20 февраль куни Россиянинг Саратов вилоятида икки енгил автомобилнинг тўқнашиб кетиши оқибатида 6 киши, шу жумладан 5 ўзбекистонлик ҳалок бўлди.
Бу ҳақда Саратов вилоят ИИВ матбуот хизматига таяниб, РИА Новости агентлигининг хабар қилишича, автофалокат маҳаллий вақт билан тонгда,соат 6:00 атрофида рўй берган.
«Дастлабки маълумотларга кўра, 90-минтақа давлат рақамига эга Kia Rio русумли автомобиль қарама-қарши йўлакка чиқиб кетган ва 163-минтақа давлат рақамига эга бўлган Nissan Almera машинаси билан тўқнашиб кетган. Оқибатда икки ҳайдовчи ва Kia автомашинасидаги 4 нафар йўловчи ҳаётдан кўз юмган. Nissan машинасида фақат ҳайдовчининг ўзи бўлган», — дея аниқлик киритган агентлик суҳбатдоши.
Сўнгги маълумотларга кўра, Kia Rio салонида ҳайдовчидан ташқари 2 эркак ва 2 аёл бўлган, машинадагиларнинг ҳаммаси Ўзбекистон фуқаролари бўлганлиги хабар қилинди.
Ҳалокат бўйича тергов ишлари бошлаб юборилган.