Линклар

Шошилинч хабар
28 сентябр 2022, Тошкент вақти: 12:29

Халқаро хабарлар

Россияда “Ўликлар партияси” фаоллари уйида тинтувлар ўтказилди

“Ўликлар партияси” фаолларининг акцияларидан бири

Санкт-Петербургда ҳуқуқ-тартибот идоралари ходимлари “Ўликлар партияси” фаолларининг уйларида тинтувлар ўтказишган.

“ОВД-Инфо” ҳуқуқбонлик лойиҳаси маълумотига кўра, тергов хатти-ҳаракатлари “партия” фаоли Кристина Бубенцованинг хонадонида, Ленинград вилоятининг Сиверский посёлкасида яшайдиган эркакникида (унинг исми очиқланмаяпти), ҳаракат асосчиси Максим Евстроповникида ва “Ўликлар партияси” тадбирлар ўтказиб келинган “ДК Рози” устахонаси раҳбари уйида ўтказилган.

“Фонтанка” нашри хабарига кўра, тинтувлар диндорлар ҳис-туйғуларини таҳқирланишига оид жиноят иши доирасида ўтказилмоқда. Бубенцова қўлга олиниб, Тергов қўмитасига олиб кетилган. Унинг компьютер ва телефонлари мусодара этилган.

Жиноят иши “Ўликлар партияси”нинг Украинадаги урушга қарши Пискарёв қабристонида ўтказган акциялари билан боғлиқ бўлиши мумкинлиги тахмин қилинмоқда.

Кун янгиликлари

Эрондаги намойишларда камида 60 киши ҳалок бўлди

Эрондаги намойишлардан бири.

Эронда 12 кундан бери ҳижоб тўғрисидаги қонунни бузганликда айбланиб полиция томонидан қўлга олинган Маҳса Аминий ўлими ортидан бошланиб кетган намойишлар давом этмоқда.

27 сентябрда ҳам намойишчилар полиция билан тўқнашгани, кўплаб норозилар қўлга олингани айтилмоқда. Намойишлар Теҳрон, Табриз,Қоража,Қум ва Язд каби кўплаб шаҳарларда давом этмоқда.

Эрондаги Fars ахборот агентлигининг билдиришича, 16 сентябрдан бери намойишлар пайтида полиция билан содир этилган тўқнашувлар оқибатида камида 60 киши ҳалок бўлди.

Ҳуқуқ фаоллари айрим ҳудудларда интернет ўчириб қўйилгани сабабли воқеалар ривожи ва тўқнашувлар тўғрисидаги видеоларни тарқатиш имконияти бўлмаётганини айтмоқда.

Эрон инсон ҳуқуқлари ташкилоти эса камида 76 киши ҳалок бўлгани ва 1200 киши қўлга олинганини билдирди. Tasnim агентлиги қўлга олинган норозилар орасида Эрон собиқ президенти Али Акбар Хошими Рафсанжонийнинг қизи ҳам борлигини ёзди.

22 ёшли Маҳса Аминий Теҳронда ҳижоб тўғрисидаги қонунни бузганликда айбланиб қўлга олинган эди. У қўлга олинганидан сўнг комага тушган ва уч кундан сўнг касалхонада вафот этган.

Европага келаётган россияликлар сони бир ҳафтада 30 фоизга кўпайди (ВИДЕО)

Россия-Грузия чегарасида навбатда турганлар.

Ўтган ҳафтада Россиянинг 66 минг фуқароси Европа Иттифоқи давлатларига кириб келди, бу икки ҳафта олдинги кўрсаткичдан 30 фоизга кўпдир, деб хабар берди Чегараларни назорат қилиш бўйича Европа агентлиги.

Агентлик чегарани кесиб ўтаётган россияликлар сони кўпайганини президент Путин 21 сентябрда эълон қилган қисман сафарбарлик билан боғламоқда. Агентлик ЕИга кириб келганларнинг кўпчилиги Европада яшаш рухсатномаси, шенген визалари ва икки фуқароликка эгалигини таъкидлади.

Аввалроқ "Новая газета. Европа" Россия президенти администрациясидаги манбасига таянган ҳолда, сафарбарлик эълон қилинганидан сўнг мамлакатни 261 минг эркак тарк этгани тўғрисида ёзган. Расман бу хабар тасдиқланмаган.

