Линклар

Шошилинч хабар
23 май 2024, Тошкент вақти: 06:17

Ўзбекистон хабарлари

Ўзбекистон Афғонистонга электр етказиб берадиган тармоқ қурилишини жонлантиради

Ўзбекистон ва Толибон ҳукумати расмийлари Тошкентда “Сурхон-Пули - Хумри” тармоғини қуришни жонлантириш масаласини муҳокама қилгани тўғрисида "Ўзбекистон миллий электр тармоқлари" хабар берди.

Икки томон учрашуви бўлиб ўтгани тўғрисидаги хабар 30 декабрда ёйинланди. Музокараларда "Ўзбекистон миллий электр тармоқлари" ва “Da Afghanistan Brreshna Sherkat” (DABS) раҳбарлари иштирок этган.

“Сурхон-Пули - Хумри” тармоғи қурилиши якунланиши ортидан Ўзбекистон Афғонистонга сотадиган электр қуввати ҳажми ҳам кўпаяди.

201 километрли мазкур тармоқнинг 45 километри айни пайтда қуриб битказилган. Тармоқнинг барпо этилиши лойиҳа йўналишида Толибон ва Афғонистон ҳукумати ҳарбийлари ўртасида жанглар бошланиб кетгани муносабати билан 2021 йилнинг ўрталарида тўхтатиб қўйилган эди.

Осиё тараққиёт банки ва Афғонистон расмийлари 2020 йилнинг 20 октябрь куни Кобулда Ўзбекистон делегацияси иштирокида 110 млн доллар ажратишни назарда тутувчи "Сурхон-Пули-Хумри" электр узатиш линиясини қуриш лойиҳасини молиялаштириш тўғрисида битим имзолаган эди.

Ўзбекистон Афғонистонга электр қуввати етказиб берувчи энг йирик қўшни давлатдир. Шартномага асосан Ўзбекистон Афғонистонга ҳар йили 6 миллиард кВт / соатгача электр энергиясини 10 йил муддатга тўлаш шарти билан етказиб беради.

Кун янгиликлари

Раисий билан видолашувда ўзбек делегацияси ҳам иштирок этади

Эроннинг марҳум президенти Иброҳим Раисий тобутини кўтариб кетаётган фахрий қоровул вакиллари, Табриз, 2024 йил 21 майи
Эроннинг марҳум президенти Иброҳим Раисий тобутини кўтариб кетаётган фахрий қоровул вакиллари, Табриз, 2024 йил 21 майи

Эроннинг Шарқий Озарбайжон вилояти ҳудудидаги авиаҳалокатда вафот этган президент Иброҳим Раисий билан 22 май куни Теҳронда ўтказилажак видолашув маросимида Ўзбекистон делегацияси ҳам иштирок этади.

Президент матбуот котиби Шерзод Асадов маълумотига кўра, маросимда иштирок этадиган делегацияга Ўзбекистон Олий Мажлиси Қонунчилик палатаси спикери Нурдинжон Исмоилов бошчилик қилади.

Эронда жорий йилнинг 19 май куни вертолёт қулаши чоғида президент Раисий ва унинг саккиз нафар ҳамроҳининг нобуд бўлиши ортидан эълон қилинган беш кунлик мотам тадбирлари давом этмоқда.

Авиаҳалокат қурбонлари жасадлари солинган тобутлар 21 май куни Табриздан пойтахт Теҳронга олиб келинган. Чоршанба куни бу ерда марҳум Раисий ва ҳамроҳлари билан видолашув маросими ўтказилиши кўзда тутилган. Теҳрондан сўнг жасадлар шиа мазҳабидаги мусулмонлар учун муқаддас ҳисобланган Қум шаҳрига, кейин эса Раисийнинг туғилган шаҳри бўлмиш Машҳадга олиб кетилиши айтилган.

Аввалроқ Эрон вице-президенти Муҳсин Мансурий марҳум президент Иброҳим Раисий 23 май куни Машҳад шаҳрида дафн этилишини маълум қилган эди.

