасида парламентлар, ҳукуматлар, ташқи сиёсат ва тармоқ идоралари даражасидаги мулоқотлар натижадорлигини ошириш, халқаро ва минтақавий майдонлар, жумладан, Бирлашган Миллатлар Ташкилоти, Жаҳон савдо ташкилоти, минтақа давлатлари раҳбарларининг маслаҳат учрашувлари, “Марказий Осиё плюс” форматлари доирасида ўзаро қўллаб-қувватлашни давом эттириш зарурлиги таъкидланган, ўзаро товар айирбошлаш ҳажмини яқин йилларда 2 миллиард долларга етказиш, қишлоқ ва сув хўжалиги, экология, хавфсизлик ва бошқа соҳаларда ўзаро манфаатли ҳамкорликни ривожлантириш, стратегик аҳамиятга эга минтақавий лойиҳаларни, жумладан, “Хитой - Қирғизистон - Ўзбекистон” темир йўли ва Қамбарота ГЭС-1 қурилишини тез фурсатда амалга ошириш масалалари муҳокама қилинган.

Икки мамлакат расмий делегациялари иштирокида кенгайтирилган таркибда ўтказилган музокараларда эса, президент матбуот хизмати қайдича, савдо, саноат кооперацияси, энергетика, транспорт, қишлоқ ва сув хўжалиги, хавфсизлик, маданият ва бошқа муҳим йўналишлардаги ҳамкорлик натижалари танқидий таҳлил қилинган. Музокаралар чоғида томонлар парламентлар, ҳукуматлар, вазирликлар, идоралар ва ҳудудлар, ишбилармонлар, экспертлар ва жамоатчилик даражасида фаол алоқаларни давом эттиришга келишиб олишган. Шунингдек, Давлатлараро кенгаш тузишга қарор қилинган.

Йиғилишда бош вазирлар ўринбосарларининг ҳисоботлари ва савдо-иқтисодий ҳамкорлик юзасидан аниқ таклифлари тингланган, музокаралар якунида эса президентлар қўшма “йўл харитаси”ни тайёрлаш ва эришилган келишувларни самарали амалга ошириш механизмларини йўлга қўйиш бўйича топшириқ беришган.

Икки томонлама музокаралардан сўнг Мирзиёев ва Жапаров видеоалоқа форматида йирик кооперация лойиҳаларини ишга тушириш маросимида иштирок этишган. Жумладан, президентлар Фарғона ва Наманган вилоятларида умумий қуввати 400 мегаватт бўлган иккита қуёш электр станцияси қурилишига старт беришган. Мазкур станцияларда ишлаб чиқариладиган электр энергияси Қирғизистонга етказиб берилиши кўзда тутилган. Шунингдек, Қирғизистоннинг Чуй вилоятида “Кобальт”, “Оникс” ва “Трекер” русумли енгил ҳамда юк автомобиллари йиғиладиган заводни ишга туширишган. Президентлар Қирғизистон Қораболта шаҳрида жойлашган тикув-трикотаж маҳсулотлари ва мато ишлаб чиқарадиган фабрикани ҳам онлайн тарзда очиб беришган.

Қирғизистон президентининг Ўзбекистонга давлат ташрифига оид тадбирлар 19 июль куни ҳам давом этади.

Мирзиёев Эроннинг янги президенти билан мулоқот қилди

Эроннинг янги президенти Масъуд Пезешкиён
Эроннинг янги президенти Масъуд Пезешкиён

Ўзбекистон президенти Шавкат Мирзиёев 17 июль куни Эроннинг янги сайланган президенти Масъуд Пезешкиён билан телефон орқали мулоқот қилган.

Президент матбуот хизмати маълумотига кўра, мулоқот аввалида Мирзиёев Пезешкиённи Эронда ўтказилган президент сайловидаги ғалабаси билан қутлаган.

Шундан сўнг икки президент Ўзбекистон-Эрон муносабатларини янада ривожлантириш, савдо, инвестиция ва транспорт соҳаларидаги амалий ҳамкорликни кенгайтириш масалалари муҳокама қилишган.

Мулоқот чоғида энергетика, кимё саноати, қишлоқ хўжалиги, озиқ-овқат ва бошқа тармоқларда кооперация лойиҳаларини илгари суриш муҳимлиги қайд этилган.

Хабарномада суҳбат чоғида Мирзиёев ва Пезешкиён минтақавий кун тартибидаги долзарб масалаларга ҳам тўхталишгани қўшимча қилинган.

Аввалроқ Озодлик Эронда 5 июль куни бўлиб ўтган президент сайловининг иккинчи босқичида ислоҳотчи номзод Масъуд Пезешкиён ғалаба қозонгани ҳақида хабар қилган эди.

Эронда президент давлат раҳбари бўлиб ҳисобланмайди, у айниқса ташқи сиёсатда анчагина чекланган ваколат эгаси бўлмиш ижроия ҳокимияти раҳбаридир. Шунга қарамай, президент дунёнинг турли мамлакатлари билан алоқалар оҳангига ўз таъсирини кўрсатиш имконига эга.

Ботир Зокиров қурилиш вазири лавозимидан кетди

Қурилиш ва уй-жой коммунал хўжалиги вазири Ботир Зокиров лавозимидан бўшатилди. Бу ҳақда 17 июль куни президент раислигида Тошкентда ўтказилган видеоселектор йиғилишида билдирилган.

Йиғилишда қайд этилишича, Ботир Зокиров ўз лавозимидан “соғлиги туфайли” озод этилган, унинг ўрнига эса вазирнинг биринчи ўринбосари Шерзод Ҳидоятов вазир вазифасини бажарувчи этиб тайинланган.

Ҳидоятов биринчи ўринбосар лавозимига тайинланган 2019 йилнинг сентябрига қадар Tashkent City Халқаро ишбилармонлик маркази қурилиши дирекциясини бошқарган, ундан аввал эса Тошкент шаҳрининг собиқ ҳокими Жаҳонгир Ортиқхўжаевга тегишли Akfa ширкатлар гуруҳида қурилиш бўйича директор вазифасида ишлаган.

Шу ой охирида 61 ёшга тўладиган Ботир Зокиров 2019 йилнинг сентябридан буён қурилиш вазири лавозимида ишлаб келаётган эди. Ишдан бўшатилган мулозимга бошқа бирор лавозим бериладими ёки у соғлиғини тиклаш билан машғул бўладими – ҳозирча маълум эмас.

Аввалроқ маҳаллий матбуотда қурилиш вазири Ботир Зокировга алоқадор “Трест-12” ширкатига миллионлаб долларлик қурилиш лойиҳалари бир неча марта тендерсиз берилгани ҳақида хабарлар чиққан эди.

Давомини ўқинг

XS
SM
MD
LG