Болаликдан ногирон бўлган фарзандини парваришлаётган оналарга, етарли иш стажига эга бўлмаган тақдирда ҳам, эндиликда 55 ёшидан бошлаб ижтимоий нафақа тўланади.
Адлия вазирлигининг билдиришича, бу борада 18 март куни Вазирлар Маҳкамаси тегишли қарорларга ўзгартириш ва қўшимчалар киритган.
Нафақа боланинг ногиронлиги тўғрисида Тиббий-маслаҳат комиссиясининг тиббий хулосаси ёки маълумотномаси асосида тайинланади.
“Қонунчиликка мувофиқ, I ва II гуруҳ ногиронларга, ёшга доир ёки боқувчисини йўқотганлик нафақаси тайинланган нафақа олувчиларга, агар улар ҳақ тўланадиган ишни бажариши ёки даромаднинг бошқа манбаига эга бўлиши муносабати билан нафақа тўлаш тўхтатилар эди”, дейилади маълумотда.
Янги киритилган ўзгартиришларга мувофиқ, мазкур тартиб бекор қилинди. Бундан буён нафақа олувчи бошқа даромад келтирадиган иш билан шуғулланиши ёки шуғулланмаслигидан қатъий назар нафақа тўлаш давом эттирилади.