Тошкентнинг Мирзо Улуғбек туманида фуқаро бировнинг 700.000.000 сўм пулини ўзлаштириб юборганликда гумон қилиниб, қўлга олинди. Бу ҳақда хабар қилган Ўзбекистон Республикаси ИИВ Жамоатчилик ва оммавий ахборот воситалари билан алоқалар бошқармасига кўра, гумонланувчи 20 октябрь куни ИИБ ТБга тушган мурожаат асосида ушланган.
Айтилишича, қўлга олинган Х.А. шу йилнинг августида Бошлиқ даҳасида яшовчи Х.И.га “Жанубий” вокзал атрофидан ер майдони олиб беришни ваъда қилиб, ундан 700 000 000 сўм олган ва ваъдасини бажармай пулларни ўз эҳтиёжларига ишлатиб юборган.
Кўрилган чоралар натижасида Х.А. қўлга олинган. Ҳолат юзасидан жиноят иши қўзғатилиб, тергов ҳаракатлари олиб борилмоқда.