Линклар

Шошилинч хабар
27 январ 2022, Тошкент вақти: 22:30

Ўзбекистон хабарлари

Тошкентда Марказий Осиёдаги энг йирик вакциналар сақланадиган совуқлик омбори қурилди

ЮНИСЕФ 2017 йилдан то шу кунгача Ўзбекистонга вакциналар сақланадиган 21 та омборхона қуриб берган.

БМТнинг ЮНИСЕФ жамғармаси Тошкентда Марказий Осиёдаги энг йирик вакциналар сақланадиган совуқлик омборини қурди ва фойдаланиш учун 19 ноябрда Соғлиқни сақлаш вазирлигига топширди.

Расман маълум қилинишича, мазкур омборда деярли 1000 квадрат метрдан иборат учта совуқлик камераси (2-8 ° C), ультрасовуқ совутгичлар (3000 литр ҳажмли) ва музлатгич хоналар (40 квадрат метр) мавжуд. Шу билан бирга, иншоот иммунизация учун зарур материаллар сақланадиган 1000 квадрат метрли қуруқ омборга ҳам эга.

Омборхонада юкларни тез ва самарали бошқариш учун электр юк кўтаргичлар, док навеслари, текислаш платформалари ва кўтариш механизмлари мавжуд. Улар иккита электр тармоғига уланган бўлиб, узлуксиз электр таъминоти учун кучли заҳира дизель генераторига эга.

Соғлиқни сақлаш вазирлигининг билдиришича, ЮНИСЕФ 2017 йилдан то шу кунгача Ўзбекистонга вакциналар сақланадиган 21 та омборхона қуриб берган, бундан ташқари коронавирусга қарши вакциналарни ташиш учун совутгичли юк машиналари, вакциналар учун контейнерлар ва совуқлик камераларини етказиб берди.

Кун янгиликлари

Янги йилнинг 25 кунида ис газидан 28 киши ҳалок бўлди

Ўзбекистонда 1 январдан 25 январгача ис гази билан боғлиқ 16 та ҳолатда 28 киши вафот этди ва 9 киши заҳарланди. Бу ҳақда АОКАда ўтказилган ФВВ, ИИВ, Саноат хавфсизлиги давлат қўмитаси, Техник жиҳатдан тартибга солиш агентлиги мутасаддилари иштирокидаги матбуот анжуманида қайд этилди.

Расман билдирилишича, 2021 йилда ис гази билан боғлиқ жами 74 та ҳолат аниқланган. Уларда 67 киши заҳарланган ва 128 киши ўлган.

Ўтган йили Фавқулодда вазиятлар вазирлиги 2021 йилнинг январидан 15 декабрига қадар ис газидан 125 киши ҳалок бўлгани ва 115 киши жароҳатлангани ҳақида билдирган эди.

Бу 2020 йилнинг 15 декабригача бўлган кўрсаткичдан анча кўпдир. Жумладан, 2020 йилнинг 16 декабрида ўтган йиғилишда президент Шавкат Мирзиёев бир йилда 56 та ис газидан заҳарланиш ва 106 та чақнаш ҳолати оқибатида 106 нафар фуқаро вафот этгани, 190 нафари заҳарлангани ва куйиш тан жароҳатини олганини таъкидлаган.

Энергетика вазирлиги барча ҳудудларда электр таъминоти тикланганини билдирди ва аҳолини сабр-тоқатли бўлишга чақирди

Иллюстратив сурат.

Ўзбекистоннинг барча ҳудудларида 27 январь куни соат 16:00 дан бошлаб электр энергияси таъминоти тўлиқ тиклангани тўғрисида Энергетика вазирлиги маълум қилди.

Расман билдирилишича, айни пайтда Тўрақўрғон иссиқлик электр станциясидан ташқари барча электр станцияларнинг иш фаолияти тикланди.

Вазирлик, шу билан бир қаторда, 27 январь соат 16:00 ҳолатига кўра, мамлакатда газ таъминоти ҳозирча тўлиқ тикланмаганини маълум қилди.

