Мирзо Улуғбек номидаги Ўзбекистон Миллий университетида президент Шавкат Мирзиёевнинг БМТ Бош Ассамблеяси 72-сессиясида сўзлаган нутқига ёзилган эсселар танлови бўлди.
ЎзА агентлигининг хабар қилишича, бу тадбир ёшларга Ўзбекистонда "рўй бераётган ислоҳотлар аҳамиятини тушунтириш ҳамда университет талабаларининг ижодий ва илмий ишларини рағбатлантириш мақсадида" ташкил қилинган.
Танловда Санъатбек Музаффаров биринчи ўрин, Шерзод Бурхонов ҳамда Зулхумор Орифжоновалар иккинчи ўрин, Сўғдиёна Бозорова, Дилдора Охунжонова ва Дилафрўз Абдужалилова учинчи ўринни эгаллаган.
Иштирокчиларга президентнинг "Буюк келажагимизни мард ва олижаноб халқимиз билан бирга қурамиз" номли китоби ва фахрий ёрлиқ топширилган.
Бунга қадар Ўзбекистон биринчи президенти Ислом Каримовнинг БМТ минбарида туриб сўзлаган нуқтлари - 1993 йилдаги БМТ Бош ассамблеяси 48-сессияси, 1995 йилдаги БМТ ташкил этилгани 50 йиллиги муносабати билан ўтказилган сессиялардаги нутқлари ҳам мамлакатдаги олий ва ўрта махсус касб-ҳунар билим юртларида дарслик сифатида ўқитилган, имтиҳонлар жорий этилган.