Тошкентда 148-йўналишда қатнаган Mercedes Benz русумли автобусда ёнғин чиқди.
Uz24 сайти берган хабарга кўра, 14 июль куни тонгги соат 8 яримда йўловчилар билан тўла автобус салонида аввалига тутун пайдо бўлган. Бунинг носозлик аломати эканини пайқаган ҳайдовчи дарҳол йўловчиларни автобусдан туширган.
Ҳодисада жароҳатланганлар ҳақида маълумотлар йўқ.
Uz24 сайти у ўтган йил март ойидан буён пойтахтдаги Mercedes Benz автобусида ёнғин чиқишига оид 7 ҳолат эканини қайд этмоқда.
Жумладан, шу йилнинг 5 май куни Тошкентдаги 12-йўналишда қатнайдиган Mercedes-Benz автобусида ва 23 июнь куни Тошкентнинг “Чорсу” бекаатида 89-йўналишдаги Mercedes Benz Connecto Low Floor русумидаги автобусларда ёнғин чиққан. Воқеада йўловчиларнинг ҳаммаси соғ-омон эвакуация қилинган, аммо автобуслар яроқсиз ҳолга келган.
Ўзбекистонда йўловчи автобусларида нега ёнғин чиқиш ҳоллари кўпайётгани ва бу борада ўтказилаётган текширувлар қандай натижа бераётгани ҳақида Озодликда расмий маълумотлар йўқ.