НАТО бош котиби Йенс Столтенберг 26 ноябрь куни Брюсселда ўтган матбуот анжуманида Россияни зудликда «ҳибсга олинган украин денгизчилари ва кемаларини озод этиш”га чақирди.
- Бу воқеа Украинада тўрт йилдан бери уруш давом этаётганини яна бир бор эслатди. 2014 йилдан бери НАТО иттифоқчилари Россиянинг Қримдаги ва Украина шарқидаги агрессив ҳаракатларини қоралаб келмоқда. Иттифоқчилар Россия Қримни аннекция қилганини тан олмайди. Россия Қримда, Қора ва Азов денгизларида милитаризацияни давом эттирмоқда, бу эса Украина мустақиллигига ҳамда катта бир минтақадаги хавфсизликка таҳдид солмоқда, - деди Столтенберг.
26 ноябрда Россиянинг Украина кемаларини ўққа тутганини Британия ва АҚШ ҳам қоралаган эди.
Россия украин денгизчилари ва кемаларини Киевга қайтариш юзасидан ғарб талабларини эътиборга олмади. Москва Киевни фитна чиқариш мақсадида ғарб давлатлари билан тил бириктирганликда айблади.
Россия қўшинлари 25 ноябрда Қора денгизда Қрим ярим ороли соҳилларидан нарида сузиб кетаётган Украина кемаларига қарши ўт очгани ортидан Украинада икки ойлик ҳарбий ҳолат эълон қилинди.
Хабарларда айтилишича, Россия 23 нафар украин денгизчисини асир олган ва 3 та кемани Керчда ушлаб турибди. Улар Қора денгиздан Керчь бўғози орқали Азов денгизига ўтмоқчи бўлган.