Линклар

Шошилинч хабар
08 декабр 2021, Тошкент вақти: 02:33

Халқаро хабарлар

Европа Кенгаши Москвани “Мемориал” ташкилотини тугатишни тўхтатишга чақирди

Европа Кенгашининг инсон ҳуқуқлари бўйича комиссияси раиси Дуня Миятович

Европа Кенгаши Россия расмийларини “Мемориал”ни тугатиш фаолиятини тўхтатишга ва биринчи навбатда “хорижий агентлар” тўғрисидаги қонунни бекор қилишга чақирмоқда. Бу ҳақда Европа Кенгашининг инсон ҳуқуқлари бўйича комиссияси раиси Дуня Миятович баёнотида сўз борган.

Россия расмийларининг “Халқаро Мемориал” ноҳукумат ташкилоти ва “Мемориал” ҳуқуқбонлик марказини тугатишга қаратилган хатти-ҳаракатлари Европа Кенгашини қаттиқ ташвишга солмоқда. “Мемориал” – “постсовет ҳудуд ва унинг хорижида эрк, демократия ва инсон ҳақлари учун тинимсиз кураш рамзидир”. Ташкилотнинг йўқ қилиниши Россияда фуқаролик жамияти ва инсон ҳуқуқлари ҳимояси учун анчагина салбий оқибатларга олиб келади, дея урғулаган Миятович.

У Россиядаги “хорижий агентлар”га оид қонун халқаро европача мезонларга уйғун эмаслиги учун Европа Кенгаши томонидан бир неча бор танқид қилинганига эътибор қаратди. Мазкур қонуннинг ҳуқуқбонлик ташкилотини тугатишда қўлланиши, Миятовичга кўра, фуқаролик жамиятига қарши репрессиянинг яна бир намунасидир.

Европа Кенгаши вакили фикрича, “Мемориал” сиёсий маҳкумларни дастаклагани учун экстремизм ва терроризмни оқлашда айбланаётгани айниқса чуқур хавотир уйғотмоқда.

Ўтган ҳафтада Россия Бош прокуратураси “Халқаро Мемориал” ҳуқуқбонлик ташкилотини тугатиш талаби билан Олий судга, Москва прокуратураси эса “Мемориал” инсон ҳақлари марказини тугатиш ҳақидаги даъво аризаси билан шаҳар судига мурожаат қилган. Ташкилот “хорижий агентлар”га доир қонунчиликни бузганликда айбланмоқда.

“Мемориал” вакиллари ташкилотни йўқ қилиш ҳаракатлари сиёсий қарор эканини таъкидлашмоқда.

Кун янгиликлари

Қирғизистон: МСК парламент сайловининг якуний натижаларини эълон қилди

Бишкекдаги участка сайлов комиссияларидан бирининг вакиллари, 2021 йил 28 ноябри

Қирғизистон Марказий сайлов комиссияси ахборот-сайлов тизимида (АСТ) 7 декабрь куни овозларни қўлда санаш якуний натижалари эълон қилинди.

Сайлов варақалари 100 фоиз санаб бўлинганидан сўнг 5 фоизлик сайлов тўсиғидан олти партия ўтган, булар “Ата-Журт Қирғизстан” (17,3%), “Ишеним” (13,63%), “Интимақ” (10,99%), “Альянс” (8,34%), “Бутун Қирғизстан” (7,04%) ҳамда “Ийман Нуру” (6,15%) партияларидир.

Ўттиз олтита бир мандатли округдан 34 нафар номзод сайланган. Икки сайлов участкасида “барча номзодларга қарши” овозлар устунлик қилган, эндиликда ушбу участкаларда қайта сайлов ўтказилади.

Қирғизистонда парламент сайлови шу йилнинг 28 ноябрь куни бўлиб ўтган. Унда сайловчилар нафақат партияларга, балки унинг рўйхатидаги муайян номзодга ҳам овоз бериши мумкин бўлган. Жўғўрқу Кенешнинг 90 бўлғуси депутатидан 54 нафари шу тариқа сайланган, қолган 36 депутат мамлакатнинг бир мандатли округларини тамсил этади.