Аввалроқ Қозоғистон, Ўзбекистон ва Қирғизистонга ҳам Россиядан минглаб эркаклар қочиб ўтгани, бунинг оқибатида минтақанинг катта шаҳарлари, жумладан, Тошкент ва Бишкекда меҳмонхоналарда жой қолмагани, уй ижараси эса ошиб кетгани хабар қилинган.

“Тошкент меҳмонхоналарида жой қолмади” - Россияликлар мобилизациядан қочмоқда
Илтимос кутинг

Айни дамда медиа-манба мавжуд эмас

0:00 0:09:26 0:00

Украинанинг босиб олинган ҳудудларида ўтказилган “референдум” натижалари эълон қилинди

Донецкдаги овоз бериш участкаси.

Айирмачи Донецк вилоят «сайлов комиссияси»нинг билдиришича, овоз беришда қатнашганларнинг 99,23 фоизи Россияга қўшилишни маъқуллаган. Луганск вилоятида 98,42 фоиз, Запорожьеда 93,11 фоиз, Херсон вилоятида 87,05 фоиз сайловчи “Россияга қўшилиш учун овоз берган”.

«Референдум»лар якунланишидан бир неча соат олдин Россия Хавфсизлик кенгаши раисининг ўринбосари Дмитрий Медведев телеграм саҳифасида: «Референдумлар якунланди. Натижалари аниқ. Уйингиз Россияга хуш келибсиз!» деб ёзди.

Украинанинг босиб олинган ҳудудларини Россия таркибига қўшиб олиш масаласи 4 октябрда Федерация кенгашида кўриб чиқилиши кутилмоқда. Аммо ўзини ЛХР деб атаб олган тан олинмаган ҳудуд раҳбари Леонид Пасечник президент Путиндан вилоятни 28 сентябрдаёқ Россияга қўшиб олишни илтимос қилди.

Украина президенти Владимир Зеленский: «Оккупация қилинган ҳудудларда ўтказилган фарсни хатто референдумларнинг имитацияси деб ҳам атаб бўлмайди» , деди. Унга кўра, Украина армияси ҳар қандай шароитда ҳам украин ерларини озод қилишдан воз кечмайди. Зеленский Россия «референдум» натижаларини тан олса, «Путин билан сўзлашадиган ҳеч қандай гапи қолмаслиги»ни айтди.

Ғарб давлатлари Россияни бир неча марта «референдум» натижаларини тан олмасликлари тўғрисида огоҳлантирди. 27 сентябрь куни АҚШ давлат котиби Энтони Блинкен: «Украина ўзининг барча ҳудудларида абсолют даражада мудофаа ҳуқуқига, жумладан, Россия томонидан турли йўллар билан босиб олинган ерларини қайтариб олиш ҳуқуқига эга», деб баёнот берди. Блинкен президент Жо Байденнинг сўзларини такрорлаб, «сохта референдумлар ўтказган Россияга нисбатан қўшимча қатъий санкциялар жорий этилиши»ни айтди.

Ғарб давлатлари «сохта» деб атаётган «референдум»лар 23 сентябрдан 27 сентябргача Украинанинг босиб олинган ҳудудлари («ЛХР», «ДХР», ва Херсон ҳамда Запорожье вилоятларининг бир қисми)да ўтказилди.

Махачқалъадаги норозилик чиқишлари чоғида Озодликнинг жамоатчи мухбири ҳам қўлга олинди

Юлия Вешневецкая

Доғистон маркази бўлмиш Махачқалъа шаҳрида 26 сентябрь куни норозилик акцияси чоғида полиция томонидан тутиб кетилган шахслар орасида Озодликнинг рус хизмати жамоатчи мухбири Юлия Вешневецкая ҳам бўлган. “Свобода” хабарига кўра, журналист аёл ҳалигача қўйиб юборилгани йўқ.

Қайд этилишича, душанба куни қўлга олинганлар ичида бўлган “Новое Дело” нашри мухбири Идрис Юсупов ҳамда “RusNews” бош муҳаррири Сергей Айнбиндер 17 соат тутиб турилганидан кейин озод қилинган.

Маълумотларга кўра, 25 ва 26 сентябрь кунлари Махачқалъада кузатилган норозилик чиқишлари чоғида жами 230 чоғли (якшанба куни 120 нафар ва душанба куни 110 нафар) киши ушлаб кетилган.