Ўзбекистонликлар учун Ҳаж квотаси бу йил ўзгаришсиз қолди

Иллюстратив сурат
Иллюстратив сурат

Жорий мавсумда ҳам 15 минг нафар ўзбекистонлик Ҳаж сафарига бориши мумкин. Бу ҳақда Дин ишлари бўйича қўмита ахборот хизмати раҳбари Илҳом Маърупов 21 май куни Тошкентда бўлиб ўтган брифингда маълум қилган.

Ислом Каримов ҳукмронлиги даврида ҳамда Шавкат Мирзиёев президентлигининг илк йилларида ўзбекистонликлар учун Ҳаж квотаси ўртача 5 минг 200 нафардан оширилган эмас. Мамлакатда яшовчи мусулмонлар учун Ҳаж квотасининг оширилиши бундан беш йил муқаддам бошланган.

Маърупов қайдича, ўзбекистонлик зиёратчилар учун квота 2019 йилда 7200 нафарни, 2022 йилда 12 минг нафарни, 2023 йилда эса 15 минг нафарни ташкил этган.

Аввалроқ Ўзбекистон мусулмонлари учун йиллик Ҳаж квотаси 24 мингтагача ошириш кўзда тутилгани хабар қилинган. Бунга оид келишувга Саудия Арабистони подшоҳлиги ҳаж ва умра ишлари вазири Тавфиқ бин Фавзон ар-Рабиа бошчилигидаги делегациянинг 2022 йил сентябрида президент Шавкат Мирзиёев қабулида бўлган пайтда эришилган эди.

Одатда Саудия Арабистони Ҳаж ва Умра ишлари вазирлиги бирор мамлакат учун Ҳаж квотасини “ҳар минг мусулмонга бир зиёратчи” формуласидан келиб чиққан ҳолда белгилаб келади. Ўзбекистонда, ўртача ҳисоб-китобларга кўра, 34 миллиондан зиёд мусулмон яшаши эътиборга олинса, Ислом олами учун ўтмишда кўплаб машҳур дин олимларини етиштириб берган бу мамлакатга шу кунда лозим бўлганининг ярмича ҳам квота ажратилмаётганини қайд этиш мумкин.

Маълумотларга кўра, жорий йилдаги Ҳаж мавсумида ўзбекистонлик зиёратчилар 23 майдан 7 июнгача мамлакатнинг ўнта халқаро аэропортидан Мадинаи Мунаввара шаҳрига учади. Ҳаж ибодатини адо этажак зиёратчиларни 22 июндан 12 июлга қадар ватанига қайтариш режаланган.

Кремль: Владимир Путин давлат ташрифи билан Ўзбекистонга боради

Ўзбекистон президенти матбуот хизмати фотоси
Ўзбекистон президенти матбуот хизмати фотоси

Ўзбекистонда Россия президенти томонидан амалга оширилажак давлат ташрифига ҳозирлик кўрилмоқда. Мазкур ҳозирликнинг бориши, Кремль матбуот хизматига кўра, Россия президенти Владимир Путин билан Ўзбекистон президенти Шавкат Мирзиёев ўртасида 21 май куни бўлиб ўтган телефон мулоқоти чоғида муҳокама қилинган. Кремль хабарномасида Путиннинг Ўзбекистонга сафари қайси санага белгиланганига аниқлик киритилган эмас.

Шу контекстда савдо-иқтисодий соҳаси дохил икки томонлама ҳамкорликни янада ривожлантиришнинг қатор амалий масалалари тилга олинди”, дейилган хабарномада.

Сешанба куни Мирзиёев билан Путин телефон орқали мулоқот қилганини Ўзбекистон президенти матбуот хизмати ҳам тасдиқлаган. Бироқ мазкур хабарномада икки президент орасида Путиннинг Ўзбекистонга ташрифи муҳокама қилингани мутлақо эслатилган эмас.

Унда Мирзиёев ва Путин Ўзбекистон билан Россия ўртасидаги кўп қиррали ҳамкорликни янада кенгайтириш, кенг қамровли стратегик шериклик ва иттифоқчилик муносабатларини мустаҳкамлаш масалаларини кўриб чиқишгани, олий даражадаги учрашувлар натижасида эришилган келишувлар ижросининг бориши ҳамда бўлажак икки томонлама тадбирлар режасини муҳокама қилишгани қайд этилган, холос.