Мухолифат партиялари овоз бериш натижалари сохталаштирилганини таъкидламоқда. Сайлов куни овозларни автомат тартибда санаш тизимида носозлик чиқиши, сайт қайта ишга тушганидан сўнг эса мухолифат партиялар тўплаган овозлар сони кескин камайиб қолиши сайловнинг холислигини шубҳа остида қолдирмоқда.

Нью-Йоркдаги сайловда АҚШ фуқароси бўлмаганлар ҳам овоз бериш ҳуқуқига эга бўлиши мумкин

Нью-Йорк шаҳри манзараси

АҚШ фуқароси бўлмаган Нью-Йорк турғунлари маҳаллий сайловда овоз бериш ҳуқуқига эга бўлиши мумкин. Бунга оид қонун лойиҳасини шаҳар кенгаши ва мэрия дастаклашга чоғланмоқда.

Мазкур ҳужжат қабул қилинган тақдирда, мэр, шаҳар кенгаши аъзолари ва бошқа мансабдор шахсларни сайлашда Америка фуқароси бўлмаган 800 мингга яқин одам иштирок этиш ҳуқуқига эга бўлади. Айни пайтда фуқаро бўлмаган шахслар аввалгидек президент ёки Конгресс аъзолари сайловида, шунингдек, штат губернатори, депутатлари ва судьяларини сайлашда иштирок эта олмаслиги айтилмоқда.

Қонун лойиҳаси шаҳар кенгашида кенг кўламли қўлловга эга бўлган. Нью-Йорк мэри Билл де Блазио унга вето қўймаслигини билдирган.

Сўнгги маълумотларга кўра, Нью-Йоркда агломерациялар аҳолисини ҳисобга олмаганда жами 9 миллионга яқин одам яшайди. Улардан 7 миллиони овоз бериш ҳуқуқига эга.

АҚШ Пекиндаги Олимпия ўйинларига дипломатик бойкот эълон қилди

АҚШ Хитойдаги Олимпия ўйинларига дипломатик бойкот эълон қилади. Бу ҳақда Оқ уй матбуот котиби Жен Псаки билдирди. Мулозима, бойкотга қарамай, америкалик спортчилар Олимпиадада иштирок этишлари мумкинлигини қўшимча қилди.

“ХХР томонидан Шинжонда геноцид ўтказилаётгани ва бошқа инсон ҳақлари бузилаётганини эътиборга олган ҳолда, Байден маъмурияти 2022 йилдаги Пекин қишки Олимпиадаси ва Паралимпиадасига дипломатик ёки расмий делегацияни жўнатмайди”, деган Жен Псаки брифингда.

Аввалроқ Хитойдаги Олимпиадага дипломатик бойкот эълон қилиниши эҳтимоли ҳақида АҚШ президенти Жо Байден гапирган эди. У Шинжонда уйғурларга босим ўтказилаётгани, Тибет ва Ҳонконгда инсон ҳақлари бузилаётганини бунга сабаб ўлароқ келтирган.

АҚШ ташаббусини Австралия дастаклаб чиққан, бироқ бу мамлакат Олимпиадага дипломатик бойкот эълон қилиш қарорини олган эмас.

Пекиндаги Олимпиада 2022 йилнинг 4 февралидан 20 февралигача бўлиб ўтиши режаланган. АҚШ сўнгги бор Олимпия ўйинларига 1980 йили (Москвада ўтказилган) тўла бойкот эълон қилган эди.

Озодликнинг беларус хизмати мухбири 10 суткалик қамоқдан сўнг озод этилмади

Андрей Кузнечик

Озодлик радиоси беларус хизмати жамоатчи мухбири Андрей Кузнечикнинг яқинлари журналистнинг 10 суткалик маъмурий қамоқдан сўнг озод этилмаганини маълум қилишди. Бу ҳақда “Настояшчее время” телеканали хабар қилди.

Кузнечикнинг қамоқ муддати 5 декабрь куни тугаган, аммо у ҳанузгача ҳибсда қолмоқда. Яқинларига кўра, унинг устидан янги маъмурий иш очилган.