“Сиздан сабр-тоқатли бўлишингизни, электр энергияси узилишларини олдини олиш учун эҳтиёждан ташқари электр жиҳозларини тармоққа уламасликни сўраймиз", -дейилади вазирлик билдирувида.

Коронавирусга чалинганлар сони 218 мингдан ошди. Тўлиқ вакцина олганлар 8 миллионга яқинлашди

Соғлиқни сақлаш вазирлигининг билдиришича, 26 январда яна 1117 кишида коронавирус инфекцияси аниқланди. Бу билан 26 январь ҳолатига кўра, Ўзбекистонда коронавирус инфекцияси қайд этилганлар сони 218 минг 477 нафарни ташкил этмоқда.

Янги касалланиш ҳолатлари бўйича биринчи учликда Тошкент шаҳри (451 нафар), Фарғона вилояти (129 нафар) ва Тошкент вилояти (113 нафар ) бормоқда.

Касалликдан соғайганлар жами 208 минг 18 нафарга етди ва соғайиш кўрсаткичи 95 фоизни ташкил этмоқда.

Шунингдек, коронавирусга чалинган 2 нафар бемор вафот этиб, касалликдан вафот этганлар сони 1551 нафарни ташкил қилди.

Вазирликнинг билдиришича, жами 41 680 571 доза вакцинадан фойдаланилди. 1-босқич эмланганлар 19 236 112 нафарни, 2-босқичда эмланганлар 14 489 580 нафарни, 3-босқич эмланганлар 7 954 879 нафарни ташкил қилди.

Биринчи доза билан эмлаш кўрсаткичи эмланиши режалаштирилган қатламга нисбатан 89,7 фоизни, тўлиқ босқичларда эмланиш кўрсатчики эса 67,9 фоизни ташкил қилмоқда.

26 январь ҳолатига кўра, Ўзбекистонда 12 ёшдан 18 ёшгача бўлган 721 636 нафар бола Pfizer вакцинаси билан ихтиёрий равишда эмланди.

Тошкентда террорчиликка алоқадорлик иддаоси билан 30 чоғли киши қўлга олинди

Иллюстратив сурат

Ўзбекистон пойтахти Тошкент шаҳрида ҳуқуқ-тартибот идоралари томонидан ҳамкорликда амалга оширилган тезкор тадбир чоғида “Тавҳид ва жиҳод катибати” номли террорчилик ташкилотининг бир гуруҳ аъзоси ушланган. Бу ҳақда маълумот тарқатган Тошкент шаҳар Ички ишлар бош бошқармаси мазкур амалиёт қайси куни ўтказилганига аниқлик киритган эмас.

ИИББ вакиллари иддаосига кўра, қўлга олинган шахслар пойтахт ҳудудида жамоавий йиғинларни ўтказиб, келгусида Сурия ҳудудида фаолият юритаётган террорчилик ташкилотларининг сафига қўшилишни режалаштириб келишган.

“Аниқланган “Тавҳид ва жиҳод катибати” тарафдорларининг сони 30 нафарга яқин бўлиб, ёшлардан иборат эканлиги, уларнинг айримлари Андижон, Сурхондарё ва Қашқадарё вилоятларидан Тошкент шаҳрига ишлаш мақсадида келганликлари маълум бўлди”, дейилган хабарномада ТЖК Олий суднинг 2016 йил 26 сентябридаги қарорига асосан террористик ташкилот деб топилгани ва Ўзбекистон ҳудудида унинг фаолияти тақиқланганини эслатилган.

Тошкент шаҳар ИИББ айни пайтда мазкур ҳолат юзасидан мамлакат Жиноят кодексининг тегишли моддалари билан жиноят иши қўзғатилиб, тергов ҳаракатлари давом эттирилаётганини қўшимча қилган.

Энергетика вазирлиги аксарият ҳудудларда газ қуйиш шохобчалари ишлай бошлашини билдирди

Архив сурати

Ўзбекистонда 27 январь куни эрталабки соат 9:00 дан эътиборан шаҳарлараро йўналишлар бўйлаб, шунингдек аксарият ҳудудларда газ қуйиш шохобчалари ишлай бошлайди. Бу ҳақда Энергетика вазирлиги матбуот хизмати маълум қилди.