Ҳаагадаги Халқаро жиноят суди 2023 йил март ойида Украина ҳудудида болаларнинг ноқонуний депортациясида айбдор кўрилган Россия президенти Владимир Путинни ҳибсга олиш учун ордер берган эди. Ўшандан бери Путин Рим статутини ратификация қилган мамлакатларга сафар қилган эмас ва бундай мамлакатлар орасида Россия учун “дўст” ўлкалар ҳам бор.

Ўзбекистон Рим статутини ратификация қилган эмас. Бу Ҳаага суди ордер чиқарганидан буён Путиннинг Ўзбекистонга илк сафари бўлади. Россия президенти Ўзбекистонга сўнгги бор 2022 йил сентябрида — ШҲТ Давлат раҳбарлари кенгаши мажлисида иштирок этиш учун келган эди.

Қозоғистон Ўзбекистон билан иттифоқчилик шартномасини имзолади

Иллюстратив сурат
Иллюстратив сурат

Қозоғистон президенти Қасим-Жомарт Тоқаев жорий йилнинг 20 май куни “Қозоғистон Республикаси ва Ўзбекистон Республикаси ўртасидаги иттифоқчилик муносабатлари тўғрисидаги шартномани ратификация қилиш тўғрисида”ги қонунни имзолаган. Бу ҳақда Қозоғистон президентининг расмий сайтида маълумот тарқатилди.

Ўзбекистон ва Қозоғистон президентлари томонидан 2022 йил 22 декабрида Тошкентда имзоланган иттифоқчилик шартномаси жорий йилнинг 25 апрель куни Қозоғистон Сенати депутатлари томонидан ратификация қилинган эди.

Шу тариқа шартномани кучга киритиш бўйича Қозоғистон томони ҳам барча юридик процедураларни бажариб бўлди.

Икки мамлакат ўртасидаги иттифоқчилик шартномасига оид қонун 2023 йил 22 ноябрида Ўзбекистон Олий Мажлиси Қонунчилик палатасида қабул қилиниб, 25 ноябрида Сенат томонидан маъқулланган, 30 ноябрь куни эса у президент Шавкат Мирзиёев томонидан имзоланган эди.

Ҳужжат Ўзбекистон билан Қозоғистон ўртасида сиёсий, савдо-иқтисодий, транзит-транспорт, энергетика, маданий-гуманитар, фуқаровий мудофаа соҳаларида ўзаро ҳамкорликни кенгайтиришга йўналтирилган бўлиб, унда халқаро майдонда ҳам ўзаро ҳамжиҳатликни мустаҳкамлаш кўзда тутилган.

Шартнома моддаларига мувофиқ, томонлар икки мамлакат парламентлари, сиёсий партиялари ва жамоатчилик ташкилотлари ўртасидаги алоқалар мустаҳкамланишига кўмаклашишади, шу билан бирга, ташқи сиёсат, мудофаа ва хавфсизлик соҳаларида, халқаро террорчилик, диний экстремизм ва айирмачилик, трансмиллий уюшган жиноятчилик, кибержиноятчилик, ноқонуний миграция, одам савдоси, ноқонуний қурол, наркотик ва психотроп моддалар савдоси дохил хавфсизлик учун янги хатар ва таҳдидларга қарши кураш масалаларида тиғиз ҳамкорлик қилишади.

Россияда қонунбузарлик содир этган ўзбекистонликларга Қозоғистонга бормаслик тавсия қилинди

Ўзбек-қозоқ чегарасидаги назорат-ўтказиш масканларидан бири (архив сурати)
Ўзбек-қозоқ чегарасидаги назорат-ўтказиш масканларидан бири (архив сурати)

Ўзбекистон Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлиги Россия ҳудудида ҳуқуқбузарлик содир этиб, ватанига қайтган ўзбекистонликларга Қозоғистонга бормасликни тавсия қилмоқда.

Агентлик Қозоғистон ва Россия ҳукуматларининг маъмурий ва жиноий ишлари бўйича қарорларни тан олиш ва ижро этишга оид икки томонлама келишувлари асосида Қозоғистон чегара ва ички ишлар тизимида янги тизим жорий этилганини эслатиб, бунинг натижасида сўнгги вақтларда Россия ҳудудида ҳуқуқбузарлик содир этган Ўзбекистон фуқароларининг Қозоғистон чегарасини кесиб ўтиш вақтида ҳибсга олиниш ҳолатлари кузатилаётганини қайд этган.

