3 июнь, эрталаб соат 9:00 ларда Тошкентдаги «Новза» метроси яқинида қурилган йўл ўтказгичда бир вақтнинг ўзида 5 та автомашина аварияга учради.
Бу ҳақда хабар қилган gazeta.uzга кўра, аварияга сабабчи бўлган Nexia ҳайдовчиси тан жароҳати олган, бошқа жабрланувчилар йўқ.
Содир бўлган йирик йўл-транспорт ҳодисаси оқибатида ЙТҲ Бунёдкор шоҳ кўчасида бир соатдан ортиқроқ вақт давомида тиқин пайдо бўлди.
Ҳодиса гувоҳларига кўра, «Халқлар дўстлиги» метросидан Мирзо Улуғбек метроси томонга биринчи ҳаракат йўлагида келаётган Nexia ҳайдовчиси тушишда узлуксиз чизиқ орқали иккинчи йўлакка ўтиб кетади ва Howo юк машинаси билан тўқнашади. Тўқнашувдан сўнг енгил автомобиль учинчи полосага чиқиб кетиб, яна бир Howo юк машинаси билан тўқнашади.
Натижада Nexia ажратувчи тўсиқ устидан қарама-қарши йўналишга чиқиб кетиб, ағдарилади. Қарши томонда учинчи йўлакдан келаётган Spark ҳайдовчиси тўқнашувдан қочишга уриниб, биринчи йўлакда ҳаракатланаётган Matiz билан тўқнашади.