Маҳаллий матбуотнинг ëзишича¸ 15 июнь куни Ўзбекистонга келган Франциядаги B-Tween студияси вакиллари Ўзбекистон маданий меросига оид фильмни суратга олиш учун тайëргарликни бошлаган.
Французлар оладиган ҳужжатли фильмда таниқли киноактëр Жерар Депардьенинг иштирок этиши кутилмоқда.
Фильм¸ айтилишича¸ Uzbekistan Airways» миллий авиакомпанияси ва Ўзбекистон туризмни ривожлантириш давлат қўмитаси ҳомийлигида суратга олинади.
Тошкент¸ Самарқанд¸ Бухородаги меъморий обидалар¸ Нукусдаги Савицкий музейи¸ ҳамда ўзбек таомлари кўрсатиладиган бу ҳужжатли фильмнинг хорижий туристларни Ўзбекистонга жалб этиш йўлидаги навбатдаги реклама ҳаракати бўлиши айтилмоқда.
Депардье иштирокидаги саҳналарнинг жорий йил сентябрь ойида суратга олиниши кутилмоқда.
Жерар Депардье постсовет ҳудуди диктаторлари билан яқин алоқаларга эга шахс саналади.
2012 йили ўшандаги президентнинг тўнғич қизи Гулнора Каримова таклифига мувофиқ Ўзбекистонга борган Депардье Каримова ëзгани айтилган қўшиқни у билан бирга куйлаган эди.
Депардье¸ шунингдек¸ Чеченистоннинг инсон ҳақларини мунтазам топтаб келаëтган президенти Рамзан Қодиров таклифи билан 2013 йили Грознийга бориб¸ ундан квартира совғасини олган.
Айни йили Владимир Путин унга Россия фуқаролигини ҳадя қилган эди.