Ҳибсга олинган шахслар Россия томони мазкур ҳуқуқбузарликлар бўйича якуний қарор қабул қилгунига қадар жазони ижро этиш муассасаларида сақланмоқда”, дея огоҳлантирган агентлик Россияда қонунбузарлик содир этган ўзбекистонлик мигрантларга Қозоғистонга бормай туришни маслаҳат берган.

Аввалроқ Ўзбекистон Ташқи ишлар вазирлиги ҳам ўзбекистонликларга Қозоғистонга кириш ва чиқишда барча зарур ҳужжатларни ўзлари билан олиб юришни тавсия қилган эди.

“Ўзбекистон-Қозоғистон ёки Россия-Қозоғистон чегарасини кесиб ўтишда нафақат Қозоғистонга, балки Россия Федерациясига ҳам киришда ҳеч қандай тўсиқлар йўқлигига олдиндан ишонч ҳосил қилиш лозим, чунки Россия ва Қозоғистон ўртасидаги маъмурий ва жиноий ишлар бўйича қарорларни ўзаро тан олиш ва ижро этиш тўғрисидаги келишувларга мувофиқ Қозоғистоннинг ваколатли органлари Россия Федерациясининг миграция ва бошқа қонун ҳужжатларининг бузилиши ёки тўланмаган жарималар мавжудлиги бўйича текширув ўтказадилар”, дейилганди ТИВ мурожаатида.

Агар Россия Федерациясида бўлиш даврида қайд этилган қоидабузарлик ёки тўланмаган жарима аниқланса, вазирлик қайдича, Қозоғистон томони Ўзбекистон фуқаросининг Қозоғистонга кириши ёки чиқишини тақиқлаш тўғрисида қарор қабул қилиши мумкин.

АҚШда болалар устидан жинсий зўравонлик материалларини ташиган ўзбекистонлик 19 йилга қамалди

Иллюстратив сурат
Иллюстратив сурат

АҚШнинг Флорида штатида вояга етмаган болалар устидан жинсий зўравонликка оид материалларни ташиган ўзбекистонлик устидан ҳукм ўқилди. Бу ҳақда Флорида ўрта округи прокуратураси маълумот тарқатди.

Қайд этилишича, 2022 йил январида 39 ёшли Султон Нуриев Орландодан Тошкентга чиқиб кетган, ўша йил февралида у АҚШга қайтган. Қайтиш чоғида божхона-чегара хизмати ходими ўзбекистонликнинг телефонини текшириб, ундан болалар устидан жинсий зўравонлик тасвирларини топган.

Аниқланишича, у Ўзбекистонда ўзини 12 ёшли болакай ўлароқ кўрсатиб, интернетда вояга етмаган қизларни йўлдан уриш билан шуғулланиб келган. У қизчаларни шаҳвоний характердаги суратларни олиб, ўзига йўллашга мажбур қилган.

Хабарномада Нуриев 2023 йилнинг 26 сентябрида ўз айбига иқрор бўлгани қўшимча қилинган. Унинг АҚШга қай асосда ва қандай мақсадда борганига аниқлик киритилган эмас.

Суд ҳукмига кўра, ўзбекистонлик кейинчалик умрбод назорат остида бўлиш шарти билан 19 йилга озодликдан маҳрум қилинган.

OCCRP: Алишер Қодиров Дубайда 8 млн долларлик мулкка эга

Коррупция ва уюшган жиноятчиликни тадқиқ этиш маркази (OCCRP) экспертлари Dubai Unlocked лойиҳаси доирасида Ўзбекистон собиқ бош прокурори Рашид Қодировнинг ўғли Алишер Қодиров Дубайда умумий қиймайти қарийб 8 миллион АҚШ долларига тенг кўчмас мулкка эгалик қилишига оид ҳужжатларни қўлга киритишган.

OCCRP ҳужжатларига мувофиқ, Алишер Қодировнинг “Марина Плаза”да тўртта офиси бор. Улардан ҳар бири 1,9 миллион доллардан 2,1 миллион долларгача баҳоланган.