Вазирлик бундан Тошкент, Фарғона, Андижон ва Наманган вилоятлари бундан мустасно экани, мазкур ҳудудларда газ таъминоти иш режимини тиклаш ишлари олиб борилаётганини қўшимча қилган.

Энергетикларга кўра, 28 январдан бошлаб Ўзбекистондаги барча газ қуйиш шохобчаларининг иш фаолиятини тиклаш режаланган.

Тошкентлик блогер Фозилхўжа Орифхўжаев 7,5 йилга қамалди

Фозилхўжа Орифхўжаев

Ижтимоий тармоқларда Аброр Мухтор Алий тахаллуси остида зиддиятли чиқишлари билан танилган Аброр Абдуазимов билан Тошкентдаги “Тўхтабой” масжиди олдида бўлиб ўтган тортишув ортидан қўлга олинган блогер Фозилхўжа Орифхўжаев 7,5 йилга қамалди.

Тошкент шаҳар судлари Telegram-канали тарқатган маълумотга мувофиқ, жорий йилнинг 26 январь куни жиноят ишлари бўйича Олмазор туман судида 41 ёшли Ф. Орифхўжаев иши бўйича суд жараёни ниҳоясига етиб, ҳукм эълон қилинган.

Судья З. Нуриддинов раислигида юритилган суд ҳукмига кўра, судланувчи Ўзбекистон Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми “г” бандида назарда тутилган жиноятни содир этганликда айбдор деб топилган ва унга нисбатан 7 йил 6 ой муддатга озодликдан маҳрум этиш жазоси тайинланган.

Хабарномада ҳукмдан норози тарафлар 20 кун ичида Тошкент шаҳар судининг жиноят ишлари бўйича судлов ҳайъатига апелляция тартибида шикоят беришлари ёки прокурор томонидан протест билдирилиши мумкинлигини билдирилган.

Орифхўжаев ўтган йилнинг 26 июнь куни юзма-юз сўзлашиш учун Абдуазимов ваъз ўқиётган Тошкентдаги “Тўхтабой” масжиди олдига борган. У ерда Орифхўжаев Абдуазимовни “иккиюзламачи” деб атаган.

28 июнь куни ички ишлар ходимлари Орифхўжаевни чақиртириб, уни майда безориликда айблашиб, ҳибсга олишган ҳамда уяли телефонини тортиб олишган. Ўша куни суд блогерни 15 суткага ҳибсга олиш тўғрисида ҳукм чиқарган.

Орифхўжаев жазо муддатини ўтаётганида адвокати Сергей Майоровга COVID-19 пандемиясини баҳона қилиб, у билан учраштиришмаган.

Диний эркинликларни назорат қилувчи Forum18 халқаро ташкилоти Ф. Орифхўжаев 15 кун ҳибсда сақланган пайтда қамоқхона маъмурлари унга нисбатан шафқатсиз муносабатда бўлишгани ҳақида хабар қилган.

13 июль куни – Орифхўжаев озод этилиши керак бўлган кунда унинг адвокати С. Майоров чақирилиб, мижозига “оммавий ахборот воситалари ёки телекоммуникация воситаларидан ёки Интернетдан фойдаланган ҳолда жамоат хавфсизлиги ва жамоат тартибига таҳдид солувчи материалларни тарқатиш ёки кўрсатиш” айблови билан жиноят иши қўзғатилгани маълум қилинган.

Тошкент суди Орифхўжаевни ҳибсга олиш муддатини аввал уч ойга, кейинроқ 2021 йил 13 декабригача узайтирган.

Ўзбек расмийларининг дин бўйича сиёсати борасидаги танқидий чиқишлари билан танилган Фозилхўжа Орифхўжаев тақдири халқаро инсон ҳуқуқлари ташкилотлари томонидан диққат билан кузатиб борилмоқда. Хусусан, Human Rights Watch (HRW) ҳуқуқбонлик ташкилоти ўтган йил 9 декабрида расмийларни тошкентлик блогерга қўйилган “асоссиз” айбловларни бекор қилиш ва уни зудлик билан озод қилишга чақирган.

