Ўн йиллик танаффусдан сўнг Тошкент билан қайта бошланган ҳамкорлик натижаси ўлароқ Европа тикланиш ва тараққиёт банки директорлар кенгаши жорий йилнинг 18 октябрь куни Лондонда Ўзбекистондаги лойиҳалар учун иккита лойиҳа маъқуллаган. Бу ҳақда Ўзбекистон Олий Мажлис Сенати матбуот хизмати маълумот тарқатди.
Қиймати 100 млн АҚШ доллари бўлган биринчи кредит линияси Ўзбекистон Республикаси ташқи иқтисодий фаолият миллий банкига берилади. “Бундан 70 млн АҚШ доллари кичик ва ўрта бизнеснинг якуний қарз олувчиларини молиялаштиришни назарда тутса, 30 млн АҚШ доллари савдо соҳасини молиялаштиришга йўналтирилади. Ушбу кредитдан мақсад кичик ва ўрта бизнес вакилларининг, шу жумладан мамлакатимиз минтақаларидаги тадбиркорларни ўрта муддали молиялаштириш имкониятини яхшилашдан иборат”, дейилади Сенат хабарномасида.
Қиймати 10 млн АҚШ доллари бўлган иккинчи кредит линияси мева шарбати, шарбат концентратлари, сабзавот пасталари ва бошқа шу каби маҳсулотларни ишлаб чиқаришга ихтисослашган “Agromir Juice” МЧЖ қўшма корхонасига тақдим этилади.
“Ушбу кредит ЕТТБ томонидан Ўзбекистон компаниясига Самарқанд вилоятида замонавий омбор мажмуасини қуриш учун маблағ ажратилишини назарда тутади ва компанияда ягона бошқарув тизимини жорий этиш ҳамда ишлаб чиқариш самарадорлигини оширишга хизмат қилади”, дейилади хабарномада.
ЕТТБ томонидан маъқулланган лойиҳаларни имзолаш, хабарларга кўра, шу йил ноябрь ойининг илк декадасида Европа Банкининг биринчи вице-президенти Ф. Беннетнинг Ўзбекистон Республикасига ташрифи чоғида амалга оширилиши режалаштирилмоқда.
Ўзбекистон Олий Мажлис Сенати раисининг биринчи ўринбосари Содиқ Сафоев “бу ЕТТБ томонидан молиялаштириш очилишининг фақат бошланиши, холос”, деган.