Ўзбекистон Ички ишлар вазирлиги 2018 йили таъмагирлик ва товламачиликда гумонланаётган Алишер Қодировга нисбатан қидирув эълон қилган эди.

Каримов даврида 15 йил давомида Ўзбекистон бош прокурори лавозимида ишлаган Рашиджон Қодиров 2018 йил 22 февралида ҳибсга олиниб, жиноят ишлари бўйича Тошкент шаҳар суди қарори билан 2019 йил 26 июнида 10 йилга озодликдан маҳрум этилганди. У порахўрлик, пора беришда воситачилик қилганлик, товламачилик, солиқ тўлашдан бош тортганлик ва жиноий даромадларни машрулаштириш каби жиноятларда айбдор деб топилган.

OCCRPнинг Dubai Unlocked лойиҳаси Дубайдаги қимматбаҳо кўчмас мулк соҳиблари тўғрисидаги маълумотларни очиқлаб келади. 70 дан ортиқ мамлакат журналистлари Дубайдаги минглаб кўчмас мулк объекти ҳақида сизган маълумотларни таҳлил қилиб чиқишган. Ҳужжатлар кўпроқ 2020 ва 2022 йиллардаги олди-сотдиларга алоқадор.

Умуман олганда, бу тадқиқот Бирлашган Араб Амирликларидаги бу йирик шаҳар қандай қилиб ҳукуматлар, давлат корпорациялари ва жиноят оламига алоқадор одамлар дохил юзлаб кишининг пул ётқизиши учун қулай жойга айланганини кўрсатиб берган.

“Тадқиқот “қаҳрамонлар”и шахсини тасдиқлатиш учун бир неча ой кетди”, дея урғулашган лойиҳа муаллифлари.

Малайзия бош вазири уч кунлик ташриф билан Ўзбекистонда бўлади

Малайзиялик сиёсатчи Анвар Иброҳим узоқ йиллар давомида мухолифат лидерлардан бири бўлиб ҳисобланган (архив сурати)
Малайзиялик сиёсатчи Анвар Иброҳим узоқ йиллар давомида мухолифат лидерлардан бири бўлиб ҳисобланган (архив сурати)

Малайзия бош вазири Анвар Иброҳим 17-19 май кунлари расмий ташриф билан Ўзбекистонга келади. Бу ҳақда маълумот тарқатган президент матбуот хизмати Анвар Иброҳим Тошкентга Шавкат Мирзиёев таклифига биноан келаётганини қайд этган.

“Ташрифнинг биринчи кунида Тошкент шаҳрида олий даражадаги тадбирлар ва музокаралар ўтказилиши режалаштирилган”, дейилган хабарномада.

Саммит кун тартибидан тизимли сиёсий мулоқотни ривожлантириш ва маданий-гуманитар алмашинувни кенгайтириш, савдо, инновациялар, энергетика, нефть-кимё, саноат, электротехника ва электроника, қишлоқ хўжалиги ва иқтисодиётнинг бошқа соҳаларида аниқ кооперация дастурлари ва лойиҳаларини илгари суриш масалалари ўрин олган.

Анвар Иброҳимнинг Самарқанд ва Бухоро шаҳарларига ҳам бориши, шунингдек, қўшма бизнес форумида иштирок этиши кутилмоқда.

Ҳаж мавсумига кейинги ҳафта якунида старт берилади — ЎМИ

Ўзбекистонда бу йилги ҳаж мавсуми 23 майдан бошланади. Бу ҳақда Ўзбекистон мусулмонлари идораси матбуот хизмати маълумот тарқатди.

Хабарномада кейинги ҳафта охиридан 7 июнга қадар Ўзбекистондан Саудия Арабистонига ҳар куни авиақатновлар амалга оширилиши айтилган

Қайд этилишича, Саудия Арабистонининг Мадинаи Мунаввара шаҳрига учадиган Uzbekistan Airways учоқлари Тошкент, Бухоро, Наманган, Фарғона, Самарқанд, Қарши, Термиз, Урганч, Нукус ва Навоий аэропортларидан парвоз қилади.