Халқаро ташкилотнинг шу йил 11 январида эълон қилинган ҳисоботида эса “Давлатнинг диний идораси назоратидан ташқарида ўз эътиқодига эга бўлган мусулмонлар сохта диний экстремизм билан боғлиқ жиноий айбловлар нишонига айланди. Июнь ойида полиция ҳукуматнинг очиқ танқидчиси Фозилхўжа Орифхўжаевга экстремизм билан боғлиқ айбловлар қўйди ва уни уч ойга тергов ҳибсхонасига жўнатди”, дейилган эди.

Жиноят ишлари бўйича Миробод туман суди ўтган ҳафта тошкентлик блогер Миразиз Бозоровга нисбатан 3 йил озодликни чеклаш жазоси тайинлаш ҳақида ҳукм чиқарган. Расмий маълумотларга кўра, блогер Бозоров устидан даъво аризаси ёзган тўрт шахснинг бири ҳам Аброр Абдуазимов (Аброр Мухтор Алий) бўлган.

“Ўзтрансгаз”: Газ қувуридаги зарур босимни тиклаш учун камида яна икки кун керак бўлади

Иллюстратив сурат

Ўзбекистонда газ қазиб чиқарувчи корхоналарнинг электр станцияларини зарур даражадаги газ ҳажми билан таъминлаши ва газ қувурлари тизими орқали зарур иш босимини тиклаш ишларини амалга ошириш учун камида икки кун вақт талаб этилади. Бу ҳақда 27 январга ўтар кечаси маълумот тарқатган “Ўзтрансгаз” ширкати айни пайтда жойларда компрессор станцияларини тўлиқ ишга тушириш бўйича ишлар давом этаётганини билдирди.

Ширкат изоҳига кўра, умумтизимда юзага келган носозликлар сабабли Ўзбекистондаги мавжуд газ қазиб олиш конлари ва уни қайта ишлаш заводларида технологик жараёнларнинг бузилиш ҳолатлари кузатиляпти, бу эса газ ишлаб чиқариш ҳажмининг камайишига олиб келяпти. Айни пайтда “Ўзтрансгаз” АЖ тизимидаги Компрессор станцияларининг агрегатлари фаолияти тўхтатилган.

“Ўзтрансгаз” вакиллари юзага келган фавқулодда ҳолатни тезкор равишда бартараф қилиш мақсадида фавқулодда гуруҳ ташкил қилиниб, авария-таъмир бригадалари сафарбар этилгани, энг аввало иссиқлик электр станцияларини имкон қадар тез ишга туширишда амалий ёрдам бериш ва газ транспорт тизимини фаолиятини тиклаш мазкур гуруҳнинг асосий вазифаси этиб белгиланганини қайд этганлар.

“Натижада 25-26 январь кунлари авария ҳолатида тўхтаб қолган 6 та компрессор станциясидан 5 таси тўлиқ бўлмаган ҳолатда ишга туширилди. Жорий йил 26 январь куни соат 18.00 да магистрал газ қувурлари тармоғига узатилаётган табиий газ миқдори соатига 4 839 минг куб метрни ташкил этди”, дейилган ширкат хабарномасида газ таъминотини нормал даражада тиклаш учун яна икки кун керак бўлишини урғулаган.

Аввалроқ Ўзбекистондаги манбалар Озодликка табиий газга уланган аксар ҳудудларда босим жуда пастлаб кетгани, кўп қаватли уйлар ҳануз нормал даражада исимагани, ичимлик суви таъминотида ҳам муаммолар юзага келаётгани ҳақида маълум қилишган.

Бу орада Энергетика вазирлиги Ўзбекистоннинг айрим ҳудудларида 27 январь куни ҳам энерготизимдаги йирик авария оқибатларини бартараф этиш ишлари давом эттирилишини билдирган.

Мирзиёев “Марказий Осиё - Ҳиндистон” онлайн саммитида иштирок этади

Ўзбекистон президенти Шавкат Мирзиёев 27 январь куни илк бор ўтказиладиган “Ҳиндистон – Марказий Осиё” онлайн саммити ишида қатнашади.

