Бухорода туғилган уч эгизак Шавкат, Миромон ва Мирзиёнинг отасига Ўзбекистон Президенти номидан Cobalt машинаси совға қилинди. Бу ҳақда daryo.uz хабар қилди.
Шерзод Ўринов ва Маҳлиё Азимованинг оиласида 25 март куни уч эгизак туғилганди. Уларга Президент Шавкат Мирзиёев шарафига Шавкат, Миромон ва Мирзиё исмлари берилди.
29 март, президент Мирзиёев Бухоро вилоятига сафар қилган куни эгизакларнинг ота-онасига Президент номидан Cobalt автомашинаси ва 3 та болалар аравачаси топширилди.
"Машина Навоийдан келтирилди ва «Ўзмахсуссувқурилиш» ДУКда ҳайдовчи бўлиб ишлайдиган Шерзод Ўринов номига расмийлаштириб берилди. Ҳозирда она ва болаларнинг аҳволи яхши. Улар шифокорлар Насиба Рамазонова, Самия Латипова ва Зилола Шариповалар назоратида бўлиб турибди", деб хабар қилди сайт.
Айтилишича, Шерзод Ўринов ва Маҳлиё Азимоваларнинг эгизаклардан ташқари 4 ёшли қизи ҳам бор.