Франция ташқи ишлар вазирлиги Кимёвий қуролга қарши кураш халқаро ташкилоти инспекторлари Дума шаҳрига киритилмаётгани ортидан бу шаҳардан кимёвий қурол қўлланилганига оид далиллар йўқ қилинаётган бўлишини таҳмин қилмоқда.
Франция ташқи ишлар вазирлигига кўра, Дума бугунги кунда тўлиғича Россия ва Сурия ҳукумат кучлари назорати остидадир.
14 апрель куни Сурияга борган экспертларнинг Думага киришига Россия ва Сурия расмийлари тўсқинлик қилаётгани бир неча кун аввал билдирилган эди.
Россия 17 апрель куни ташкилот экспертлари “хавфсизликка оид айрим муаммолар ҳал этилганидан сўнг” 18 апрелда Думага киритилишини эълон қилган.
17 апрелда Пентагонда чиқиш қилган АҚШ мудофаа вазири Жим Маттис ҳам Сурияда кимёвий қуролларга қарши курашиш масаласини тилга олди.
Маттис Думада кимёвий қурол қўлланилганига жавоб тариқасида АҚШ, Франция ва Буюк Британия ҳарбийлари 14 апрель куни Сурия ҳукуматига қарашли нуқталарга ҳаводан ҳужум уюштирганини эслар экан:
-Франция, Британия ва АҚШ, НАТОдаги иттифоқчиларимиз кимёвий қуролни тақиқлаш устида ишлаяпмиз ва биз мана шу ишни амалга ошириш учун бирлашдик. Биз умумий ва якдил нуқтаи назарни излаб ўтирмадик, чунки нуқтаи назаримиз бир ҳилдир. Биз ўз фикримизча, адолатли, халқаро ҳуқуққа ҳамда миллий қонунларимизга зид келмайдиган ишни амалга оширдик. Умид қиламизки, бу мужда Ассад режимига етиб борди, -деб айтди.