Президент матбуот хизмати маълумотига кўра, тадбир Ҳиндистон бош вазири Нарендра Моди ташаббуси билан ташкил этилмоқда. Унда Марказий Осиё мамлакатлари билан Ҳиндистон ўртасидаги “кўп томонлама муносабатларни янада кенгайтириш, минтақавий боғлиқликни кучайтириш ҳамда минтақада барқарорлик ва изчил тараққиётни таъминлаш масалалари кўриб чиқилади”.

Саммит кун тартибидан савдо, саноат кооперацияси, “яшил” иқтисодиёт, инновациялар ва рақамли технологиялар, транспорт ва логистика, маданий-гуманитар алмашинув соҳаларида амалий ҳамкорликни илгари суриш каби масалалар ҳам ўрин олган.

Тадбир якунида ҳамкорликни мустаҳкамлашга қаратилган Деҳли декларацияси қабул қилиниши айтилмоқда.

Ўзбекистон, Қозоғистон ва Қирғизистонда кузатилган блэкаутнинг илк куни Ш. Мирзиёев “Марказий Осиё давлатлари - Хитой” онлайн саммитида иштирок этган эди. Анжуманда ХХР раиси Си Цзиньпин Хитой яқин 3 йил ичида минтақа давлатларига ижтимоий лойиҳалар учун 500 миллион доллар миқдорида беғараз ёрдам ажратишини эълон қилган.

Президент блэкаутдан “саросимага тушмаган сабр- тоқатли” халққа миннатдорчилик билдирди

Президент Шавкат Мирзиёев 26 январь куни ўтган видеоселекторда Ўзбекистон тарихида илк маротаба юз берган йирик энергетик инқироздан саросимага тушмагани учун Ўзбекистон халқига миннатдорчилик билдирди.

“Бундай ҳолатда халқимиз вазиятни тўғри қабул қилиб, саросимага тушмади. Фурсатдан фойдаланиб, аввало сабр-тоқатли халқимизга, шунингдек, ушбу вазиятни бартараф этишда жонбозлик кўрсатган барча соҳа ва идоралар ходимларига, шунингдек, оммавий ахборот воситалари ва ижтимоий тармоқ вакилларига ўз миннатдорчилигимни билдираман”,-деб иқтибос келтирди президент сўзларидан “Кун уз”.

“Газета уз”нинг ёзишича, видеоселектор давомида президент “бу авариядан ўша заҳотиёқ хабар топиб, дарҳол ҳукумат комиссиясини тузишга топшириқ берганини, комиссия, тармоқ ва ҳудуд раҳбарлари билан доимий мулоқотда бўлганини, авария ҳамда унинг иқтисодиёт ва аҳоли ҳаётига салбий таъсирини бартараф этиш бўйича ишларни, шахсан назоратига олгани”ни билдирган.

“Дарё уз” эса президент айни пайтда блэкаут оқибатлари босқичма-босқич бартараф этилаётганини айтгани тўғрисида хабар берди.

“Бу ҳодисадан тўғри хулоса қилиб, биз Ўзбекистон тараққиётини давримизнинг глобал муаммолари билан янада боғлиқ ҳолда кўришимиз керак. Бу борадаги мавжуд таҳдид ва муаммоларни бартараф этишга доимо тайёр туришимиз керак”,-деб иқтибос келтирди президент сўзларидан нашр.

Ўзбек драматургиясининг таниқли вакили Шароф Бошбеков вафот этди

Шароф Бошбеков "Тақдир эшиги", "Темир хотин", "Юзсиз" каби асарлари билан халқ орасида танилган.

Ўзбекистонда хизмат кўрсатган маданият ходими, “Меҳнат шуҳрати”ордени соҳиби, таниқли драматург, Ёзувчилар уюшмаси аъзоси Шароф Бошбеков 26 январь куни 71 ёшида оламдан ўтди. Бу ҳақда Ўзбекистон Ёзувчилар уюшмаси расман маълум қилди.

1951 йил 4 январда Самарқанд вилояти Булунғур тумани Ғубир қишлоғида туғилган Шароф Бошбеков 1974 йили Тошкент театр ва рассомчилик санъати институтини тамомлаган.