ЎМИ вакиллари “Ҳаж” ва “Умра” тадбирларини ташкил этиш ва ўтказиш бўйича Республика жамоатчилик кенгаши жорий мавсумга тайёргарлик ишларини давом эттираётгани, жумладан зиёратчиларни тиббий кўрикдан ўтказиш, эмлаш, гуруҳ раҳбарларини бириктириш, сафар олди машғулотлар ўтказиш, шифокорлар ва ошпазлар гуруҳини жалб этиш ҳамда сафар ҳужжатларини расмийлаштириш ишлари якунига етказилаётганини қўшимча қилишган.

Тўққизта вилоят аҳолиси ҳафталик сел хавфидан огоҳлантирилди

Ўзбекистоннинг Сурхондарё вилоятига келган сел оқибати (архив сурати)
Ўзбекистоннинг Сурхондарё вилоятига келган сел оқибати (архив сурати)

Жорий йилнинг 16-22 май кунлари кутилаётган кучли ёғин-сочин туфайли Ўзбекистоннинг тоғ олди ва тоғли ҳудудларида сел-сув тошқини ҳодисалари юзага келишига сабаб бўлиши мумкин. Бу ҳақда Гидрометеорология хизмати агентлиги раҳбари Шерзод Ҳабибуллаев Facebook тармоғидаги ўз саҳифаси орқали маълум қилди.

Ўзгидромет раҳбарига кўра, сел ҳодисалари мамлакатнинг 9 вилояти ҳудудида, шу жумладан Қашқадарё вилоятининг Яккабоғ, Деҳқонобод, Чироқчи, Кўкдала, Китоб, Шаҳрисабз, Қамаши, Ғузор туманларида, Сурхондарё вилоятининг Сариосиё, Узун, Олтинсой, Денов, Бойсун, Шеробод, Шўрчи, Қумқўрғон, Музробот туманларида, Самарқанд вилоятининг Ургут, Самарқанд, Булунғур, Нуробод, Қўшработ, Каттақўрғон, Пайариқ, Жомбой, Иштихон туманларида, Навоий вилоятининг Хатирчи, Навбаҳор, Нурота, Конимех, Кармана туманларида, Жиззах вилоятининг Зомин, Бахмал, Ғаллаорол, Шароф Рашидов, Фориш, Янгиобод туманларида, Тошкент вилоятининг Оҳангарон, Бўстонлиқ, Паркент, Пискент, Ўртачирчиқ, Юқоричирчиқ туманларида ва Ангрен, Олмалиқ шаҳарларида, Наманган вилоятининг Поп, Косонсой, Чортоқ, Чуст, Наманган, Янгиқўрғон туманларида, Фарғона вилоятининг Сўх, Шоҳимардон, Фарғона, Бешариқ туманларида, Андижон вилоятининг Андижон, Асака, Жалақудуқ, Қўрғонтепа, Пахтаобод, Избоскан, Хўжаобод, Марҳамат туманлари ва Хонобод шаҳрида кузатилиши эҳтимоли бор.

Хабарномада тоғолди ва тоғли ҳудудларда истиқомат қилувчи аҳолидан ҳамда бу ҳудудларда ҳаракатланувчи ҳайдовчилардан тошқин эҳтимолига қарши эҳтиёткорлик чораларини кўриш сўралган.

Бу йил баҳор мавсумида Ўзбекистоннинг жанубий вилоятлари дохил Марказий Осиё минтақасидаги мамлакатлар сел-тошқин ҳодисаларидан сезиларли зарар кўрди. Табиий офатлар оқибатида Афғонистон, Қозоғистон, Қирғизистон ва Тожикистон ҳудудларида бир неча киши қурбон бўлгани маълум.

Уруш бошидан бери Россияда болаларга қарши жинсий жиноятлар сони 6 баравар ошди

Украинада кенг кўламда босқин бошланган 2022 йил февралидан буён Россияда вояга етмаганларга қарши жинсий характердаги зўравонлик ҳаракатлари билан боғлиқ жиноятлар сони қарийб 6 баравар, болаларга нисбатан шаҳвоний ҳаракатлар сони эса 1,5 баравардан кўпроққа ошган. Бу ҳақда “Можем объяснить” Телеграм канали Россия Олий судининг расмий статистик маълумотларидан келиб чиққан ҳолда маълум қилди.