Полиция норозиларга қарши саккизта жиноят иши очган, аммо уларга РФ Жиноят кодексининг қайси моддаси бўйича иш очилгани очиқланаётгани йўқ. Иштирокчиларнинг кўпига эса маъмурий жазо қўлланилган.

Япониянинг Isuzu ширкати Россияда автомобиль ишлаб чиқаришни тўхтатмоқчи

Ульяновск шаҳрида ўз заводига эга бўлган Япониянинг Isuzu автоконцерни Toyota ва Mazda ширкатлари ортидан Россияда автомобиль ишлаб чиқаришни тўхтатиш ҳақида бош қотира бошлади. Бу ҳақда Япониянинг Yomiuri нашри хабар қилди.

Ширкат мазкур қарорни автомобилсозлик заводи (АО “Исузу Рус”) учун зарур компонентларни етказиб бериш имконияти йўқлиги туфайли қабул қилиши мумкин. Бу ерда автомобиль ишлаб чиқариш Россия Украинага қарши уруш бошлаганидан кейин жорий йилнинг баҳорида тўхтатиб қўйилган эди.

Isuzu бренди Россияда 2006 йилдан бери фаолият кўрсатиб келаётганди.

Россия Мудофаа вазирлиги мобилизациядан бошқа мамлакатларга қочиб кетганларни қайтаришни талаб қилмайди

Россия-Грузия чегарасидаги фуқаролар (иллюстратив сурат)

Россия Мудофаа вазирлиги қисман ҳарбий сафарбарлик доирасида Қозоғистон, Грузия ва бошқа мамлакатлар идораларига у ердаги россияликларни мажбуран қайтариш бўйича ҳеч қанақа мурожаатнома йўллаган эмас ва бундай қилишни режалаштирмаяпти. Бу ҳақда РИА Новости агентлиги вазирликдан олинган маълумотга таянган ҳолда хабар қилди.

Аввалроқ Қозоғистон Ички ишлар вазирлиги мобилизациядан қочаётган россияликлар расмий қидирувга берилган тақдирда ватанига қайтарилиши мумкинлигини ҳақида билдирган эди.

Айни пайтда Грузия билан чегарада 27 сентябрдан эътиборан Россиянинг кўчма чақирув пункти иш бошлаган. Бу маълумотни Шимолий Осетия ҳукуматининг матбуот хизмати тасдиқлаган.

МДҲ хавфсизлик идоралари раҳбарлари ҳафта охирида Москвада йиғилади

Кремль воизи Дмитрий Песков Россия президенти Владимир Путин МДҲ бош чекистлари билан мулоқотда бўлишини тасдиқлади

Россия пойтахти Москвада жорий ҳафта охирида МДҲ давлатлари хавфсизлик идоралари ва разведка хизматлари раҳбарлари жам бўлади.

“РИА Новости” агентлигининг Кремль матбуот котиби Дмитрий Песков сўзларига таянган ҳолда хабар қилишича, постсовет ўлкалари бош чекистлари билан Россия президенти Владимир Путин видеоконференция воситасида мулоқот қилмоқчи. Песков Путиннинг МДҲ давлатлари разведкачилари билан учрашуви жума куни бўлиб ўтмаслигини урғулаган.

Аввалроқ Россия нашрлари 30 сентябрь куни Москвада ўтказилажак йиғилишда Озарбайжон, Арманистон, Беларусь, Қозоғистон, Қирғизистон, Россия, Тожикистон ва Ўзбекистон делегациялари иштирок этиши ва ўша куни Путин йиғилганлар билан мулоқот қилиши ҳақида ёзишган эди.

Turkish Airlines учоқлари йил охиригача Минск, Сочи, Ростов ва Екатеринбургга учмайдиган бўлди

Туркиянинг Turkish Airlines авиаширкати 2022 йил 31 декабригача Беларусь пойтахти Минск, Россиянинг Сочи, Ростов ва Екатеринбург шаҳарларига парвозларини бекор қилди. Бу ҳақда авиаширкат сайти маълумот тарқатди.

Мазкур қарор сабаби очиқланмаган. Авиаширкат вакиллари қайдича, бекор қилинган рейсларга чипта олган йўловчилар бошқа йўналишни танлашлари ёки чипта пулини тўлалигича қайтариб олишлари мумкин.

Turkish Airlines авиаширкатининг бошқа бир хабарномасида Украинага парвозлар ҳам бекор қилингани билдирилган.

