Ўзбекистонда истиқболли ҳисобланадиган қазилма бойликлари конларининг 70 фоизи қайта ишлашга жалб қилинмаган. Бу ҳақда геологик тадқиқотлар ва қаттиқ фойдали қазилмаларнинг стратегик муҳим турлари конларини ўзлаштиришга хорижий инвестицияларни жалб қилиш бўйича президент имзолаган қарорда маълум қилинди.
Норматив-ҳуқуқий актлар порталида эълон қилинган қарорда таъкидланишича, қимматбаҳо, рангли ва нодир металлар аниқланган 435 та ер ости участкаларининг 380 таси (87 фоизи), қаттиқ фойдали қазилма конларининг 120 таси (71 фоизи) қайта ишлашга жалб қилинмаган.
2009 йилдан буён таклиф қилинган 38 та истиқболли майдон ва 159 та инвестицион блокдан фақатгина 10 та истиқболли майдонда геологик ўрганиш ишлари олиб борилган ва 2 та конни ишлаб чиқишга хорижий инвестиция жалб қилинган.
Президент қарорида хорижий инвестицияларни жалб этиш ва янги ишлаб чиқариш қувватларини ташкил этиш учун қаттиқ фойдали қазилмаларнинг стратегик муҳим турлари, истиқболли участка ва конлар рўйхатини ишлаб чиқиш кўрсатмаси берилган.