Ўзбекистон тарихида биринчи марта хоккей бўйича республика чемпионати ўтказилмоқда. Чемпионатнинг очилиш маросимида Миллий олимпия қўмитаси президенти Умид Аҳмаджонов иштирок этди. Бу ҳақда қўмита расмий сайтида маълум қилинди.
Хабарда айтилишича, 8 февралда бошланган чемпионатнинг даврий қисми 17 март куни якунланади. 20 мартдан эса плей-офф босқичи бошланади. Унда жамоалар учта ўрин учун мусобақалашади.
Чемпионатда айни пайтда “Тошкент”, “Бинокор”, “Хумо” ва “Семурғ” жамоалари иштирок этаётгани айтилмоқда.
Биринчи босқич ўйинларида “Тошкент” “Бинокор”ни 5:1, “Семурғ” “Хумо”ни 5:4 ҳисобида ютган.
Иккинчи босқичда "Семурғ" "Бинокор"ни 6:5 ҳисобида, "Хумо" "Тошкент"ни 6:5 ҳисобида мағлуб этган.
Ўзбекистонда биринчи хоккей чемпионатини ўтказиш ташаббуси 2013 йилда ҳам кўтарилган, аммо муваффақиятсиз якунланган эди.
Ўзбекистон Хоккей федерацияси Адлия вазирлигида 2018 йилнинг 28 мартида рўйхатдан ўтказилган.