Кузнечик билан алоқа 25 ноябрда узилган, тез орада унинг қўлга олингани маълум бўлган. Журналистнинг квартирасида тинтув ўтказилиб, телефони ва компьютери олиб қўйилган. Ҳукуматга оид телеграм-каналлар маълумотига кўра, 26 ноябрь куни Минск суди уни “майда безорилик”да айбдор деб топиб, 10 суткага қамаган. Кузнечик айблонни тан олган эмас.

2020 йил июнида Минскда Озодлик беларус хизматининг штатдан ташқари маслаҳатчиси, блогер Игорь Лосик ҳибсга олинган эди. У ўшандан бери панжара ортида қолмоқда.

Лосик “ҳокимият ва ҳуқуқ-тартибот идоралари вакилларига нисбатан” ижтимоий адоват қўзғатганликда айбланяпти. Блогер 12 йилгача озодликдан маҳрум этилиши мумкин.

2021 йил июнида Минскда кучишлатар ходимлар Озодлик радиоси беларус хизмати офисини алғов-далғов қилишган. Ўшанда бир неча журналист ҳибсга олиниб, шаҳардан чиқиб кетмаслик шарти билан қўйиб юборилган. 3 декабрь куни Беларусь суди Озодлик беларус хизматининг ижтимоий тармоқлардаги саҳифаларини “экстремистик” деб топган.

Бугунги кунда мамлакатда ўттизга яқин журналист ва блогер ҳибсда сақланмоқда, ўнлаб ОАВ ходими хорижга чиқиб кетишга мажбур бўлган.

Германияда уч партия коалиция тузишга эришди, янги канцлер 8 декабрда сайланади

Немис сиёсатчиси Олаф Шольц Германиянинг янги канцлери этиб сайланиши кутилмоқда

Германияда “Иттифоқ-90/Яшиллар” партияси Эркин демократик партия ҳамда социал-демократлар билан коалицион битимни маъқуллади. Аввалроқ эркин демократлар ва социал-демократлар коалицияга розилик беришган эди. Шу тариқа битим тез орада имзоланади.

8 декабрь куни Бундестаг социал-демократ Олаф Шольцни янги канцлер этиб сайлаши кутилмоқда. Катта эҳтимол билан, янги ҳукуматга тўққиз эркак ва саккиз аёл киради. Ташқи ишлар вазири лавозимига “Яшиллар” вакиласи Анналена Бербок тайинланади, дея хабар қилган dpa агентлиги.

Бундестагга сайлов сентябрь ойи охирида бўлиб ўтган. Собиқ канцлер Ангела Меркель мансуб Христиан-демократлар блоки парламентда 48 та ўринни йўқотган. Социал-демократлар сайловгача банд қилиб турганидан 53 та кўп депутатлик ўрнига эга бўлганлар.

Германияда сайлов илк бор Меркелсиз ўтган. Сайловдан олдин у канцлер лавозимига талабгор бўлмаслигини айтган эди. 3 декабрь куни Берлинда Меркелнинг канцлерликдан кетиши муносабати билан тантанали маросим ўтказилган. У расман 8 декабрь куни истеъфога чиқади.

Европа суди Польшага ўтиб олган мигрантларни Беларусга қайтаришни тақиқлади

Беларусь-Польша чегарасида лагерь қуриб олган мигрантлар

Инсон ҳуқуқлари бўйича Европа суди (ИҲЕС) Польшага кириб олган мигрантларни Беларусь ҳудудига қайтариб юборишни тақиқлаб қўйди – бу ҳақдаги қарор суд сайтида эълон қилинган.

2021 йил 20 августидан 3 декабрига қадар ИҲЕС жами 198 нафар арзгўйнинг Евроиттифоқ ҳудудида хавфсиз бўлишини таъминлаш сўралган 47 та илтимосномасини кўриб чиққан.

Энг кўп шикоят Польша ҳукумати устидан берилган (44 та), яна иккита ҳолатда – Латвияга ва битта ҳолатда Литвага қарши даъво қўзғатилган.

“Аксар мурожаатларда ариза берувчилар Польша ҳудудида эканларини билдириб, уларни Беларусга қайтариб юбормасликни илтимос қилишган. Суд 39-қоидани қўллаб, ариза берувчилар, агар улар ростдан ҳам Польша ҳудудида бўлса, ушбу мамлакатдан чиқариб юборилмаслиги кераклиги ҳақида қарор чиқарди”, дейилган суд қарорида.