Қайд этилишича, бу жиноятларнинг каттагина қисми урушдан қайтганлар томонидан, шу жумладан “Вагнер” хусусий ҳарбий ширкати томонидан ёлланган ва жанговар ҳаракатларда иштирок этгани туфайли афв этилган собиқ маҳкумлар тарафидан содир этилган.

2022 йил 24 февралидан кейин матбуотда Россия ҳарбийлари томонидан вояга етмаганларнинг жинсий зўрлангани билан боғлиқ камида 11 та ҳолат ёритилган. “Можем объяснить” Телеграм канали бу шов-шувли ҳодисалардан камида иккитасини мисол ўлароқ келтирган: ўтган йил баҳорида урушдан қайтган ёлланма 10 яшар ўгай қизини калтаклаб, жинсий характердаги зўравонлик ҳаракатларини содир этган, собиқ вагнерчилардан яна бири эса 10 ва 12 яшар икки қизалоқни зўрлаган.

Оммавий ахборот воситаларида Украина урушидан қайтганлар томонидан содир этилган қотиллик ва зўравонлик дохил оғир жиноятлар ҳақидаги хабарлар мунтазам равишда пайдо бўлиб турибди. Бу каби юзлаб воқеа маълум. Улар туфайли юзага келган шов-шувлар Кремлни ўз назорати остидаги журналистларга бундай воқеаларни ёритмасликни тавсия қилишга мажбурлаган.

Жорий йилнинг март ойида Россия Давлат думаси ҳарбий хизмат ўташ ҳақида шартнома имзолаган шахслар унча катта бўлмаган ва ўртача оғирликдаги жиноятлар бўйича жавобгарликдан озод қилиниши кўзда тутилган қонун лойиҳасини қабул қилган. Бунгача жиноятлари учун судланган уруш қатнашчилари Россия президенти томонидан имзоланган афв фармони асосида жазодан озод қилинар эди.

UNICEF'нинг Ўзбекистондаги ваколатхонаси раҳбари алмашди

БМТ Болалар жамғармаси логоси
БМТ Болалар жамғармаси логоси

БМТ Болалар жамғармасининг (UNICEF) Ўзбекистондаги ваколатхонасига Реҳина Мария Кастижио раҳбар этиб тайинланган. Бу ҳақда ваколатхона матбуот хизмати маълумот тарқатди.

Кастижио хоним Тошкентда иш бошлашдан олдин UNICEFнинг Хорватия ва Парагвайдаги ваколатхоналарини бошқарган.

Мулозима БМТ Болалар жамғармасида 2016 йилдан фаолият юритиб келмоқда. Унгача эса Кастижио хоним Боливия, Эквадор ва Перудаги UNAIDS директори, Швейцарияда UNAIDS хусусий сектор билан ҳамкорлик бўлими раҳбари лавозимларида ишлаган ҳамда БМТ Бош котиби Кофи Аннан Ижроия аппаратида Иқтисодий ва ижтимоий масалалар бўйича масъул ходими бўлган.

АҚШдаги Ғарбий Вашингтон университетида иқтисод ва халқаро муносабатлар бўйича таҳсил олган ҳамда Нотр-Дам университетида давлат бошқаруви ва халқаро муносабатлар бўйича магистрлик даражасини олган Кастижио хоним испан, инглиз ва француз тилларида равон сўзлаша олиши айтилган.

Реҳина Мария Кастижиодан олдин UNICEFнинг Ўзбекистондаги ваколатхонаси Мунир Мамедзаде раҳбарлик қилган. Ваколатхонани 2020 йил августидан бери бошқариб келган жаноб Мамедзаде Озодликка ҳам бир неча бор интервью берган эди.

Боку қидирувда бўлган икки шахсни Тошкентга экстрадиция қилди

Озарбайжон халқаро қидирувга берилган икки кишини Ўзбекистонга экстрадиция қилган.

