Нидерландия пойтахти Амстердамда 7 март куни матбуот анжумани ўтказган тожик мухолифатчиси Шарофиддин Гадоев уни Москвадан ўғирлаб кетган Тожикистон ҳукумати президентлик сайловида президент Эмомали Раҳмоннинг катта ўғли номзодини қўллаши учун босим кўрсатганини айтди.
Унга кўра, Миллий хавфсизлик хизмати раиси Саймумин Ятимов уни сўроқ қилиб, “24-гуруҳ” мухолиф ҳаракатининг 17 аъзоси Тожикистонга қайтарилганини ва бу гуруҳга Гадоев раҳбарлик қилиши кераклигини айтган.
Мухолифатчининг айтишича, Миллий хавфсизлик хизмати раҳбари мухолифат гуруҳи 2020 йилда ўтадиган сайловда амалдаги президентнинг ўғли Рустам Эмомалини қўллаб-қувватлаши шартлигини билдирган.
-Россияда икки миллиондан ортиқ тожикистонлик мигрант бор. Бу тожик сайловчиларининг 50 фоизини ташкил қилади. 2020 йилда Тожикистонда парламент ва президент сайлови ўтказилади. Шу сабабдан ҳам Душанбе учун Тожикистон мухолифати мухожирлар билан ишлаб, уларни сайловда овоз беришга ундаши муҳимдир,-деди Гадоев.
Нидерландиядан сиёсий бошпана олган тожикистонлик фаол Шарофиддин Гадоев 5 март куни эълон қилинган видеомурожаатида Москвага борганида полиция томонидан қўлга олингани ва Душанбега топширилгани ҳақида маълум қилган эди.
“24-гуруҳ” ҳаракатининг етакчиларидан бири бўлган Гадоев февраль ойида Нидерландияда йўқолиб қолган ва Тожикистонда пайдо бўлиб қолган эди.
У март ойининг бошларида яна Европага - Нидерландияга қайтиб келди. Бунга қадар Нидерландия ҳукумати ва Human Rights Watch ташкилоти Шарофиддин Гадоевнинг йўқолиб қолганидан ва Душанбеда пайдо бўлганидан ташвиш билдирган.