Америка ташқи сиёсат кенгаши вице-президенти Илан Берман АҚШ Конгресси Сенатида уюштирилган брифингда қилган чиқишида Ўзбекистон раҳбариятининг Марказий Осиёда олиб бораётган ташқи сиёсий курсига юқори баҳо берди.
“Бу Марказий Осиёда жозиба марказига айланиб бораётган республиканинг тараққиётида тарихий бир ондир”, дея иқтибос келтиради америкалик эксперт сўзларидан Ўзбекистон ТИВ матбуот хизмати.
Америка ташқи сиёсат кенгаши қошидаги Марказий Осиё ва Кавказ институти (CACI) раиси Фредерик Старр сўнгги ойларда Ўзбекистонда ислоҳотларни илгари суриш жараёнида сезиларли олға силжиш кузатилаётганини қайд этган.
Ўзбекистон делегацияси қатнашган сешанба кунги брифингда АҚШ Давлат департаменти, Мудофаа вазирлиги ходимлари, Конгресснинг ҳар икки палатаси депутатлари, АҚШнинг жамоатчилик, экспертлик ва корчалонлик доиралари вакиллари иштирок этганлар. Ўзбек делегациясига Олий Мажлис Сенатининг халқаро муносабатлар, ташқи иқтисодий алоқалар, чет эл инвестициялари ва туризм масалалари бўйича қўмитаси раиси Алишер Курманов бошчилик қилмоқда.