Ўзбекистон мусулмонлари идораси Уламолар кенгаши 2017 йилги закот, фитр садақа ва фидя миқдори бўйича қабул қилган қарорга кўра, 2017 йил (ҳижрий 1438 йил) учун Закот нисоби 1 гр тиллонинг бугунги кундаги бозордаги ўртача нархи 185 000 (бир юз саксон беш минг) сўм эканлигини эътиборга олиб, 85 гр тилло ҳисобидан закот нисоби 15 725 000 (ўн беш миллион етти юз йигирма беш минг) сўм эканлиги ва мазкур сумманинг қирқдан бир ҳиссаси, яъни 393 125 (уч юз тўқсон уч минг бир юз йигирма беш) сўм закот чиқариш тўғрисидаги хулосаси маъқулланди.
Бу йилги Фитр садақаси миқдори вилоят, шаҳар ва туман бозорларидаги 2 кг буғдой нархидан келиб чиққан ҳолда белгиланди. (Масалан 2017 йилда Тошкент шаҳар бозорида 1 кг буғдойнинг нархи ўртача 3 000 сўм бўлса, демак 2 кг буғдой нархи 6 000 сўм бўлади).
Фидя миқдори доимий узр билан рўза тутолмайдиган кишилар учун бир оч одамнинг бир кунлик озиқ-овқати баробарида бўлиб, ўртача 12 000 (ўн икки минг) сўм деб белгиланди.