Македонияда мамлакат номи ўзгартирилишига қарши норозилик намойишлари давом этмоқда. Пойтахт Скопьеда юзлаб намойишчилар иккинчи тунни “Македония” деган ҳайқириқлар билан ўтказдилар. Норозилар бош вазир Зоран Заевнинг истеъфосини талаб қилмоқда.
Намойишчилар полицияга нисбатан зўравонлик қилгани оқибатида норозиларга қарши кўздан ёш чиқарувчи газ қўлланилган. Тўқнашувда 7 полициячи ва икки нафар намойишчи жароҳатланди. 25 нафар намойишчи қўлга олингани хабар қилинди.
Намойишлар 17 июнда Греция ва Македония ташқи ишлар вазирлари Македония номини Шимолий Македония деб ўзгартириш тўғрисидаги шартномани имзолаганидан сўнг бошланиб кетди.
12 июнда Греция ва собиқ Югославия таркибидан чиққан республика - Македониянинг номи билан боғлиқ 27 йиллик баҳсга нуқта қўйилгани эълон қилинган. Македония бош вазири Зоран Заев Афина ва Скопье мамлакат номини Шимолий Македония деб номлаш тўғрисида келишиб олганларини айтган эди.
Бироқ президент Гёрге Иванов 14 июнда эришилган шартномани Македония манфаатларига зид деб ҳисоблашини ва бу шартномани имзолашдан бош тортишини айтган эди.