Тошкент шаҳар Шайхонтохур туманидаги битта маҳаллада 18 март куни бир вақтнинг ўзида олтита уйда ёнғин чиқди.
Республика Давлат ёнғин хавфсизлиги хизматининг маълум қилишича, “Оқлон” маҳалласи, Кўкча дарвоза тор кўчасида 4та уй ва шу хонадонларга туташ қурилган Фузулий кўчасидаги 2 та уйда чиққан ёнғин оқибатида жами 380 квадрат метр том ва уйлардаги жиҳозлар ёниб кетган.
Ўт ўчирувчилар воқеа жойига соат 11.29 да етиб борган ҳамда соат 12.34 да ёнғинни тўлиқ ўчиришга муваффақ бўлган. Ёнғинни ўчириш учун 8 та ёнғин ўчириш экипажи жалб қилинган.
“Кўрилган тезкор ҳаракатлар натижасида ёнғиндан уйларнинг жами 500 кв.метр майдони сақлаб қолинган. Тан жароҳати олганлар ва ҳалок бўлганлар йўқ”, - дейилади хабарда.
Дастлабки тахминларга қараганда, ёнғин Кўкча дарвоза тор кўчасидаги 14-хонадонда газ плитасига доғлаш учун қўйилган ёғнинг назоратсиз қолдирилгани оқибатида келиб чиққан. Ҳозирда моддий зарар миқдори аниқланмоқда.