"Uzbekistan Airways" Миллий авиакомпанияси 16 июлдан бошлаб Тошкент-Тбилиси-Тошкент йўналишида мунтазам йўловчи қатновларини йўлга қўяди. Бу ҳақда маҳаллий нашрлар хабар қилди.
Маълум қилинишича, парвозлар бир ҳафтада икки марта: сешанба ва жума кунлари Airbus-320 самолётларида амалга оширилади.
Тошкент-Тбилиси-Тошкент авиақатнови Россия билан Грузия ўртасидаги авиақатновлар Кремль томонидан тақиқлаб қўйилган бир вақтга тўғри келмоқда.
"Uzbekistan Airways" Тошкент-Тбилиси йўналиши бўйлаб илк рейсни 16 апрель куни амалга оширган эди.
Маълумотларга қараганда, жорий йилнинг биринчи чорагида Ўзбекистондан Грузияга саёҳат қилганлар сони кескин ортган. Йилнинг дастлабки уч ойида ўзбекистонликлар Грузияга 4,5 минг мартадан ортиқроқ борган бўлиб, бу 2018 йилнинг биринчи чорагидаги кўрсаткичдан 279,4% кўпдир.
Грузия меҳмонхоналар ва ресторанлар ассоциацияси раҳбари Шалва Алавердашвили ўтган ойда "Рустави 2" телеканалига бу йилги ëз мавсумида Ўзбекистондан келадиган сайëҳлар оқимининг кескин ошиши кутилаётганини айтган эди:
"Тошкент-Тбилиси рейсининг йўлга қўйилиши муносабати билан Ўзбекистондан келадиган сайëҳлар оқимининг кучайиши кутилмоқда".
Ëзги мавсум бошланиши арафасида Путиннинг Россия учқичларининг Грузияга учишини тақиқлашига муносабат билдирган грузин расмийси¸ мамлакат сайëҳлик индустрияси 100 фоиз россияликларга қарам¸ деган фикрларни рад қилган.
Россия президенти ўтган ойда Грузияда бўлиб ўтган аксилроссия намойишлари ортидан бу мамлакатга авиақатновларни 8 июлдан бошлаб тақиқлаб қўйган.
Аҳолиси 3¸7 миллиондан иборат Грузияга 2018 йили 8 миллион 680 мингга яқин турист борган ва бу 2017 йилга нисбатан қарийб 15 фоизга кўпдир. Ўтган йили Грузияга борган россияликлар сони 1 миллион 404,9 мингни ташкил этган.