Туркия президенти Режаб Тоййип Эрдўғон 28 ноябрь куни ҳукумрон АК партиясининг Анқарада ўтган йиғилишида АҚШ президенти Дональд Трамп билан телефонда суҳбатлашганини тасдиқлади.
-Мен Қўшма Штатлар президенти жаноб Дональд Трамп билан жума, 24 ноябрь куни муҳим масалаларни телефон орқали муҳокама қилдим. Бу Туркия ва Америка муносабатлари совуқлашганидан бери ўтказилган биринчи телефон суҳбати бўлди, -деди Эрдўғон.
Туркия президентига кўра, Трамп билан суҳбат жараёнида Сурия, курд жанггарилари ва Фатхулло Гулан масаласи муҳокама қилинган.
Аввалроқ Туркия бош вазири Бинали Йилдирим Бибиси телеканалига берган интервьюсида Эрдўғон Трамп билан суҳбатлашганини, шундан сўнг Трамп Суриядаги курд жанггариларига қурол етказиш дастурини тўхтатишга қарор қилганини билдирган эди.
Туркия Суриядаги урушда АҚШ курд жанггариларини қўллаб-қувватлаб келаётганига бир неча маротада норозилик билдирган ва АҚШдан курд жанггариларига қурол етказиб бериш дастурини тўхтатишни талаб қилган.
Туркия Курдистон ишчи партияси атрофига бирлашган курд жанггариларини террорчи деб билади.
АҚШнинг Суриядаги курд жангариларига ҳарбий ëрдам кўрсатиб келаëтгани ва Америкадан бошпана топган уламо Фатҳуллоҳ Гуланни Туркияга беришдан бош тортаëтгани ортидан Анқара ва Вашингтон муносабатлари анчадан бери кескинлигича қолмоқда.
Анқара Гуланни 2016 йилги ҳарбий тўнтариш уринишини ташкиллаштирганликда айбламоқда¸ Гулан бу айбловни рад этиб келмоқда.