ИҲЕС, шунингдек, Варшавадан Беларусь-Польша чегарасида турган 32 нафар афғонистонлик ёнига адвокатларни ўтказишни сўраган. Айрим ҳолларда Страсбург мигрантларни овқат, сув, кийим-кечак, тиббий ёрдам ёки вақтинча бошпана билан таъминлашни талаб қилган.

Беларусь-Польша чегарасида юзага келган миграция инқирози декабрь ойига келиб бирмунча юмшаган. Хусусан, мингга яқин ироқлик мигрант юртига қайтарилгани айтилмоқда.

ЕИ мамлакатлари миграция инқирози вужудга келишида Лукашенко режимини айблайди. 2 декабрь куни Евроиттифоқ Беларусга қарши бешинчи санкциялар туркумини жорий этган. Бу каби чеклов чораларини Минскка нисбатан АҚШ Молия вазирлиги ҳам қўллаган.

ЖССТ: “Омикрон” штаммини юқтирганлар орасида ўлим қайд этилганича йўқ

Иллюстратив сурат

Дунёда коронавируснинг янги “Омикрон” штамми юқиши ҳали бирон ҳолатда инсон ўлимига сабаб бўлмаган. Бу ҳақда Жаҳон соғлиқни сақлаш ташкилоти (ЖССТ) маълум қилди.

Аввалроқ ЖССТ эксперти Мария ван Керкҳове CBS телеканалига берган интервьюсида ҳозирча “Омикрон” штаммига чалингарларда касаллик бирмунча енгил кечаётганини айтган. Бироқ тиббиётчи ва олимлар янги штамм тарқалиши энди бошланганини айтиб, жамоатчиликни огоҳликка чақиришмоқда.

ЖССТнинг соғлиқни сақлаш соҳасидаги фавқулодда вазиятлар дастури директори Майкл Райанга кўра, “Омикрон” нақадар юқумлилиги ва қанчалик оғир асоратларга олиб келиши мумкинлигини аниқлаш учун уни яна бир неча ҳафта ўрганиш керак бўлади.

Айни пайтда янги штамм 30 дан ортиқ мамлакатда қайд этилган. Европа касалликлар профилактикаси ва назорати маркази келгуси ойлардан эътиборан қитъада коронавирус юқтирган беморларнинг тахминан ярмини айнан “Омикрон” штаммига чалинганлар ташкил этишини башорат қилмоқда.

Кўплаб мамлакатларда вирус кириб келиши ва тарқалишининг олдини олиш мақсадида турли чекловлар жорий этилган.

“Омикрон” штамми ноябрь ойи бошида Африка жанубида аниқланган. ЖССТ маълумотига кўра, вируснинг ушбу варианти мутациялари сони аввал аниқланган барча штаммларникидан кўп – 32 та. Бу ўзгаришлар “Омикрон”нинг юқумлилигини ва инсон ҳужайраларига кириб олиш имкониятларини оширади.

Мьянма мухолифати етакчиси тўрт йилга озодликдан маҳрум этилди

Аун Сан Су Чжи

Мьянма суди мамлакатнинг собиқ давлат маслаҳатчиси ва Нобель мукофоти совриндори Аун Сан Су Чжини тўрт йиллик қамоқ жазосига ҳукм қилди. У иғвогарликда ва коронавирус пандемияси шароитида санитария чекловларини бузганликда айбдор, деб топилди.

Бу қишда хунта иқтидорга келганидан бери Аун Сан Су Чжига нисбатан чиқарилган биринчи ҳукмдир. Собиқ маслаҳатчи яна бир неча жиноятда айбланмоқда. Унга тайинланадиган умумий қамоқ муддати 100 йилдан ортиқ бўлиши мумкин. Мьянма собиқ давлат маслаҳатчисининг адвокатлари барча айбловларни инкор этишмоқда.

Аун Сан Су Чжи 76 ёшда. У 2016 йилда давлат маслаҳатчиси лавозимини эгаллаган ва амалда Мьянма ҳукуматига раҳбарлик қилган.