Мигрантлар сони кўпайгани ортидан Қозоғистон Россия билан музокаралар ўтказмоқчи

Қозоғистон президенти Қасим-Жомарт Тоқаев

Украинадаги уруш учун Россияда ҳарбий сафарбарлик эълон қилингани ортидан чегарадан ўтаётган россияликлар сони кескин ошиб кетгани туфайли Қозоғистон расмийлари Москва билан музокаралар ўтказади. Бу ҳақда Қозоғистон президенти Қасим-Жомарт Тоқаев Туркистон вилояти жамоатчилиги олдида қилган чиқишида билдирди.

Тоқаевга кўра, халқаро таранглик авж олган бир паллада Қозоғистон “халқаро ташкилотларда, биринчи галда БМТда ўтказилаётган овоз беришларда нейтрал позиция”сини сақлаб турибди, бу эса мамлакатнинг “миллий манфаатларига мос келади”.

“Давлатларнинг ҳудудий яхлитлиги ўзгармас бўлиши лозим. Бу асосий принципдир. Мен ҳар доим халқаро майдонда бу ҳақда очиқ ва аниқ гапириб келганман. Яқинда БМТнинг энг юксак минбаридан туриб бу ҳақда яна бир марта билдирганим ҳам тасодиф эмас. Шундоққина ёнгинамизда кенг кўламли уруш боряпти. Буни эсда тутаркан, биз биринчи навбатда ўз мамлакатимиз хавфсизлиги ҳақида ўйлашимиз лозим”, деди Тоқаев.

Қозоғистон президенти ҳукуматга мобилизация эълонидан кейин Россиядан қочиб келаётган россияликларга кўмак кўрсатишни топширди. У “келаётганлар ёрдам олишади, бироқ уларга ҳеч қанақа имтиёз берилмайди”, дея қайд этди.

“Уларнинг кўпчилиги иложсиз қолгани туфайли кетишга мажбур бўлишган. Биз улар ҳақида қайғуриб, уларнинг хавфсизлигини таъминлашимиз лозим. Бу сиёсий ва гуманитар масаладир”, деди Тоқаев.

Айни пайтда Қозоғистон расмийлари мигрантлар оқиб келиши манзарасида биринчи галда ўз фуқаролари манфаатларини ҳисобга олишлари керак, дея бирдирди бош вазир Алихан Смаилов ҳукумат йиғинида. Унга кўра, бу аввало меҳнат бозорига тааллуқли.

“Қўшни мамлакатлардан келган мигрантлар мамлакатимизда фақат белгиланган қонунчилик доирасидагина ишлашлари мумкин”, деди Смаилов.

Россияда ҳарбий сафарбарлик эълон қилинганидан кейин Қозоғистонга келувчилар сони 2-3 баравар кўпайган, 21 сентябрдан бери мамлакатга 98 минг чоғли россиялик кириб келган. Россия Мудофаа вазирлиги урушга 300 минг киши сафарбар қилиниши мумкинлигини билдирган, бироқ оммавий ахборот воситалари сафарбар қилинганлар сони миллиондан ошиши мумкинлиги ҳақида хабар қилишмоқда.

Россия бомбардимон қилишда давом этаётган Харьковда гей парад ўтказилди

Харьковдаги гей парад иштирокчилари.

Россия армияси ракеталар ва артилерия орқали ўқ отишда давом этаётган Харьков шаҳрида 25 сентябрь куни гей парад ўтказилди деб хабар берди “Настояшчее время” телеканали. ЛГБТ+ паради хавфсизлик нуқтаи назаридан Харьков метросида ўтказилди ва унинг иштирокчилари сони ҳам чекланди.

Ташкилотчилар парад ўтказиш орқали Украина демократиясининг Россия тоталитар режимидан устунлигини кўрсатмоқчи бўлишганини айтишди.

“Биз учун бугун биринчи навбатда Украина, Украина учун кураш турибди. Ҳар куни биз қўлимиздан келган ҳаракатларни амалга оширмоқдамиз. ЛГБТ одамлар жанг қилишмоқда, волонтёрлик қилишаяпти, кўмак кўрсатишаяпти. Бугун биз бир оз вақт ажратиб, инсон ҳуқуқлари масаласини кўтармоқчи бўлдик”, деди "ХарьковПрайд" ташкилотчиларидан бири Анна Шаригина.