Муқимий номидаги давлат мусиқали театри, Сирдарё вилояти мусиқали драма театрида фаолият кўрсатган. Шундан сўнг Ўзбекистон Ёзувчилар уюшмаси (1983-1985), Ўзбекистон Миллий давлат академик драма театрида (1986-1987) адабий ходим бўлиб хизмат қилди.

Шароф Бошбеков “Тақдир эшиги” номли илк драматик асарини 1980 йилда ёзди. Шундан сўнг унинг “Тикансиз типратиканлар”, “Мусиқа сайёраси”, “Тентак фаришталар”, “Тушов узган тулпорлар” (1983) драмаси, “Эшик қоққан ким?” (1987), “Эски шаҳар гаврошлари” (1998), “Темир хотин” (1989) каби жиддий комедиялари ўзбек драматургияси хазинасини бойитди.

Шароф Бошбеков сценарийси асосида “Маъруф ва Шариф”, “Юзсиз” (1993), “Тилла бола” (1994) каби фильмлар яратилди. У “Масхарабоз” (1996), “Фарҳод ва Ширин” фильмларида ҳам сценарий муаллифи, ҳам режиссёр сифатида иштирок этди. Унинг сценарийси асосида “Чархпалак” телесериали суратга олинган.

Бундан ташқари, “Тентак фаришталар” (1995), “Зўрдан зўр чиқса” (1996) каби саҳна асарлари ҳам республика театрларида муваффақиятли намойиш этилди.

Адиб драма ва киноқиссалардан иборат “Танланган асралар” китоби учун 2021 йили Ўзбекистон Ёзувчилар уюшмасининг “Йилнинг энг яхши асари” танлови ғолиби бўлди.

Шароф Бошбеков 1996 йили “Ўзбекистонда хизмат кўрсатган маданият ходими” фахрий унвони, 2001 йили “Меҳнат шуҳрати” ордени билан тақдирланган.

Тошкентда газ босими тикланиши ваъда қилинмоқда. Самарқанд ва Наманганда автобуслар тўхтади

Энергетика вазирлиги ижтимоий тармоқларда “пойтахтда газ таъминоти тўхтатилади” мазмунида тарқалаётган хабарлар асоссиз эканини билдирди.

“Тошкент шаҳри газ билан таъминланган, бироқ бугун, 26 январь куни соат 14:00 дан 17:00 га қадар газ босимининг бироз пасайиши кузатилиши мумкин”,-дейилади расмий билдирувда.

Вазирлик пойтахтда газ босимининг пасайишига йўл қўймаслик бўйича барча чоралар “тезкорлик билан амалга оширилаётгани”ни ва соат 17:00 дан кейин газ босими нормал ҳолатда истеъмолчиларга етказилишини маълум қилди.

Айни пайтда Самарқанд ва Наманганда газ заправкалари ишламаётгани ортидан 26 январь куни шаҳар, шаҳар атрофи ва шаҳарлараро йўналишларда хизмат кўрсатувчи автобус йўналишларида транспорт воситалари сони кескин даражада камайиб кетгани ҳақда “Кун уз” хабар берди.

Ўзбекистонда 25 январь куни юз берган блэкаут оқибатида Энергетика вазирлиги автомобилларга газ тўлдириш компрессор станциялари фаолиятига “вақтинчалик чекловлар киритган” эди.

Умрага авиарейслар 1 февралдан бошлаб ҳар куни амалга оширилади

Ўзбекистон мусулмонлари идораси 1 февралдан бошлаб Умра сафарига ҳар куни биттадан авиарейс амалга оширилишини маълум қилди.

Расман билдирилишича, 10 февралдан бошлаб Саудия Арабистонига рейслар сони кунига 2тага етказилади. Рамазон ойи давомида эса ҳар куни 3 тадан авиақатнов йўлга қўйилади.

16 январь куни Ўзбекистон мусулмонлари идораси Тошкентдан Саудияга 22, 25 ва 28 январь кунлари авиарейслар йўлга қўйилгани тўғрисида хабар берганди.