Жорий йилнинг 1 февраль куни ҳарбийлар Аун Сан Су Чжи ҳукуматини ағдариб ташлаган. Хунта раҳбарияти у бошчилик қилган “Миллий лига демократия тарафдори” партиясининг ўтган йил ноябрь ойида бўлиб ўтган сайловдаги ишончли ғалабасини “ялпи сохталаштириш натижаси” дея изоҳлаган. Июль ойи охирида сайлов натижалари бекор қилинган.

Аун Сан Су Чжи беш йил муқаддам Мьянма ҳукумати мамлакатни қисман демократлаштириш томон қадам қўйишида муҳим роль ўйнаган.

Amnesty International халқаро инсон ҳақлари ташкилоти 6 декабрдаги баёнотида Аун Сан Су Чжи устидан чиқарилган ҳукмни қоралаган.

Қозоғистон Мудофаа вазирлиги норозиликни бостиришда қўлланиладиган махсус воситалар билан таъминланмоқда

Қозоғистон Мудофаа вазирлиги қуролли кучлар томонидан қўлланаётган махсус воситалар рўйхатини тасдиқлашга оид буйруқ лойиҳасини ишлаб чиқди.

Ўн беш банддан иборат махсус воситалар рўйхати “Электрон ҳукумат” порталида эълон қилинган бўлиб, улар одатда оммавий норозилик ва кўчадаги тартибсизликларни бостиришда фойдаланишга мўлжалланган. Хусусан, рўйхатда зарбани қайтарувчи қалқон, металл қўлкишан, кўзни ёшлантирувчи газ баллончаси, махсус таёқ, кўтариб-тушириладиган пардали ва ичига алоқа қурилмаси ўрнатилган дубулға, зирҳли нимчалар, ёруғлик-шовқин гранаталари ва бошқа воситалар номлари келтирилган.

Мудофаа вазирлиги хабарномасига кўра, ҳужжатда “ҳарбий хизматчилар иштирокидаги турли тадбирларда ҳуқуқ-тартиботни таъминлаш учун жалб этиладиган ҳарбий полиция аслаҳалари рўйхати” белгиланган. Вазирлик бу ерда гап “ҳарбий парадлар, халқаро кўргазмалар, машқлар ва бошқа тадбирлар” ҳақида эканини иддао қилмоқда.

“Мен ушбу норматив-ҳуқуқий ҳужжатга қаршиман! Электрошок қурилмаси, транспорт воситаларини мажбуран тўхтатувчи қурилма? Армия ташқи душманга қарши курашиши керак, халққа қарши эмас! Бу қанақа расвогарчилик!” деб фикр билдирган лойиҳа остидаги изоҳида Марина Серебренникова исмли фойдаланувчи.

Қозоғистон конституцияси сўз эркинлигини ва тинч йиғилишлар ўтказиш ҳуқуқини кафолатлайди, аммо мамлакат Жиноят кодексидаги “жамоат тартибини сақлаш”га қаратилган моддалар ушбу ҳуқуқларни чеклайди. Экспертлар конституция билан Жиноят кодексидаги номувофиқликларни бартараф этиш ва ижтимоий ҳаётдаги бошқа чекловларни олиб ташлаш учун ислоҳотлар зарурлигини таъкидлайдилар.

Россиянинг Рязань вилоятида ўзбекистонлик икки болакай чўкиб кетди

Иллюстратив сурат

Россиянинг Рязань вилояти Рязянь туманидаги Дедюхино қишлоғида 4 ва 7 ёшли ака-ука чўкиб кетди. Бу ҳақда Россия Тергов қўмитасининг минтақавий бошқармаси матбуот хизмати маълумот тарқатди.

Асли ўзбекистонлик бўлган ва қаровсиз қолдирилган бу болакайлар шу йилнинг 3 декабрида қишлоқдаги устини муз қоплаган сунъий сув ҳавзасига чиққанлар, муз ёрилиши оқибатида ҳовузга тушиб, чўкиб кетганлар.

Воқеа жойида маҳаллий тергов бошқармаси ходимлари дастлабки тергов ҳаракатларини ўтказганлар, зарур экспертиза чораларини тайинлаганлар. Болаларнинг отаси фарзандларининг жасади Ўзбекистонга олиб кетилиб, ўша ерда дафн этилишини айтган.

