АҚШда профессионал рингда чиқиш қилаётган ўзбекистонлик боксчилар - Фазлиддин Ғойибназаров, Шахрам Ғиёсов ва Муроджон Аҳмадалиев 16 июлда ўтказилган жангларда ғалабага эришдилар.
“Газета уз” нашрининг ёзишича, Фазлиддин Ғойибназаров Янги Орлеандаги бокс кечасида америкалик Кевин Жонсонга қарши рингга кўтарилди. Ғойибназаров ҳакамларнинг қарорига асосан ғолиб деб топилди.
Шахрам Ғиёсов Лос-Анжелесдаги бокс шоусида мексикалик Дэниел Эчеверриа билан куч синашди. У биринчи раунднинг ўзидаёқ рақибининг гавда қисмига кучли зарба бериб, нокаутга учратди.
Муроджон Аҳмадалиев ҳам худди шу рингда аргентиналик Луис Молина билан жанг қилди. Олти раундлик баҳсда ўзбекистонлик боксчи очколар бўйича ғалаба қозонди.