Бухородан Паркентга ўқувчиларни олиб кетаётган автобус ҳалокатга учрагани оқибатида 53 йўловчидан 27 нафари тан жароҳати олди. Бу ҳақда Соғлиқни сақлаш вазирлиги маълум қилди.
29 апрель куни автобус йўловчиларидан фақт 7 нафари тан жароҳати олгани хабар қилинган эди.
Вазирликнинг билдиришича, тан жароҳати олганларга тез ёрдам кўрсатилди. 27 нафар одамдан 19 нафари тез тиббий ёрдам кўрсатилгач, уйларига жўнатилган. Икки нафари Нурафшон касалхонасида ҳар томонлама тиббий кўрикдан ўтказилгач, уйларига кетган.
Жароҳатланганлардан 6 нафари Республика тез тиббий ёрдам илмий марказига жойлаштирилди. Улардан икки нафари- 54 ёшли А. Қобилов ва 2,5 ёшли Р. Маъмурбоева муваффақиятли равишда жарроҳлик амалиётидан ўтказилди. Уларнинг аҳволи қониқарли экани айтилди.
Озодлик радиоси душанба куни Фавқулодда вазиятлар вазирлигига таянган ҳолда, Бухорога зиёратга борган 53 нафар йўловчини олиб қайтаётган автобус 29 апрель куни тунги соат иккилар атрофида 4R20 автомобиль йўлининг Ўртачирчиқ туманидан ўтувчи олтинчи километрида баллони ёрилиб кетиб, аварияга учрагани ҳақида хабар берган эди.
Автобусда Тошкент вилояти Паркент туманидаги 31-ўрта мактабнинг 37 нафар ўқувчиси, 3 нафар ўқитувчиси, 10 нафар ота-она ҳамда 3 нафар ҳайдовчи бўлган.