Қирғизистоннинг Кўкбўри бўйича терма жамоаси жорий йилда Ўзбекистонда ўтадиган жаҳон чемпионатида иштирок этишдан бош тортди.
Қирғизистон Кўкбўри федерациясининг 27 сентябрда билдиришича, бунга ўйин қоидалари ўзгартириб юборилгани сабаб бўлган.
“Мусобақа шартлари бизга мутлақо ёқмади, негаки бу кўкбўри қоидалари эмас, балки кўпкари қоидаларидир. Биз бундай қоида асосида ўйнамаймиз, биз бу қоидаларга қарши бир неча марта норозилик билдирганмиз”, дейилади федерация баёнотида.
Кўкбўри - Кўпкари бўйича жаҳон чемпионати Тошкентда ноябрь ойида ўтказилиши тўғрисида йил бошида эълон қилинган эди. Шундан сўнг мусобақаларни ўтказиш тартиб-қоидалари бўйича баҳс-мунозаралар бошланиб кетган. Жумладан, Қирғизистон жаҳон чемпионати тойқозон усулида ўтказилишини талаб қилмоқда.
Бироқ 2019 йилнинг февралида Кўпкари халқаро ассоциацияси Астанада бўлиб ўтган қурултойида мусобақаларни тойқозонсиз ўтказиш бўйича қарор қабул қилган.
Бу қурултойда Қозоғистон, Ўзбекистон, Тожикистон, Монголия, Туркия, Венгрия, Хитой, Россия ва Афғонистон вакиллари иштирок этган. Қирғизистон қурултойда қатнашишдан бош тортган.
Тойқозон баланд ва катта қозон бўлиб, чавандозлар бу қозонга ўлжасини солган тақдирдагина, команда бир очкога эга бўлади.
Кўпкари халқаро ассоциацияси қурултойида тойқозонлар ўрнига ерга чизилган айланалардан фойдаланиш бўйича қарор қабул қилинган.