Қашқадарё ва Сурхондарё вилоятларида кичик саноат зоналари ташкил этилади.
Бу борада президент томонидан 29 март куни имзоланган қарор 3 апрель куни Norma.uz ахборот-ҳуқуқий порталида эълон қилинди.
Қарорда таъкидланишича кичик саноат зоналари давлат мулки бўлган ва давлат улуши мавжуд корхоналарнинг фойдаланилмаётган ишлаб чиқариш майдонлари негизида ташкил этилади.
Қашқадарё вилоятида жами 30 гектарга яқин ҳудудда 7 та, Сурхондарё вилоятида 55 гектардан каттароқ ҳудудда 9 та кичик саноат зоналари очилади.
Давлат кўчмас мулки тадбиркорлик субъектларига 10 йиллик узоқ муддатга ижарага берилади.
Тикланиш ва тараққиёт жамғармаси инвестиция лойиҳаларини биргаликда молиялаштириш учун тижорат банклари орқали Қашқадарё кичик саноат зонасига 25 миллион доллар, Сурхондарё кичик саноат зонасига 50 миллион доллар миқдорида кредит линиясини очади.