Парад иштирокчилари камалакранг рамзларни кўтарган ҳолда Харьков метросининг барча станцияларини айланиб чиқди. Улар Украина учун бошқалар билан бирдай курашаётганини, демак барча каби тенг ҳуқуққа эга бўлишлари шартлигини айтишган.

Россия 24 февралда Украинага бостириб кирганидан сўнг ЛГБТ ҳамжамиятига оид минглаб одамлар ҳам украин армияси ва кўнгиллилар отрядларига қўшилиб, рус армиясига қарши жанг қилмоқда. Қолган ЛГБТ фаоллар эса гуманитар ёрдам йиғиш ва тарқатиш билан шуғулланяпти.

Евгений Пригожин "Вагнер" ҳусусий ҳарбий ширкатига алоқадор эканини тан олди

Евгений Пригожин Владимир Путин билан.

Президент Путинга яқин экани айтиладиган миллиардер Евгений Пригожин Украинадаги урушда иштирок этаётган жангариларга доҳил бўлган "Вагнер" ҳусусий ҳарбий ширкатига алоқадор эканини илк маротаба тан олди. "Вагнер"чилар Сурия, Африка, жумладан, Ливиядаги урушларда қатнашган.

У ўзига тегишли "Конкорд" ширкати сайтида “Вагнер”ни 2014 йилда ташкил қилганини билдирган. Пригожинга кўра, у шу кунгача ўзи “Рус ватанпарварлигининг асоси” деб атайдиган “вагнер”чиларга панд бериб қўймаслик учун бу ширкатга алоқадор эканини инкор қилиб келган.

Пригожин бунга қадар “Вагнер”га ўзининг алоқадорлигини ёзган журналистлар билан судлашган. Яқинда Пригожин Россия қамоқхоналарида “Вагнер”га жангари ёллаётгани тўғрисидаги видеолар тарқалган эди. Айрим маълумотларга қараганда, Пригожин Украинадаги урушга 6 минг маҳкумни ёллаган.

The Bell нашри 2019 йилдаги журналистик суриштирувида Пригожин “Вагнер”ни ташкил этишга Россия армияси Бош штаби ташаббуси билан жалб қилинганини ёзган эди.

Путин Эдвард Сноуденга Россия фуқаролигини берди

Сноуден 2020 йилнинг ноябрида Россия фуқаролигини олиш учун ариза берганди.

Россия президенти Путин АҚШ Миллий хавфсизлик агентлиги (МХА)нинг собиқ ходими Эдвард Сноуденга Россия фуқаролигини берди. Бу борадаги фармон меъёрий ҳужжатлар порталида эълон қилинди.

Сноуден 2020 йилнинг ноябрида твиттер саҳифасида Россия фуқаролигини олиш учун ариза берганини ёзганди. Сноуден 2013 йилнинг июнида The Guardian ва The Washington Post газеталарига АҚШ разведкаси жаҳоннинг кўп давлатларида одамларни ахборот ва алоқа тармоқлари орқали тотал кузатаётгани тўғрисидаги маълумотларни ошкор қилган.

Мазкур маълумотларда, разведка жаҳондаги 35 сиёсий лидернинг, жумладан, Германия канцлери Ангела Меркелнинг телефон мулоқотларини тинглаб боргани қайд этилган. Пентагоннинг ҳисоботида белгиланишича, Сноуден жами 1,7 миллионта махфий файлни ўғирлаган.

Шундан сўнг 2013 йилда Сноуденга нисбатан АҚШда жосуслик ва махфий ҳужжатларни ўғирлаш бўйича айблов билдирилган. Сноуден АҚШдан қочиб Ҳонконгда бошпана топди. Кейинроқ у Россияга келган ва шу ерда яшаб келаётган эди.

Ижевскдаги мактабга қилинган ҳужум қурбонлари 15 кишига етди

Ҳалок бўлганларнинг 11 нафари ўқувчи, икки нафари қўриқчи ва икки нафари ўқитувчи.

Россия Федерацияси таркибига кирувчи Удмуртия республикасининг Ижевск шаҳрида 26 сентябрь куни 88-сонли мактабда содир этилган отишмада ҳалок бўлганлар сони 15 кишига етди. Ҳалок бўлганларнинг 11 нафари ўқувчи, икки нафари қўриқчи ва икки нафари ўқитувчи. Ҳужумчи воқеа жойида ўз жонига қасд қилган.