Трампга қарашли ширкат янги ижтимоий тармоқни яратишга 1 млрд доллар сармоя жалб қилганини очиқлади

Дональд Трамп

Дональд Трампга қарашли “Trump Media & Technology Group” (TMTG) ширкати инвесторлардан “Truth Social” номли янги ижтимоий тармоқни яратишга бир миллиард доллардан ортиқ маблағ жалб этган. Бу ҳақда ширкат тарқатган хабарномада маълум қилинган.

“Миллиард доллар – рақамли гигантларга цензура ва сиёсий камситишга барҳам берилиши кераклиги ҳақида муҳим сигналдир. Америка “Truth Social”га ўтишга тайёр – ушбу платформада сиёсий мафкурангиз учун сизни камситишмайди”, деган ширкат соҳиби, АҚШнинг собиқ президенти Дональд Трамп.

Трамп жамоаси янги ижтимоий тармоқни яратиш режалари ҳақида 2021 йил январида ўз тарафдорларини АҚШ Конгресси биносини ишғол этишга даъват қилгани туфайли барча йирик платформалар собиқ президентнинг аккаунтларини блоклаб қўйганидан сўнг эълон қилган. Трампнинг ўзи ҳеч кимни зўравонлик қилишга тарғиб этмаганини иддао қилиб келади.

“Truth Social” ижтимоий тармоғи, Трамп вакилларига кўра, “либерал медиа консорциуми” ва йирик технологик ширкатларга қарши кураш олиб боради. 2021 йил октябрида Трамп ширкати тармоқ 2022 йилнинг биринчи чорагида ишга тушишини маълум қилган.

Ўша ойдаёқ ҳакерлар “Truth Social” ижтимоий тармоғига (платформа фойдаланувчилар учун ҳозирча ёпиқ) кириб олиб, унда Дональд Трампнинг сохта аккаунтини очишган.

Москвада 8 нафар тожикистонлик тадбиркорларга қуролли ҳужум уюштиргани учун қамалди

Иллюстратив сурат

Москва суди Тожикистоннинг саккиз нафар фуқаросини Москва вилоятида тадбиркорларга қуролли ҳужум уюштиргани учун 8,5 йилдан 16 йилгача қамоқ жазосига ҳукм қилди. ТАСС агентлиги хабарига кўра, маҳкумлар жазо муддатини қаттиқ тартибли қамоқхонада ўтайди.

“Суд жиноят иши фигурантларидан олти нафари Москва шаҳри ва вилояти ҳудудида тадбиркорларнинг хусусий уйларига талончилик мақсадида ҳужумлар уюштирган қуролли гуруҳ аъзолари эканини аниқлади. Ҳужумлар чоғида улар ўқотар, газли ва травматик қуроллардан фойдаланиб, жабрланувчиларнинг қиймати 11,5 млн рублдан ортиқ мол-мулкини тортиб олишган”, дейилган ТАСС хабарида.

Жорий йилнинг май ойида Тожикистоннинг беш фуқароси Россия бош ҳарбий разведка идораси – ГРУ биносига ҳужум қилишга урингани учун 9 йилдан 17 йилгача муддатга озодликдан маҳрум қилинган.

Бироқ, “Интерфакс” агентлиги хабарига мувофиқ, судланганлар айбларини тан олишмаган. Улардан бири суд мажлиси чоғида бақириб, жиноят иши сохталаштирилганини ва уларга туҳмат қилишаётганини айтган.

Россияда оғир жиноятлар учун қамоққа олинган кўплаб тожикистонликлар жиноят иши сохталаштирилганидан ва сўроқ чоғида уларни қийноққа солишганидан шикоят қилишади.

Франция ва Қатар Кобулдан 300 нафардан зиёд кишини олиб чиқиб кетди

Кобул аэропорти

Франция ва Қатар Афғонистонда қўшма инсонпарварлик амалиёти ўтказиб, Кобулдан 300 дан зиёд одамни олиб чиқиб кетишди. Учоқ бортида толиблар томонидан ҳаётига хавф кўрилган 258 нафар афғонистонлик, 60 нафар ҳолландиялик ва 11 нафар франциялик бўлган.