Озарбайжон Бош прокуратураси қайдича, жиноятчиликка қарши кураш бўйича Ўзбекистон билан ҳамкорлик доирасида бу мамлакат Бош прокуратурасининг 32 ёшли украиналик Арсен Калдарар ва 44 ёшли Абдураҳмон Қаюмовни жиноий жавобгарликка жалб қилишга оид илтимосномаси қаноатлантирилган.

Ўзбекистонда товламачилик ҳаракатларини содир этганликда айбланиб, халқаро қидирувга берилган бу икки шахс 2024 йил февралида Озарбайжонда ушланиб, ҳибсга олинган эди.

Хабарномада бу икковлон Озарбайжон Пенитенциар хизмати махсус қўриқчилари томонидан Ўзбекистоннинг салоҳиятли ташкилотлари ходимларига топширилгани айтилган.

Урганчда бешинчи қаватдан қулаган ўсмир касалхонага етказилди

Хоразм вилоятининг Урганч шаҳрида вояга етмаган боланинг 5-қаватдан қулаб тушгани ҳолати юзасидан прокуратура томонидан терговга қадар текширув ҳаракатлари олиб бориляпти. Бу ҳақда Ўзбекистон Бош прокуратураси матбуот котиби Ҳаёт Шамсутдинов маълум қилди.

Аввалроқ ижтимоий тармоқларда 2007 йилда туғилган ўсмирнинг Урганчдаги кўп қаватли уй 5-қаватидан Captiva автомобили устига қулагани акс этган видео тарқалган эди.

Шамсутдиновга кўра, касалхонага етказилган жабрланувчига айни пайтда зарур тиббий ёрдам кўрсатилмоқда.

БП мулозими Урганчда содир бўлган ҳодисанинг сабаблари аниқланаётганини қўшимча қилган.

Мирзиёев “БМТ-аёллар” тузилмаси раҳбари билан учрашди

Ўзбекистон президенти Шавкат Мирзиёев “БМТ-аёллар” тузилмаси раҳбари Сима Сами Бахус билан (president.uz фотоси)
Ўзбекистон президенти Шавкат Мирзиёев “БМТ-аёллар” тузилмаси раҳбари Сима Сами Бахус билан (president.uz фотоси)

Ўзбекистон президенти Шавкат Мирзиёев 14 май куни Бирлашган Миллатлар Ташкилоти бош котибининг ўринбосари, “БМТ-аёллар” тузилмаси ижрочи директори Сима Сами Бахус бошчилигидаги делегацияни қабул қилган.

Президент матбуот хизмати маълумотига кўра, Бахус хоним Мирзиёевга БМТ бош котиби Антониу Гутерришнинг “саломи ва энг эзгу тилаклари”ни етказган.

“БМТ-аёллар” раҳбари бошчилигидаги делегация 13-14 май кунлари Самарқанд шаҳрида бўлиб ўтган Осиё хотин-қизлар форумида иштирок этиш учун Ўзбекистонга келган.

Учрашувда Ўзбекистоннинг “БМТ-аёллар” тузилмаси билан конструктив ҳамкорлигини янада ривожлантириш масалалари кўриб чиқилган. Шунингдек,

Самарқандда ўтказилган анжуман якунлари юқори баҳоланиб, форумни Осиё минтақасида аёллар ҳуқуқларини кенгайтириш масалалари бўйича доимий мулоқот платформасига айлантириш муҳимлиги таъкидланган.

Ўзаро ҳамкорлик бўйича, шу жумладан минтақавий даражадаги аниқ лойиҳа ва дастурларни ўз ичига олган ўрта муддатли истиқболга мўлжалланган дастурни қабул қилиш зарурлиги қайд этилди”, дейилган хабарномада Шавкат Мирзиёев Ўзбекистонда “БМТ-аёллар” тузилмаси ваколатхонасини очиш масаласини қўллаб-қувватлагани қўшимча қилинган.

Ўзбекистонда аёллар ва болаларга қарши зўравонлик масаласи узоқ йиллар мобайнида долзарб муаммо бўлиб келган. Сўнгги йилларда бундай муаммо борлиги яширмай қўйилгани манзарасида мамлакат расмийлари ҳам оиладаги зўравонлик ва гендер тенглиги масалаларига алоҳида эътибор қарата бошлагани кузатилади.

Давомини ўқинг

XS
SM
MD
LG