“Жорий умра мавсумида биринчи навбатда пандемиядан олдин, яъни 2020 йил февраль ойи охирига қадар умра зиёрати учун тўловларни амалга ошириб, сафарга бора олмаган фуқаролар юборилади”,-дейилади хабарда.

2020 йил февраль ойига қадар умра зиёрати учун охирги белгиланган тўловларни амалга оширганлар қўшимча равишда 4 миллион 770 минг сўм тўлашлари лозим бўлади.

Умрага борувчилар коронавирусга қарши Astra-Zeneca, Moderna, Pfizer ёки Jonson & Jonson вакциналари билан тўлиқ эмланиб, сертификатга эга бўлиши лозим.

Ўзбекистонда икки кунлик пастлашдан сўнг коронавирусга чалинганлар сони яна кўпайди

Кетма-кет икки кунлик пасайишдан сўнг Ўзбекистонда коронавирусга чалинганлар сони яна кўпайди. 25 январь куни Ўзбекистонда 1174 кишишида коронавирус инфекцияси аниқланди. 24 январь куни 1296, 25 январь куни 1123 кишида коронавирус аниқлангани тўғрисида билдирилган эди.

Соғлиқни сақлаш вазирлиги янги касалланиш ҳолатларининг 482 нафари Тошкент шаҳрида, 139 нафари Тошкент вилоятида ва 133 нафари Фарғона вилоятида қайд этилганини билдирди.

Касалликдан соғайганлар жами 206727 нафарга етди ва соғайиш кўрсаткичи 95 фоизни ташкил этмоқда.

Шунингдек, коронавирусга чалинган 4 нафар бемор вафот этди. Бу билан вирусдан ўлганлар сони 1549 кишига етди. Қолаверса, кеча 114 нафар кишида пневмония аниқланди.

Энергетика вазирлиги: Электр таъминоти 70 фоизга тикланди, заправкаларда чеклов жорий этилади

Ўзбекистон бўйлаб электр энергияси таъминоти, 26 январь соат 09:30 ҳолатига кўра, 70 фоизга тикланган. Бу ҳақда Энергетика вазирлиги матбуот котиби Элмира Бекмуродова бугун АОКАда ўтказилган брифингда маълум қилди.

Мулозима сешанба куни мамлакат электр тизимида юзага келган носозликлар туфайли газ ишлаб чиқариш ҳажми камайганини қайд этиб, ишлаб чиқарилаётган табиий газ тўлиқ ҳажмда ИЭС, ижтимоий соҳа объектлари ва аҳолига йўналтирилишини билдирган.

“Шу муносабат билан бугундан бошлаб автомобилларга газ тўлдириш компрессор станциялари фаолиятига вақтинчалик чекловлар киритилади”, деган Э. Бекмуродова.

Мулозима ижтимоий аҳамиятга эга бўлмаган юридик истеъмолчиларга ҳам табиий газ етказиб бериш вақтинча тўхтатилишини қўшимча қилган.

Вазирлик: Қозонхоналардан қарийб 90 фоизи ишга тушди, етти ҳудудга ичимлик суви тўлиқ етказиляпти

Уй-жой коммунал хизмат кўрсатиш вазирлиги 26 январь соат 09:30 га келиб ўз тизимига кирувчи 500 та қозонхонадан 444 таси ўз иш фаолиятини қайта тиклагани ҳақида маълумот тарқатди.

Вазирлик сешанба оқшомида Тошкент шаҳридаги марказий иситиш қозонхоналари 3-4 соат оралиғида тўлиқ иш режимига ўтиши ва кўп қаватли уйлардаги хонадонлар исий бошлашини ваъда қилган эди.

Шунингдек, кеча пойтахтда ичимлик суви таъминоти 6 соат ичида тўлиқ тикланиши айтилган эди.

Вазирлик қайдича, айни пайтгача Қорақалпоғистон Республикаси, Бухоро, Навоий, Наманган, Самарқанд, Хоразм вилоятлари ҳамда Тошкент шаҳрида аҳолига ичимлик суви етказиб бериш 100 фоизга тикланган.

Давомини ўқинг

XS
SM
MD
LG