АҚШнинг Epsilon Development Company ширкати Ўзбекистон жанубида ичида 10 миллион тонна нефть ва 7 миллиард куб метр газ борлиги тахмин қилинган кон топди. Бу ҳақда Россиянинг “Прайм” нашри хабар қилади.
Кон Қашқадарё вилоятидаги Қултоқ-Қамаши инвестиция блокида топилган.
Жорий йилнинг март ойида Epsilon Development Company ва Epsilon Asia Limited (Ҳонконг) Бухоро-Хива ва Фарғона нефть-газ ҳудудларида бешта нефть-газ инвестиция блокларини қайта ишлаш учун консорциум тузган эди. АҚШ ширкати маълумотларига кўра, консорциумнинг 2019-2023 йилларда лойиҳага киритажак инвестициялари ҳажми 5,2 млрд долларни ташкил этади. Қазиб олинажак углеводородларнинг ҳаммаси дастлабки босқичда Ўзбекистон ички бозорида сотилиши айтилмоқда.
Epsilon ширкатининг Ўзбекистонда очган конлари ҳақида Озодлик аввал ҳам хабар қилган.