Ўзбекистонда президент фармони билан Давлат ветеринария қўмитаси Ветеринария ва чорвачиликни ривожлантириш давлат қўмитаси этиб қайта ташкил этилди.
Бу ҳақда хабар қилган Адлия вазирлигининг Телеграм тармоғидаги “Ҳуқуқий ахборот” каналига кўра, қўмита ветеринария, чорвачилик ва наслчилик соҳасида ягона давлат сиёсатини амалга оширади.
Самарқанд ветеринария медицинаси институти ва унинг академик лицейи, Чорвачилик ва паррандачилик илмий-тадқиқот институти,
Қоракўлчилик ва чўл экологияси илмий-тадқиқот институти ва
Балиқчилик илмий-тадқиқот институти янги қўмита таркибига ўтказилган.
Қўмита ҳузурида Ветеринария хизмати ва чорвачиликни ривожлантириш жамғармаси ҳамда “Ўзбекчорванасл” агентлиги ташкил этилган.
Қайд этилишича, 2020 йил 1 январидан 100 бошли чорва ва 100 минг парранда бўлган хўжаликларда ветеринария врачи ва зоотехник штати жорий этилади, қорамолчилик йўналишидаги хўжаликлардаги ҳамда аҳоли қарамоғидаги сигирлар селекция режасига асосан наслли буқалар уруғи билан сунъий уруғлантирилади, туман ҳокимлари келгуси йилга озуқа экинларини жойлаштириш режасини “Ўзбекчорванасл” агентлигининг ҳудудий бошқармалари билан келишади.
Ўзбекистон ҳукумати таркибида шу кунда 10 та Давлат қўмитаси фаолият кўрсатмоқда.