Ўзбекистон ва АҚШ ўртасидаги дипломатик алоқаларга 25 йил тўлиши муносабати билан икки давлат раҳбари бир-бирига табрикнома йўллади.
19 февраль кунги сана муносабати билан АҚШ президенти ўз ҳамкасби Мирзиёевга йўллаган табрик Ўзбекистон президенти матбуот хизмати расмий сайтида чоп этилди.
Табрик мантида шундай дейилади:
"Мамлакатларимиз 19 февраль куни АҚШ ва Ўзбекистон ўртасида дипломатик муносабатлар ўрнатилганининг 25 йиллигини нишонлайди. Биз икки томонлама муносабатларда эришилган кўплаб ютуқларимиз билан фахрланишимиз мумкин. Келгуси йилларда ҳам минтақавий хавфсизлик ва барқарорлик соҳасидаги умумий мақсадларимизни амалга оширишда Сиз билан ҳамкорликда ишлаймиз, деган умиддаман. Америка Қўшма Штатлари Ўзбекистон Республикаси ва унинг қўшнилари суверенитети, мустақиллиги ва ҳудудий яхлитлигини, шунингдек, Сизнинг Марказий Осиёни янада тараққий этиши ва ўзаро ҳамжиҳатлигини мустаҳкамлашга йўналтирилган сайъ-ҳаракатларингизни қўллаб-қувватлайди".
Президент Мизиёевнинг АҚШ президентига йўллаган мактубидан эса мана бу иқтибос чоп этилди:
"Ўтган даврда ўзаро дўстлик ва шериклик муносабатларида мустаҳкам пойдевор яратилди. Кўп қиррали ҳамкорлигимиз жадал ва кенг кўламли характер касб этди".
Аммо, матбуот хизмати тарқатган хабар мазмунидан нисбатан узун бўлган табрик матнида Шавкат Мирзиёев Ўзбекистон ташқи сиёсатининг фундаментал ва концептуал асослари ўзгаришсиз қолиши, у АҚШ-Ўзбекистон ўртасида 25 йил давомида шаклланган анаъанавий муносабатларни сақлаб қолишнинг қатъий тарафдори экани алоҳида таъкидлагани айтилди.
Шунингдек, Мирзиёев табригида Ўзбекистон раҳбари "Америка бизнесининг Ўзбекистонда узоқ муддатли фаолият юритиши ҳамда АҚШнинг етакчи корпорация ва компаниялари билан инвестициявий-технологик ҳамкорликни янада кенгайтириш"ни сўрагани хабар қилинди.