Расман билдирилишича, ҳужумни мазкур мактабнинг собиқ ўқувчиси, 1988 йилда туғилган Артём Казанцев амалга оширган. Ҳужум пайтида унинг кийимида нацистик рамзлар бўлгани айтилмоқда. Айни пайтда Казанцевнинг уйида тинтув ўтказиляпти. Ҳозирча ҳужум мотивлари номаълум.

Ҳодиса муносабати билан Удмуртияда уч кун мотам тутилиши эълон қилинган.

Россияда бу ўқув юртларига қилинган ҳужумларнинг навбатдагиси бўлди. 2021 йилнинг 20 сентябрида талаба Тимур Бекмансуров Перм давлат университети кампусида ўқ отиб 6 кишини ўлдирган эди.

2021 йил майида Ильназ Галявиев Қозондаги 175-сонли гимназияда ўқотар қуролдан 9 кишини отиб ўлдирган, 24 кишини яралаган.

Коинот кемаси астероид билан тўқнашди

DART кемаси 2021 йилнинг 23 ноябрида учирилган эди.

Бу NASA ўтган йилнинг ноябрида бошлаган тажрибанинг асосий аспектларидан бири бўлди. Унга асосан Ерга хавф туғдирувчи астероидларнинг йўналишини ўзгартириш режалаштирилган.

650 килоли DART кемаси Ердан 11 миллион километр узоқликдаги диаметри 160 метр, тезлиги соатига 22 минг километр бўлган Dimorphos астероиди билан тўқнашган. Олимларнинг айтишларича, тажриба муваффақиятли якунланган. DART кемаси 2021 йилнинг ноябрида Колифорниядаги Ванденберг ҳарбий базасининг космодромидан учирилган эди.

Тажрибанинг кейинги босқичида астероиднинг бошқа йирик Didymos астероиди атрофидаги ҳаракатланиш траекторияси ўрганилади. Бир неча ой мобайнида Hubble коинот телескопи ва барча қитъалардаги ўнлаб обсерваториялар воситасида Dimorphos йўналишини Didymos орбитасига яқинлаштиришга нақадар муваффақ бўлингани ўрганилади.

Мазкур тажриба Ер билан тўқнашиш хавфи мавжуд коинот жисмлари траекториясини ўзгартириш мумкинлигини исботлашга қаратилган илк уринишдир.Тадқиқотчиларга кўра, Dimorphos Ерга хавф солган эмас. Бироқ бу каби кичкинагина астероид билан тўқнашув ҳам Ерда кўплаб одамларнинг ўлимига ва ўнлаб миллиард долларлик зарарларга сабаб бўлиши мумкин.

Олимларнинг айтишларича, яқиндагина ўтказилган тадқиқотлар динозаврлар Ер диаметри 10 километр бўлган астероид билан тўқнашгани оқибатида қирилиб кетганини кўрсатди.

Тожикистонда “Душанбе сити банк” “Мир” карталарига хизмат кўрсатишни тўхтатди

Иллюстратив сурат

Тожикистоннинг “Душанбе сити банк” 23 сентябрь куни бошланган техник носозликлар туфайли Россиянинг “Мир” тўлов тизими карталарига хизмат кўрсатишни тўхтатиб қўйган. Бу ҳақда ТАСС агентлиги банк баёнотига таянган ҳолда хабар қилди.

“Ҳозирги пайтда “Душанбе сити банк” банкоматлари ва РОS-терминалларида “Мир” тўлов тизими карталарига хизмат кўрсатилмаяпти”, дейилган банк хабарномасида.

“Коммерсант” газетаси қайдича, “Душанбе сити банк” пластик картали мижозлар сони бўйича Тожикистонда иккинчи ўринда туради.

Ўтган ҳафта якунида UZCARD умумреспублика процессинг маркази Ўзбекистонда халқаро банклар томонидан чиқарилган “Мир” карталарига хизмат кўрсатиш вақтинча тўхтатилгани ҳақида эълон қилган ҳамда буни “техник ва профилактик ишлар олиб борилаётгани” билан изоҳлаган.

Ундан ҳам аввалроқ АҚШ Молия вазирлиги огоҳлантируви манзарасида Туркия, Қозоғистон ва Вьетнамдаги бир неча банк “Мир” картасига хизмат кўрсатиш бўйича чеклов жорий этишгани хабар қилинган.

Давомини ўқинг

XS
SM
MD
LG