Буюк Британия Ўзбекистон билан Шериклик ва ҳамкорлик тўғрисидаги битим имзолади. Ташқи ишлар вазирлиги матбуот хизматининг маълум қилишича, битимга шу йил 31 октябрь куни Ўзбекистон ташқи ишлар вазири Абдулазиз Комилов ҳамда Буюк Британиянинг фавқулодда ва мухтор элчиси Тимоти Торлот қўл қўйган.
Кенг қамровли бу ҳужжат амалдаги ҳуқуқий асосни сақлаш ва томонлар ўртасидаги сиёсий, савдо-иқтисодий, саноат, транспорт, қишлоқ хўжалиги, энергетика, илмий-техникавий, молиявий ва бошқа соҳалардаги муносабатларни ривожлантиришга қаратилгани қайд этилган.
Битим Буюк Британиянинг Европа иттифоқидан чиқишидан сўнг Ўзбекистон – Буюк Британия ҳамкорлигининг шартномавий муносабатлари давомийлигини таъминлашга ва барча соҳаларда ҳар томонлама амалий ҳамкорликни янада ривожлантиришга имкон яратади.
“Шартнома томонларнинг ички давлат жараёнларининг бажарилиши тўғрисидаги сўнгги ёзма маълумот олинган санадан кейинги ойнинг биринчи кунидан бошлаб кучга киради. Ҳужжатда шартномани кучга киргунга қадар вақтинча қўллаш имконияти ҳам кўзда тутилган”, дейилади ТИВ хабарномасида.