Украина президенти Петро Порошенко суиқасддан омон қолгани расман айтилаётган журналист Аркадий Бабченкони қўриқлаш тўғрисида кўрсатма берди.
-Мен Украина Хавфсизлик хизмати раҳбарига Бабченкони ва оиласини кеча-кундуз қўриқлашни ташкил этиш тўғрисида буйруқ бердим. Чунки Москва қўл қовуштириб ўтирмайди, бу масалада менда ҳеч қандай иллюзия йўқ. Лекин биз ўз давлатимиз ва фуқароларимизни ҳимоя қилишни ўрганиб олдик, - деди Порошенко 30 май куни.
29 май куни Киевда Москва ҳукуматининг танқидчиси бўлган ва Россиядан қочиб Украинада яшаётган рус журналисти Аркадий Бабченко номаълум шахслар томонидан уйи олдида отиб ўлдирилгани хабар қилинган эди.Аммо 30 май куни унинг тирик экани расман маълум қилинди.
Украина Хавфсизлик хизмати раҳбари Василий Грицак 30 май куни Киевда ўтказилган матбуот анжуманида журналист Аркадий Бабченкога қарши суиқасд Россия махсус хизматларининг буюртмаси бўлгани, суиқасд ижрочиларини қўлга олиш учун эса Бабченконининг ўлдирилиши сахналаштирилганини айтди.