Биз ҳар доим ўз истеъмолчиларимизга газ етказиб беришда «Ўзбекнефтгаз»дан олинган ресурсга кўра иш қилардик. Аммо президентимиз талабига кўра бу йилдан иш услубимизни ўзгартирамиз. Энди ресурсга кўра эмас, талабга қараб газ етказиб бермоқчимиз.
Бу гапни «Ўзтрансгаз» акциядорлик жамияти раиси Улуғбек Сайидов Kun.uz`га берган суҳбатида айтди.
Раиснинг бу гапидан йиллардан буён кузатилаётган газ тақчиллигига батамом барҳам берилади, деган маъно чиқадими-йўқми - номаълум.
Улуғбек Сайидовга кўра, Ўзбекистон азалдан газ экспорт қилувчи давлат ҳисобланган ва ҳеч қачон импорт қилмаган. Ўзбекистон экспортдан ташқари транзит хизматларини ҳам кўрсатувчи давлатдир. Мамлакат асосан Қозоғистон, Тожикистон, Қирғизистон ва Хитой каби давлатларга газ экспорт қилади.
"Яна бир нарсани таъкидлаб ўтиш керак, муҳтарам президентимизнинг шахсан ташаббуслари билан Тожикистонга газ бериш 2017 йил охири – 2018 йил бошидан тикланди. Бунгача бир неча йилдан бери биз қўшниларимиз Тожикистонга газ беришни умуман ёпиб қўйган эдик. Газ узатишни тиклаганимизда у ердаги халқ, истеъмолчилар қанчалик хурсанд бўлганини ҳеч қачон яширишмайди",- деган «Ўзтрансгаз» акциядорлик жамияти раиси Улуғбек Сайидов.
Мана шундай вазиятда Ўзбекистоннинг ўз истеъмолчилари йиллардан буён газ тақчиллигидан шикоят қилиб келади.