Кобулдан парвоз қилган учоқ Дохага қўнган, у ердан одамлар Францияга йўлланиши айтилмоқда.

Франция президенти Эммануэль Макрон Афғонистондан одамларни олиб чиқишга кўрсатган кўмаги учун Қатарга миннатдорлик билдирган.

Макрон Европа Иттифоқи расмийлари Кобулда умумий элчихона очиш имкониятини кўриб чиқаётганларини қўшимча қилган. Афғонистонда ҳокимият толиблар назорати остига ўтганидан кейин ЕИ мамлакатлари бу мамлакатда ўз фаолиятини тўхтатишган эди.

Франция ТИВ маълумотига мувофиқ, жорий йил 10 сентябридан буён Қатар, расмий Париж илтимосига кўра, Афғонистондан одамларни олиб чиқиб кетиш учун 10 та рейс ташкил қилган. Мазкур учоқлар билан 110 нафар франциялик ва 396 нафар афғонистонлик олиб чиқиб кетилган. Франциялик дипломатлар эвакуация ишлари яқин орада давом этиши билдирганлар.

Озарбайжон мина майдонлари харитаси эвазига арман асирларини озод қилди

Арманистон-Озарбайжон чегараси

Озарбайжон Арманистон билан ноябрнинг ўртасида бўлиб ўтган қуролли тўқнашувлар пайтида асирга олган 10 арман ҳарбий хизматчини озод қилди. Бунинг эвазига Арманистон Тоғли Қорабоғнинг Озарбайжонга қайтарилган ҳудудлари ҳамда уларга туташ ерлардаги мина ўрнатилган майдонлар харитасини Бокуга топширди.

Бу ҳақда шанба оқшомида Озарбайжон хавфсизлик хизмати хабар қилди. Хабарда айтилишича, асирларга харита алмашув жараёнига Россия мудофаа вазирлиги воситачилик қилган.

Шу йилнинг 16 ноябрида икки давлат ўртасидаги чегарада ўтган йили ўт очиш тўхтатилган буён энг йирик жанг бўлиб ўтган эди.Озарбайжон томони 7, Арманистон 6 ҳарбий хизматчиси ҳалок бўлгани тўғрисида баёнот берган.Бундан ташқари Арманистон бош вазири Никол Пашинянга кўра, 30 дан зиёд арман аскари асир олинган бўлиши мумкин. Икки асир ноябрда қайтарилгани хабар қилинган.

Ўтган йилги урушда Боку Тоғли Қорабоғнинг бир қисми ҳамда 1994-йилда сепаратистик уруш тугаганидан бери этник арман кучлари назоратида бўлган унга туташ ҳудудлар устидан назорат ўрнатди.

Минтақага кузатувчи сифатида 2000 га яқин рус аскари сафарбар этилди.

Тоғли Қорабоғ халқаро миқёсда Озарбайжоннинг бир қисми сифатида тан олинган.

Туркия мухолифати ўтказган митингда Эрдўғоннинг истеъфоси талаб қилинди

Туркия байроғи

4 декабрда Түркиянинг Мерсин шаҳрида мухолифатдаги Республика халқ партияси (CHP) митинги бўлиб ўтди. Партия лидери Камол Қиличдорўғли нутқ сўзлаган митингда 21 минг киши иштирок этгани хабар қилинди.

Митинг иштирокчилари Туркияда сўнгги бир неча ой давомида турк лираси қадри кескин тушиб кетгани ва иқтисодий бўҳрон учун ҳукуматни айблаб, президент Ражаб Тоййиб Эрдўғон ва ҳукуматнинг истеъфосини талаб қилди.

Шу куни президент Эрдўғон Туркиянинг Сиирт шаҳри аҳолиси билан учрашди. Президент кортежидаги машиналардан бири олдига бомба қўйилгани аниқланганини Ички ишлар вазирлиги билдириб, автомашина йўқ қилингани хабар қилинди.

Туркияда ўтган ойда инфляция 22 фоизни ташкил қилди, лира қадри кескин тушиб кетди. 10 йил муқаддам 1 АҚШ доллари 2 Янги турк лирасига тенг эди, шу кунда қарийб 14 лирага етди.

Давомини ўқинг

XS
SM
MD
LG