Самарқанд вилояти Тайлоқ туман Ички ишлар бўлими ҲПБ ИИО профилактика катта инспектори 15 май куни пора олаëтган пайтда қўлга олинган.
Бош прокуратура Матбуот хизматининг Озодликка билдиришича¸ инспектор “420-сонли милиция таянч пунктидаги хизмат хонасида фуқародан туман ҳокимининг бинога бўлган эгалик қилиш ҳақидаги қарорини чиқартириб бериш эвазига олдиндан келишилган 70 минг АҚШ долларидан 60 минг АҚШ доллари миқдоридаги пул маблағларини олган вақтда ашёвий далиллар билан ушланган”.
Самарқанд вилоят прокуратураси мазкур ҳолат юзасидан ИИБ инспекторига нисбатан Жиноят Кодексининг тегишли моддалари билан жиноят иши қўзғаган.
Озодликка воқеадан хабардор тойлоқликлардан келган маълумотга кўра¸ ушланган инспектор бу поранинг туман раҳбарларига берилиши керак бўлгани ҳақида кўрсатма берган. Ҳозирча бу кўрсатма юзасидан бошқа расмийларнинг ушлангани ҳақида расмий хабар йўқ.